6. ச²ட்ட²ஸிக்கா²பத³ம்

907. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ய பி⁴க்கு²னியா உபட்டா²ககுலம் து²ல்லனந்த³ம் பி⁴க்கு²னிம் ஏதத³வோச – ‘‘பி⁴க்கு²னிஸங்க⁴ஸ்ஸ, அய்யே, சீவரம் த³ஸ்ஸாமா’’தி. து²ல்லனந்தா³ பி⁴க்கு²னீ – ‘‘தும்ஹே ப³ஹுகிச்சா ப³ஹுகரணீயா’’தி அந்தராயம் அகாஸி. தேன கோ² பன ஸமயேன தஸ்ஸ குலஸ்ஸ க⁴ரம் ட³ய்ஹதி. தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அம்ஹாகம் தே³ய்யத⁴ம்மம் அந்தராயம் கரிஸ்ஸதி! உப⁴யேனாம்ஹ பரிபா³ஹிரா [பரிஹீனா (ஸீ.)], போ⁴கே³ஹி ச புஞ்ஞேன சா’’தி. அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ க³ணஸ்ஸ சீவரலாப⁴ம் அந்தராயம் கரிஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ க³ணஸ்ஸ சீவரலாப⁴ம் அந்தராயம் அகாஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ க³ணஸ்ஸ சீவரலாப⁴ம் அந்தராயம் கரிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

908. ‘‘யா பன பி⁴க்கு²னீ க³ணஸ்ஸ சீவரலாப⁴ம் அந்தராயம் கரேய்ய, பாசித்திய’’ந்தி.

909. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

க³ணோ நாம பி⁴க்கு²னிஸங்கோ⁴ வுச்சதி.

சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²மம்.

அந்தராயம் கரேய்யாதி ‘‘கத²ம் இமே சீவரம் ந [இமம் சீவரம் (க.)] த³தே³ய்யு’’ந்தி அந்தராயம் கரோதி, ஆபத்தி பாசித்தியஸ்ஸ. அஞ்ஞம் பரிக்கா²ரம் அந்தராயம் கரோதி, ஆபத்தி து³க்கடஸ்ஸ. ஸம்ப³ஹுலானம் பி⁴க்கு²னீனம் வா ஏகபி⁴க்கு²னியா வா அனுபஸம்பன்னாய வா சீவரம் வா அஞ்ஞம் வா பரிக்கா²ரம் அந்தராயம் கரோதி, ஆபத்தி து³க்கடஸ்ஸ.

910. அனாபத்தி ஆனிஸம்ஸம் த³ஸ்ஸேத்வா நிவாரேதி, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.