3. விகாலகா³மப்பவிஸனஸிக்கா²பத³ம்

508. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² விகாலே கா³மம் பவிஸித்வா ஸபா⁴யம் நிஸீதி³த்வா அனேகவிஹிதம் திரச்சா²னகத²ம் கதே²ந்தி, ஸேய்யதி²த³ம் – [இமா திரச்சா²னகதா²யோ தீ³. 1.17; ம. நி. 2.223; ஸம். நி.; அ. நி. 10.69] ராஜகத²ம் சோரகத²ம் மஹாமத்தகத²ம் ஸேனாகத²ம் ப⁴யகத²ம் யுத்³த⁴கத²ம் அன்னகத²ம் பானகத²ம் வத்த²கத²ம் ஸயனகத²ம் மாலாகத²ம் க³ந்த⁴கத²ம் ஞாதிகத²ம் யானகத²ம் கா³மகத²ம் நிக³மகத²ம் நக³ரகத²ம் ஜனபத³கத²ம் இத்தி²கத²ம் [இத்தி²கத²ம் புரிஸகத²ம் (க.) மஜ்ஜி²மபண்ணாஸட்ட²கதா² 156 பிட்டே² ஓலோகேதப்³பா³] ஸூரகத²ம் விஸிகா²கத²ம் கும்ப⁴ட்டா²னகத²ம் புப்³ப³பேதகத²ம் நானத்தகத²ம் லோகக்கா²யிகம் ஸமுத்³த³க்கா²யிகம் இதிப⁴வாப⁴வகத²ம் இதி வா. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா விகாலே கா³மம் பவிஸித்வா ஸபா⁴யம் நிஸீதி³த்வா அனேகவிஹிதம் திரச்சா²னகத²ம் கதே²ஸ்ஸந்தி, ஸேய்யதி²த³ம் – ராஜகத²ம் சோரகத²ம்…பே… இதிப⁴வாப⁴வகத²ம் இதி வா, ஸேய்யதா²பி கி³ஹீ காமபோ⁴கி³னோ’’தி!

அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² விகாலே கா³மம் பவிஸித்வா ஸபா⁴யம் நிஸீதி³த்வா அனேகவிஹிதம் திரச்சா²னகத²ம் கதே²ஸ்ஸந்தி, ஸேய்யதி²த³ம் – ராஜகத²ம் சோரகத²ம்…பே… இதிப⁴வாப⁴வகத²ம் இதி வா’’தி…பே… ஸச்சம் கிர தும்ஹே, பி⁴க்க²வே, விகாலே கா³மம் பவிஸித்வா ஸபா⁴யம் நிஸீதி³த்வா அனேகவிஹிதம் திரச்சா²னகத²ம் கதே²த², ஸேய்யதி²த³ம் – ராஜகத²ம் சோரகத²ம்…பே… இதிப⁴வாப⁴வகத²ம் இதி வாதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, விகாலே கா³மம் பவிஸித்வா ஸபா⁴யம் நிஸீதி³த்வா அனேகவிஹிதம் திரச்சா²னகத²ம் கதே²ஸ்ஸத², ஸேய்யதி²த³ம் – ராஜகத²ம் சோரகத²ம்…பே… இதிப⁴வாப⁴வகத²ம் இதி வா! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² விகாலே கா³மம் பவிஸேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

509. தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ ஸாவத்தி²ம் க³ச்ச²ந்தா ஸாயம் அஞ்ஞதரம் கா³மம் உபக³ச்சி²ம்ஸு. மனுஸ்ஸா தே பி⁴க்கூ² பஸ்ஸித்வா ஏதத³வோசும் – ‘‘பவிஸத², ப⁴ந்தே’’தி. அத² கோ² தே பி⁴க்கூ² – ‘‘ப⁴க³வதா படிக்கி²த்தம் விகாலே கா³மம் பவிஸிது’’ந்தி குக்குச்சாயந்தா ந பவிஸிம்ஸு. சோரா தே பி⁴க்கூ² அச்சி²ந்தி³ம்ஸு. அத² கோ² தே பி⁴க்கூ² ஸாவத்தி²ம் க³ந்த்வா பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஆபுச்சா² விகாலே கா³மம் பவிஸிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² அனாபுச்சா² விகாலே கா³மம் பவிஸேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

510. தேன கோ² பன ஸமயேன அஞ்ஞதரோ பி⁴க்கு² கோஸலேஸு ஜனபதே³ ஸாவத்தி²ம் க³ச்ச²ந்தோ ஸாயம் அஞ்ஞதரம் கா³மம் உபக³ச்சி². மனுஸ்ஸா தம் பி⁴க்கு²ம் பஸ்ஸித்வா ஏதத³வோசும் – ‘‘பவிஸத², ப⁴ந்தே’’தி. அத² கோ² ஸோ பி⁴க்கு² – ‘‘ப⁴க³வதா படிக்கி²த்தம் அனாபுச்சா² விகாலே கா³மம் பவிஸிது’’ந்தி குக்குச்சாயந்தோ ந பாவிஸி. சோரா தம் பி⁴க்கு²ம் அச்சி²ந்தி³ம்ஸு. அத² கோ² ஸோ பி⁴க்கு² ஸாவத்தி²ம் க³ந்த்வா பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஸந்தம் பி⁴க்கு²ம் ஆபுச்சா² விகாலே கா³மம் பவிஸிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஸந்தம் பி⁴க்கு²ம் அனாபுச்சா² விகாலே கா³மம் பவிஸேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

511. தேன கோ² பன ஸமயேன அஞ்ஞதரோ பி⁴க்கு² அஹினா த³ட்டோ² ஹோதி. அஞ்ஞதரோ பி⁴க்கு² ‘‘அக்³கி³ம் ஆஹரிஸ்ஸாமீ’’தி கா³மம் க³ச்ச²தி. அத² கோ² ஸோ பி⁴க்கு² – ‘‘ப⁴க³வதா படிக்கி²த்தம் ஸந்தம் பி⁴க்கு²ம் அனாபுச்சா² விகாலே கா³மம் பவிஸிது’’ந்தி குக்குச்சாயந்தோ ந பாவிஸி…பே… ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ததா²ரூபே அச்சாயிகே கரணீயே ஸந்தம் பி⁴க்கு²ம் அனாபுச்சா² விகாலே கா³மம் பவிஸிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

512. ‘‘யோ பன பி⁴க்கு² ஸந்தம் பி⁴க்கு²ம் அனாபுச்சா² விகாலே கா³மம் பவிஸேய்ய, அஞ்ஞத்ர ததா²ரூபா அச்சாயிகா கரணீயா, பாசித்திய’’ந்தி.

513. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஸந்தோ நாம பி⁴க்கு² ஸக்கா ஹோதி ஆபுச்சா² பவிஸிதும்.

அஸந்தோ நாம பி⁴க்கு² ந ஸக்கா ஹோதி ஆபுச்சா² பவிஸிதும்.

விகாலோ நாம மஜ்ஜ²ன்ஹிகே வீதிவத்தே யாவ அருணுக்³க³மனா.

கா³மம் பவிஸேய்யாதி பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ ஆபத்தி பாசித்தியஸ்ஸ. அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸ ஆபத்தி பாசித்தியஸ்ஸ.

அஞ்ஞத்ர ததா²ரூபா அச்சாயிகா கரணீயாதி ட²பேத்வா ததா²ரூபம் அச்சாயிகம் கரணீயம்.

514. விகாலே விகாலஸஞ்ஞீ ஸந்தம் பி⁴க்கு²ம் அனாபுச்சா² கா³மம் பவிஸதி, அஞ்ஞத்ர ததா²ரூபா அச்சாயிகா கரணீயா, ஆபத்தி பாசித்தியஸ்ஸ. விகாலே வேமதிகோ ஸந்தம் பி⁴க்கு²ம் அனாபுச்சா² கா³மம் பவிஸதி, அஞ்ஞத்ர ததா²ரூபா அச்சாயிகா கரணீயா, ஆபத்தி பாசித்தியஸ்ஸ. விகாலே காலஸஞ்ஞீ ஸந்தம் பி⁴க்கு²ம் அனாபுச்சா² கா³மம் பவிஸதி, அஞ்ஞத்ர ததா²ரூபா அச்சாயிகா கரணீயா, ஆபத்தி பாசித்தியஸ்ஸ.

காலே விகாலஸஞ்ஞீ, ஆபத்தி து³க்கடஸ்ஸ. காலே வேமதிகோ, ஆபத்தி து³க்கடஸ்ஸ. காலே காலஸஞ்ஞீ, அனாபத்தி.

515. அனாபத்தி ததா²ரூபே அச்சாயிகே கரணீயே, ஸந்தம் பி⁴க்கு²ம் ஆபுச்சா² பவிஸதி, அஸந்தம் பி⁴க்கு²ம் அனாபுச்சா² பவிஸதி, அந்தராராமம் க³ச்ச²தி, பி⁴க்கு²னுபஸ்ஸயம் க³ச்ச²தி, தித்தி²யஸேய்யம் க³ச்ச²தி, படிக்கமனம் க³ச்ச²தி, கா³மேன மக்³கோ³ ஹோதி, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

விகாலகா³மப்பவிஸனஸிக்கா²பத³ம் நிட்டி²தம் ததியம்.