6. ஸுராபானவக்³கோ³

1. ஸுராபானஸிக்கா²பத³ம்

326. தேன ஸமயேன பு³த்³தோ⁴ ப⁴க³வா சேதியேஸு சாரிகம் சரமானோ யேன ப⁴த்³த³வதிகா தேன பாயாஸி. அத்³த³ஸம்ஸு கோ² கோ³பாலகா பஸுபாலகா கஸ்ஸகா பதா²வினோ ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான ப⁴க³வந்தம் ஏதத³வோசும் – ‘‘மா கோ², ப⁴ந்தே, ப⁴க³வா அம்ப³தித்த²ம் அக³மாஸி. அம்ப³தித்தே², ப⁴ந்தே, ஜடிலஸ்ஸ அஸ்ஸமே நாகோ³ படிவஸதி இத்³தி⁴மா ஆஸிவிஸோ [ஆஸீவிஸோ (ஸீ. ஸ்யா.)] கோ⁴ரவிஸோ. ஸோ ப⁴க³வந்தம் மா விஹேடே²ஸீ’’தி. ஏவம் வுத்தே ப⁴க³வா துண்ஹீ அஹோஸி. து³தியம்பி கோ²…பே… ததியம்பி கோ² கோ³பாலகா பஸுபாலகா கஸ்ஸகா பதா²வினோ ப⁴க³வந்தம் ஏதத³வோசும் – ‘‘மா கோ², ப⁴ந்தே, ப⁴க³வா அம்ப³தித்த²ம் அக³மாஸி. அம்ப³தித்தே², ப⁴ந்தே, ஜடிலஸ்ஸ அஸ்ஸமே நாகோ³ படிவஸதி இத்³தி⁴மா ஆஸிவிஸோ கோ⁴ரவிஸோ. ஸோ ப⁴க³வந்தம் மா விஹேடே²ஸீ’’தி. ததியம்பி கோ² ப⁴க³வா துண்ஹீ அஹோஸி.

அத² கோ² ப⁴க³வா அனுபுப்³பே³ன சாரிகம் சரமானோ யேன ப⁴த்³த³வதிகா தத³வஸரி. தத்ர ஸுத³ம் ப⁴க³வா ப⁴த்³த³வதிகாயம் விஹரதி. அத² கோ² ஆயஸ்மா ஸாக³தோ யேன அம்ப³தித்த²ஸ்ஸ [அம்ப³தித்த²கஸ்ஸ (ஸீ.), அம்ப³தித்த²ம் (ஸ்யா.)] ஜடிலஸ்ஸ அஸ்ஸமோ தேனுபஸங்கமி; உபஸங்கமித்வா அக்³யாகா³ரம் பவிஸித்வா திணஸந்தா²ரகம் பஞ்ஞபேத்வா நிஸீதி³ பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. அத்³த³ஸா கோ² ஸோ நாகோ³ ஆயஸ்மந்தம் ஸாக³தம் பவிட்ட²ம். தி³ஸ்வான து³ம்மனோ [து³க்கீ² து³ம்மனோ (ஸீ. ஸ்யா.)] பதூ⁴பாயி [பதூ⁴பாஸி (ஸ்யா. க.)]. ஆயஸ்மாபி ஸாக³தோ பதூ⁴பாயி [பதூ⁴பாஸி (ஸ்யா. க.)]. அத² கோ² ஸோ நாகோ³ மக்க²ம் அஸஹமானோ பஜ்ஜலி. ஆயஸ்மாபி ஸாக³தோ தேஜோதா⁴தும் ஸமாபஜ்ஜித்வா பஜ்ஜலி. அத² கோ² ஆயஸ்மா ஸாக³தோ தஸ்ஸ நாக³ஸ்ஸ தேஜஸா தேஜம் பரியாதி³யித்வா யேன ப⁴த்³த³வதிகா தேனுபஸங்கமி. அத² கோ² ப⁴க³வா ப⁴த்³த³வதிகாயம் யதா²பி⁴ரந்தம் விஹரித்வா யேன கோஸம்பீ³ தேன சாரிகம் பக்காமி. அஸ்ஸோஸும் கோ² கோஸம்பி³கா உபாஸகா – ‘‘அய்யோ கிர ஸாக³தோ அம்ப³தித்தி²கேன நாகே³ன ஸத்³தி⁴ம் ஸங்கா³மேஸீ’’தி.

அத² கோ² ப⁴க³வா அனுபுப்³பே³ன சாரிகம் சரமானோ யேன கோஸம்பீ³ தத³வஸரி. அத² கோ² கோஸம்பி³கா உபாஸகா ப⁴க³வதோ பச்சுக்³க³மனம் கரித்வா யேனாயஸ்மா ஸாக³தோ தேனுபஸங்கமிம்ஸு; உபஸங்கமித்வா ஆயஸ்மந்தம் ஸாக³தம் அபி⁴வாதே³த்வா ஏகமந்தம் அட்ட²ம்ஸு. ஏகமந்தம் டி²தா கோ² கோஸம்பி³கா உபாஸகா ஆயஸ்மந்தம் ஸாக³தம் ஏதத³வோசும் – ‘‘கிம், ப⁴ந்தே, அய்யானம் து³ல்லப⁴ஞ்ச மனாபஞ்ச, கிம் படியாதே³மா’’தி? ஏவம் வுத்தே ச²ப்³ப³க்³கி³யா பி⁴க்கூ² கோஸம்பி³கே உபாஸகே ஏதத³வோசும் – ‘‘அத்தா²வுஸோ, காபோதிகா நாம பஸன்னா பி⁴க்கூ²னம் து³ல்லபா⁴ ச மனாபா ச, தம் படியாதே³தா²’’தி. அத² கோ² கோஸம்பி³கா உபாஸகா க⁴ரே க⁴ரே காபோதிகம் பஸன்னம் படியாதே³த்வா ஆயஸ்மந்தம் ஸாக³தம் பிண்டா³ய பவிட்ட²ம் தி³ஸ்வான ஆயஸ்மந்தம் ஸாக³தம் ஏதத³வோசும் – ‘‘பிவது, ப⁴ந்தே, அய்யோ ஸாக³தோ காபோதிகம் பஸன்னம், பிவது, ப⁴ந்தே, அய்யோ ஸாக³தோ காபோதிகம் பஸன்ன’’ந்தி. அத² கோ² ஆயஸ்மா ஸாக³தோ க⁴ரே க⁴ரே காபோதிகம் பஸன்னம் பிவித்வா நக³ரம்ஹா நிக்க²மந்தோ நக³ரத்³வாரே பரிபதி.

அத² கோ² ப⁴க³வா ஸம்ப³ஹுலேஹி பி⁴க்கூ²ஹி ஸத்³தி⁴ம் நக³ரம்ஹா நிக்க²மந்தோ அத்³த³ஸ ஆயஸ்மந்தம் ஸாக³தம் நக³ரத்³வாரே பரிபதந்தம். தி³ஸ்வான பி⁴க்கூ² ஆமந்தேஸி – ‘‘க³ண்ஹத², பி⁴க்க²வே, ஸாக³த’’ந்தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ படிஸ்ஸுணித்வா ஆயஸ்மந்தம் ஸாக³தம் ஆராமம் நேத்வா யேன ப⁴க³வா தேன ஸீஸம் கத்வா நிபாதேஸும். அத² கோ² ஆயஸ்மா ஸாக³தோ பரிவத்தித்வா யேன ப⁴க³வா தேன பாதே³ கரித்வா ஸேய்யம் கப்பேஸி. அத² கோ² ப⁴க³வா பி⁴க்கூ² ஆமந்தேஸி – ‘‘நனு, பி⁴க்க²வே, புப்³பே³ ஸாக³தோ ததா²க³தே ஸகா³ரவோ அஹோஸி ஸப்பதிஸ்ஸோ’’தி? ‘‘ஏவம், ப⁴ந்தே’’. ‘‘அபி நு கோ², பி⁴க்க²வே, ஸாக³தோ ஏதரஹி ததா²க³தே ஸகா³ரவோ ஸப்பதிஸ்ஸோ’’தி? ‘‘நோ ஹேதம், ப⁴ந்தே’’. ‘‘நனு, பி⁴க்க²வே, ஸாக³தோ அம்ப³தித்தி²கேன நாகே³ன [டே³ட்³டு³பே⁴னாபி (ஸீ. ஸ்யா.)] ஸத்³தி⁴ம் ஸங்கா³மேஸீ’’தி? ‘‘ஏவம், ப⁴ந்தே’’. ‘‘அபி நு கோ², பி⁴க்க²வே, ஸாக³தோ ஏதரஹி பஹோதி நாகே³ன ஸத்³தி⁴ம் ஸங்கா³மேது’’ந்தி? ‘‘நோ ஹேதம், ப⁴ந்தே’’. ‘‘அபி நு கோ², பி⁴க்க²வே, தம் பாதப்³ப³ம் யம் பிவித்வா விஸஞ்ஞீ அஸ்ஸா’’தி? ‘‘நோ ஹேதம், ப⁴ந்தே’’. ‘‘அனனுச்ச²விகம், பி⁴க்க²வே, ஸாக³தஸ்ஸ அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம, பி⁴க்க²வே, ஸாக³தோ மஜ்ஜம் பிவிஸ்ஸதி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

327. ‘‘ஸுராமேரயபானே பாசித்திய’’ந்தி.

328. ஸுரா நாம பிட்ட²ஸுரா பூவஸுரா ஓத³னஸுரா கிண்ணபக்கி²த்தா ஸம்பா⁴ரஸம்யுத்தா.

மேரயோ நாம புப்பா²ஸவோ ப²லாஸவோ மத்⁴வாஸவோ கு³ளாஸவோ ஸம்பா⁴ரஸம்யுத்தோ.

பிவேய்யாதி அந்தமஸோ குஸக்³கே³னபி பிவதி, ஆபத்தி பாசித்தியஸ்ஸ.

மஜ்ஜே மஜ்ஜஸஞ்ஞீ பிவதி, ஆபத்தி பாசித்தியஸ்ஸ. மஜ்ஜே வேமதிகோ பிவதி, ஆபத்தி பாசித்தியஸ்ஸ. மஜ்ஜே அமஜ்ஜஸஞ்ஞீ பிவதி, ஆபத்தி பாசித்தியஸ்ஸ.

அமஜ்ஜே மஜ்ஜஸஞ்ஞீ, ஆபத்தி து³க்கடஸ்ஸ. அமஜ்ஜே வேமதிகோ, ஆபத்தி து³க்கடஸ்ஸ. அமஜ்ஜே அமஜ்ஜஸஞ்ஞீ, அனாபத்தி.

329. அனாபத்தி அமஜ்ஜஞ்ச ஹோதி மஜ்ஜவண்ணம் மஜ்ஜக³ந்த⁴ம் மஜ்ஜரஸம் தம் பிவதி, ஸூபஸம்பாகே, மம்ஸஸம்பாகே, தேலஸம்பாகே, ஆமலகபா²ணிதே, அமஜ்ஜம் அரிட்ட²ம் பிவதி, உம்மத்தகஸ்ஸ, ஆதி³கம்மிகஸ்ஸாதி.

ஸுராபானஸிக்கா²பத³ம் நிட்டி²தம் பட²மம்.

2. அங்கு³லிபதோத³கஸிக்கா²பத³ம்

330. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² ஸத்தரஸவக்³கி³யம் பி⁴க்கு²ம் அங்கு³லிபதோத³கேன ஹாஸேஸும். ஸோ பி⁴க்கு² உத்தந்தோ அனஸ்ஸாஸகோ காலமகாஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²ம் அங்கு³லிபதோத³கேன ஹாஸேஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, பி⁴க்கு²ம் அங்கு³லிபதோத³கேன ஹாஸேதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²ம் அங்கு³லிபதோத³கேன ஹாஸேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

331. ‘‘அங்கு³லிபதோத³கே பாசித்திய’’ந்தி.

332. அங்கு³லிபதோத³கோ நாம [அங்கு³லிபதோத³கோ நாம அங்கு³லியாபி துத³ந்தி (ஸ்யா.)] உபஸம்பன்னோ உபஸம்பன்னம் ஹஸாதி⁴ப்பாயோ [ஹஸ்ஸாதி⁴ப்பாயோ (ஸீ. ஸ்யா.)] காயேன காயம் ஆமஸதி, ஆபத்தி பாசித்தியஸ்ஸ. உபஸம்பன்னே உபஸம்பன்னஸஞ்ஞீ அங்கு³லிபதோத³கேன ஹாஸேதி, ஆபத்தி பாசித்தியஸ்ஸ. உபஸம்பன்னே வேமதிகோ அங்கு³லிபதோத³கேன ஹாஸேதி, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞீ அங்கு³லிபதோத³கேன ஹாஸேதி, ஆபத்தி பாசித்தியஸ்ஸ.

காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன காயம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன நிஸ்ஸக்³கி³யம் ஆமஸதி, ஆபத்தி து³க்கடஸ்ஸ.

333. அனுபஸம்பன்னம் காயேன காயம் ஆமஸதி, ஆபத்தி து³க்கடஸ்ஸ. காயேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயம் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன காயம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன காயபடிப³த்³த⁴ம் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன நிஸ்ஸக்³கி³யம் ஆமஸதி, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

334. அனாபத்தி ந ஹஸாதி⁴ப்பாயோ, ஸதி கரணீயே ஆமஸதி, உம்மத்தகஸ்ஸ, ஆதி³கம்மிகஸ்ஸாதி.

அங்கு³லிபதோத³கஸிக்கா²பத³ம் நிட்டி²தம் து³தியம்.

3. ஹஸத⁴ம்மஸிக்கா²பத³ம்

335. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸத்தரஸவக்³கி³யா பி⁴க்கூ² அசிரவதியா நதி³யா உத³கே கீளந்தி. தேன கோ² பன ஸமயேன ராஜா பஸேனதி³ கோஸலோ மல்லிகாய தே³வியா ஸத்³தி⁴ம் உபரிபாஸாத³வரக³தோ ஹோதி. அத்³த³ஸா கோ² ராஜா பஸேனதி³ கோஸலோ ஸத்தரஸவக்³கி³யே பி⁴க்கூ² அசிரவதியா நதி³யா உத³கே கீளந்தே. தி³ஸ்வான மல்லிகம் தே³விம் ஏதத³வோச – ‘‘ஏதே தே, மல்லிகே, அரஹந்தோ உத³கே கீளந்தீ’’தி. ‘‘நிஸ்ஸம்ஸயம் கோ², மஹாராஜ, ப⁴க³வதா ஸிக்கா²பத³ம் அபஞ்ஞத்தம். தே வா பி⁴க்கூ² அப்பகதஞ்ஞுனோ’’தி. அத² கோ² ரஞ்ஞோ பஸேனதி³ஸ்ஸ கோஸலஸ்ஸ ஏதத³ஹோஸி – ‘‘கேன நு கோ² அஹம் உபாயேன ப⁴க³வதோ ச ந ஆரோசேய்யம், ப⁴க³வா ச ஜானேய்ய இமே பி⁴க்கூ² உத³கே கீளிதா’’தி? அத² கோ² ராஜா பஸேனதி³ கோஸலோ ஸத்தரஸவக்³கி³யே பி⁴க்கூ² பக்கோஸாபேத்வா மஹந்தம் கு³ளபிண்ட³ம் அதா³ஸி – ‘‘இமம், ப⁴ந்தே, கு³ளபிண்ட³ம் ப⁴க³வதோ தே³தா²’’தி. ஸத்தரஸவக்³கி³யா பி⁴க்கூ² தம் கு³ளபிண்ட³ம் ஆதா³ய யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் ஏதத³வோசும் – ‘‘இமம், ப⁴ந்தே, கு³ளபிண்ட³ம் ராஜா பஸேனதி³ கோஸலோ ப⁴க³வதோ தே³தீ’’தி. ‘‘கஹம் பன தும்ஹே, பி⁴க்க²வே, ராஜா அத்³த³ஸா’’தி. ‘‘அசிரவதியா நதி³யா, ப⁴க³வா, உத³கே கீளந்தே’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, உத³கே கீளிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

336. ‘‘உத³கே ஹஸத⁴ம்மே [ஹஸ்ஸத⁴ம்மே (ஸீ. ஸ்யா.)] பாசித்திய’’ந்தி.

337. உத³கே ஹஸத⁴ம்மோ நாம உபரிகோ³ப்ப²கே உத³கே ஹஸாதி⁴ப்பாயோ நிமுஜ்ஜதி வா உம்முஜ்ஜதி வா பலவதி வா, ஆபத்தி பாசித்தியஸ்ஸ.

338. உத³கே ஹஸத⁴ம்மே ஹஸத⁴ம்மஸஞ்ஞீ, ஆபத்தி பாசித்தியஸ்ஸ. உத³கே ஹஸத⁴ம்மே வேமதிகோ, ஆபத்தி பாசித்தியஸ்ஸ. உத³கே ஹஸத⁴ம்மே அஹஸத⁴ம்மஸஞ்ஞீ, ஆபத்தி பாசித்தியஸ்ஸ.

ஹேட்டா²கோ³ப்ப²கே உத³கே கீளதி, ஆபத்தி து³க்கடஸ்ஸ. உத³கே நாவாய கீளதி, ஆபத்தி து³க்கடஸ்ஸ. ஹத்தே²ன வா பாதே³ன வா கட்டே²ன வா கட²லாய வா உத³கம் பஹரதி, ஆபத்தி து³க்கடஸ்ஸ. பா⁴ஜனக³தம் உத³கம் வா கஞ்ஜிகம் வா கீ²ரம் வா தக்கம் வா ரஜனம் வா பஸ்ஸாவம் வா சிக்க²ல்லம் வா கீளதி, ஆபத்தி து³க்கடஸ்ஸ.

உத³கே அஹஸத⁴ம்மே ஹஸத⁴ம்மஸஞ்ஞீ, ஆபத்தி து³க்கடஸ்ஸ. உத³கே அஹஸத⁴ம்மே வேமதிகோ, ஆபத்தி து³க்கடஸ்ஸ. உத³கே அஹஸத⁴ம்மே அஹஸத⁴ம்மஸஞ்ஞீ, அனாபத்தி.

339. அனாபத்தி ந ஹஸாதி⁴ப்பாயோ, ஸதி கரணீயே உத³கம் ஓதரித்வா நிமுஜ்ஜதி வா உம்முஜ்ஜதி வா பலவதி வா, பாரம் க³ச்ச²ந்தோ நிமுஜ்ஜதி வா உம்முஜ்ஜதி வா பலவதி வா, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

ஹஸத⁴ம்மஸிக்கா²பத³ம் நிட்டி²தம் ததியம்.

4. அனாத³ரியஸிக்கா²பத³ம்

340. தேன ஸமயேன பு³த்³தோ⁴ ப⁴க³வா கோஸம்பி³யம் விஹரதி கோ⁴ஸிதாராமே. தேன கோ² பன ஸமயேன ஆயஸ்மா ச²ன்னோ அனாசாரம் ஆசரதி. பி⁴க்கூ² ஏவமாஹம்ஸு – ‘‘மாவுஸோ ச²ன்ன, ஏவரூபம் அகாஸி. நேதம் கப்பதீ’’தி. ஸோ அனாத³ரியம் படிச்ச கரோதியேவ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா ச²ன்னோ அனாத³ரியம் கரிஸ்ஸதீ’’தி…பே… ஸச்சம் கிர த்வம், ச²ன்ன, அனாத³ரியம் கரோஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, அனாத³ரியம் கரிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

341. ‘‘அனாத³ரியே பாசித்திய’’ந்தி.

342. அனாத³ரியம் நாம த்³வே அனாத³ரியானி – புக்³க³லானாத³ரியஞ்ச த⁴ம்மானாத³ரியஞ்ச.

புக்³க³லானாத³ரியம் நாம உபஸம்பன்னேன பஞ்ஞத்தேன வுச்சமானோ – ‘‘அயம் உக்கி²த்தகோ வா வம்பி⁴தோ வா க³ரஹிதோ வா, இமஸ்ஸ வசனம் அகதம் ப⁴விஸ்ஸதீ’’தி அனாத³ரியம் கரோதி, ஆபத்தி பாசித்தியஸ்ஸ.

த⁴ம்மானாத³ரியம் நாம உபஸம்பன்னேன பஞ்ஞத்தேன வுச்சமானோ ‘‘கதா²யம் நஸ்ஸேய்ய வா வினஸ்ஸேய்ய வா அந்தரதா⁴யேய்ய வா’’, தம் வா ந ஸிக்கி²துகாமோ அனாத³ரியம் கரோதி, ஆபத்தி பாசித்தியஸ்ஸ.

343. உபஸம்பன்னே உபஸம்பன்னஸஞ்ஞீ அனாத³ரியம் கரோதி, ஆபத்தி பாசித்தியஸ்ஸ. உபஸம்பன்னே வேமதிகோ அனாத³ரியம் கரோதி, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞீ அனாத³ரியம் கரோதி, ஆபத்தி பாசித்தியஸ்ஸ.

அபஞ்ஞத்தேன வுச்சமானோ – ‘‘இத³ம் ந ஸல்லேகா²ய ந து⁴தத்தா²ய ந பாஸாதி³கதாய ந அபசயாய ந வீரியாரம்பா⁴ய ஸம்வத்ததீ’’தி அனாத³ரியம் கரோதி, ஆபத்தி து³க்கடஸ்ஸ. அனுபஸம்பன்னேன பஞ்ஞத்தேன வா அபஞ்ஞத்தேன வா வுச்சமானோ – ‘‘இத³ம் ந ஸல்லேகா²ய ந து⁴தத்தா²ய ந பாஸாதி³கதாய ந அபசயாய ந வீரியாரம்பா⁴ய ஸம்வத்ததீ’’தி அனாத³ரியம் கரோதி, ஆபத்தி து³க்கடஸ்ஸ.

அனுபஸம்பன்னே உபஸம்பன்னஸஞ்ஞீ ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

344. அனாபத்தி – ‘‘ஏவம் அம்ஹாகம் ஆசரியானம் உக்³க³ஹோ பரிபுச்சா²’’தி ப⁴ணதி, உம்மத்தகஸ்ஸ, ஆதி³கம்மிகஸ்ஸாதி.

அனாத³ரியஸிக்கா²பத³ம் நிட்டி²தம் சதுத்த²ம்.

5. பி⁴ம்ஸாபனஸிக்கா²பத³ம்

345. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² ஸத்தரஸவக்³கி³யே பி⁴க்கூ² பி⁴ம்ஸாபேந்தி. தே பி⁴ம்ஸாபீயமானா ரோத³ந்தி. பி⁴க்கூ² ஏவமாஹம்ஸு – ‘‘கிஸ்ஸ தும்ஹே, ஆவுஸோ, ரோத³தா²’’தி? ‘‘இமே, ஆவுஸோ, ச²ப்³ப³க்³கி³யா பி⁴க்கூ² அம்ஹே பி⁴ம்ஸாபேந்தீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²ம் பி⁴ம்ஸாபேஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, பி⁴க்கு²ம் பி⁴ம்ஸாபேதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²ம் பி⁴ம்ஸாபேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

346. ‘‘யோ பன பி⁴க்கு² பி⁴க்கு²ம் பி⁴ம்ஸாபேய்ய, பாசித்திய’’ந்தி.

347. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ந்தி அஞ்ஞம் பி⁴க்கு²ம்.

பி⁴ம்ஸாபேய்யாதி உபஸம்பன்னோ உபஸம்பன்னம் பி⁴ம்ஸாபேதுகாமோ ரூபம் வா ஸத்³த³ம் வா க³ந்த⁴ம் வா ரஸம் வா போ²ட்ட²ப்³ப³ம் வா உபஸம்ஹரதி. பா⁴யேய்ய வா ஸோ ந வா பா⁴யேய்ய, ஆபத்தி பாசித்தியஸ்ஸ. சோரகந்தாரம் வா வாளகந்தாரம் வா பிஸாசகந்தாரம் வா ஆசிக்க²தி. பா⁴யேய்ய வா ஸோ ந வா பா⁴யேய்ய, ஆபத்தி பாசித்தியஸ்ஸ.

348. உபஸம்பன்னே உபஸம்பன்னஸஞ்ஞீ பி⁴ம்ஸாபேதி, ஆபத்தி பாசித்தியஸ்ஸ. உபஸம்பன்னே வேமதிகோ பி⁴ம்ஸாபேதி, ஆபத்தி பாசித்தியஸ்ஸ. ‘உபஸம்பன்னே அனுபஸம்பன்னஸஞ்ஞீ பி⁴ம்ஸாபேதி, ஆபத்தி பாசித்தியஸ்ஸ.

அனுபஸம்பன்னம் பி⁴ம்ஸாபேதுகாமோ ரூபம் வா ஸத்³த³ம் வா க³ந்த⁴ம் வா ரஸம் வா போ²ட்ட²ப்³ப³ம் வா உபஸம்ஹரதி. பா⁴யேய்ய வா ஸோ ந வா பா⁴யேய்ய, ஆபத்தி து³க்கடஸ்ஸ. சோரகந்தாரம் வா வாளகந்தாரம் வா பிஸாசகந்தாரம் வா ஆசிக்க²தி. பா⁴யேய்ய வா ஸோ ந வா பா⁴யேய்ய, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

349. அனாபத்தி ந பி⁴ம்ஸாபேதுகாமோ ரூபம் வா ஸத்³த³ம் வா க³ந்த⁴ம் வா ரஸம் வா போ²ட்ட²ப்³ப³ம் வா உபஸம்ஹரதி, சோரகந்தாரம் வா வாளகந்தாரம் வா பிஸாசகந்தாரம் வா ஆசிக்க²தி, உம்மத்தகஸ்ஸ, ஆதி³கம்மிகஸ்ஸாதி.

பி⁴ம்ஸாபனஸிக்கா²பத³ம் நிட்டி²தம் பஞ்சமம்.

6. ஜோதிகஸிக்கா²பத³ம்

350. தேன ஸமயேன பு³த்³தோ⁴ ப⁴க³வா ப⁴க்³கே³ஸு விஹரதி ஸும்ஸுமாரகி³ரே [ஸும்ஸுமாரகி³ரே (ஸீ. ஸ்யா.) ஸம்ஸுமாரகி³ரே (க.)] பே⁴ஸகளாவனே மிக³தா³யே. தேன கோ² பன ஸமயேன பி⁴க்கூ² ஹேமந்திகே காலே அஞ்ஞதரம் மஹந்தம் ஸுஸிரகட்ட²ம் ஜோதிம் ஸமாத³ஹித்வா விஸிப்³பே³ஸும். தஸ்மிஞ்ச ஸுஸிரே கண்ஹஸப்போ அக்³கி³னா ஸந்தத்தோ நிக்க²மித்வா பி⁴க்கூ² பரிபாதேஸி. பி⁴க்கூ² தஹம் தஹம் உபதா⁴விம்ஸு. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² ஜோதிம் ஸமாத³ஹித்வா விஸிப்³பே³ஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கூ² ஜோதிம் ஸமாத³ஹித்வா விஸிப்³பே³ந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா ஜோதிம் ஸமாத³ஹித்வா விஸிப்³பே³ஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² விஸிப்³ப³னாபேக்கோ² ஜோதிம் ஸமாத³ஹேய்ய வா ஸமாத³ஹாபேய்ய வா, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

351. தேன கோ² பன ஸமயேன பி⁴க்கூ² கி³லானா ஹோந்தி. கி³லானபுச்ச²கா பி⁴க்கூ² கி³லானே பி⁴க்கூ² ஏதத³வோசும் – ‘‘கச்சாவுஸோ, க²மனீயம், கச்சி யாபனீய’’ந்தி? ‘‘புப்³பே³ மயம், ஆவுஸோ, ஜோதிம் ஸமாத³ஹித்வா விஸிப்³பே³ம; தேன நோ பா²ஸு ஹோதி. இதா³னி பன ‘‘ப⁴க³வதா படிக்கி²த்த’’ந்தி குக்குச்சாயந்தா ந விஸிப்³பே³ம, தேன நோ ந பா²ஸு ஹோதீ’’தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கி³லானேன பி⁴க்கு²னா ஜோதிம் ஸமாத³ஹித்வா வா ஸமாத³ஹாபேத்வா வா விஸிப்³பே³தும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² அகி³லானோ விஸிப்³ப³னாபேக்கோ² ஜோதிம் ஸமாத³ஹேய்ய வா ஸமாத³ஹாபேய்ய வா, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

352. தேன கோ² பன ஸமயேன பி⁴க்கூ² பதீ³பேபி ஜோதிகேபி ஜந்தாக⁴ரேபி குக்குச்சாயந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, ததா²ரூபப்பச்சயா ஜோதிம் ஸமாத³ஹிதும் ஸமாத³ஹாபேதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

353. ‘‘யோ பன பி⁴க்கு² அகி³லானோ விஸிப்³ப³னாபேக்கோ² ஜோதிம் ஸமாத³ஹேய்ய வா ஸமாத³ஹாபேய்ய வா, அஞ்ஞத்ர ததா²ரூபப்பச்சயா, பாசித்திய’’ந்தி.

354. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அகி³லானோ நாம யஸ்ஸ வினா அக்³கி³னா பா²ஸு ஹோதி.

கி³லானோ நாம யஸ்ஸ வினா அக்³கி³னா ந பா²ஸு ஹோதி.

விஸிப்³ப³னாபேக்கோ²தி தப்பிதுகாமோ.

ஜோதி நாம அக்³கி³ வுச்சதி.

ஸமாத³ஹேய்யாதி ஸயம் ஸமாத³ஹதி, ஆபத்தி பாசித்தியஸ்ஸ.

ஸமாத³ஹாபேய்யாதி அஞ்ஞம் ஆணாபேதி, ஆபத்தி பாசித்தியஸ்ஸ. ஸகிம் ஆணத்தோ ப³ஹுகம்பி ஸமாத³ஹதி, ஆபத்தி பாசித்தியஸ்ஸ.

அஞ்ஞத்ர ததா² ரூபப்பச்சயாதி ட²பேத்வா ததா²ரூபப்பச்சயம்.

355. அகி³லானோ அகி³லானஸஞ்ஞீ விஸிப்³ப³னாபேக்கோ² ஜோதிம் ஸமாத³ஹதி வா ஸமாத³ஹாபேதி வா, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ. அகி³லானோ வேமதிகோ விஸிப்³ப³னாபேக்கோ² ஜோதிம் ஸமாத³ஹதி வா ஸமாத³ஹாபேதி வா, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ. அகி³லானோ கி³லானஸஞ்ஞீ விஸிப்³ப³னாபேக்கோ² ஜோதிம் ஸமாத³ஹதி வா ஸமாத³ஹாபேதி வா, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ.

படிலாதம் உக்கி²பதி, ஆபத்தி து³க்கடஸ்ஸ. கி³லானோ அகி³லானஸஞ்ஞீ, ஆபத்தி து³க்கடஸ்ஸ. கி³லானோ வேமதிகோ, ஆபத்தி து³க்கடஸ்ஸ. கி³லானோ கி³லானஸஞ்ஞீ, அனாபத்தி.

356. அனாபத்தி கி³லானஸ்ஸ, அஞ்ஞேன கதம் விஸிப்³பே³தி, வீதச்சிதங்கா³ரம் விஸிப்³பே³தி, பதீ³பே ஜோதிகே ஜந்தாக⁴ரே ததா²ரூபப்பச்சயா, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

ஜோதிகஸிக்கா²பத³ம் நிட்டி²தம் ச²ட்ட²ம்.

7. நஹானஸிக்கா²பத³ம்

357. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன பி⁴க்கூ² தபோதே³ நஹாயந்தி. தேன கோ² பன ஸமயேன [அத² கோ² (ஸீ. ஸ்யா.)] ராஜா மாக³தோ⁴ ஸேனியோ பி³ம்பி³ஸாரோ ‘‘ஸீஸம் நஹாயிஸ்ஸாமீ’’தி தபோத³ம் க³ந்த்வா – ‘‘யாவாய்யா நஹாயந்தீ’’தி ஏகமந்தம் படிமானேஸி. பி⁴க்கூ² யாவ ஸமந்த⁴காரா நஹாயிம்ஸு. அத² கோ² ராஜா மாக³தோ⁴ ஸேனியோ பி³ம்பி³ஸாரோ விகாலே ஸீஸம் நஹாயித்வா, நக³ரத்³வாரே த²கிதே ப³ஹினக³ரே வஸித்வா, காலஸ்ஸேவ அஸம்பி⁴ன்னேன விலேபனேன யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ராஜானம் மாக³த⁴ம் ஸேனியம் பி³ம்பி³ஸாரம் ப⁴க³வா ஏதத³வோச – ‘‘கிஸ்ஸ த்வம், மஹாராஜ, காலஸ்ஸேவ ஆக³தோ அஸம்பி⁴ன்னேன விலேபனேனா’’தி? அத² கோ² ராஜா மாக³தோ⁴ ஸேனியோ பி³ம்பி³ஸாரோ ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ராஜானம் மாக³த⁴ம் ஸேனியம் பி³ம்பி³ஸாரம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘ஸச்சம் கிர, பி⁴க்க²வே, பி⁴க்கூ² ராஜானம்பி பஸ்ஸித்வா ந மத்தம் ஜானித்வா நஹாயந்தீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா ராஜானம்பி பஸ்ஸித்வா ந மத்தம் ஜானித்வா நஹாயிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஓரேனத்³த⁴மாஸம் நஹாயேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

358. தேன கோ² பன ஸமயேன பி⁴க்கூ² உண்ஹஸமயே பரிளாஹஸமயே குக்குச்சாயந்தா ந நஹாயந்தி, ஸேத³க³தேன க³த்தேன ஸயந்தி. சீவரம்பி ஸேனாஸனம்பி து³ஸ்ஸதி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, உண்ஹஸமயே பரிளாஹஸமயே ஓரேனத்³த⁴மாஸம் நஹாயிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஓரேனத்³த⁴மாஸம் நஹாயேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. தி³யட்³டோ⁴ மாஸோ ஸேஸோ கி³ம்ஹானந்தி [கி³ம்ஹானம் (இதிபி)] வஸ்ஸானஸ்ஸ பட²மோ மாஸோ இச்சேதே அட்³ட⁴தேய்யமாஸா உண்ஹஸமயோ பரிளாஹஸமயோ – அயம் தத்த² ஸமயோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

359. தேன கோ² பன ஸமயேன பி⁴க்கூ² கி³லானா ஹோந்தி. கி³லானபுச்ச²கா பி⁴க்கூ² கி³லானே பி⁴க்கூ² ஏதத³வோசும் – ‘‘கச்சாவுஸோ, க²மனீயம், கச்சி யாபனீய’’ந்தி? ‘‘புப்³பே³ மயம், ஆவுஸோ, ஓரேனத்³த⁴மாஸம் நஹாயாம, தேன நோ பா²ஸு ஹோதி; இதா³னி பன ‘‘ப⁴க³வதா படிக்கி²த்த’’ந்தி குக்குச்சாயந்தா ந நஹாயாம, தேன நோ ந பா²ஸு ஹோதீ’’தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கி³லானேன பி⁴க்கு²னா ஓரேனத்³த⁴மாஸம் நஹாயிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஓரேனத்³த⁴மாஸம் நஹாயேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. தி³யட்³டோ⁴ மாஸோ ஸேஸோ கி³ம்ஹானந்தி [கி³ம்ஹானம் (இதிபி)] வஸ்ஸானஸ்ஸ பட²மோ மாஸோ இச்சேதே அட்³ட⁴தேய்யமாஸா உண்ஹஸமயோ, பரிளாஹஸமயோ, கி³லானஸமயோ – அயம் தத்த² ஸமயோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

360. தேன கோ² பன ஸமயேன பி⁴க்கூ² நவகம்மம் கத்வா குக்குச்சாயந்தா ந நஹாயந்தி. தே ஸேத³க³தேன க³த்தேன ஸயந்தி. சீவரம்பி ஸேனாஸனம்பி து³ஸ்ஸதி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, கம்மஸமயே ஓரேனத்³த⁴மாஸம் நஹாயிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஓரேனத்³த⁴மாஸம் நஹாயேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. தி³யட்³டோ⁴ மாஸோ ஸேஸோ கி³ம்ஹானந்தி வஸ்ஸானஸ்ஸ பட²மோ மாஸோ இச்சேதே அட்³ட⁴தேய்யமாஸா உண்ஹஸமயோ, பரிளாஹஸமயோ, கி³லானஸமயோ, கம்மஸமயோ – அயம் தத்த² ஸமயோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

361. தேன கோ² பன ஸமயேன பி⁴க்கூ² அத்³தா⁴னம் க³ந்த்வா குக்குச்சாயந்தா ந நஹாயந்தி. தே ஸேத³க³தேன க³த்தேன ஸயந்தி. சீவரம்பி ஸேனாஸனம்பி து³ஸ்ஸதி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, அத்³தா⁴னக³மனஸமயே ஓரேனத்³த⁴மாஸம் நஹாயிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஓரேனத்³த⁴மாஸம் நஹாயேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. தி³யட்³டோ⁴ மாஸோ ஸேஸோ கி³ம்ஹானந்தி வஸ்ஸானஸ்ஸ பட²மோ மாஸோ இச்சேதே அட்³ட⁴தேய்யமாஸா உண்ஹஸமயோ, பரிளாஹஸமயோ, கி³லானஸமயோ, கம்மஸமயோ, அத்³தா⁴னக³மனஸமயோ – அயம் தத்த² ஸமயோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

362. தேன கோ² பன ஸமயேன ஸம்ப³ஹுலா பி⁴க்கூ² அஜ்ஜோ²காஸே சீவரகம்மம் கரோந்தா ஸரஜேன வாதேன ஓகிண்ணா ஹோந்தி. தே³வோ ச தோ²கம் தோ²கம் பு²ஸாயதி. பி⁴க்கூ² குக்குச்சாயந்தா ந நஹாயந்தி, கிலின்னேன க³த்தேன ஸயந்தி. சீவரம்பி ஸேனாஸனம்பி து³ஸ்ஸதி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, வாதவுட்டி²ஸமயே ஓரேனத்³த⁴மாஸம் நஹாயிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

363. ‘‘யோ பன பி⁴க்கு² ஓரேனத்³த⁴மாஸம் நஹாயேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. தி³யட்³டோ⁴ மாஸோ ஸேஸோ கி³ம்ஹானந்தி வஸ்ஸானஸ்ஸ பட²மோ மாஸோ இச்சேதே அட்³ட⁴தேய்யமாஸா உண்ஹஸமயோ, பரிளாஹஸமயோ, கி³லானஸமயோ, கம்மஸமயோ, அத்³தா⁴னக³மனஸமயோ, வாதவுட்டி²ஸமயோ – அயம் தத்த² ஸமயோ’’தி.

364. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஓரேனத்³த⁴மாஸந்தி ஊனகத்³த⁴மாஸம்.

நஹாயேய்யாதி சுண்ணேன வா மத்திகாய வா நஹாயதி, பயோகே³ பயோகே³ து³க்கடம். நஹானபரியோஸானே, ஆபத்தி பாசித்தியஸ்ஸ.

அஞ்ஞத்ர ஸமயாதி ட²பேத்வா ஸமயம்.

உண்ஹஸமயோ நாம தி³யட்³டோ⁴ மாஸோ ஸேஸோ கி³ம்ஹானம். பரிளாஹஸமயோ நாம வஸ்ஸானஸ்ஸ பட²மோ மாஸோ ‘‘இச்சேதே அட்³ட⁴தேய்யமாஸா உண்ஹஸமயோ பரிளாஹஸமயோ’’தி நஹாயிதப்³ப³ம்.

கி³லானஸமயோ நாம யஸ்ஸ வினா நஹானேன ந பா²ஸு ஹோதி. கி³லானஸமயோதி நஹாயிதப்³ப³ம்.

கம்மஸமயோ நாம அந்தமஸோ பரிவேணம்பி ஸம்மட்ட²ம் ஹோதி. ‘‘கம்மஸமயோ’’தி நஹாயிதப்³ப³ம்.

அத்³தா⁴னக³மனஸமயோ நாம ‘‘அத்³த⁴யோஜனம் க³ச்சி²ஸ்ஸாமீ’’தி நஹாயிதப்³ப³ம், க³ச்ச²ந்தேன நஹாயிதப்³ப³ம், க³தேன நஹாயிதப்³ப³ம்.

வாதவுட்டி²ஸமயோ நாம பி⁴க்கூ² ஸரஜேன வாதேன ஓகிண்ணா ஹோந்தி, த்³வே வா தீணி வா உத³கபு²ஸிதானி காயே பதிதானி ஹோந்தி. ‘‘வாதவுட்டி²ஸமயோ’’தி நஹாயிதப்³ப³ம்.

365. ஊனகத்³த⁴மாஸே ஊனகஸஞ்ஞீ, அஞ்ஞத்ர ஸமயா, நஹாயதி, ஆபத்தி பாசித்தியஸ்ஸ. ஊனகத்³த⁴மாஸே வேமதிகோ, அஞ்ஞத்ர ஸமயா, நஹாயதி, ஆபத்தி பாசித்தியஸ்ஸ. ஊனகத்³த⁴மாஸே அதிரேகஸஞ்ஞீ, அஞ்ஞத்ர ஸமயா, நஹாயதி, ஆபத்தி பாசித்தியஸ்ஸ.

அதிரேகத்³த⁴மாஸே ஊனகஸஞ்ஞீ, ஆபத்தி து³க்கடஸ்ஸ. அதிரேகத்³த⁴மாஸே வேமதிகோ, ஆபத்தி து³க்கடஸ்ஸ. அதிரேகத்³த⁴மாஸே அதிரேகஸஞ்ஞீ, அனாபத்தி.

366. அனாபத்தி ஸமயே, அத்³த⁴மாஸம் நஹாயதி, அதிரேகத்³த⁴மாஸம் நஹாயதி, பாரம் க³ச்ச²ந்தோ நஹாயதி, ஸப்³ப³பச்சந்திமேஸு ஜனபதே³ஸு, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

நஹானஸிக்கா²பத³ம் நிட்டி²தம் ஸத்தமம்.

8. து³ப்³ப³ண்ணகரணஸிக்கா²பத³ம்

367. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கூ² ச பரிப்³பா³ஜகா ச ஸாகேதா ஸாவத்தி²ம் அத்³தா⁴னமக்³க³ப்படிபன்னா ஹோந்தி. அந்தராமக்³கே³ சோரா நிக்க²மித்வா தே அச்சி²ந்தி³ம்ஸு. ஸாவத்தி²யா ராஜப⁴டா நிக்க²மித்வா தே சோரே ஸப⁴ண்டே³ க³ஹேத்வா பி⁴க்கூ²னம் ஸந்திகே தூ³தம் பாஹேஸும் – ‘‘ஆக³ச்ச²ந்து, ப⁴த³ந்தா, ஸகம் ஸகம் சீவரம் ஸஞ்ஜானித்வா க³ண்ஹந்தூ’’தி. பி⁴க்கூ² ந ஸஞ்ஜானந்தி. தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ப⁴த³ந்தா அத்தனோ அத்தனோ சீவரம் ந ஸஞ்ஜானிஸ்ஸந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ²னம் தத³னுச்ச²விகம் தத³னுலோமிகம் த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கூ²னம் ஸிக்கா²பத³ம் பஞ்ஞபேஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய, ஸங்க⁴பா²ஸுதாய…பே… ஸத்³த⁴ம்மட்டி²தியா, வினயானுக்³க³ஹாய. ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

368. ‘‘நவம் பன பி⁴க்கு²னா சீவரலாபே⁴ன திண்ணம் து³ப்³ப³ண்ணகரணானம் அஞ்ஞதரம் து³ப்³ப³ண்ணகரணம் ஆதா³தப்³ப³ம் – நீலம் வா கத்³த³மம் வா காளஸாமம் வா. அனாதா³ சே பி⁴க்கு² திண்ணம் து³ப்³ப³ண்ணகரணானம் அஞ்ஞதரம் து³ப்³ப³ண்ணகரணம் நவம் சீவரம் பரிபு⁴ஞ்ஜேய்ய, பாசித்திய’’ந்தி.

369. நவம் நாம அகதகப்பம் வுச்சதி.

சீவரம் நாம ச²ன்னம் சீவரானம் அஞ்ஞதரம் சீவரம்.

திண்ணம் து³ப்³ப³ண்ணகரணானம் அஞ்ஞதரம் து³ப்³ப³ண்ணகரணம் ஆதா³தப்³ப³ந்தி அந்தமஸோ குஸக்³கே³னபி ஆதா³தப்³ப³ம்.

நீலம் நாம த்³வே நீலானி – கம்ஸனீலம், பலாஸனீலம்.

கத்³த³மோ நாம ஓத³கோ வுச்சதி.

காளஸாமம் நாம யம்கிஞ்சி காளஸாமகம் [காளகம் (ஸீ. ஸ்யா.)].

அனாதா³ சே பி⁴க்கு² திண்ணம் து³ப்³ப³ண்ணகரணானம் அஞ்ஞதரம் து³ப்³ப³ண்ணகரணந்தி அந்தமஸோ குஸக்³கே³னபி அனாதி³யித்வா திண்ணம் து³ப்³ப³ண்ணகரணானம் அஞ்ஞதரம் து³ப்³ப³ண்ணகரணம் நவம் சீவரம் பரிபு⁴ஞ்ஜதி, ஆபத்தி பாசித்தியஸ்ஸ.

370. அனாதி³ன்னே அனாதி³ன்னஸஞ்ஞீ பரிபு⁴ஞ்ஜதி, ஆபத்தி பாசித்தியஸ்ஸ. அனாதி³ன்னே வேமதிகோ பரிபு⁴ஞ்ஜதி, ஆபத்தி பாசித்தியஸ்ஸ. அனாதி³ன்னே ஆதி³ன்னஸஞ்ஞீ பரிபு⁴ஞ்ஜதி, ஆபத்தி பாசித்தியஸ்ஸ.

ஆதி³ன்னே அனாதி³ன்னஸஞ்ஞீ, ஆபத்தி து³க்கடஸ்ஸ. ஆதி³ன்னே வேமதிகோ, ஆபத்தி து³க்கடஸ்ஸ. ஆதி³ன்னே ஆதி³ன்னஸஞ்ஞீ, அனாபத்தி.

371. அனாபத்திஆதி³யித்வா பரிபு⁴ஞ்ஜதி, கப்போ நட்டோ² ஹோதி, கப்பகதோகாஸோ ஜிண்ணோ ஹோதி, கப்பகதேன அகப்பகதம் ஸம்ஸிப்³பி³தம் ஹோதி, அக்³க³ளே அனுவாதே பரிப⁴ண்டே³, உம்மத்தகஸ்ஸ, ஆதி³கம்மிகஸ்ஸாதி.

து³ப்³ப³ண்ணகரணஸிக்கா²பத³ம் நிட்டி²தம் அட்ட²மம்.

9. விகப்பனஸிக்கா²பத³ம்

372. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ பா⁴துனோ ஸத்³தி⁴விஹாரிகஸ்ஸ பி⁴க்கு²னோ ஸாமம் சீவரம் விகப்பேத்வா அப்பச்சுத்³தா⁴ரணம் [அபச்சுத்³தா⁴ரகம் (ஸீ. ஸ்யா.)] பரிபு⁴ஞ்ஜதி. அத² கோ² ஸோ பி⁴க்கு² பி⁴க்கூ²னம் ஏதமத்த²ம் ஆரோசேஸி – ‘‘அயம், ஆவுஸோ, ஆயஸ்மா உபனந்தோ³ ஸக்யபுத்தோ மய்ஹம் சீவரம் ஸாமம் விகப்பேத்வா அப்பச்சுத்³தா⁴ரணம் பரிபு⁴ஞ்ஜதீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ பி⁴க்கு²ஸ்ஸ ஸாமம் சீவரம் விகப்பேத்வா அப்பச்சுத்³தா⁴ரணம் பரிபு⁴ஞ்ஜிஸ்ஸதீ’’தி…பே… ஸச்சம் கிர த்வம், உபனந்த³, பி⁴க்கு²ஸ்ஸ ஸாமம் சீவரம் விகப்பேத்வா அப்பச்சுத்³தா⁴ரணம் பரிபு⁴ஞ்ஜஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, பி⁴க்கு²ஸ்ஸ ஸாமம் சீவரம் விகப்பேத்வா அப்பச்சுத்³தா⁴ரணம் பரிபு⁴ஞ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

373. ‘‘யோ பன பி⁴க்கு² பி⁴க்கு²ஸ்ஸ வா பி⁴க்கு²னியா வா ஸிக்க²மானாய வா ஸாமணேரஸ்ஸ வா ஸாமணேரியா வா ஸாமம் சீவரம் விகப்பேத்வா அப்பச்சுத்³தா⁴ரணம் [அபச்சுத்³தா⁴ரகம் (ஸீ. ஸ்யா.)] பரிபு⁴ஞ்ஜேய்ய, பாசித்திய’’ந்தி.

374. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ஸ்ஸாதி அஞ்ஞஸ்ஸ பி⁴க்கு²ஸ்ஸ.

பி⁴க்கு²னீ நாம உப⁴தோஸங்கே⁴ உபஸம்பன்னா.

ஸிக்க²மானா நாம த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா².

ஸாமணேரோ நாம த³ஸஸிக்கா²பதி³கோ.

ஸாமணேரீ நாம த³ஸஸிக்கா²பதி³கா.

ஸாமந்தி ஸயம் விகப்பேத்வா.

சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²மம்.

விகப்பனா நாம த்³வே விகப்பனா – ஸம்முகா²விகப்பனா ச பரம்முகா²விகப்பனா ச.

ஸம்முகா²விகப்பனா நாம ‘‘இமம் சீவரம் துய்ஹம் விகப்பேமி இத்த²ன்னாமஸ்ஸ வா’’தி.

பரம்முகா²விகப்பனா நாம ‘‘இமம் சீவரம் விகப்பனத்தா²ய துய்ஹம் த³ம்மீ’’தி. தேன வத்தப்³போ³ – ‘‘கோ தே மித்தோ வா ஸந்தி³ட்டோ² வா’’தி? ‘‘இத்த²ன்னாமோ ச இத்த²ன்னாமோ சா’’தி. தேன வத்தப்³போ³ – ‘‘அஹம் தேஸம் த³ம்மி, தேஸம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி.

அப்பச்சுத்³தா⁴ரணம் நாம தஸ்ஸ வா அதி³ன்னம், தஸ்ஸ வா அவிஸ்ஸஸந்தோ பரிபு⁴ஞ்ஜதி, ஆபத்தி பாசித்தியஸ்ஸ.

375. அப்பச்சுத்³தா⁴ரணே அப்பச்சுத்³தா⁴ரணஸஞ்ஞீ பரிபு⁴ஞ்ஜதி, ஆபத்தி பாசித்தியஸ்ஸ. அப்பச்சுத்³தா⁴ரணே வேமதிகோ பரிபு⁴ஞ்ஜதி, ஆபத்தி பாசித்தியஸ்ஸ. அப்பச்சுத்³தா⁴ரணே அப்பச்சுத்³தா⁴ரணஸஞ்ஞீ பரிபு⁴ஞ்ஜதி, ஆபத்தி பாசித்தியஸ்ஸ.

அதி⁴ட்டே²தி வா விஸ்ஸஜ்ஜேதி வா, ஆபத்தி து³க்கடஸ்ஸ. பச்சுத்³தா⁴ரணே அப்பச்சுத்³தா⁴ரணஸஞ்ஞீ, ஆபத்தி து³க்கடஸ்ஸ. பச்சுத்³தா⁴ரணே வேமதிகோ, ஆபத்தி து³க்கடஸ்ஸ. பச்சுத்³தா⁴ரணே பச்சுத்³தா⁴ரணஸஞ்ஞீ, அனாபத்தி.

376. அனாபத்தி ஸோ வா தே³தி, தஸ்ஸ வா விஸ்ஸஸந்தோ பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.

விகப்பனஸிக்கா²பத³ம் நிட்டி²தம் நவமம்.

10. சீவரஅபனிதா⁴னஸிக்கா²பத³ம்

377. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸத்தரஸவக்³கி³யா பி⁴க்கூ² அஸன்னிஹிதபரிக்கா²ரா ஹோந்தி. ச²ப்³ப³க்³கி³யா பி⁴க்கூ² ஸத்தரஸவக்³கி³யானம் பி⁴க்கூ²னம் பத்தம்பி சீவரம்பி அபனிதே⁴ந்தி. ஸத்தரஸவக்³கி³யா பி⁴க்கூ² ச²ப்³ப³க்³கி³யே பி⁴க்கூ² ஏதத³வோசும் – ‘‘தே³தா²வுஸோ, அம்ஹாகம் பத்தம்பி சீவரம்பீ’’தி. ச²ப்³ப³க்³கி³யா பி⁴க்கூ² ஹஸந்தி, தே ரோத³ந்தி. பி⁴க்கூ² ஏவமாஹம்ஸு – ‘‘கிஸ்ஸ தும்ஹே, ஆவுஸோ, ரோத³தா²’’தி? ‘‘இமே, ஆவுஸோ, ச²ப்³ப³க்³கி³யா பி⁴க்கூ² அம்ஹாகம் பத்தம்பி சீவரம்பி அபனிதே⁴ந்தீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கூ²னம் பத்தம்பி சீவரம்பி அபனிதே⁴ஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, பி⁴க்கூ²னம் பத்தம்பி சீவரம்பி அபனிதே⁴தா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கூ²னம் பத்தம்பி சீவரம்பி அபனிதே⁴ஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

378. ‘‘யோ பன பி⁴க்கு² பி⁴க்கு²ஸ்ஸ பத்தம் வா சீவரம் வா நிஸீத³னம் வா ஸூசிக⁴ரம் வா காயப³ந்த⁴னம் வா அபனிதே⁴ய்ய வா அபனிதா⁴பேய்ய வா, அந்தமஸோ ஹஸாபேக்கோ²பி, பாசித்திய’’ந்தி.

379. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ஸ்ஸாதி அஞ்ஞஸ்ஸ பி⁴க்கு²ஸ்ஸ.

பத்தோ நாம த்³வே பத்தா – அயோபத்தோ, மத்திகாபத்தோ.

சீவரம் நாம ச²ன்னம் சீவரானம் அஞ்ஞதரம் சீவரம், விகப்பனுபக³ம் பச்சி²மம்.

நிஸீத³னம் நாம ஸத³ஸம் வுச்சதி.

ஸூசிக⁴ரம் நாம ஸஸூசிகம் வா அஸூசிகம் வா.

காயப³ந்த⁴னம் நாம த்³வே காயப³ந்த⁴னானி – பட்டிகா, ஸூகரந்தகம்.

அபனிதே⁴ய்ய வாதி ஸயம் அபனிதே⁴தி, ஆபத்தி பாசித்தியஸ்ஸ.

அபனிதா⁴பேய்ய வாதி அஞ்ஞம் ஆணாபேஸி, ஆபத்தி பாசித்தியஸ்ஸ. அபனிதா⁴பேய்ய வா தி அய்யம் ஆணாபேதி, ஆபத்தி பாசித்தியஸ்ஸ. ஸகிம் ஆணத்தோ ப³ஹுகம்பி அபனிதே⁴தி, ஆபத்தி பாசித்தியஸ்ஸ.

அந்தமஸோ ஹஸாபேக்கோ²பீதி கீளாதி⁴ப்பாயோ.