10. த³ந்தபோனஸிக்கா²பத³ம்

263. தேன ஸமயேன பு³த்³தோ⁴ ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன அஞ்ஞதரோ பி⁴க்கு² ஸப்³ப³பம்ஸுகூலிகோ ஸுஸானே விஹரதி. ஸோ மனுஸ்ஸேஹி தி³ய்யமானம் ந இச்ச²தி படிக்³க³ஹேதும், ஸுஸானேபி ருக்க²மூலேபி உம்மாரேபி அய்யவோஸாடிதகானி ஸாமம் க³ஹேத்வா பரிபு⁴ஞ்ஜதி [பு⁴ஞ்ஜதி (ஸ்யா.)]. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அயம் பி⁴க்கு² அம்ஹாகம் அய்யவோஸாடிதகானி ஸாமம் க³ஹேத்வா பரிபு⁴ஞ்ஜிஸ்ஸதி! தே²ரோயம் பி⁴க்கு² வட²ரோ மனுஸ்ஸமம்ஸம் மஞ்ஞே கா²த³தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² அதி³ன்னம் முக²த்³வாரம் ஆஹாரம் ஆஹரிஸ்ஸதீ’’தி…பே… ஸச்சம் கிர த்வம், பி⁴க்கு², அதி³ன்னம் முக²த்³வாரம் ஆஹாரம் ஆஹரஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, அதி³ன்னம் முக²த்³வாரம் ஆஹாரம் ஆஹரிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² அதி³ன்னம் முக²த்³வாரம் ஆஹாரம் ஆஹரேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

264. தேன கோ² பன ஸமயேன பி⁴க்கூ² உத³கத³ந்தபோனே [உத³கத³ந்தபோணே (ஸ்யா. க.)] குக்குச்சாயந்தி. ப⁴க³வதோ ஏதமத்த²ம் ஆரோசேஸும்…பே… ‘‘அனுஜானாமி, பி⁴க்க²வே, உத³கத³ந்தபோனம் ஸாமம் க³ஹேத்வா பரிபு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

265. ‘‘யோ பன பி⁴க்கு² அதி³ன்னம் முக²த்³வாரம் ஆஹாரம் ஆஹரேய்ய, அஞ்ஞத்ர உத³கத³ந்தபோனா, பாசித்திய’’ந்தி.

266. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அதி³ன்னம் நாம அப்படிக்³க³ஹிதகம் வுச்சதி.

தி³ன்னம் நாம காயேன வா காயபடிப³த்³தே⁴ன வா நிஸ்ஸக்³கி³யேன வா தே³ந்தே ஹத்த²பாஸே டி²தோ காயேன வா காயபடிப³த்³தே⁴ன வா படிக்³க³ண்ஹாதி, ஏதம் தி³ன்னம் நாம.

ஆஹாரோ நாம உத³கத³ந்தபோனம் ட²பேத்வா யம்கிஞ்சி அஜ்ஜோ²ஹரணீயம், ஏஸோ ஆஹாரோ நாம.

அஞ்ஞத்ர உத³கத³ந்தபோனாதி ட²பேத்வா உத³கத³ந்தபோனம்.

‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

267. அப்படிக்³க³ஹிதகே அப்படிக்³க³ஹிதகஸஞ்ஞீ அதி³ன்னம் முக²த்³வாரம் ஆஹாரம் ஆஹாரேதி, அஞ்ஞத்ர உத³கத³ந்தபோனா, ஆபத்தி பாசித்தியஸ்ஸ. அப்படிக்³க³ஹிதகே வேமதிகோ அதி³ன்னம் முக²த்³வாரம் ஆஹாரம் ஆஹாரேதி, அஞ்ஞத்ர உத³கத³ந்தபோனா, ஆபத்தி பாசித்தியஸ்ஸ. அப்படிக்³க³ஹிதகே படிக்³க³ஹிதகஸஞ்ஞீ அதி³ன்னம் முக²த்³வாரம் ஆஹாரம் ஆஹாரேதி, அஞ்ஞத்ர உத³கத³ந்தபோனா, ஆபத்தி பாசித்தியஸ்ஸ.

படிக்³க³ஹிதகே அப்படிக்³க³ஹிதகஸஞ்ஞீ, ஆபத்தி து³க்கடஸ்ஸ. படிக்³க³ஹிதகே வேமதிகோ, ஆபத்தி து³க்கடஸ்ஸ. படிக்³க³ஹிதகே படிக்³க³ஹிதகஸஞ்ஞீ, அனாபத்தி.

268. அனாபத்தி உத³கத³ந்தபோனே, சத்தாரி மஹாவிகதானி ஸதி பச்சயே அஸதி கப்பியகாரகே ஸாமம் க³ஹேத்வா பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.

த³ந்தபோனஸிக்கா²பத³ம் நிட்டி²தம் த³ஸமம்.

போ⁴ஜனவக்³கோ³ சதுத்தோ².

தஸ்ஸுத்³தா³னம் –

பிண்டோ³ க³ணம் பரம் பூவம், த்³வே ச வுத்தா பவாரணா;

விகாலே ஸன்னிதீ⁴ கீ²ரம், த³ந்தபோனேன தே த³ஸாதி.