9. நவமஸிக்கா²பத³ம்

874. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ அத்தனோ ப⁴ண்ட³கம் அபஸ்ஸந்தியோ சண்ட³காளிம் பி⁴க்கு²னிம் ஏதத³வோசும் – ‘‘அபாய்யே, அம்ஹாகம், ப⁴ண்ட³கம் பஸ்ஸேய்யாஸீ’’தி? சண்ட³காளீ பி⁴க்கு²னீ உஜ்ஜா²யதி கி²ய்யதி விபாசேதி – ‘‘அஹமேவ நூன சோரீ, அஹமேவ நூன அலஜ்ஜினீ, யா அய்யாயோ அத்தனோ ப⁴ண்ட³கம் அபஸ்ஸந்தியோ தா மம் ஏவமாஹம்ஸு – ‘அபாய்யே, அம்ஹாகம் ப⁴ண்ட³கம் பஸ்ஸேய்யாஸீ’தி? ஸசாஹம், அய்யே, தும்ஹாகம் ப⁴ண்ட³கம் க³ண்ஹாமி, அஸ்ஸமணீ ஹோமி, ப்³ரஹ்மசரியா சவாமி, நிரயம் உபபஜ்ஜாமி; யா பன மம் அபூ⁴தேன ஏவமாஹ ஸாபி அஸ்ஸமணீ ஹோது, ப்³ரஹ்மசரியா சவது, நிரயம் உபபஜ்ஜதூ’’தி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா சண்ட³காளீ அத்தானம்பி பரம்பி நிரயேனபி ப்³ரஹ்மசரியேனபி அபி⁴ஸபிஸ்ஸதீ’’தி…பே… ஸச்சம் கிர, பி⁴க்க²வே, சண்ட³காளீ பி⁴க்கு²னீ அத்தானம்பி பரம்பி நிரயேனபி ப்³ரஹ்மசரியேனபி அபி⁴ஸபதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ அத்தானம்பி பரம்பி நிரயேனபி ப்³ரஹ்மசரியேனபி அபி⁴ஸபிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

875. ‘‘யா பன பி⁴க்கு²னீ அத்தானம் வா பரம் வா நிரயேன வா ப்³ரஹ்மசரியேன வா அபி⁴ஸபேய்ய, பாசித்திய்ய’’ந்தி.

876. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அத்தானந்தி பச்சத்தம். பரந்தி உபஸம்பன்னம். நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ.

877. உபஸம்பன்னாய உபஸம்பன்னஸஞ்ஞா நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ. உபஸம்பன்னாய வேமதிகா நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா நிரயேன வா ப்³ரஹ்மசரியேன வா அபி⁴ஸபதி, ஆபத்தி பாசித்தியஸ்ஸ.

திரச்சா²னயோனியா வா பேத்திவிஸயேன வா மனுஸ்ஸதோ³ப⁴க்³கே³ன வா அபி⁴ஸபதி, ஆபத்தி து³க்கடஸ்ஸ. அனுபஸம்பன்னம் அபி⁴ஸபதி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.

878. அனாபத்தி அத்த²புரேக்கா²ராய, த⁴ம்மபுரேக்கா²ராய, அனுஸாஸனிபுரேக்கா²ராய, உம்மத்திகாய, ஆதி³கம்மிகாயாதி.

நவமஸிக்கா²பத³ம் நிட்டி²தம்.