4. ஸூசிக⁴ரஸிக்கா²பத³ம்

516. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. தேன கோ² பன ஸமயேன அஞ்ஞதரேன த³ந்தகாரேன பி⁴க்கூ² பவாரிதா ஹோந்தி – ‘‘யேஸம் அய்யானம் ஸூசிக⁴ரேன அத்தோ² அஹம் ஸூசிக⁴ரேனா’’தி. தேன கோ² பன ஸமயேன பி⁴க்கூ² ப³ஹூ ஸூசிக⁴ரே விஞ்ஞாபேந்தி. யேஸம் கு²த்³த³கா ஸூசிக⁴ரா தே மஹந்தே ஸூசிக⁴ரே விஞ்ஞாபேந்தி. யேஸம் மஹந்தா ஸூசிக⁴ரா தே கு²த்³த³கே ஸூசிக⁴ரே விஞ்ஞாபேந்தி. அத² கோ² ஸோ த³ந்தகாரோ பி⁴க்கூ²னம் ப³ஹூ ஸூசிக⁴ரே கரோந்தோ ந ஸக்கோதி அஞ்ஞம் விக்காயிகம் ப⁴ண்ட³ம் காதும், அத்தனாபி ந யாபேதி, புத்ததா³ரோபிஸ்ஸ கிலமதி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தம் ஜானித்வா ப³ஹூ ஸூசிக⁴ரே விஞ்ஞாபேஸ்ஸந்தி! அயம் இமேஸம் ப³ஹூ ஸூசிக⁴ரே கரோந்தோ ந ஸக்கோதி அஞ்ஞம் விக்காயிகம் ப⁴ண்ட³ம் காதும், அத்தனாபி ந யாபேதி, புத்ததா³ரோபிஸ்ஸ கிலமதீ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² ந மத்தம் ஜானித்வா ப³ஹூ ஸூசிக⁴ரே விஞ்ஞாபேஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கூ² ந மத்தம் ஜானித்வா ப³ஹூ ஸூசிக⁴ரே விஞ்ஞாபேந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா ந மத்தம் ஜானித்வா ப³ஹூ ஸூசிக⁴ரே விஞ்ஞாபேஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

517. ‘‘யோ பன பி⁴க்கு² அட்டி²மயம் வா த³ந்தமயம் வா விஸாணமயம் வா ஸூசிக⁴ரம் காராபேய்ய பே⁴த³னகம், பாசித்திய’’ந்தி.

518. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அட்டி² நாம யம் கிஞ்சி அட்டி².

த³ந்தோ நாம ஹத்தி²த³ந்தோ வுச்சதி.

விஸாணம் நாம யம் கிஞ்சி விஸாணம்.

காராபேய்யாதி கரோதி வா காராபேதி வா, பயோகே³ து³க்கடம். படிலாபே⁴ன பி⁴ந்தி³த்வா பாசித்தியம் தே³ஸேதப்³ப³ம்.

519. அத்தனா விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. அத்தனா விப்பகதம் பரேஹி பரியோஸாபேதி [பரியோஸாவாபேதி (க.)], ஆபத்தி பாசித்தியஸ்ஸ. பரேஹி விப்பகதம் அத்தனா பரியோஸாபேதி, ஆபத்தி பாசித்தியஸ்ஸ. பரேஹி விப்பகதம் பரேஹி பரியோஸாபேதி [பரியோஸாவாபேதி (க.)], ஆபத்தி பாசித்தியஸ்ஸ.

அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.

520. அனாபத்தி க³ண்டி²காய [க³ண்டி³காய (ஸ்யா.)], அரணிகே, விதே⁴ [வீடே² (ஸீ.), வீதே² (ஸ்யா.)], அஞ்ஜனியா, அஞ்ஜனிஸலாகாய, வாஸிஜடே, உத³கபுஞ்ச²னியா, உம்மத்தகஸ்ஸ, ஆதி³கம்மிகஸ்ஸாதி.

ஸூசிக⁴ரஸிக்கா²பத³ம் நிட்டி²தம் சதுத்த²ம்.