10. சீவரஅபனிதா⁴னஸிக்கா²பத³ம்

377. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸத்தரஸவக்³கி³யா பி⁴க்கூ² அஸன்னிஹிதபரிக்கா²ரா ஹோந்தி. ச²ப்³ப³க்³கி³யா பி⁴க்கூ² ஸத்தரஸவக்³கி³யானம் பி⁴க்கூ²னம் பத்தம்பி சீவரம்பி அபனிதே⁴ந்தி. ஸத்தரஸவக்³கி³யா பி⁴க்கூ² ச²ப்³ப³க்³கி³யே பி⁴க்கூ² ஏதத³வோசும் – ‘‘தே³தா²வுஸோ, அம்ஹாகம் பத்தம்பி சீவரம்பீ’’தி. ச²ப்³ப³க்³கி³யா பி⁴க்கூ² ஹஸந்தி, தே ரோத³ந்தி. பி⁴க்கூ² ஏவமாஹம்ஸு – ‘‘கிஸ்ஸ தும்ஹே, ஆவுஸோ, ரோத³தா²’’தி? ‘‘இமே, ஆவுஸோ, ச²ப்³ப³க்³கி³யா பி⁴க்கூ² அம்ஹாகம் பத்தம்பி சீவரம்பி அபனிதே⁴ந்தீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கூ²னம் பத்தம்பி சீவரம்பி அபனிதே⁴ஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, பி⁴க்கூ²னம் பத்தம்பி சீவரம்பி அபனிதே⁴தா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கூ²னம் பத்தம்பி சீவரம்பி அபனிதே⁴ஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

378. ‘‘யோ பன பி⁴க்கு² பி⁴க்கு²ஸ்ஸ பத்தம் வா சீவரம் வா நிஸீத³னம் வா ஸூசிக⁴ரம் வா காயப³ந்த⁴னம் வா அபனிதே⁴ய்ய வா அபனிதா⁴பேய்ய வா, அந்தமஸோ ஹஸாபேக்கோ²பி, பாசித்திய’’ந்தி.

379. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ஸ்ஸாதி அஞ்ஞஸ்ஸ பி⁴க்கு²ஸ்ஸ.

பத்தோ நாம த்³வே பத்தா – அயோபத்தோ, மத்திகாபத்தோ.

சீவரம் நாம ச²ன்னம் சீவரானம் அஞ்ஞதரம் சீவரம், விகப்பனுபக³ம் பச்சி²மம்.

நிஸீத³னம் நாம ஸத³ஸம் வுச்சதி.

ஸூசிக⁴ரம் நாம ஸஸூசிகம் வா அஸூசிகம் வா.

காயப³ந்த⁴னம் நாம த்³வே காயப³ந்த⁴னானி – பட்டிகா, ஸூகரந்தகம்.

அபனிதே⁴ய்ய வாதி ஸயம் அபனிதே⁴தி, ஆபத்தி பாசித்தியஸ்ஸ.

அபனிதா⁴பேய்ய வாதி அஞ்ஞம் ஆணாபேஸி, ஆபத்தி பாசித்தியஸ்ஸ. அபனிதா⁴பேய்ய வா தி அய்யம் ஆணாபேதி, ஆபத்தி பாசித்தியஸ்ஸ. ஸகிம் ஆணத்தோ ப³ஹுகம்பி அபனிதே⁴தி, ஆபத்தி பாசித்தியஸ்ஸ.

அந்தமஸோ ஹஸாபேக்கோ²பீதி கீளாதி⁴ப்பாயோ.

380. உபஸம்பன்னே உபஸம்பன்னஸஞ்ஞீ பத்தம் வா சீவரம் வா நிஸீத³னம் வா ஸூசிக⁴ரம் வா காயப³ந்த⁴னம் வா அபனிதே⁴தி வா அபனிதா⁴பேதி வா, அந்தமஸோ ஹஸாபேக்கோ²பி, ஆபத்தி பாசித்தியஸ்ஸ. உபஸம்பன்னே வேமதிகோ…பே… உபஸம்பன்னே அனுபஸம்பன்னஸஞ்ஞீ பத்தம் வா சீவரம் வா நிஸீத³னம் வா ஸூசிக⁴ரம் வா காயப³ந்த⁴னம் வா அபனிதே⁴தி வா அபனிதா⁴பேதி வா, அந்தமஸோ ஹஸாபேக்கோ²பி, ஆபத்தி பாசித்தியஸ்ஸ.

அஞ்ஞம் பரிக்கா²ரம் அபனிதே⁴தி வா அபனிதா⁴பேதி வா, அந்தமஸோ ஹஸாபேக்கோ²பி, ஆபத்தி து³க்கடஸ்ஸ. அனுபஸம்பன்னஸ்ஸ பத்தம் வா சீவரம் வா அஞ்ஞம் வா பரிக்கா²ரம் அபனிதே⁴தி வா அபனிதா⁴பேதி வா, அந்தமஸோ ஹஸாபேக்கோ²பி, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

381. அனாபத்தி நஹஸாதி⁴ப்பாயோ, து³ன்னிக்கி²த்தம் படிஸாமேதி, ‘‘த⁴ம்மிம் கத²ம் கத்வா த³ஸ்ஸாமீ’’தி படிஸாமேதி, உம்மத்தகஸ்ஸ, ஆதி³கம்மிகஸ்ஸாதி.

சீவரஅபனிதா⁴னஸிக்கா²பத³ம் நிட்டி²தம் த³ஸமம்.

ஸுராபானவக்³கோ³ ச²ட்டோ².

தஸ்ஸுத்³தா³னம் –

ஸுரா அங்கு³லி ஹாஸோ ச [தோயஞ்ச (இதிபி)], அனாத³ரியஞ்ச பி⁴ம்ஸனம்;

ஜோதினஹானது³ப்³ப³ண்ணம், ஸாமம் அபனிதே⁴ன சாதி.