12. த்³வாத³ஸமஸிக்கா²பத³ம்

788. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிம் கத²ம் காதும். அத² கோ² ராஜா பஸேனதி³ கோஸலோ உண்ஹகாலே மஹக்³க⁴ம் கோ²மம் பாருபித்வா யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ம் பி⁴க்கு²னிம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ராஜானம் பஸேனதி³ம் கோஸலம் து²ல்லனந்தா³ பி⁴க்கு²னீ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ து²ல்லனந்த³ம் பி⁴க்கு²னிம் ஏதத³வோச – ‘‘வதே³ய்யாஸி, அய்யே, யேன அத்தோ²’’தி. ‘‘ஸசே மே த்வம், மஹாராஜ, தா³துகாமோஸி, இமம் கோ²மம் தே³ஹீ’’தி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா கோ²மம் த³த்வா உட்டா²யாஸனா து²ல்லனந்த³ம் பி⁴க்கு²னிம் அபி⁴வாதே³த்வா பத³க்கி²ணம் கத்வா பக்காமி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘மஹிச்சா² இமா பி⁴க்கு²னியோ அஸந்துட்டா². கத²ஞ்ஹி நாம ராஜானம் கோ²மம் விஞ்ஞாபேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ராஜானம் கோ²மம் விஞ்ஞாபேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ராஜானம் கோ²மம் விஞ்ஞாபேதீதி [விஞ்ஞாபேஸீதி (க.)]? ‘‘ஸச்சம், ப⁴க³வாதி’’. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ராஜானம் கோ²மம் விஞ்ஞாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

789. ‘‘லஹுபாவுரணம் பன பி⁴க்கு²னியா சேதாபேந்தியா அட்³ட⁴தேய்யகம்ஸபரமம் சேதாபேதப்³ப³ம். ததோ சே உத்தரி சேதாபேய்ய, நிஸ்ஸக்³கி³யம் பாசித்திய’’ந்தி.

790. லஹுபாவுரணம் நாம யம் கிஞ்சி உண்ஹகாலே பாவுரணம்.

சேதாபேந்தியாதி விஞ்ஞாபேந்தியா.

அட்³ட⁴தேய்யகம்ஸபரமம் சேதாபேதப்³ப³ந்தி த³ஸகஹாபணக்³க⁴னகம் சேதாபேதப்³ப³ம்.

ததோ சே உத்தரி சேதாபேய்யாதி ததுத்தரி விஞ்ஞாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, அய்யே, லஹுபாவுரணம் அதிரேகஅட்³ட⁴தேய்யகம்ஸபரமம் சேதாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

791. அதிரேகஅட்³ட⁴தேய்யகம்ஸே அதிரேகஸஞ்ஞா சேதாபேதி, நிஸ்ஸக்³கி³யம் பாசித்தியம். அதிரேகஅட்³ட⁴தேய்யகம்ஸே வேமதிகா சேதாபேதி, நிஸ்ஸக்³கி³யம் பாசித்தியம். அதிரேகஅட்³ட⁴தேய்யகம்ஸே ஊனகஸஞ்ஞா சேதாபேதி, நிஸ்ஸக்³கி³யம் பாசித்தியம்.

ஊனகஅட்³ட⁴தேய்யகம்ஸே அதிரேகஸஞ்ஞா, ஆபத்தி து³க்கடஸ்ஸ. ஊனகஅட்³ட⁴தேய்யகம்ஸே வேமதிகா, ஆபத்தி து³க்கடஸ்ஸ. ஊனகஅட்³ட⁴தேய்யகம்ஸே ஊனகஸஞ்ஞா, அனாபத்தி.

792. அனாபத்தி அட்³ட⁴தேய்யகம்ஸபரமம் சேதாபேதி, ஊனகஅட்³ட⁴தேய்யகம்ஸபரமம் சேதாபேதி, ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, மஹக்³க⁴ம் சேதாபேதுகாமஸ்ஸ அப்பக்³க⁴ம் சேதாபேதி, உம்மத்திகாய, ஆதி³கம்மிகாயாதி.

த்³வாத³ஸமஸிக்கா²பத³ம் நிட்டி²தம்.

உத்³தி³ட்டா² கோ², அய்யாயோ, திம்ஸ நிஸ்ஸக்³கி³யா பாசித்தியா த⁴ம்மா. தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

பி⁴க்கு²னிவிப⁴ங்கே³ நிஸ்ஸக்³கி³யகண்ட³ம் நிட்டி²தம்.