5. மஞ்சபீட²ஸிக்கா²பத³ம்

521. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ உச்சே மஞ்சே ஸயதி. அத² கோ² ப⁴க³வா ஸம்ப³ஹுலேஹி பி⁴க்கூ²ஹி ஸத்³தி⁴ம் ஸேனாஸனசாரிகம் ஆஹிண்ட³ந்தோ யேனாயஸ்மதோ உபனந்த³ஸ்ஸ ஸக்யபுத்தஸ்ஸ விஹாரோ தேனுபஸங்கமி. அத்³த³ஸா கோ² ஆயஸ்மா உபனந்தோ³ ஸக்யபுத்தோ ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான ப⁴க³வந்தம் ஏதத³வோச – ‘‘ஆக³ச்ச²து மே, ப⁴ந்தே, ப⁴க³வா ஸயனம் பஸ்ஸதூ’’தி. அத² கோ² ப⁴க³வா ததோவ படினிவத்தித்வா பி⁴க்கூ² ஆமந்தேஸி – ‘‘ஆஸயதோ, பி⁴க்க²வே, மோக⁴புரிஸோ வேதி³தப்³போ³’’தி. அத² கோ² ப⁴க³வா ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா து³ப்³ப⁴ரதாய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

522. ‘‘நவம் பன பி⁴க்கு²னா மஞ்சம் வா பீட²ம் வா காரயமானேன அட்ட²ங்கு³லபாத³கம் காரேதப்³ப³ம் ஸுக³தங்கு³லேன, அஞ்ஞத்ர ஹேட்டி²மாய அடனியா; தம் அதிக்காமயதோ சே²த³னகம் பாசித்திய’’ந்தி.

523. நவம் நாம கரணம் உபாதா³ய வுச்சதி.

மஞ்சோ நாம சத்தாரோ மஞ்சா – மஸாரகோ, பு³ந்தி³காப³த்³தோ⁴, குளீரபாத³கோ, ஆஹச்சபாத³கோ.

பீட²ம் நாம சத்தாரி பீடா²னி – மஸாரகம், பு³ந்தி³காப³த்³த⁴ம், குளீரபாத³கம், ஆஹச்சபாத³கம்.

காரயமானேனாதி கரோந்தோ வா காராபேந்தோ வா.

அட்ட²ங்கு³லபாத³கம் காரேதப்³ப³ம் ஸுக³தங்கு³லேன, அஞ்ஞத்ர ஹேட்டி²மாய அடனியாதி ட²பேத்வா ஹேட்டி²மம் அடனிம்; தம் அதிக்காமேத்வா கரோதி வா காராபேதி வா, பயோகே³ து³க்கடம், படிலாபே⁴ன சி²ந்தி³த்வா பாசித்தியம் தே³ஸேதப்³ப³ம்.

524. அத்தனா விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. அத்தனா விப்பகதம் பரேஹி பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் பரேஹி பரியோஸாபேதி, ஆபத்தி பாசித்தியஸ்ஸ.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

525. அனாபத்தி பமாணிகம் கரோதி, ஊனகம் கரோதி, அஞ்ஞேன கதம் பமாணாதிக்கந்தம் படிலபி⁴த்வா சி²ந்தி³த்வா பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.

மஞ்சபீட²ஸிக்கா²பத³ம் நிட்டி²தம் பஞ்சமம்.