1. பட²மஸிக்கா²பத³ம்

883. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா [மஹாவ. 350] பி⁴க்கு²னியோ அசிரவதியா நதி³யா வேஸியாஹி ஸத்³தி⁴ம் நக்³கா³ ஏகதித்தே² நஹாயந்தி. வேஸியா தா பி⁴க்கு²னியோ உப்பண்டே³ஸும் – ‘‘கிம் நு கோ² நாம தும்ஹாகம், அய்யே, த³ஹரானம் [த³ஹரானம் த³ஹரானம் (ஸீ.)] ப்³ரஹ்மசரியம் சிண்ணேன, நனு நாம காமா பரிபு⁴ஞ்ஜிதப்³பா³! யதா³ ஜிண்ணா ப⁴விஸ்ஸத² ததா³ ப்³ரஹ்மசரியம் சரிஸ்ஸத². ஏவம் தும்ஹாகம் உபோ⁴ அத்தா² பரிக்³க³ஹிதா ப⁴விஸ்ஸந்தீ’’தி. பி⁴க்கு²னியோ வேஸியாஹி உப்பண்டி³யமானா மங்கூ அஹேஸும். அத² கோ² தா பி⁴க்கு²னியோ உபஸ்ஸயம் க³ந்த்வா பி⁴க்கு²னீனம் ஏதமத்த²ம் ஆரோசேஸும். பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கு²னீனம் ஸிக்கா²பத³ம் பஞ்ஞபேஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய…பே… வினயானுக்³க³ஹாய. ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

884. ‘‘யா பன பி⁴க்கு²னீ நக்³கா³ நஹாயேய்ய, பாசித்திய’’ந்தி.

885. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

நக்³கா³ நஹாயேய்யாதி அனிவத்தா² வா அபாருதா வா நஹாயதி, பயோகே³ து³க்கடம். நஹானபரியோஸானே ஆபத்தி பாசித்தியஸ்ஸ.

886. அனாபத்தி அச்சி²ன்னசீவரிகாய வா நட்ட²சீவரிகாய வா, ஆபதா³ஸு, உம்மத்திகாய, ஆதி³கம்மிகாயாதி.

பட²மஸிக்கா²பத³ம் நிட்டி²தம்.