2. து³தியஸிக்கா²பத³ம்

887. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴க³வதா பி⁴க்கு²னீனம் [மஹாவ. 351] உத³கஸாடிகா அனுஞ்ஞாதா ஹோதி. ச²ப்³ப³க்³கி³யா பி⁴க்கு²னியோ – ‘‘ப⁴க³வதா உத³கஸாடிகா அனுஞ்ஞாதா’’தி அப்பமாணிகாயோ உத³கஸாடிகாயோ தா⁴ரேஸும் [தா⁴ரேந்தி (பாசி. 531-545)]. புரதோபி பச்ச²தோபி ஆகட்³ட⁴ந்தா ஆஹிண்ட³ந்தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ அப்பமாணிகாயோ உத³கஸாடிகாயோ தா⁴ரேஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ அப்பமாணிகாயோ உத³கஸாடிகாயோ தா⁴ரேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ அப்பமாணிகாயோ உத³கஸாடிகாயோ தா⁴ரேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

888. ‘‘உத³கஸாடிகம் பன பி⁴க்கு²னியா காரயமானாய பமாணிகா காரேதப்³பா³. தத்ரித³ம் பமாணம் – தீ³க⁴ஸோ சதஸ்ஸோ வித³த்தி²யோ, ஸுக³தவித³த்தி²யா; திரியம் த்³வே வித³த்தி²யோ. தம் அதிக்காமேந்தியா சே²த³னகம் பாசித்திய’’ந்தி.

889. உத³கஸாடிகா நாம யாய நிவத்தா² [நிவத்தா²ய (ஸ்யா.)] நஹாயதி.

காரயமானாயாதி கரோந்தியா வா காராபேந்தியா வா.

பமாணிகா காரேதப்³பா³. தத்ரித³ம் பமாணம் – தீ³க⁴ஸோ சதஸ்ஸோ வித³த்தி²யோ, ஸுக³தவித³த்தி²யா; திரியம் த்³வே வித³த்தி²யோ. தம் அதிக்காமேத்வா கரோதி வா காராபேதி வா, பயோகே³ து³க்கடம். படிலாபே⁴ன சி²ந்தி³த்வா பாசித்தியம் தே³ஸேதப்³ப³ம்.

890. அத்தனா விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. அத்தனா விப்பகதம் பரேஹி பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் பரேஹி பரியோஸாபேதி, ஆபத்தி பாசித்தியஸ்ஸ.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

891. அனாபத்தி பமாணிகம் கரோதி, ஊனகம் கரோதி, அஞ்ஞேன கதம் பமாணாதிக்கந்தம் படிலபி⁴த்வா சி²ந்தி³த்வா பரிபு⁴ஞ்ஜதி, விதானம் வா பூ⁴மத்த²ரணம் வா ஸாணிபாகாரம் வா பி⁴ஸிம் வா பி³ப்³போ³ஹனம் வா கரோதி, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.