3. நிஸ்ஸக்³கி³யகண்ட³ம் (பி⁴க்கு²னீவிப⁴ங்கோ³)

1. பத்தவக்³கோ³

1. பட²மஸிக்கா²பத³ம்

இமே கோ² பனாய்யாயோ திம்ஸ நிஸ்ஸக்³கி³யா பாசித்தியா

த⁴ம்மா உத்³தே³ஸம் ஆக³ச்ச²ந்தி.

733. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ப³ஹூ பத்தே ஸன்னிசயம் கரோந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ ப³ஹூ பத்தே ஸன்னிசயம் கரிஸ்ஸந்தி, பத்தவாணிஜ்ஜம் வா பி⁴க்கு²னியோ கரிஸ்ஸந்தி, ஆமத்திகாபணம் வா பஸாரேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ பத்தஸன்னிசயம் கரிஸ்ஸந்தீ’’தி…பே… ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கு²னியோ பத்தஸன்னிசயம் கரோந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ பத்தஸன்னிசயம் கரிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

734. ‘‘யா பன பி⁴க்கு²னீ பத்தஸன்னிசயம் கரேய்ய, நிஸ்ஸக்³கி³யம் பாசித்திய’’ந்தி.

735. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பத்தோ நாம த்³வே பத்தா – அயோபத்தோ, மத்திகாபத்தோ. தயோ பத்தஸ்ஸ வண்ணா – உக்கட்டோ² பத்தோ, மஜ்ஜி²மோ பத்தோ, ஓமகோ பத்தோ. உக்கட்டோ²னாமபத்தோ அட்³டா⁴ள்ஹகோத³னம் க³ண்ஹாதி சதுபா⁴க³ம் கா²த³னம் தது³பியம் ப்³யஞ்ஜனம். மஜ்ஜி²மோ நாமபத்தோ நாளிகோத³னம் க³ண்ஹாதி சதுபா⁴க³ம் கா²த³னம் தது³பியம் ப்³யஞ்ஜனம். ஓமகோ நாமபத்தோ பத்தோ²த³னம் க³ண்ஹாதி சதுபா⁴க³ம் கா²த³னம் தது³பியம் ப்³யஞ்ஜனம். ததோ உக்கட்டோ² அபத்தோ ஓமகோ அபத்தோ.

ஸன்னிசயம் கரேய்யாதி அனதி⁴ட்டி²தோ அவிகப்பிதோ.

நிஸ்ஸக்³கி³யோ ஹோதீதி ஸஹ அருணுக்³க³மனா நிஸ்ஸக்³கி³யோ ஹோதி. நிஸ்ஸஜ்ஜிதப்³போ³ ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³போ³. தாய பி⁴க்கு²னியா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கு²னீனம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அயம் மே, அய்யே, பத்தோ ரத்தாதிக்கந்தோ நிஸ்ஸக்³கி³யோ, இமாஹம் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தாய பி⁴க்கு²னியா படிப³லாய ஆபத்தி படிக்³க³ஹேதப்³பா³. நிஸ்ஸட்ட²பத்தோ தா³தப்³போ³ –

‘‘ஸுணாது மே, அய்யே, ஸங்கோ⁴. அயம் பத்தோ இத்த²ன்னாமாய பி⁴க்கு²னியா நிஸ்ஸக்³கி³யோ ஸங்க⁴ஸ்ஸ நிஸ்ஸட்டோ². யதி³ ஸங்க⁴ஸ்ஸ பத்தகல்லம், ஸங்கோ⁴ இமம் பத்தம் இத்த²ன்னாமாய பி⁴க்கு²னியா த³தே³ய்யா’’தி.

தாய பி⁴க்கு²னியா ஸம்ப³ஹுலா பி⁴க்கு²னியோ உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கு²னீனம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸு வசனீயா – ‘‘அயம் மே, அய்யாயோ, பத்தோ ரத்தாதிக்கந்தோ நிஸ்ஸக்³கி³யோ, இமாஹம் அய்யானம் நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தாய பி⁴க்கு²னியா படிப³லாய ஆபத்தி படிக்³க³ஹேதப்³பா³. நிஸ்ஸட்ட²பத்தோ தா³தப்³போ³ –

‘‘ஸுணந்து மே அய்யாயோ. அயம் பத்தோ இத்த²ன்னாமாய பி⁴க்கு²னியா நிஸ்ஸக்³கி³யோ அய்யானம் நிஸ்ஸட்டோ². யதி³ அய்யானம் பத்தகல்லம், அய்யாயோ இமம் பத்தம் இத்த²ன்னாமாய பி⁴க்கு²னியா த³தே³ய்யு’’ந்தி.

தாய பி⁴க்கு²னியா ஏகம் பி⁴க்கு²னிம் உபஸங்கமித்வா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயா – ‘‘அயம் மே, அய்யே, பத்தோ ரத்தாதிக்கந்தோ நிஸ்ஸக்³கி³யோ. இமாஹம் அய்யாய நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. தாய பி⁴க்கு²னியா ஆபத்தி படிக்³க³ஹேதப்³பா³. நிஸ்ஸட்ட²பத்தோ தா³தப்³போ³ – ‘‘இமம் பத்தம் அய்யாய த³ம்மீ’’தி.

736. ரத்தாதிக்கந்தே அதிக்கந்தஸஞ்ஞா, நிஸ்ஸக்³கி³யம் பாசித்தியம். ரத்தாதிக்கந்தே வேமதிகா, நிஸ்ஸக்³கி³யம் பாசித்தியம். ரத்தாதிக்கந்தே அனதிக்கந்தஸஞ்ஞா, நிஸ்ஸக்³கி³யம் பாசித்தியம். அனதி⁴ட்டி²தே அதி⁴ட்டி²தஸஞ்ஞா, நிஸ்ஸக்³கி³யம் பாசித்தியம். அவிகப்பிதே விகப்பிதஸஞ்ஞா, நிஸ்ஸக்³கி³யம் பாசித்தியம். அவிஸ்ஸஜ்ஜிதே விஸ்ஸஜ்ஜிதஸஞ்ஞா, நிஸ்ஸக்³கி³யம் பாசித்தியம். அனட்டே² நட்ட²ஸஞ்ஞா… அவினட்டே² வினட்ட²ஸஞ்ஞா… அபி⁴ன்னே பி⁴ன்னஸஞ்ஞா… அவிலுத்தே விலுத்தஸஞ்ஞா, நிஸ்ஸக்³கி³யம் பாசித்தியம்.

நிஸ்ஸக்³கி³யம் பத்தம் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. ரத்தானதிக்கந்தே அதிக்கந்தஸஞ்ஞா, ஆபத்தி து³க்கடஸ்ஸ. ரத்தானதிக்கந்தே வேமதிகா, ஆபத்தி து³க்கடஸ்ஸ. ரத்தானதிக்கந்தே அனதிக்கந்தஸஞ்ஞா அனாபத்தி.

737. அனாபத்தி அந்தோஅருணே அதி⁴ட்டே²தி, விகப்பேதி, விஸ்ஸஜ்ஜேதி, நஸ்ஸதி, வினஸ்ஸதி, பி⁴ஜ்ஜதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, உம்மத்திகாய, ஆதி³கம்மிகாயாதி.

தேன கோ² பன ஸமயேன ச²ப்³ப³க்³கி³யா பி⁴க்கு²னியோ நிஸ்ஸட்ட²பத்தம் ந தே³ந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, நிஸ்ஸட்ட²பத்தோ ந தா³தப்³போ³. யா ந த³தே³ய்ய, ஆபத்தி து³க்கடஸ்ஸாதி.

பட²மஸிக்கா²பத³ம் நிட்டி²தம்.

2. து³தியஸிக்கா²பத³ம்

738. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கு²னியோ கா³மகாவாஸே வஸ்ஸம்வுட்டா² [வஸ்ஸம்வுத்தா² (ஸீ. ஸ்யா.)] ஸாவத்தி²ம் அக³மம்ஸு வத்தஸம்பன்னா இரியாபத²ஸம்பன்னா து³ச்சோளா லூக²சீவரா. உபாஸகா தா பி⁴க்கு²னியோ பஸ்ஸித்வா – ‘‘இமா பி⁴க்கு²னியோ வத்தஸம்பன்னா இரியாபத²ஸம்பன்னா து³ச்சோளா லூக²சீவரா, இமா பி⁴க்கு²னியோ அச்சி²ன்னா ப⁴விஸ்ஸந்தீ’’தி பி⁴க்கு²னிஸங்க⁴ஸ்ஸ அகாலசீவரம் அத³ம்ஸு. து²ல்லனந்தா³ பி⁴க்கு²னீ – ‘‘அம்ஹாகம் கதி²னம் அத்த²தம் காலசீவர’’ந்தி அதி⁴ட்ட²ஹித்வா பா⁴ஜாபேஸி. உபாஸகா தா பி⁴க்கு²னியோ பஸ்ஸித்வா ஏதத³வோசும் – ‘‘அபய்யாஹி சீவரம் லத்³த⁴’’ந்தி? ‘‘ந மயம், ஆவுஸோ, சீவரம் லபா⁴ம. அய்யா து²ல்லனந்தா³ – ‘அம்ஹாகம் கதி²னம் அத்த²தம் காலசீவர’ந்தி அதி⁴ட்ட²ஹித்வா பா⁴ஜாபேஸீ’’தி. உபாஸகா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அகாலசீவரம் ‘காலசீவர’ந்தி அதி⁴ட்ட²ஹித்வா பா⁴ஜாபேஸ்ஸதீ’’தி! அஸ்ஸோஸும் கோ² பி⁴க்கு²னியோ தேஸம் உபாஸகானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அகாலசீவரம் ‘காலசீவர’ந்தி அதி⁴ட்ட²ஹித்வா பா⁴ஜாபேஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும் …பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேதீதி [பா⁴ஜாபேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

739. ‘‘யா பன பி⁴க்கு²னீ அகாலசீவரம் ‘காலசீவர’ந்தி அதி⁴ட்ட²ஹித்வா பா⁴ஜாபேய்ய, நிஸ்ஸக்³கி³யம் பாசித்திய’’ந்தி.

740. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அகாலசீவரம் நாம அனத்த²தே கதி²னே ஏகாத³ஸமாஸே உப்பன்னம், அத்த²தே கதி²னே ஸத்தமாஸே உப்பன்னம், காலேபி ஆதி³ஸ்ஸ தி³ன்னம், ஏதம் அகாலசீவரம் நாம.

அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, அய்யே, அகாலசீவரம் ‘‘காலசீவர’ந்தி அதி⁴ட்ட²ஹித்வா பா⁴ஜாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

741. அகாலசீவரே அகாலசீவரஸஞ்ஞா ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, நிஸ்ஸக்³கி³யம் பாசித்தியம். அகாலசீவரே வேமதிகா ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, ஆபத்தி து³க்கடஸ்ஸ. அகாலசீவரே காலசீவரஸஞ்ஞா ‘‘காலசீவர’’ந்தி அதி⁴ட்ட²ஹித்வா பா⁴ஜாபேதி, அனாபத்தி. காலசீவரே அகாலசீவரஸஞ்ஞா, ஆபத்தி து³க்கடஸ்ஸ. காலசீவரே வேமதிகா, ஆபத்தி து³க்கடஸ்ஸ. காலசீவரே காலசீவரஸஞ்ஞா, அனாபத்தி.

742. அனாபத்தி அகாலசீவரம் காலசீவரஸஞ்ஞா பா⁴ஜாபேதி, காலசீவரம் காலசீவரஸஞ்ஞா பா⁴ஜாபேதி, உம்மத்திகாய, ஆதி³கம்மிகாயாதி.

து³தியஸிக்கா²பத³ம் நிட்டி²தம்.

3. ததியஸிக்கா²பத³ம்

743. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ அஞ்ஞதராய பி⁴க்கு²னியா ஸத்³தி⁴ம் சீவரம் பரிவத்தேத்வா பரிபு⁴ஞ்ஜி. அத² கோ² ஸா பி⁴க்கு²னீ தம் சீவரம் ஸங்க⁴ரித்வா [ஸம்ஹரித்வா (க.)] நிக்கி²பி. து²ல்லனந்தா³ பி⁴க்கு²னீ தம் பி⁴க்கு²னிம் ஏதத³வோச – ‘‘யம் தே, அய்யே, மயா ஸத்³தி⁴ம் சீவரம் பரிவத்திதம், கஹம் தம் சீவர’’ந்தி? அத² கோ² ஸா பி⁴க்கு²னீ தம் சீவரம் நீஹரித்வா து²ல்லனந்தா³ய பி⁴க்கு²னியா த³ஸ்ஸேஸி. து²ல்லனந்தா³ பி⁴க்கு²னீ தம் பி⁴க்கு²னிம் ஏதத³வோச – ‘‘ஹந்தா³ய்யே, துய்ஹம் சீவரம், ஆஹர மே’தம் சீவரம், யம் துய்ஹம் துய்ஹமேவேதம், யம் மய்ஹம் மய்ஹமேவேதம், ஆஹர மே’தம், ஸகம் பச்சாஹரா’’தி அச்சி²ந்தி³. அத² கோ² ஸா பி⁴க்கு²னீ பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ பி⁴க்கு²னியா ஸத்³தி⁴ம் சீவரம் பரிவத்தேத்வா அச்சி²ந்தி³ஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆராசேஸும்…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ பி⁴க்கு²னியா ஸத்³தி⁴ம் சீவரம் பரிவத்தேத்வா அச்சி²ந்த³தீதி [அச்சி²ந்தீ³தி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ பி⁴க்கு²னியா ஸத்³தி⁴ம் சீவரம் பரிவத்தேத்வா அச்சி²ந்தி³ஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

744. ‘‘யா பன பி⁴க்கு²னீ பி⁴க்கு²னியா ஸத்³தி⁴ம் சீவரம் பரிவத்தேத்வா ஸா பச்சா² ஏவம் வதே³ய்ய – ‘ஹந்தா³ய்யே, துய்ஹம் சீவரம் ஆஹர, மேதம் சீவரம், யம் துய்ஹம் துய்ஹமேவேதம், யம் மய்ஹம் மய்ஹமேவேதம், ஆஹர மேதம், ஸகம் பச்சாஹரா’தி அச்சி²ந்தே³ய்ய வா அச்சி²ந்தா³பேய்ய வா, நிஸ்ஸக்³கி³யம் பாசித்திய’’ந்தி.

745. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

பி⁴க்கு²னியா ஸத்³தி⁴ந்தி அஞ்ஞாய பி⁴க்கு²னியா ஸத்³தி⁴ம்.

சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²மம்.

பரிவத்தேத்வாதி பரித்தேன வா விபுலம், விபுலேன வா பரித்தம்.

அச்சி²ந்தே³ய்யாதி ஸயம் அச்சி²ந்த³தி நிஸ்ஸக்³கி³யம் பாசித்தியம்.

அச்சி²ந்தா³பேய்யாதி அஞ்ஞம் ஆணாபேதி, ஆபத்தி து³க்கடஸ்ஸ. ஸகிம் ஆணத்தா ப³ஹுகம்பி அச்சி²ந்த³தி, நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே அய்யே சீவரம் பி⁴க்கு²னியா ஸத்³தி⁴ம் பரிவத்தேத்வா அச்சி²ன்னம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

746. உபஸம்பன்னாய உபஸம்பன்னஸஞ்ஞா சீவரம் பரிவத்தேத்வா அச்சி²ந்த³தி வா அச்சி²ந்தா³பேதி வா, நிஸ்ஸக்³கி³யம் பாசித்தியம். உபஸம்பன்னாய வேமதிகா சீவரம் பரிவத்தேத்வா அச்சி²ந்த³தி வா அச்சி²ந்தா³பேதி வா, நிஸ்ஸக்³கி³யம் பாசித்தியம். உபஸம்பன்னாய அனுபஸம்பன்னஸஞ்ஞா சீவரம் பரிவத்தேத்வா அச்சி²ந்த³தி வா அச்சி²ந்தா³பேதி வா, நிஸ்ஸக்³கி³யம் பாசித்தியம்.

அஞ்ஞம் பரிக்கா²ரம் பரிவத்தேத்வா அச்சி²ந்த³தி வா அச்சி²ந்தா³பேதி வா, ஆபத்தி து³க்கடஸ்ஸ. அனுபஸம்பன்னாய ஸத்³தி⁴ம் சீவரம் வா அஞ்ஞம் வா பரிக்கா²ரம் பரிவத்தேத்வா அச்சி²ந்த³தி வா அச்சி²ந்தா³பேதி வா, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.

747. அனாபத்தி ஸா வா தே³தி, தஸ்ஸா வா விஸ்ஸஸந்தீ க³ண்ஹாதி, உம்மத்திகாய, ஆதி³கம்மிகாயாதி.

ததியஸிக்கா²பத³ம் நிட்டி²தம்.

4. சதுத்த²ஸிக்கா²பத³ம்

748. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ கி³லானா ஹோதி. அத² கோ² அஞ்ஞதரோ உபாஸகோ யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ம் பி⁴க்கு²னிம் ஏதத³வோச – ‘‘கிம் தே, அய்யே, அபா²ஸு, கிம் ஆஹரீயதூ’’தி? ‘‘ஸப்பினா மே, ஆவுஸோ, அத்தோ²’’தி. அத² கோ² ஸோ உபாஸகோ அஞ்ஞதரஸ்ஸ ஆபணிகஸ்ஸ க⁴ரா கஹாபணஸ்ஸ ஸப்பிம் ஆஹரித்வா து²ல்லனந்தா³ய பி⁴க்கு²னியா அதா³ஸி. து²ல்லனந்தா³ பி⁴க்கு²னீ ஏவமாஹ – ‘‘ந மே, ஆவுஸோ, ஸப்பினா அத்தோ²; தேலேன மே அத்தோ²’’தி. அத² கோ² ஸோ உபாஸகோ யேன ஸோ ஆபணிகோ தேனுபஸங்கமி; உபஸங்கமித்வா தம் ஆபணிகம் ஏதத³வோச – ‘‘ந கிராய்யோ அய்யாய ஸப்பினா அத்தோ², தேலேன அத்தோ². ஹந்த³ தே ஸப்பிம், தேலம் மே தே³ஹீ’’தி. ‘‘ஸசே மயம் அய்யோ விக்கீதம் ப⁴ண்ட³ம் புன ஆதி³யிஸ்ஸாம [ஆஹரிஸ்ஸாம (க.)], கதா³ அம்ஹாகம் ப⁴ண்ட³ம் விக்காயிஸ்ஸதி [விக்கீயிஸ்ஸதி (?)]; ஸப்பிஸ்ஸ கயேன ஸப்பி ஹடம், தேலஸ்ஸ கயம் ஆஹர, தேலம் ஹரிஸ்ஸஸீ’’தி. அத² கோ² ஸோ உபாஸகோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா து²ல்லனந்தா³ அஞ்ஞம் விஞ்ஞாபேத்வா அஞ்ஞம் விஞ்ஞாபேஸ்ஸதீ’’தி! அஸ்ஸோஸும் கோ² பி⁴க்கு²னியோ தஸ்ஸ உபாஸகஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி…பே… அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ அஞ்ஞம் விஞ்ஞாபேத்வா அஞ்ஞம் விஞ்ஞாபேதீதி [விஞ்ஞாபேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா …பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அஞ்ஞம் விஞ்ஞாபேத்வா அஞ்ஞம் விஞ்ஞாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

749. ‘‘யா பன பி⁴க்கு²னீ அஞ்ஞம் விஞ்ஞாபேத்வா அஞ்ஞம் விஞ்ஞாபேய்ய, நிஸ்ஸக்³கி³யம் பாசித்திய’’ந்தி.

750. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஞ்ஞம் விஞ்ஞாபேத்வாதி யம் கிஞ்சி விஞ்ஞாபேத்வா.

அஞ்ஞம் விஞ்ஞாபேய்யாதி தம் ட²பேத்வா அஞ்ஞம் விஞ்ஞாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே அய்யே அஞ்ஞம் விஞ்ஞாபேத்வா அஞ்ஞம் விஞ்ஞாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீ’’தி.

751. அஞ்ஞே அஞ்ஞஸஞ்ஞா அஞ்ஞம் விஞ்ஞாபேதி, நிஸ்ஸக்³கி³யம் பாசித்தியம். அஞ்ஞே வேமதிகா அஞ்ஞம் விஞ்ஞாபேதி, நிஸ்ஸக்³கி³யம் பாசித்தியம். அஞ்ஞே அனஞ்ஞஸஞ்ஞா அஞ்ஞம் விஞ்ஞாபேதி, நிஸ்ஸக்³கி³யம் பாசித்தியம்.

அனஞ்ஞே அஞ்ஞஸஞ்ஞா அனஞ்ஞம் விஞ்ஞாபேதி, ஆபத்தி து³க்கடஸ்ஸ. அனஞ்ஞே வேமதிகா அனஞ்ஞம் விஞ்ஞாபேதி, ஆபத்தி து³க்கடஸ்ஸ. அனஞ்ஞே அனஞ்ஞஸஞ்ஞா, அனாபத்தி.

752. அனாபத்தி தஞ்ஞேவ [தஞ்சேவ (ஸ்யா.)] விஞ்ஞாபேதி, அஞ்ஞஞ்ச விஞ்ஞாபேதி, ஆனிஸம்ஸம் த³ஸ்ஸேத்வா விஞ்ஞாபேதி, உம்மத்திகாய, ஆதி³கம்மிகாயாதி.

சதுத்த²ஸிக்கா²பத³ம் நிட்டி²தம்.

5. பஞ்சமஸிக்கா²பத³ம்

753. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ கி³லானா ஹோதி. அத² கோ² அஞ்ஞதரோ உபாஸகோ யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ம் பி⁴க்கு²னிம் ஏதத³வோச – ‘‘கச்சி, அய்யே, க²மனீயம் கச்சி யாபனீய’’ந்தி? ‘‘ந மே, ஆவுஸோ, க²மனீயம், ந யாபனீய’’ந்தி. ‘‘அமுகஸ்ஸ, அய்யே, ஆபணிகஸ்ஸ க⁴ரே கஹாபணம் நிக்கி²பிஸ்ஸாமி, ததோ யம் இச்சே²ய்யாஸி தம் ஆஹராபேய்யாஸீ’’தி. து²ல்லனந்தா³ பி⁴க்கு²னீ அஞ்ஞதரம் ஸிக்க²மானம் ஆணாபேஸி – ‘‘க³ச்ச², ஸிக்க²மானே, அமுகஸ்ஸ ஆபணிகஸ்ஸ க⁴ரா கஹாபணஸ்ஸ தேலம் ஆஹரா’’தி. அத² கோ² ஸா ஸிக்க²மானா தஸ்ஸ ஆபணிகஸ்ஸ க⁴ரா கஹாபணஸ்ஸ தேலம் ஆஹரித்வா து²ல்லனந்தா³ய பி⁴க்கு²னியா அதா³ஸி. து²ல்லனந்தா³ பி⁴க்கு²னீ ஏவமாஹ – ‘‘ந மே, ஸிக்க²மானே, தேலேன அத்தோ², ஸப்பினா மே அத்தோ²’’தி. அத² கோ² ஸா ஸிக்க²மானா யேன ஸோ ஆபணிகோ தேனுபஸங்கமி; உபஸங்கமித்வா தம் ஆபணிகம் ஏதத³வோச – ‘‘ந கிர, ஆவுஸோ, அய்யாய தேலேன அத்தோ², ஸப்பினா அத்தோ², ஹந்த³ தே தேலம், ஸப்பிம் மே தே³ஹீ’’தி. ‘‘ஸசே மயம், அய்யே, விக்கீதம் ப⁴ண்ட³ம் புன ஆதி³யிஸ்ஸாம, கதா³ அம்ஹாகம் ப⁴ண்ட³ம் விக்காயிஸ்ஸதி! தேலஸ்ஸ கயேன தேலம் ஹடம், ஸப்பிஸ்ஸ கயம் ஆஹர, ஸப்பிம் ஹரிஸ்ஸஸீ’’தி. அத² கோ² ஸா ஸிக்க²மானா ரோத³ந்தீ அட்டா²ஸி. பி⁴க்கு²னியோ தம் ஸிக்க²மானம் ஏதத³வோசும் – ‘‘கிஸ்ஸ த்வம், ஸிக்க²மானே, ரோத³ஸீ’’தி? அத² கோ² ஸா ஸிக்க²மானா பி⁴க்கு²னீனம் ஏதமத்த²ம் ஆரோசேஸி. யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அஞ்ஞம் சேதாபேத்வா அஞ்ஞம் சேதாபேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ அஞ்ஞம் சேதாபேத்வா அஞ்ஞம் சேதாபேதீதி [சேதாபேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அஞ்ஞம் சேதாபேத்வா அஞ்ஞம் சேதாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

754. ‘‘யா பன பி⁴க்கு²னீ அஞ்ஞம் சேதாபேத்வா அஞ்ஞம் சேதாபேய்ய, நிஸ்ஸக்³கி³யம் பாசித்திய’’ந்தி.

755. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஞ்ஞம் சேதாபேத்வாதி யம் கிஞ்சி சேதாபேத்வா.

அஞ்ஞம் சேதாபேய்யாதி தம் ட²பேத்வா அஞ்ஞம் சேதாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே, அய்யே, அஞ்ஞம் சேதாபேத்வா அஞ்ஞம் சேதாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

756. அஞ்ஞே அஞ்ஞஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞே வேமதிகா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞே அனஞ்ஞஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம்.

அனஞ்ஞே அஞ்ஞஸஞ்ஞா அனஞ்ஞம் சேதாபேதி, ஆபத்தி து³க்கடஸ்ஸ. அனஞ்ஞே வேமதிகா அனஞ்ஞம் சேதாபேதி, ஆபத்தி து³க்கடஸ்ஸ. அனஞ்ஞே அனஞ்ஞஸஞ்ஞா அனாபத்தி.

757. அனாபத்தி தஞ்ஞேவ [தஞ்சேவ (ஸ்யா.)] சேதாபேதி, அஞ்ஞஞ்ச சேதாபேதி, ஆனிஸம்ஸம் த³ஸ்ஸேத்வா சேதாபேதி, உம்மத்திகாய, ஆதி³கம்மிகாயாதி.

பஞ்சமஸிக்கா²பத³ம் நிட்டி²தம்.

6. ச²ட்ட²ஸிக்கா²பத³ம்

758. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன உபாஸகா பி⁴க்கு²னிஸங்க⁴ஸ்ஸ சீவரத்தா²ய ச²ந்த³கம் ஸங்க⁴ரித்வா அஞ்ஞதரஸ்ஸ பாவாரிகஸ்ஸ க⁴ரே பரிக்கா²ரம் நிக்கி²பித்வா பி⁴க்கு²னியோ உபஸங்கமித்வா ஏதத³வோசும் – ‘‘அமுகஸ்ஸ, அய்யே, பாவாரிகஸ்ஸ க⁴ரே சீவரத்தா²ய பரிக்கா²ரோ நிக்கி²த்தோ, ததோ சீவரம் ஆஹராபேத்வா பா⁴ஜேதா²’’தி. பி⁴க்கு²னியோ தேன பரிக்கா²ரேன பே⁴ஸஜ்ஜம் சேதாபேத்வா பரிபு⁴ஞ்ஜிம்ஸு. உபாஸகா ஜானித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன அஞ்ஞம் சேதாபேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தேஸம் உபாஸகானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா² …பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன அஞ்ஞம் சேதாபேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன அஞ்ஞம் சேதாபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன அஞ்ஞம் சேதாபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

759. ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன அஞ்ஞம் சேதாபேய்ய, நிஸ்ஸக்³கி³யம் பாசித்திய’’ந்தி.

760. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேனாதி அஞ்ஞஸ்ஸத்தா²ய தி³ன்னேன.

ஸங்கி⁴கேனாதி ஸங்க⁴ஸ்ஸ, ந க³ணஸ்ஸ, ந ஏகபி⁴க்கு²னியா.

அஞ்ஞம் சேதாபேய்யாதி யம்அத்தா²ய தி³ன்னம், தம் ட²பேத்வா அஞ்ஞம் சேதாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே, அய்யே, அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன அஞ்ஞம் சேதாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி.…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

761. அஞ்ஞத³த்தி²கே அஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே வேமதிகா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே அனஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். நிஸ்ஸட்ட²ம் படிலபி⁴த்வா யதா²தா³னே உபனேதப்³ப³ம்.

அனஞ்ஞத³த்தி²கே அஞ்ஞத³த்தி²கஸஞ்ஞா, ஆபத்தி து³க்கடஸ்ஸ. அனஞ்ஞத³த்தி²கே வேமதிகா, ஆபத்தி து³க்கடஸ்ஸ. அனஞ்ஞத³த்தி²கே அனஞ்ஞத³த்தி²கஸஞ்ஞா, அனாபத்தி.

762. அனாபத்தி ஸேஸகம் உபனேதி, ஸாமிகே அபலோகேத்வா உபனேதி, ஆபதா³ஸு, உம்மத்திகாய, ஆதி³கம்மிகாயாதி.

ச²ட்ட²ஸிக்கா²பத³ம் நிட்டி²தம்.

7. ஸத்தமஸிக்கா²பத³ம்

763. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன உபாஸகா பி⁴க்கு²னிஸங்க⁴ஸ்ஸ சீவரத்தா²ய ச²ந்த³கம் ஸங்க⁴ரித்வா அஞ்ஞதரஸ்ஸ பாவாரிகஸ்ஸ க⁴ரே பரிக்கா²ரம் நிக்கி²பித்வா பி⁴க்கு²னியோ உபஸங்கமித்வா ஏதத³வோசும் – ‘‘அமுகஸ்ஸ, அய்யே, பாவாரிகஸ்ஸ க⁴ரே சீவரத்தா²ய பரிக்கா²ரோ நிக்கி²த்தோ, ததோ சீவரம் ஆஹராபேத்வா பா⁴ஜேதா²’’தி. பி⁴க்கு²னியோ தேன ச பரிக்கா²ரேன ஸயம்பி யாசித்வா பே⁴ஸஜ்ஜம் சேதாபேத்வா பரிபு⁴ஞ்ஜிம்ஸு. உபாஸகா ஜானித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞம் சேதாபேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞம் சேதாபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞம் சேதாபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

764. ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞம் சேதாபேய்ய, நிஸ்ஸக்³கி³யம் பாசித்திய’’ந்தி.

765. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேனாதி அஞ்ஞஸ்ஸத்தா²ய தி³ன்னேன.

ஸங்கி⁴கேனாதி ஸங்க⁴ஸ்ஸ, ந க³ணஸ்ஸ, ந ஏகபி⁴க்கு²னியா.

ஸஞ்ஞாசிகேனாதி ஸயம் யாசித்வா.

அஞ்ஞம் சேதாபேய்யாதி யம்அத்தா²ய தி³ன்னம் தம் ட²பேத்வா அஞ்ஞம் சேதாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே, அய்யே, அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞம் சேதாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

766. அஞ்ஞத³த்தி²கே அஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே வேமதிகா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே அனஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். நிஸ்ஸட்ட²ம் படிலபி⁴த்வா யதா²தா³னே உபனேதப்³ப³ம்.

அனஞ்ஞத³த்தி²கே அஞ்ஞத³த்தி²கஸஞ்ஞா, ஆபத்தி து³க்கடஸ்ஸ. அனஞ்ஞத³த்தி²கே வேமதிகா, ஆபத்தி து³க்கடஸ்ஸ. அனஞ்ஞத³த்தி²கே அனஞ்ஞத³த்தி²கஸஞ்ஞா, அனாபத்தி.

767. அனாபத்தி ஸேஸகம் உபனேதி, ஸாமிகே அபலோகேத்வா உபனேதி, ஆபதா³ஸு, உம்மத்திகாய, ஆதி³கம்மிகாயாதி.

ஸத்தமஸிக்கா²பத³ம் நிட்டி²தம்.

8. அட்ட²மஸிக்கா²பத³ம்

768. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரஸ்ஸ பூக³ஸ்ஸ பரிவேணவாஸிகா பி⁴க்கு²னியோ யாகு³யா கிலமந்தி. அத² கோ² ஸோ பூகோ³ பி⁴க்கு²னீனம் யாகு³அத்தா²ய ச²ந்த³கம் ஸங்க⁴ரித்வா அஞ்ஞதரஸ்ஸ ஆபணிகஸ்ஸ க⁴ரே பரிக்கா²ரம் நிக்கி²பித்வா பி⁴க்கு²னியோ உபஸங்கமித்வா ஏதத³வோச – ‘‘அமுகஸ்ஸ, அய்யே, ஆபணிகஸ்ஸ க⁴ரே யாகு³அத்தா²ய பரிக்கா²ரோ நிக்கி²த்தோ, ததோ தண்டு³லம் ஆஹராபேத்வா யாகு³ம் பசாபேத்வா பரிபு⁴ஞ்ஜதா²’’தி. பி⁴க்கு²னியோ தேன பரிக்கா²ரேன பே⁴ஸஜ்ஜம் சேதாபேத்வா பரிபு⁴ஞ்ஜிம்ஸு. ஸோ பூகோ³ ஜானித்வா உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன அஞ்ஞம் சேதாபேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன அஞ்ஞம் சேதாபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன அஞ்ஞம் சேதாபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

769. ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன அஞ்ஞம் சேதாபேய்ய, நிஸ்ஸக்³கி³யம் பாசித்திய’’ந்தி.

770. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேனாதி அஞ்ஞஸ்ஸத்தா²ய தி³ன்னேன.

மஹாஜனிகேனாதி க³ணஸ்ஸ, ந ஸங்க⁴ஸ்ஸ, ந ஏகபி⁴க்கு²னியா.

அஞ்ஞம் சேதாபேய்யாதி யம்அத்தா²ய தி³ன்னம் தம் ட²பேத்வா அஞ்ஞம் சேதாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே, அய்யே, அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன அஞ்ஞம் சேதாபிதம் நிஸ்ஸக்³கி³யம் இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

771. அஞ்ஞத³த்தி²கே அஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே வேமதிகா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே அனஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். நிஸ்ஸட்ட²ம் படிலபி⁴த்வா யதா²தா³னே உபனேதப்³ப³ம்.

அனஞ்ஞத³த்தி²கே அஞ்ஞத³த்தி²கஸஞ்ஞா, ஆபத்தி து³க்கடஸ்ஸ. அனஞ்ஞத³த்தி²கே வேமதிகா, ஆபத்தி து³க்கடஸ்ஸ. அனஞ்ஞத³த்தி²கே அனஞ்ஞத³த்தி²கஸஞ்ஞா, அனாபத்தி.

772. அனாபத்தி ஸேஸகம் உபனேதி, ஸாமிகே அபலோகேத்வா உபனேதி, ஆபதா³ஸு, உம்மத்திகாய, ஆதி³கம்மிகாயாதி.

அட்ட²மஸிக்கா²பத³ம் நிட்டி²தம்.

9. நவமஸிக்கா²பத³ம்

773. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரஸ்ஸ பூக³ஸ்ஸ பரிவேணவாஸிகா பி⁴க்கு²னியோ யாகு³யா கிலமந்தி. அத² கோ² ஸோ பூகோ³ பி⁴க்கு²னீனம் யாகு³அத்தா²ய ச²ந்த³கம் ஸங்க⁴ரித்வா அஞ்ஞதரஸ்ஸ ஆபணிகஸ்ஸ க⁴ரே பரிக்கா²ரம் நிக்கி²பித்வா பி⁴க்கு²னியோ உபஸங்கமித்வா ஏதத³வோச – ‘‘அமுகஸ்ஸ, அய்யே, ஆபணிகஸ்ஸ க⁴ரே யாகு³அத்தா²ய பரிக்கா²ரோ நிக்கி²த்தோ. ததோ தண்டு³லே ஆஹராபேத்வா யாகு³ம் பசாபேத்வா பரிபு⁴ஞ்ஜதா²’’தி. பி⁴க்கு²னியோ தேன ச பரிக்கா²ரேன ஸயம்பி யாசித்வா பே⁴ஸஜ்ஜம் சேதாபேத்வா பரிபு⁴ஞ்ஜிம்ஸு. ஸோ பூகோ³ ஜானித்வா உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன ஸஞ்ஞாசிகேன அஞ்ஞம் சேதாபேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன ஸஞ்ஞாசிகேன அஞ்ஞம் சேதாபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன ஸஞ்ஞாசிகேன அஞ்ஞம் சேதாபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

774. ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன ஸஞ்ஞாசிகேன அஞ்ஞம் சேதாபேய்ய, நிஸ்ஸக்³கி³யம் பாசித்திய’’ந்தி.

775. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேனாதி அஞ்ஞஸ்ஸத்தா²ய தி³ன்னேன.

மஹாஜனிகேனாதி க³ணஸ்ஸ, ந ஸங்க⁴ஸ்ஸ, ந ஏகபி⁴க்கு²னியா.

ஸஞ்ஞாசிகேனாதி ஸயம் யாசித்வா.

அஞ்ஞம் சேதாபேய்யாதி யம்அத்தா²ய தி³ன்னம் தம் ட²பேத்வா அஞ்ஞம் சேதாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே, அய்யே, அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன ஸஞ்ஞாசிகேன அஞ்ஞம் சேதாபிதம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

776. அஞ்ஞத³த்தி²கே அஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே வேமதிகா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே அனஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். நிஸ்ஸட்ட²ம் படிலபி⁴த்வா யதா²தா³னே உபனேதப்³ப³ம்.

அனஞ்ஞத³த்தி²கே அஞ்ஞத³த்தி²கஸஞ்ஞா, ஆபத்தி து³க்கடஸ்ஸ. அனஞ்ஞத³த்தி²கே வேமதிகா, ஆபத்தி து³க்கடஸ்ஸ. அனஞ்ஞத³த்தி²கே அனஞ்ஞத³த்தி²கஸஞ்ஞா அனாபத்தி.

777. அனாபத்தி ஸேஸகம் உபனேதி, ஸாமிகே அபலோகேத்வா உபனேதி, ஆபதா³ஸு, உம்மத்திகாய, ஆதி³கம்மிகாயாதி.

நவமஸிக்கா²பத³ம் நிட்டி²தம்.

10. த³ஸமஸிக்கா²பத³ம்

778. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிம் கத²ம் காதும். ப³ஹூ மனுஸ்ஸா து²ல்லனந்த³ம் பி⁴க்கு²னிம் பயிருபாஸந்தி. தேன கோ² பன ஸமயேன து²ல்லனந்தா³ய பி⁴க்கு²னியா பரிவேணம் உந்த்³ரியதி [உத்³ரீயதி (ஸ்யா.)]. மனுஸ்ஸா து²ல்லனந்த³ம் பி⁴க்கு²னிம் ஏதத³வோசும் – ‘‘கிஸ்ஸித³ம் தே, அய்யே, பரிவேணம் உந்த்³ரியதீ’’தி? ‘‘நத்தா²வுஸோ, தா³யகா, நத்தி² காரகா’’தி. அத² கோ² தே மனுஸ்ஸா து²ல்லனந்தா³ய பி⁴க்கு²னியா பரிவேணத்தா²ய ச²ந்த³கம் ஸங்க⁴ரித்வா து²ல்லனந்தா³ய பி⁴க்கு²னியா பரிக்கா²ரம் அத³ம்ஸு. து²ல்லனந்தா³ பி⁴க்கு²னீ தேன ச பரிக்கா²ரேன ஸயம்பி யாசித்வா பே⁴ஸஜ்ஜம் சேதாபேத்வா பரிபு⁴ஞ்ஜி. மனுஸ்ஸா ஜானித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேன ஸஞ்ஞாசிகேன அஞ்ஞம் சேதாபேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேன ஸஞ்ஞாசிகேன அஞ்ஞம் சேதாபேதீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேன ஸஞ்ஞாசிகேன அஞ்ஞம் சேதாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

779. ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேன ஸஞ்ஞாசிகேன அஞ்ஞம் சேதாபேய்ய, நிஸ்ஸக்³கி³யம் பாசித்திய’’ந்தி.

780. யா பனாதி யா யாதி³ஸா…பே… பி⁴க்கு²னீதி…பே… அயம் இமஸ்மிம் அத்தே² அதி⁴ப்பேதா பி⁴க்கு²னீதி.

அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேனாதி அஞ்ஞஸ்ஸத்தா²ய தி³ன்னேன.

புக்³க³லிகேனாதி ஏகாய பி⁴க்கு²னியா, ந ஸங்க⁴ஸ்ஸ, ந க³ணஸ்ஸ.

ஸஞ்ஞாசிகேனாதி ஸயம் யாசித்வா.

அஞ்ஞம் சேதாபேய்யாதி யம்அத்தா²ய தி³ன்னம் தம் ட²பேத்வா அஞ்ஞம் சேதாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே, அய்யே, அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேன ஸஞ்ஞாசிகேன அஞ்ஞம் சேதாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

781. அஞ்ஞத³த்தி²கே அஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே வேமதிகா அஞ்ஞம் சேதாபேதி, நிஸ்ஸக்³கி³யம் பாசித்தியம். அஞ்ஞத³த்தி²கே அனஞ்ஞத³த்தி²கஸஞ்ஞா அஞ்ஞம் சேதாபேதி, நிஸ்ஸக்³கி³யம் பாசித்தியம். நிஸ்ஸட்ட²ம் படிலபி⁴த்வா யதா²தா³னே உபனேதப்³ப³ம்.

அனஞ்ஞத³த்தி²கே அஞ்ஞத³த்தி²கஸஞ்ஞா, ஆபத்தி து³க்கடஸ்ஸ. அனஞ்ஞத³த்தி²கே வேமதிகா, ஆபத்தி து³க்கடஸ்ஸ. அனஞ்ஞத³த்தி²கே அனஞ்ஞத³த்தி²கஸஞ்ஞா, அனாபத்தி.

782. அனாபத்தி ஸேஸகம் உபனேதி, ஸாமிகே அபலோகேத்வா உபனேதி, ஆபதா³ஸு, உம்மத்திகாய, ஆதி³கம்மிகாயாதி.

த³ஸமஸிக்கா²பத³ம் நிட்டி²தம்.

11. ஏகாத³ஸமஸிக்கா²பத³ம்

783. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிம் கத²ம் காதும். அத² கோ² ராஜா பஸேனதி³ கோஸலோ ஸீதகாலே மஹக்³க⁴ம் கம்ப³லம் பாருபித்வா யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ம் பி⁴க்கு²னிம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ராஜானம் பஸேனதி³ம் கோஸலம் து²ல்லனந்தா³ பி⁴க்கு²னீ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ து²ல்லனந்த³ம் பி⁴க்கு²னிம் ஏதத³வோச – ‘‘வதே³ய்யாஸி, அய்யே, யேன அத்தோ²’’தி? ‘‘ஸசே மே த்வம், மஹாராஜ, தா³துகாமோஸி, இமம் கம்ப³லம் தே³ஹீ’’தி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா கம்ப³லம் த³த்வா உட்டா²யாஸனா து²ல்லனந்த³ம் பி⁴க்கு²னிம் அபி⁴வாதே³த்வா பத³க்கி²ணம் கத்வா பக்காமி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘மஹிச்சா² இமா பி⁴க்கு²னியோ அஸந்துட்டா². கத²ஞ்ஹி நாம ராஜானம் கம்ப³லம் விஞ்ஞாபேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ராஜானம் கம்ப³லம் விஞ்ஞாபேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ராஜானம் கம்ப³லம் விஞ்ஞாபேதீதி [விஞ்ஞாபேஸீதி (க.)]? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ராஜானம் கம்ப³லம் விஞ்ஞாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

784. ‘‘க³ருபாவுரணம் [பாபுரணம் (ஸீ. ஸ்யா.)] பன பி⁴க்கு²னியா சேதாபேந்தியா சதுக்கம்ஸபரமம் சேதாபேதப்³ப³ம். ததோ சே உத்தரி சேதாபேய்ய, நிஸ்ஸக்³கி³யம் பாசித்திய’’ந்தி.

785. க³ருபாவுரணம் நாம யம் கிஞ்சி ஸீதகாலே பாவுரணம்.

சேதாபேந்தியாதி விஞ்ஞாபேந்தியா.

சதுக்கம்ஸபரமம் சேதாபேதப்³ப³ந்தி ஸோளஸகஹாபணக்³க⁴னகம் சேதாபேதப்³ப³ம்.

ததோ சே உத்தரி சேதாபேய்யாதி ததுத்தரி விஞ்ஞாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… ‘‘இத³ம் மே, அய்யே, க³ருபாவுரணம் அதிரேகசதுக்கம்ஸபரமம் சேதாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

786. அதிரேகசதுக்கம்ஸே அதிரேகஸஞ்ஞா சேதாபேதி, நிஸ்ஸக்³கி³யம் பாசித்தியம். அதிரேகசதுக்கம்ஸே வேமதிகா சேதாபேதி, நிஸ்ஸக்³கி³யம் பாசித்தியம். அதிரேகசதுக்கம்ஸே ஊனகஸஞ்ஞா சேதாபேதி, நிஸ்ஸக்³கி³யம் பாசித்தியம்.

ஊனகசதுக்கம்ஸே அதிரேகஸஞ்ஞா, ஆபத்தி து³க்கடஸ்ஸ. ஊனகசதுக்கம்ஸே வேமதிகா, ஆபத்தி து³க்கடஸ்ஸ. ஊனகசதுக்கம்ஸே ஊனகஸஞ்ஞா, அனாபத்தி.

787. அனாபத்தி சதுக்கம்ஸபரமம் சேதாபேதி, ஊனகசதுக்கம்ஸபரமம் சேதாபேதி, ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, மஹக்³க⁴ம் சேதாபேதுகாமஸ்ஸ அப்பக்³க⁴ம் சேதாபேதி, உம்மத்திகாய, ஆதி³கம்மிகாயாதி.

ஏகாத³ஸமஸிக்கா²பத³ம் நிட்டி²தம்.

12. த்³வாத³ஸமஸிக்கா²பத³ம்

788. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிம் கத²ம் காதும். அத² கோ² ராஜா பஸேனதி³ கோஸலோ உண்ஹகாலே மஹக்³க⁴ம் கோ²மம் பாருபித்வா யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ம் பி⁴க்கு²னிம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ராஜானம் பஸேனதி³ம் கோஸலம் து²ல்லனந்தா³ பி⁴க்கு²னீ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ து²ல்லனந்த³ம் பி⁴க்கு²னிம் ஏதத³வோச – ‘‘வதே³ய்யாஸி, அய்யே, யேன அத்தோ²’’தி. ‘‘ஸசே மே த்வம், மஹாராஜ, தா³துகாமோஸி, இமம் கோ²மம் தே³ஹீ’’தி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா கோ²மம் த³த்வா உட்டா²யாஸனா து²ல்லனந்த³ம் பி⁴க்கு²னிம் அபி⁴வாதே³த்வா பத³க்கி²ணம் கத்வா பக்காமி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘மஹிச்சா² இமா பி⁴க்கு²னியோ அஸந்துட்டா². கத²ஞ்ஹி நாம ராஜானம் கோ²மம் விஞ்ஞாபேஸ்ஸந்தீ’’தி! அஸ்ஸோஸும் கோ² பி⁴க்கு²னியோ தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யா தா பி⁴க்கு²னியோ அப்பிச்சா²…பே… தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா து²ல்லனந்தா³ ராஜானம் கோ²மம் விஞ்ஞாபேஸ்ஸதீ’’தி…பே… ஸச்சம் கிர, பி⁴க்க²வே, து²ல்லனந்தா³ பி⁴க்கு²னீ ராஜானம் கோ²மம் விஞ்ஞாபேதீதி [விஞ்ஞாபேஸீதி (க.)]? ‘‘ஸச்சம், ப⁴க³வாதி’’. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ராஜானம் கோ²மம் விஞ்ஞாபேஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, பி⁴க்கு²னியோ இமம் ஸிக்கா²பத³ம் உத்³தி³ஸந்து –

789. ‘‘லஹுபாவுரணம் பன பி⁴க்கு²னியா சேதாபேந்தியா அட்³ட⁴தேய்யகம்ஸபரமம் சேதாபேதப்³ப³ம். ததோ சே உத்தரி சேதாபேய்ய, நிஸ்ஸக்³கி³யம் பாசித்திய’’ந்தி.

790. லஹுபாவுரணம் நாம யம் கிஞ்சி உண்ஹகாலே பாவுரணம்.

சேதாபேந்தியாதி விஞ்ஞாபேந்தியா.

அட்³ட⁴தேய்யகம்ஸபரமம் சேதாபேதப்³ப³ந்தி த³ஸகஹாபணக்³க⁴னகம் சேதாபேதப்³ப³ம்.

ததோ சே உத்தரி சேதாபேய்யாதி ததுத்தரி விஞ்ஞாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, அய்யே, லஹுபாவுரணம் அதிரேகஅட்³ட⁴தேய்யகம்ஸபரமம் சேதாபிதம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… அய்யாய த³ம்மீதி.

791. அதிரேகஅட்³ட⁴தேய்யகம்ஸே அதிரேகஸஞ்ஞா சேதாபேதி, நிஸ்ஸக்³கி³யம் பாசித்தியம். அதிரேகஅட்³ட⁴தேய்யகம்ஸே வேமதிகா சேதாபேதி, நிஸ்ஸக்³கி³யம் பாசித்தியம். அதிரேகஅட்³ட⁴தேய்யகம்ஸே ஊனகஸஞ்ஞா சேதாபேதி, நிஸ்ஸக்³கி³யம் பாசித்தியம்.

ஊனகஅட்³ட⁴தேய்யகம்ஸே அதிரேகஸஞ்ஞா, ஆபத்தி து³க்கடஸ்ஸ. ஊனகஅட்³ட⁴தேய்யகம்ஸே வேமதிகா, ஆபத்தி து³க்கடஸ்ஸ. ஊனகஅட்³ட⁴தேய்யகம்ஸே ஊனகஸஞ்ஞா, அனாபத்தி.

792. அனாபத்தி அட்³ட⁴தேய்யகம்ஸபரமம் சேதாபேதி, ஊனகஅட்³ட⁴தேய்யகம்ஸபரமம் சேதாபேதி, ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, மஹக்³க⁴ம் சேதாபேதுகாமஸ்ஸ அப்பக்³க⁴ம் சேதாபேதி, உம்மத்திகாய, ஆதி³கம்மிகாயாதி.

த்³வாத³ஸமஸிக்கா²பத³ம் நிட்டி²தம்.

உத்³தி³ட்டா² கோ², அய்யாயோ, திம்ஸ நிஸ்ஸக்³கி³யா பாசித்தியா த⁴ம்மா. தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

பி⁴க்கு²னிவிப⁴ங்கே³ நிஸ்ஸக்³கி³யகண்ட³ம் நிட்டி²தம்.