8. அட்ட²மஸிக்கா²பத³ம்

869. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ய காபிலானியா அந்தேவாஸினீ பி⁴க்கு²னீ ப⁴த்³த³ம் காபிலானிம் ஸக்கச்சம் உபட்டே²தி. ப⁴த்³தா³ காபிலானீ பி⁴க்கு²னியோ ஏதத³வோச – ‘‘அயம் மம், அய்யே, பி⁴க்கு²னீ ஸக்கசம் உபட்டே²தி, இமிஸ்ஸாஹம் சீவரம் த³ஸ்ஸாமீ’’தி. அத² கோ² ஸா பி⁴க்கு²னீ து³க்³க³ஹிதேன தூ³பதா⁴ரிதேன பரம் உஜ்ஜா²பேஸி – ‘‘அஹம் கிராய்யே, அய்யம் ந ஸக்கச்சம் உபட்டே²மி, ந கிர மே அய்யா சீவரம் த³ஸ்ஸதீ’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னீ து³க்³க³ஹிதேன தூ³பதா⁴ரிதேன பரம் உஜ்ஜா²பேஸ்ஸதீ’’தி…பே… ஸச்சம் கிர, பி⁴க்க²வே, பி⁴க்கு²னீ து³க்³க³ஹிதேன தூ³பதா⁴ரிதேன பரம் உஜ்ஜா²பேதீதி [உஜ்ஜா²பேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னீ து³க்³க³ஹிதேன தூ³பதா⁴ரிதேன பரம் உஜ்ஜா²பேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

870. ‘‘யா பன பி⁴க்கு²னீ து³க்³க³ஹிதேன தூ³பதா⁴ரிதேன பரம் உஜ்ஜா²பேய்ய, பாசித்திய’’ந்தி.

871. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

து³க்³க³ஹிதேனாதி அஞ்ஞதா² க³ஹிதேன [உக்³க³ஹிதேன (க.)].

தூ³பதா⁴ரிதேனாதி அஞ்ஞதா² உபதா⁴ரிதேன.

பரந்தி உபஸம்பன்னம் உஜ்ஜா²பேதி, ஆபத்தி பாசித்தியஸ்ஸ.

872. உபஸம்பன்னாய உபஸம்பன்னஸஞ்ஞா உஜ்ஜா²பேதி, ஆபத்தி பாசித்தியஸ்ஸ. உபஸம்பன்னாய வேமதிகா உஜ்ஜா²பேதி, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா உஜ்ஜா²பேதி, ஆபத்தி பாசித்தியஸ்ஸ.

அனுபஸம்பன்னம் உஜ்ஜா²பேதி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.

873. அனாபத்தி உம்மத்திகாய, ஆதி³கம்மிகாயாதி.

அட்ட²மஸிக்கா²பத³ம் நிட்டி²தம்.