8. கண்டு³ப்படிச்சா²தி³ஸிக்கா²பத³ம்

537. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴க³வதா பி⁴க்கூ²னம் கண்டு³ப்படிச்சா²தி³ அனுஞ்ஞாதா ஹோதி. ச²ப்³ப³க்³கி³யா பி⁴க்கூ² – ‘‘ப⁴க³வதா கண்டு³ப்படிச்சா²தி³ அனுஞ்ஞாதா’’தி அப்பமாணிகாயோ கண்டு³ப்படிச்சா²தி³யோ தா⁴ரேந்தி; புரதோபி பச்ச²தோபி ஆகட்³ட⁴ந்தா ஆஹிண்ட³ந்தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அப்பமாணிகாயோ கண்டு³ப்படிச்சா²தி³யோ தா⁴ரேஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, அப்பமாணிகாயோ கண்டு³ப்படிச்சா²தி³யோ தா⁴ரேதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அப்பமாணிகாயோ கண்டு³ப்படிச்சா²தி³யோ தா⁴ரேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

538. ‘‘கண்டு³ப்படிச்சா²தி³ம் பன பி⁴க்கு²னா காரயமானேன பமாணிகா காரேதப்³பா³. தத்ரித³ம் பமாணம் – தீ³க⁴ஸோ சதஸ்ஸோ வித³த்தி²யோ, ஸுக³தவித³த்தி²யா; திரியம் த்³வே வித³த்தி²யோ. தம் அதிக்காமயதோ சே²த³னகம் பாசித்திய’’ந்தி.

539. கண்டு³ப்படிச்சா²தி³ நாம யஸ்ஸ அதோ⁴னாபி⁴ உப்³ப⁴ஜாணுமண்ட³லம் கண்டு³ வா பீளகா வா அஸ்ஸாவோ வா து²ல்லகச்சு² வா ஆபா³தோ⁴, தஸ்ஸ படிச்சா²த³னத்தா²ய.

காரயமானேனாதி கரோந்தோ வா காராபேந்தோ வா. பமாணிகா காரேதப்³பா³. தத்ரித³ம் பமாணம் – தீ³க⁴ஸோ சதஸ்ஸோ வித³த்தி²யோ, ஸுக³தவித³த்தி²யா; திரியம் த்³வே வித³த்தி²யோ. தம் அதிக்காமேத்வா கரோதி வா காராபேதி வா, பயோகே³ து³க்கடம். படிலாபே⁴ன சி²ந்தி³த்வா பாசித்தியம் தே³ஸேதப்³ப³ம்.

540. அத்தனா விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. அத்தனா விப்பகதம் பரேஹி பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் பரேஹி பரியோஸாபேதி, ஆபத்தி பாசித்தியஸ்ஸ.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

541. அனாபத்தி பமாணிகம் கரோதி, ஊனகம் கரோதி, அஞ்ஞேன கதம் பமாணாதிக்கந்தம் படிலபி⁴த்வா சி²ந்தி³த்வா பரிபு⁴ஞ்ஜதி, விதானம் வா பூ⁴மத்த²ரணம் வா ஸாணிபாகாரம் வா பி⁴ஸிம் வா பி³ப்³போ³ஹனம் வா கரோதி, உம்மத்தகஸ்ஸ, ஆதி³கம்மிகஸ்ஸாதி.

கண்டு³ப்படிச்சா²தி³ஸிக்கா²பத³ம் நிட்டி²தம் அட்ட²மம்.