7. ஸத்தமஸிக்கா²பத³ம்

864. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கு²னியோ கோஸலேஸு ஜனபதே³ ஸாவத்தி²ம் க³ச்ச²ந்தியோ ஸாயம் அஞ்ஞதரம் கா³மம் உபக³ந்த்வா அஞ்ஞதரம் ப்³ராஹ்மணகுலம் உபஸங்கமித்வா ஓகாஸம் யாசிம்ஸு. அத² கோ² ஸா ப்³ராஹ்மணீ தா பி⁴க்கு²னியோ ஏதத³வோச – ‘‘ஆக³மேத², அய்யே, யாவ ப்³ராஹ்மணோ ஆக³ச்ச²தீ’’தி. பி⁴க்கு²னியோ – ‘‘யாவ ப்³ராஹ்மணோ ஆக³ச்ச²தீ’’தி ஸேய்யம் ஸந்த²ரித்வா ஏகச்சா நிஸீதி³ம்ஸு ஏகச்சா நிபஜ்ஜிம்ஸு. அத² கோ² ஸோ ப்³ராஹ்மணோ ரத்திம் ஆக³ந்த்வா தம் ப்³ராஹ்மணிம் ஏதத³வோச – ‘‘கா இமா’’தி? ‘‘பி⁴க்கு²னியோ, அய்யா’’தி. ‘‘நிக்கட்³ட⁴த² இமா முண்டா³ ப³ந்த⁴கினியோ’’தி, க⁴ரதோ நிக்கட்³டா⁴பேஸி. அத² கோ² தா பி⁴க்கு²னியோ ஸாவத்தி²ம் க³ந்த்வா பி⁴க்கு²னீனம் ஏதமத்த²ம் ஆரோசேஸும். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ விகாலே குலானி உபஸங்கமித்வா ஸாமிகே அனாபுச்சா² ஸேய்யம் ஸந்த²ரித்வா அபி⁴னிஸீதி³ஸ்ஸந்திபி அபி⁴னிபஜ்ஜிஸ்ஸந்திபீ’’தி…பே… ஸச்சம் கிர, பி⁴க்க²வே, பி⁴க்கு²னியோ விகாலே குலானி உபஸங்கமித்வா ஸாமிகே அனாபுச்சா² ஸேய்யம் ஸந்த²ரித்வா அபி⁴னிஸீத³ந்திபி அபி⁴னிபஜ்ஜந்திபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ விகாலே குலானி உபஸங்கமித்வா ஸாமிகே அனாபுச்சா² ஸேய்யம் ஸந்த²ரித்வா அபி⁴னிஸீதி³ஸ்ஸந்திபி அபி⁴னிபஜ்ஜிஸ்ஸந்திபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

865. ‘‘யா பன பி⁴க்கு²னீ விகாலே குலானி உபஸங்கமித்வா ஸாமிகே அனாபுச்சா² ஸேய்யம் ஸந்த²ரித்வா வா ஸந்த²ராபேத்வா வா அபி⁴னிஸீதே³ய்ய வா அபி⁴னிபஜ்ஜேய்ய வா, பாசித்திய’’ந்தி.

866. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

விகாலோ நாம அத்த²ங்க³தே ஸூரியே யாவ அருணுக்³க³மனா.

குலம் நாம சத்தாரி குலானி – க²த்தியகுலம், ப்³ராஹ்மணகுலம், வேஸ்ஸகுலம் ஸுத்³த³குலம். உபஸங்கமித்வாதி தத்த² க³ந்த்வா.

ஸாமிகே அனாபுச்சா²தி யோ தஸ்மிம் குலே மனுஸ்ஸோ ஸாமிகோ தா³தும், தம் அனாபுச்சா².

ஸேய்யம் நாம அந்தமஸோ பண்ணஸந்தா²ரோபி. ஸந்த²ரித்வாதி ஸயம் ஸந்த²ரித்வா. ஸந்த²ராபேத்வாதி அஞ்ஞம் ஸந்த²ராபேத்வா. அபி⁴னிஸீதே³ய்யாதி தஸ்மிம் அபி⁴னிஸீத³தி, ஆபத்தி பாசித்தியஸ்ஸ. அபி⁴னிபஜ்ஜேய்யாதி தஸ்மிம் அபி⁴னிபஜ்ஜதி, ஆபத்தி பாசித்தியஸ்ஸ.

867. அனாபுச்சி²தே அனாபுச்சி²தஸஞ்ஞா ஸேய்யம் ஸந்த²ரித்வா வா ஸந்த²ராபேத்வா வா அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ. அனாபுச்சி²தே வேமதிகா ஸேய்யம் ஸந்த²ரித்வா வா ஸந்த²ராபேத்வா வா அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ. அனாபுச்சி²தே ஆபுச்சி²தஸஞ்ஞா ஸேய்யம் ஸந்த²ரித்வா வா ஸந்த²ராபேத்வா வா அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ.

ஆபுச்சி²தே அனாபுச்சி²தஸஞ்ஞா, ஆபத்தி து³க்கடஸ்ஸ. ஆபுச்சி²தே வேமதிகா, ஆபத்தி து³க்கடஸ்ஸ. ஆபுச்சி²தே ஆபுச்சி²தஸஞ்ஞா, அனாபத்தி.

868. அனாபத்தி ஆபுச்சா² ஸேய்யம் ஸந்த²ரித்வா வா ஸந்த²ராபேத்வா வா அபி⁴னிஸீத³தி வா அபி⁴னிபஜ்ஜதி வா, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.