6. தூலோனத்³த⁴ஸிக்கா²பத³ம்

526. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² மஞ்சம்பி பீட²ம்பி தூலோனத்³த⁴ம் காராபேந்தி. மனுஸ்ஸா விஹாரசாரிகம் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா மஞ்சம்பி பீட²ம்பி தூலோனத்³த⁴ம் காராபேஸ்ஸந்தி, ஸேய்யதா²பி கி³ஹீ காமபோ⁴கி³னோ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² மஞ்சம்பி பீட²ம்பி தூலோனத்³த⁴ம் காராபேஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, மஞ்சம்பி பீட²ம்பி தூலோனத்³த⁴ம் காராபேதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, மஞ்சம்பி பீட²ம்பி தூலோனத்³த⁴ம் காராபேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

527. ‘‘யோ பன பி⁴க்கு² மஞ்சம் வா பீட²ம் வா தூலோனத்³த⁴ம் காராபேய்ய, உத்³தா³லனகம் பாசித்திய’’ந்தி.

528. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

மஞ்சோ நாம சத்தாரோ மஞ்சா – மஸாரகோ, பு³ந்தி³காப³த்³தோ⁴, குளீரபாத³கோ, ஆஹச்சபாத³கோ.

பீட²ம் நாம சத்தாரி பீடா²னி – மஸாரகம், பு³ந்தி³காப³த்³த⁴ம், குளீரபாத³கம், ஆஹச்சபாத³கம்.

தூலம் நாம தீணி தூலானி – ருக்க²தூலம், லதாதூலம், போடகிதூலம்.

காராபேய்யாதி கரோதி வா காராபேதி வா, பயோகே³ து³க்கடம். படிலாபே⁴ன உத்³தா³லேத்வா பாசித்தியம் தே³ஸேதப்³ப³ம்.

529. அத்தனா விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. அத்தனா விப்பகதம் பரேஹி பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் பரேஹி பரியோஸாபேதி, ஆபத்தி பாசித்தியஸ்ஸ.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

530. அனாபத்தி ஆயோகே³, காயப³ந்த⁴னே, அம்ஸப³த்³த⁴கே, பத்தத²விகாய, பரிஸ்ஸாவனே, பி³ப்³போ³ஹனம் கரோதி, அஞ்ஞேன கதம் படிலபி⁴த்வா உத்³தா³லேத்வா பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.

தூலோனத்³த⁴ஸிக்கா²பத³ம் நிட்டி²தம் ச²ட்ட²ம்.