6. ச²ட்ட²ஸிக்கா²பத³ம்

859. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ பச்சா²ப⁴த்தம் குலானி உபஸங்கமித்வா ஸாமிகே அனாபுச்சா² ஆஸனே அபி⁴னிஸீத³திபி அபி⁴னிபஜ்ஜதிபி. மனுஸ்ஸா து²ல்லனந்த³ம் பி⁴க்கு²னிம் ஹிரீயமானா ஆஸனே நேவ அபி⁴னிஸீத³ந்தி ந அபி⁴னிபஜ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ பச்சா²ப⁴த்தம் குலானி உபஸங்கமித்வா ஸாமிகே அனாபுச்சா² ஆஸனே அபி⁴னிஸீதி³ஸ்ஸதிபி அபி⁴னிபஜ்ஜிஸ்ஸதிபீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ பச்சா²ப⁴த்தம் குலானி உபஸங்கமித்வா ஸாமிகே அனாபுச்சா² ஆஸனே அபி⁴னிஸீதி³ஸ்ஸதிபி அபி⁴னிபஜ்ஜிஸ்ஸதிபீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ பச்சா²ப⁴த்தம் குலானி உபஸங்கமித்வா ஸாமிகே அனாபுச்சா² ஆஸனே அபி⁴னிஸீத³திபி அபி⁴னிபஜ்ஜதிபீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ பச்சா²ப⁴த்தம் குலானி உபஸங்கமித்வா ஸாமிகே அனாபுச்சா² ஆஸனே அபி⁴னிஸீதி³ஸ்ஸதிபி அபி⁴னிபஜ்ஜிஸ்ஸதிபி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

860. ‘‘யா பன பி⁴க்கு²னீ பச்சா²ப⁴த்தம் குலானி உபஸங்கமித்வா ஸாமிகே அனாபுச்சா² ஆஸனே அபி⁴னிஸீதே³ய்ய வா அபி⁴னிபஜ்ஜேய்ய வா, பாசித்திய’’ந்தி.

861. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பச்சா²ப⁴த்தம் நாம மஜ்ஜ²ன்ஹிகே வீதிவத்தே யாவ அத்த²ங்க³தே ஸூரியே.

குலம் நாம சத்தாரி குலானி – க²த்தியகுலம், ப்³ராஹ்மணகுலம், வேஸ்ஸகுலம், ஸுத்³த³குலம். உபஸங்கமித்வாதி தத்த² க³ந்த்வா.

ஸாமிகே அனாபுச்சா²தி யோ தஸ்மிம் குலே மனுஸ்ஸோ ஸாமிகோ தா³தும், தம் அனாபுச்சா².

ஆஸனம் நாம பல்லங்கஸ்ஸ ஓகாஸோ வுச்சதி.

அபி⁴னிஸீதே³ய்யாதி தஸ்மிம் அபி⁴னிஸீத³தி, ஆபத்தி பாசித்தியஸ்ஸ.

அபி⁴னிபஜ்ஜேய்யாதி தஸ்மிம் அபி⁴னிபஜ்ஜதி, ஆபத்தி பாசித்தியஸ்ஸ.

862. அனாபுச்சி²தே அனாபுச்சி²தஸஞ்ஞா ஆஸனே அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ. அனாபுச்சி²தே வேமதிகா ஆஸனே அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ. அனாபுச்சி²தே ஆபுச்சி²தஸஞ்ஞா ஆஸனே அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ.

பல்லங்கஸ்ஸ அனோகாஸே ஆபத்தி து³க்கடஸ்ஸ. ஆபுச்சி²தே அனாபுச்சி²தஸஞ்ஞா, ஆபத்தி து³க்கடஸ்ஸ. ஆபுச்சி²தே வேமதிகா, ஆபத்தி து³க்கடஸ்ஸ. ஆபுச்சி²தே ஆபுச்சி²தஸஞ்ஞா, அனாபத்தி.

863. அனாபத்தி ஆபுச்சா² ஆஸனே அபி⁴னிஸீத³தி வா அபி⁴னிபஜ்ஜதி வா, து⁴வபஞ்ஞத்தே, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.