7. நிஸீத³னஸிக்கா²பத³ம்

531. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴க³வதா பி⁴க்கூ²னம் நிஸீத³னம் அனுஞ்ஞாதம் ஹோதி. ச²ப்³ப³க்³கி³யா பி⁴க்கூ² – ‘‘ப⁴க³வதா நிஸீத³னம் அனுஞ்ஞாத’’ந்தி அப்பமாணிகானி நிஸீத³னானி தா⁴ரேந்தி. மஞ்சஸ்ஸபி பீட²ஸ்ஸபி புரதோபி பச்ச²தோபி ஓலம்பே³ந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அப்பமாணிகானி நிஸீத³னானி தா⁴ரேஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, அப்பமாணிகானி நிஸீத³னானி தா⁴ரேதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அப்பமாணிகானி நிஸீத³னானி தா⁴ரேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘நிஸீத³னம் பன பி⁴க்கு²னா காரயமானேன பமாணிகம் காரேதப்³ப³ம். தத்ரித³ம் பமாணம் – தீ³க⁴ஸோ த்³வே வித³த்தி²யோ, ஸுக³தவித³த்தி²யா; திரியம் தி³யட்³ட⁴ம். தம் அதிக்காமயதோ சே²த³னகம் பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

532. தேன கோ² பன ஸமயேன ஆயஸ்மா உதா³யீ மஹாகாயோ ஹோதி. ஸோ ப⁴க³வதோ புரதோ நிஸீத³னம் பஞ்ஞபேத்வா ஸமந்ததோ ஸமஞ்ச²மானோ நிஸீத³தி. அத² கோ² ப⁴க³வா ஆயஸ்மந்தம் உதா³யிம் ஏதத³வோச – ‘‘கிஸ்ஸ த்வம், உதா³யி, நிஸீத³னம் ஸமந்ததோ ஸமஞ்ச²ஸி; ஸேய்யதா²பி புராணாஸிகோட்டோ²’’தி? ‘‘ததா² ஹி பன, ப⁴ந்தே, ப⁴க³வதா பி⁴க்கூ²னம் அதிகு²த்³த³கம் நிஸீத³னம் அனுஞ்ஞாத’’ந்தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, நிஸீத³னஸ்ஸ த³ஸம் வித³த்தி²ம். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

533. ‘‘நிஸீத³னம் பன பி⁴க்கு²னா காரயமானேன பமாணிகம் காரேதப்³ப³ம். தத்ரித³ம் பமாணம் – தீ³க⁴ஸோ த்³வே வித³த்தி²யோ, ஸுக³தவித³த்தி²யா; திரியம் தி³யட்³ட⁴ம். த³ஸா வித³த்தி². தம் அதிக்காமயதோ சே²த³னகம் பாசித்திய’’ந்தி.

534. நிஸீத³னம் நாம ஸத³ஸம் வுச்சதி.

காரயமானேனாதி கரோந்தோ வா காராபேந்தோ வா பமாணிகம் காரேதப்³ப³ம். தத்ரித³ம் பமாணம் – தீ³க⁴ஸோ த்³வே வித³த்தி²யோ, ஸுக³தவித³த்தி²யா; திரியம் தி³யட்³ட⁴ம். த³ஸா வித³த்தி². தம் அதிக்காமேத்வா கரோதி வா காராபேதி வா, பயோகே³ து³க்கடம். படிலாபே⁴ன சி²ந்தி³த்வா பாசித்தியம் தே³ஸேதப்³ப³ம்.

535. அத்தனா விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. அத்தனா விப்பகதம் பரேஹி பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் பரேஹி பரியோஸாபேதி, ஆபத்தி பாசித்தியஸ்ஸ.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

536. அனாபத்தி பமாணிகம் கரோதி, ஊனகம் கரோதி, அஞ்ஞேன கதம் பமாணாதிக்கந்தம் படிலபி⁴த்வா சி²ந்தி³த்வா பரிபு⁴ஞ்ஜதி, விதானம் வா பூ⁴மத்த²ரணம் வா ஸாணிபாகாரம் வா பி⁴ஸிம் வா பி³ப்³போ³ஹனம் வா கரோதி, உம்மத்தகஸ்ஸ, ஆதி³கம்மிகஸ்ஸாதி.

நிஸீத³னஸிக்கா²பத³ம் நிட்டி²தம் ஸத்தமம்.