8. அட்ட²மஸிக்கா²பத³ம்

916. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ நடானம்பி நடகானம்பி லங்க⁴கானம்பி ஸோகஜ்ஜா²யிகானம்பி [ஸோகஸாயிகானம்பி (ஸீ.)] கும்ப⁴தூ²ணிகானம்பி [கும்ப⁴து²ணிகானம்பி (க.)] ஸமணசீவரம் தே³தி – ‘‘மய்ஹம் பரிஸதி [பரிஸதிம் (ஸீ.)] வண்ணம் பா⁴ஸதா²’’தி. நடாபி நடகாபி லங்க⁴காபி ஸோகஜ்ஜா²யிகாபி கும்ப⁴தூ²ணிகாபி து²ல்லனந்தா³ய பி⁴க்கு²னியா பரிஸதி வண்ணம் பா⁴ஸந்தி – ‘‘அய்யா து²ல்லனந்தா³ ப³ஹுஸ்ஸுதா பா⁴ணிகா விஸாரதா³ பட்டா த⁴ம்மிம் கத²ம் காதும்; தே³த² அய்யாய, கரோத² அய்யாயா’’தி. யா தா பி⁴க்கு²னியோ அப்பிச்சா², தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அகா³ரிகஸ்ஸ ஸமணசீவரம் த³ஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ அகா³ரிகஸ்ஸ ஸமணசீவரம் தே³தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அகா³ரிகஸ்ஸ ஸமணசீவரம் த³ஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

917. ‘‘யா பன பி⁴க்கு²னீ அகா³ரிகஸ்ஸ வா பரிப்³பா³ஜகஸ்ஸ வா பரிப்³பா³ஜிகாய வா ஸமணசீவரம் த³தே³ய்ய, பாசித்திய’’ந்தி.

918. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அகா³ரிகோ நாம யோ கோசி அகா³ரம் அஜ்ஜா²வஸதி.

பரிப்³பா³ஜகோ நாம பி⁴க்கு²ஞ்ச ஸாமணேரஞ்ச ட²பேத்வா யோ கோசி பரிப்³பா³ஜகஸமாபன்னோ.

பரிப்³பா³ஜிகா நாம பி⁴க்கு²னிஞ்ச ஸிக்க²மானஞ்ச ஸாமணேரிஞ்ச ட²பேத்வா யா காசி பரிப்³பா³ஜிகஸமாபன்னா.

ஸமணசீவரம் நாம கப்பகதம் வுச்சதி. தே³தி, ஆபத்தி பாசித்தியஸ்ஸ.

919. அனாபத்தி மாதாபிதூனம் தே³தி, தாவகாலிகம் தே³தி, உம்மத்திகாய, ஆதி³கம்மிகாயாதி.

அட்ட²மஸிக்கா²பத³ம் நிட்டி²தம்.