7. ஸத்தமஸிக்கா²பத³ம்

911. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னிஸங்க⁴ஸ்ஸ அகாலசீவரம் உப்பன்னம் ஹோதி. அத² கோ² பி⁴க்கு²னிஸங்கோ⁴ தம் சீவரம் பா⁴ஜேதுகாமோ ஸன்னிபதி. தேன கோ² பன ஸமயேன து²ல்லனந்தா³ய பி⁴க்கு²னியா அந்தேவாஸினியோ பி⁴க்கு²னியோ பக்கந்தா ஹோந்தி. து²ல்லனந்தா³ பி⁴க்கு²னீ தா பி⁴க்கு²னியோ ஏதத³வோச – ‘‘அய்யே, பி⁴க்கு²னியோ பக்கந்தா, ந தாவ சீவரம் பா⁴ஜீயிஸ்ஸதீ’’தி. சீவரவிப⁴ங்க³ம் படிபா³ஹி. பி⁴க்கு²னியோ ந தாவ சீவரம் பா⁴ஜீயிஸ்ஸதீதி பக்கமிம்ஸு [விபக்கமிம்ஸு (ஸ்யா.)]. து²ல்லனந்தா³ பி⁴க்கு²னீ அந்தேவாஸினீஸு பி⁴க்கு²னீஸு ஆக³தாஸு தம் சீவரம் பா⁴ஜாபேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ த⁴ம்மிகம் சீவரவிப⁴ங்க³ம் படிபா³ஹிஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ த⁴ம்மிகம் சீவரவிப⁴ங்க³ம் படிபா³ஹதீதி [படிபா³ஹீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ த⁴ம்மிகம் சீவரவிப⁴ங்க³ம் படிபா³ஹிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

912. ‘‘யா பன பி⁴க்கு²னீ த⁴ம்மிகம் சீவரவிப⁴ங்க³ம் படிபா³ஹேய்ய, பாசித்திய’’ந்தி.

913. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

த⁴ம்மிகோநாம சீவரவிப⁴ங்கோ³ ஸமக்³கோ³ பி⁴க்கு²னிஸங்கோ⁴ ஸன்னிபதித்வா பா⁴ஜேதி.

படிபா³ஹேய்யாதி கத²ம் இமம் சீவரம் ந பா⁴ஜேய்யாதி [சீவரம் பா⁴ஜேய்யாதி (க.)] படிபா³ஹதி, ஆபத்தி பாசித்தியஸ்ஸ.

914. த⁴ம்மிகே த⁴ம்மிகஸஞ்ஞா படிபா³ஹதி, ஆபத்தி பாசித்தியஸ்ஸ. த⁴ம்மிகே வேமதிகா படிபா³ஹதி, ஆபத்தி து³க்கடஸ்ஸ. த⁴ம்மிகே அத⁴ம்மிகஸஞ்ஞா படிபா³ஹதி, அனாபத்தி. அத⁴ம்மிகே த⁴ம்மிகஸஞ்ஞா, ஆபத்தி து³க்கடஸ்ஸ. அத⁴ம்மிகே வேமதிகா, ஆபத்தி து³க்கடஸ்ஸ. அத⁴ம்மிகே அத⁴ம்மிகஸஞ்ஞா, அனாபத்தி.

915. அனாபத்தி ஆனிஸம்ஸம் த³ஸ்ஸேத்வா படிபா³ஹதி, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.