2. ரதனஸிக்கா²பத³ம்

502. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ பி⁴க்கு² அசிரவதியா நதி³யா நஹாயதி. அஞ்ஞதரோபி ப்³ராஹ்மணோ பஞ்சஸதானம் த²விகம் த²லே நிக்கி²பித்வா அசிரவதியா நதி³யா நஹாயந்தோ விஸ்ஸரித்வா அக³மாஸி. அத² கோ² ஸோ பி⁴க்கு² – ‘‘தஸ்ஸாயம் ப்³ராஹ்மணஸ்ஸ த²விகா, மா இத⁴ நஸ்ஸீ’’தி அக்³க³ஹேஸி. அத² கோ² ஸோ ப்³ராஹ்மணோ ஸரித்வா துரிதோ ஆதா⁴வித்வா தம் பி⁴க்கு²ம் ஏதத³வோச – ‘‘அபி மே, போ⁴, த²விகம் பஸ்ஸேய்யாஸீ’’தி? ‘‘ஹந்த³, ப்³ராஹ்மணா’’தி அதா³ஸி. அத² கோ² தஸ்ஸ ப்³ராஹ்மணஸ்ஸ ஏதத³ஹோஸி – ‘‘கேன நு கோ² அஹம் உபாயேன இமஸ்ஸ பி⁴க்கு²னோ புண்ணபத்தம் ந த³தே³ய்ய’’ந்தி! ‘‘ந மே, போ⁴, பஞ்சஸதானி, ஸஹஸ்ஸம் மே’’தி பலிபு³ந்தே⁴த்வா முஞ்சி. அத² கோ² ஸோ பி⁴க்கு² ஆராமம் க³ந்த்வா பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² ரதனம் உக்³க³ஹேஸ்ஸதீ’’தி…பே… ஸச்சம் கிர த்வம், பி⁴க்கு², ரதனம் உக்³க³ஹேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, ரதனம் உக்³க³ஹேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ரதனம் வா ரதனஸம்மதம் வா உக்³க³ண்ஹேய்ய வா உக்³க³ண்ஹாபேய்ய வா, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

503. தேன கோ² பன ஸமயேன ஸாவத்தி²யா உஸ்ஸவோ ஹோதி. மனுஸ்ஸா அலங்கதப்படியத்தா உய்யானம் க³ச்ச²ந்தி. விஸாகா²பி மிகா³ரமாதா அலங்கதப்படியத்தா ‘‘உய்யானம் க³மிஸ்ஸாமீ’’தி கா³மதோ நிக்க²மித்வா – ‘‘க்யாஹம் கரிஸ்ஸாமி உய்யானம் க³ந்த்வா, யம்னூனாஹம் ப⁴க³வந்தம் பயிருபாஸேய்ய’’ந்தி ஆப⁴ரணம் ஓமுஞ்சித்வா உத்தராஸங்கே³ன ப⁴ண்டி³கம் ப³ந்தி⁴த்வா தா³ஸியா அதா³ஸி – ‘‘ஹந்த³, ஜே, இமம் ப⁴ண்டி³கம் க³ண்ஹாஹீ’’தி. அத² கோ² விஸாகா² மிகா³ரமாதா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² விஸாக²ம் மிகா³ரமாதரம் ப⁴க³வா த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² விஸாகா² மிகா³ரமாதா ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ஸா தா³ஸீ தம் ப⁴ண்டி³கம் விஸ்ஸரித்வா அக³மாஸி. பி⁴க்கூ² பஸ்ஸித்வா ப⁴க³வதோ ஏதமத்த²ம் ஆரோசேஸும். ‘‘தேன ஹி, பி⁴க்க²வே, உக்³க³ஹேத்வா நிக்கி²பதா²’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ரதனம் வா ரதனஸம்மதம் வா அஜ்ஜா²ராமே உக்³க³ஹேத்வா வா உக்³க³ஹாபேத்வா வா நிக்கி²பிதும் – ‘‘யஸ்ஸ ப⁴விஸ்ஸதி ஸோ ஹரிஸ்ஸதீ’’தி. ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ரதனம் வா ரதனஸம்மதம் வா, அஞ்ஞத்ர அஜ்ஜா²ராமா, உக்³க³ண்ஹேய்ய வா உக்³க³ண்ஹாபேய்ய வா, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

504. தேன கோ² பன ஸமயேன காஸீஸு ஜனபதே³ அனாத²பிண்டி³கஸ்ஸ க³ஹபதிஸ்ஸ கம்மந்தகா³மோ ஹோதி. தேன ச க³ஹபதினா அந்தேவாஸீ ஆணத்தோ ஹோதி – ‘‘ஸசே ப⁴த³ந்தா ஆக³ச்ச²ந்தி ப⁴த்தம் கரேய்யாஸீ’’தி. தேன கோ² பன ஸமயேன ஸம்ப³ஹுலா பி⁴க்கூ² காஸீஸு ஜனபதே³ சாரிகம் சரமானா யேன அனாத²பிண்டி³கஸ்ஸ க³ஹபதிஸ்ஸ கம்மந்தகா³மோ தேனுபஸங்கமிம்ஸு. அத்³த³ஸா கோ² ஸோ புரிஸோ தே பி⁴க்கூ² தூ³ரதோவ ஆக³ச்ச²ந்தே. தி³ஸ்வான யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ² அபி⁴வாதே³த்வா ஏதத³வோச – ‘‘அதி⁴வாஸேந்து, ப⁴ந்தே, அய்யா ஸ்வாதனாய க³ஹபதினோ ப⁴த்த’’ந்தி. அதி⁴வாஸேஸும் கோ² தே பி⁴க்கூ² துண்ஹீபா⁴வேன. அத² கோ² ஸோ புரிஸோ தஸ்ஸா ரத்தியா அச்சயேன பணீதம் கா²த³னீயம் போ⁴ஜனீயம் படியாதா³பேத்வா காலம் ஆரோசாபேத்வா அங்கு³லிமுத்³தி³கம் ஓமுஞ்சித்வா தே பி⁴க்கூ² ப⁴த்தேன பரிவிஸித்வா – ‘‘அய்யா பு⁴ஞ்ஜித்வா க³ச்ச²ந்து, அஹம்பி கம்மந்தம் க³மிஸ்ஸாமீ’’தி அங்கு³லிமுத்³தி³கம் விஸ்ஸரித்வா அக³மாஸி. பி⁴க்கூ² பஸ்ஸித்வா – ‘‘ஸசே மயம் க³மிஸ்ஸாம நஸ்ஸிஸ்ஸதாயம் அங்கு³லிமுத்³தி³கா’’தி தத்தே²வ அச்சி²ம்ஸு. அத² கோ² ஸோ புரிஸோ கம்மந்தா ஆக³ச்ச²ந்தோ தே பி⁴க்கூ² பஸ்ஸித்வா ஏதத³வோச – ‘‘கிஸ்ஸ, ப⁴ந்தே, அய்யா இதே⁴வ அச்ச²ந்தீ’’தி? அத² கோ² தே பி⁴க்கூ² தஸ்ஸ புரிஸஸ்ஸ ஏதமத்த²ம் ஆரோசேத்வா ஸாவத்தி²ம் க³ந்த்வா பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ரதனம் வா ரதனஸம்மதம் வா அஜ்ஜா²ராமே வா அஜ்ஜா²வஸதே² வா உக்³க³ஹேத்வா வா உக்³க³ஹாபேத்வா வா நிக்கி²பிதும் – யஸ்ஸ ப⁴விஸ்ஸதி ஸோ ஹரிஸ்ஸதீ’’தி. ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

505. ‘‘யோ பன பி⁴க்கு² ரதனம் வா ரதனஸம்மதம் வா, அஞ்ஞத்ர அஜ்ஜா²ராமா வா அஜ்ஜா²வஸதா² வா, உக்³க³ண்ஹேய்ய வா உக்³க³ண்ஹாபேய்ய வா, பாசித்தியம். ரதனம் வா பன பி⁴க்கு²னா ரதனஸம்மதம் வா அஜ்ஜா²ராமே வா அஜ்ஜா²வஸதே² வா உக்³க³ஹேத்வா வா உக்³க³ஹாபேத்வா வா நிக்கி²பிதப்³ப³ம் – ‘யஸ்ஸ ப⁴விஸ்ஸதி ஸோ ஹரிஸ்ஸதீ’தி. அயம் தத்த² ஸாமீசீ’’தி.

506. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ரதனம் நாம முத்தா மணி வேளுரியோ ஸங்கோ² ஸிலா பவாலம் ரஜதம் ஜாதரூபம் லோஹிதங்கோ [லோஹிதகோ (?)] மஸாரக³ல்லம்.

ரதனஸம்மதம் நாம யம் மனுஸ்ஸானம் உபபோ⁴க³பரிபோ⁴க³ம், ஏதம் ரதனஸம்மதம் நாம.

அஞ்ஞத்ர அஜ்ஜா²ராமா வா அஜ்ஜா²வஸதா² வாதி ட²பேத்வா அஜ்ஜா²ராமம் அஜ்ஜா²வஸத²ம்.

அஜ்ஜா²ராமோ நாம பரிக்கி²த்தஸ்ஸ ஆராமஸ்ஸ அந்தோ ஆராமோ, அபரிக்கி²த்தஸ்ஸ உபசாரோ.

அஜ்ஜா²வஸதோ² நாம பரிக்கி²த்தஸ்ஸ ஆவஸத²ஸ்ஸ அந்தோ ஆவஸதோ², அபரிக்கி²த்தஸ்ஸ உபசாரோ.

உக்³க³ண்ஹேய்யாதி ஸயம் க³ண்ஹாதி, ஆபத்தி பாசித்தியஸ்ஸ.

உக்³க³ண்ஹாபேய்யாதி அஞ்ஞம் கா³ஹாபேதி, ஆபத்தி பாசித்தியஸ்ஸ.

ரதனம் வா பன பி⁴க்கு²னா ரதனஸம்மதம் வா அஜ்ஜா²ராமே வா அஜ்ஜா²வஸதே² வா உக்³க³ஹேத்வா வா உக்³க³ஹாபேத்வா வா நிக்கி²பிதப்³ப³ந்தி ரூபேன வா நிமித்தேன வா ஸஞ்ஞாணம் கத்வா நிக்கி²பித்வா ஆசிக்கி²தப்³ப³ம் – ‘‘யஸ்ஸ ப⁴ண்ட³ம் நட்ட²ம் ஸோ ஆக³ச்ச²தூ’’தி. ஸசே தத்த² ஆக³ச்ச²தி ஸோ வத்தப்³போ³ – ‘‘ஆவுஸோ, கீதி³ஸம் தே ப⁴ண்ட³’’ந்தி? ஸசே ரூபேன வா நிமித்தேன வா ஸம்பாதே³தி தா³தப்³ப³ம், நோ சே ஸம்பாதே³தி ‘‘விசினாஹி ஆவுஸோ’’தி வத்தப்³போ³. தம்ஹா ஆவாஸா பக்கமந்தேன யே தத்த² ஹோந்தி பி⁴க்கூ² பதிரூபா, தேஸம் ஹத்தே² நிக்கி²பித்வா பக்கமிதப்³ப³ம். நோ சே ஹோந்தி பி⁴க்கூ² பதிரூபா, யே தத்த² ஹோந்தி க³ஹபதிகா பதிரூபா, தேஸம் ஹத்தே² நிக்கி²பித்வா பக்கமிதப்³ப³ம்.

அயம் தத்த² ஸாமீசீதி அயம் தத்த² அனுத⁴ம்மதா.

507. அனாபத்தி ரதனம் வா ரதனஸம்மதம் வா அஜ்ஜா²ராமே வா அஜ்ஜா²வஸதே² வா உக்³க³ஹேத்வா வா உக்³க³ஹாபேத்வா வா நிக்கி²பதி – ‘‘யஸ்ஸ ப⁴விஸ்ஸதி ஸோ ஹரிஸ்ஸதீ’’தி, ரதனஸம்மதம் விஸ்ஸாஸம் க³ண்ஹாதி, தாவகாலிகம் க³ண்ஹாதி, பம்ஸுகூலஸஞ்ஞிஸ்ஸ, உம்மத்தகஸ்ஸ, ஆதி³கம்மிகஸ்ஸாதி.

ரதனஸிக்கா²பத³ம் நிட்டி²தம் து³தியம்.