4. போ⁴ஜனவக்³கோ³
1. ஆவஸத²பிண்ட³ஸிக்கா²பத³ம்
203. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாவத்தி²யா அவிதூ³ரே அஞ்ஞதரஸ்ஸ பூக³ஸ்ஸ ஆவஸத²பிண்டோ³ பஞ்ஞத்தோ ஹோதி. ச²ப்³ப³க்³கி³யா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பவிஸித்வா பிண்ட³ம் அலப⁴மானா ஆவஸத²ம் அக³மம்ஸு. மனுஸ்ஸா – ‘‘சிரஸ்ஸம்பி ப⁴த³ந்தா ஆக³தா’’தி தே ஸக்கச்சம் பரிவிஸிம்ஸு. அத² கோ² ச²ப்³ப³க்³கி³யா பி⁴க்கூ² து³தியம்பி தி³வஸம்…பே… ததியம்பி தி³வஸம் புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பவிஸித்வா பிண்ட³ம் அலப⁴மானா ஆவஸத²ம் க³ந்த்வா பு⁴ஞ்ஜிம்ஸு. அத² கோ² ச²ப்³ப³க்³கி³யானம் பி⁴க்கூ²னம் ஏதத³ஹோஸி – ‘‘கிம் மயம் கரிஸ்ஸாம ஆராமம் க³ந்த்வா! ஹிய்யோபி இதே⁴வ ஆக³ந்தப்³ப³ம் ப⁴விஸ்ஸதீ’’தி, தத்தே²வ அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜந்தி. தித்தி²யா அபஸக்கந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜிஸ்ஸந்தி! நயிமேஸஞ்ஞேவ ஆவஸத²பிண்டோ³ பஞ்ஞத்தோ; ஸப்³பே³ஸஞ்ஞேவ ஆவஸத²பிண்டோ³ பஞ்ஞத்தோ’’தி.
அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – கத²ஞ்ஹி நாம ச²ப்³ப³க்³கி³யா பி⁴க்கூ² அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜிஸ்ஸந்தீதி…பே… ஸச்சம் கிர தும்ஹே, பி⁴க்க²வே, அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘ஏகோ ஆவஸத²பிண்டோ³ பு⁴ஞ்ஜிதப்³போ³. ததோ சே உத்தரிம் பு⁴ஞ்ஜேய்ய, பாசித்திய’’ந்தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
204. தேன கோ² பன ஸமயேன ஆயஸ்மா ஸாரிபுத்தோ கோஸலேஸு ஜனபதே³ ஸாவத்தி²ம் க³ச்ச²ந்தோ யேன அஞ்ஞதரோ ஆவஸதோ² தேனுபஸங்கமி. மனுஸ்ஸா – ‘‘சிரஸ்ஸம்பி தே²ரோ ஆக³தோ’’தி ஸக்கச்சம் பரிவிஸிம்ஸு. அத² கோ² ஆயஸ்மதோ ஸாரிபுத்தஸ்ஸ பு⁴த்தாவிஸ்ஸ க²ரோ ஆபா³தோ⁴ உப்பஜ்ஜி, நாஸக்கி² தம்ஹா ஆவஸதா² பக்கமிதும். அத² கோ² தே மனுஸ்ஸா து³தியம்பி தி³வஸம் ஆயஸ்மந்தம் ஸாரிபுத்தம் ஏதத³வோசும் – ‘‘பு⁴ஞ்ஜத², ப⁴ந்தே’’தி. அத² கோ² ஆயஸ்மா ஸாரிபுத்தோ – ‘‘ப⁴க³வதா படிக்கி²த்தம் அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜிது’’ந்தி குக்குச்சாயந்தோ ந படிக்³க³ஹேஸி; சி²ன்னப⁴த்தோ அஹோஸி. அத² கோ² ஆயஸ்மா ஸாரிபுத்தோ ஸாவத்தி²ம் க³ந்த்வா பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கி³லானேன பி⁴க்கு²னா அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
205. ‘‘அகி³லானேன பி⁴க்கு²னா ஏகோ ஆவஸத²பிண்டோ³ பு⁴ஞ்ஜிதப்³போ³. ததோ சே உத்தரி பு⁴ஞ்ஜேய்ய, பாசித்திய’’ந்தி.
206. அகி³லானோ நாம ஸக்கோதி தம்ஹா ஆவஸதா² பக்கமிதும்.
கி³லானோ நாம ந ஸக்கோதி தம்ஹா ஆவஸதா² பக்கமிதும்.
ஆவஸத²பிண்டோ³ நாம பஞ்சன்னம் போ⁴ஜனானம் அஞ்ஞதரம் போ⁴ஜனம் – ஸாலாய வா மண்ட³பே வா ருக்க²மூலே வா அஜ்ஜோ²காஸே வா அனோதி³ஸ்ஸ யாவத³த்தோ² பஞ்ஞத்தோ ஹோதி. அகி³லானேன பி⁴க்கு²னா ஸகிம் பு⁴ஞ்ஜிதப்³போ³. ததோ சே உத்தரி ‘பு⁴ஞ்ஜிஸ்ஸாமீ’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.
207. அகி³லானோ அகி³லானஸஞ்ஞீ ததுத்தரி ஆவஸத²பிண்ட³ம் பு⁴ஞ்ஜதி, ஆபத்தி பாசித்தியஸ்ஸ. அகி³லானோ வேமதிகோ ததுத்தரி ஆவஸத²பிண்ட³ம் பு⁴ஞ்ஜதி, ஆபத்தி பாசித்தியஸ்ஸ. அகி³லானோ கி³லானஸஞ்ஞீ ததுத்தரிம் ஆவஸத²பிண்ட³ம் பு⁴ஞ்ஜதி, ஆபத்தி பாசித்தியஸ்ஸ.
கி³லானோ அகி³லானஸஞ்ஞீ, ஆபத்தி து³க்கடஸ்ஸ. கி³லானோ வேமதிகோ ஆபத்தி து³க்கடஸ்ஸ. கி³லானோ கி³லானஸஞ்ஞீ, அனாபத்தி.
208. அனாபத்தி கி³லானஸ்ஸ, அகி³லானோ ஸகிம் பு⁴ஞ்ஜதி, க³ச்ச²ந்தோ, வா ஆக³ச்ச²ந்தோ வா பு⁴ஞ்ஜதி, ஸாமிகா நிமந்தேத்வா போ⁴ஜேந்தி, ஓதி³ஸ்ஸ பஞ்ஞத்தோ ஹோதி, ந யாவத³த்தோ² பஞ்ஞத்தோ ஹோதி, பஞ்ச போ⁴ஜனானி ட²பேத்வா ஸப்³ப³த்த² அனாபத்தி, உம்மத்தகஸ்ஸ, ஆதி³கம்மிகஸ்ஸாதி.
ஆவஸத²பிண்ட³ஸிக்கா²பத³ம் நிட்டி²தம் பட²மம்.
2. க³ணபோ⁴ஜனஸிக்கா²பத³ம்
209. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன தே³வத³த்தோ பரிஹீனலாப⁴ஸக்காரோ ஸபரிஸோ குலேஸு விஞ்ஞாபேத்வா விஞ்ஞாபேத்வா பு⁴ஞ்ஜதி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா குலேஸு விஞ்ஞாபேத்வா விஞ்ஞாபேத்வா பு⁴ஞ்ஜிஸ்ஸந்தி! கஸ்ஸ ஸம்பன்னம் ந மனாபம், கஸ்ஸ ஸாது³ம் ந ருச்சதீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம தே³வத³த்தோ ஸபரிஸோ குலேஸு விஞ்ஞாபேத்வா விஞ்ஞாபேத்வா பு⁴ஞ்ஜிஸ்ஸதீ’’தி…பே… ஸச்சம் கிர த்வம், தே³வத³த்த, ஸபரிஸோ குலேஸு விஞ்ஞாபேத்வா விஞ்ஞாபேத்வா பு⁴ஞ்ஜஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, ஸபரிஸோ குலேஸு விஞ்ஞாபேத்வா விஞ்ஞாபேத்வா பு⁴ஞ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘க³ணபோ⁴ஜனே பாசித்திய’’ந்தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
210. தேன கோ² பன ஸமயேன மனுஸ்ஸா கி³லானே பி⁴க்கூ² ப⁴த்தேன நிமந்தேந்தி. பி⁴க்கூ² குக்குச்சாயந்தா நாதி⁴வாஸேந்தி – ‘‘படிக்கி²த்தம் ப⁴க³வதா க³ணபோ⁴ஜன’’ந்தி. ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கி³லானேன பி⁴க்கு²னா க³ணபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘க³ணபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
211. தேன கோ² பன ஸமயேன மனுஸ்ஸா சீவரதா³னஸமயே ஸசீவரப⁴த்தம் படியாதே³த்வா பி⁴க்கூ² நிமந்தேந்தி – ‘‘போ⁴ஜேத்வா சீவரேன அச்சா²தே³ஸ்ஸாமா’’தி. பி⁴க்கூ² குக்குச்சாயந்தா நாதி⁴வாஸேந்தி – ‘‘படிக்கி²த்தம் ப⁴க³வதா க³ணபோ⁴ஜன’’ந்தி. சீவரம் பரித்தம் உப்பஜ்ஜதி. பி⁴க்கூ² ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, சீவரதா³னஸமயே க³ணபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘க³ணபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
212. தேன கோ² பன ஸமயேன மனுஸ்ஸா சீவரகாரகே பி⁴க்கூ² ப⁴த்தேன நிமந்தேந்தி. பி⁴க்கூ² குக்குச்சாயந்தா நாதி⁴வாஸேந்தி – ‘‘படிக்கி²த்தம் ப⁴க³வதா க³ணபோ⁴ஜன’’ந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, சீவரகாரஸமயே க³ணபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘க³ணபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ, சீவரகாரஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
213. தேன கோ² பன ஸமயேன பி⁴க்கூ² மனுஸ்ஸேஹி ஸத்³தி⁴ம் அத்³தா⁴னம் க³ச்ச²ந்தி. அத² கோ² தே பி⁴க்கூ² தே மனுஸ்ஸே ஏதத³வோசும் – ‘‘முஹுத்தம், ஆவுஸோ, ஆக³மேத²; பிண்டா³ய சரிஸ்ஸாமா’’தி. தே ஏவமாஹம்ஸு – ‘‘இதே⁴வ, ப⁴ந்தே, பு⁴ஞ்ஜதா²’’தி. பி⁴க்கூ² குக்குச்சாயந்தா ந படிக்³க³ண்ஹந்தி – ‘‘படிக்கி²த்தம் ப⁴க³வதா க³ணபோ⁴ஜன’’ந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, அத்³தா⁴னக³மனஸமயே க³ணபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘க³ணபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ, சீவரகாரஸமயோ, அத்³தா⁴னக³மனஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
214. தேன கோ² பன ஸமயேன பி⁴க்கூ² மனுஸ்ஸேஹி ஸத்³தி⁴ம் நாவாய க³ச்ச²ந்தி. அத² கோ² தே பி⁴க்கூ² தே மனுஸ்ஸே ஏதத³வோசும் – ‘‘முஹுத்தம், ஆவுஸோ, தீரம் உபனேத²; பிண்டா³ய சரிஸ்ஸாமா’’தி. தே ஏவமாஹம்ஸு – ‘‘இதே⁴வ, ப⁴ந்தே, பு⁴ஞ்ஜதா²’’தி. பி⁴க்கூ² குக்குச்சாயந்தா ந படிக்³க³ண்ஹந்தி – ‘‘படிக்கி²த்தம் ப⁴க³வதா க³ணபோ⁴ஜன’’ந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, நாவாபி⁴ருஹனஸமயே க³ணபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘க³ணபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ, சீவரகாரஸமயோ, அத்³தா⁴னக³மனஸமயோ, நாவாபி⁴ருஹனஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
215. தேன 0 கோ² பன ஸமயேன தி³ஸாஸு வஸ்ஸம்வுட்டா² பி⁴க்கூ² ராஜக³ஹம் ஆக³ச்ச²ந்தி ப⁴க³வந்தம் த³ஸ்ஸனாய. மனுஸ்ஸா நானாவேரஜ்ஜகே பி⁴க்கூ² பஸ்ஸித்வா ப⁴த்தேன நிமந்தேந்தி. பி⁴க்கூ² குக்குச்சாயந்தா நாதி⁴வாஸேந்தி – ‘‘படிக்கி²த்தம் ப⁴க³வதா க³ணபோ⁴ஜன’’ந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, மஹாஸமயே க³ணபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘க³ணபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ, சீவரகாரஸமயோ, அத்³தா⁴னக³மனஸமயோ, நாவாபி⁴ருஹனஸமயோ, மஹாஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
216. தேன கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஞாதிஸாலோஹிதோ ஆஜீவகேஸு பப்³ப³ஜிதோ ஹோதி. அத² கோ² ஸோ ஆஜீவகோ யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி; உபஸங்கமித்வா ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச – ‘‘இச்சா²மஹம், மஹாராஜ, ஸப்³ப³பாஸண்டி³கப⁴த்தம் காது’’ந்தி. ‘‘ஸசே த்வம், ப⁴ந்தே, பு³த்³த⁴ப்பமுக²ம் பி⁴க்கு²ஸங்க⁴ம் பட²மம் போ⁴ஜேய்யாஸி’’. ‘‘ஏவம் கரேய்யாமீ’’தி. அத² கோ² ஸோ ஆஜீவகோ பி⁴க்கூ²னம் ஸந்திகே தூ³தம் பாஹேஸி – ‘‘அதி⁴வாஸேந்து மே பி⁴க்கூ² ஸ்வாதனாய ப⁴த்த’’ந்தி. பி⁴க்கூ² குக்குச்சாயந்தா நாதி⁴வாஸேந்தி – ‘‘படிக்கி²த்தம் ப⁴க³வதா க³ணபோ⁴ஜன’’ந்தி. அத² கோ² ஸோ ஆஜீவகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³, ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் அட்டா²ஸி. ஏகமந்தம் டி²தோ கோ² ஸோ ஆஜீவகோ ப⁴க³வந்தம் ஏதத³வோச – ‘‘ப⁴வம்பி கோ³தமோ பப்³ப³ஜிதோ, அஹம்பி பப்³ப³ஜிதோ; அரஹதி பப்³ப³ஜிதோ பப்³ப³ஜிதஸ்ஸ பிண்ட³ம் படிக்³க³ஹேதும். அதி⁴வாஸேது மே ப⁴வம் கோ³தமோ ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² ஸோ ஆஜீவகோ ப⁴க³வதோ அதி⁴வாஸனம் விதி³த்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஸமணப⁴த்தஸமயே க³ணபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
217. க³ணபோ⁴ஜனே , அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ, சீவரகாரஸமயோ, அத்³தா⁴னக³மனஸமயோ, நாவாபி⁴ருஹனஸமயோ, மஹாஸமயோ, ஸமணப⁴த்தஸமயோ – அயம் தத்த² ஸமயோ’’தி.
218. க³ணபோ⁴ஜனம் நாம யத்த² சத்தாரோ பி⁴க்கூ² பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதா பு⁴ஞ்ஜந்தி. ஏதம் க³ணபோ⁴ஜனம் நாம.
அஞ்ஞத்ர ஸமயாதி ட²பேத்வா ஸமயம்.
கி³லானஸமயோ நாம அந்தமஸோ பாதா³பி ப²லிதா [பா²லிதா (ஸ்யா. க.)] ஹோந்தி. ‘‘கி³லானஸமயோ’’தி பு⁴ஞ்ஜிதப்³ப³ம்.
சீவரதா³னஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்சமாஸா. ‘‘சீவரதா³னஸமயோ’’தி பு⁴ஞ்ஜிதப்³ப³ம்.
சீவரகாரஸமயோ நாம சீவரே கயிரமானே. ‘‘சீவரகாரஸமயோ’’தி பு⁴ஞ்ஜிதப்³ப³ம்.
அத்³தா⁴னக³மனஸமயோ நாம ‘‘அத்³த⁴யோஜனம் க³ச்சி²ஸ்ஸாமீ’’தி பு⁴ஞ்ஜிதப்³ப³ம், க³ச்ச²ந்தேன பு⁴ஞ்ஜிதப்³ப³ம், க³தேன பு⁴ஞ்ஜிதப்³ப³ம்.
நாவாபி⁴ருஹனஸமயோ நாம ‘‘நாவம் அபி⁴ருஹிஸ்ஸாமீ’’தி பு⁴ஞ்ஜிதப்³ப³ம், ஆருள்ஹேன பு⁴ஞ்ஜிதப்³ப³ம், ஓருள்ஹேன பு⁴ஞ்ஜிதப்³ப³ம்.
மஹாஸமயோ நாம யத்த² த்³வே தயோ பி⁴க்கூ² பிண்டா³ய சரித்வா யாபேந்தி, சதுத்தே² ஆக³தே ந யாபேந்தி. ‘‘மஹாஸமயோ’’தி பு⁴ஞ்ஜிதப்³ப³ம்.
ஸமணப⁴த்தஸமயோ நாம யோ கோசி பரிப்³பா³ஜகஸமாபன்னோ ப⁴த்தம் கரோதி. ‘‘ஸமணப⁴த்தஸமயோ’’தி பு⁴ஞ்ஜிதப்³ப³ம்.
‘‘அஞ்ஞத்ர ஸமயா பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.
219. க³ணபோ⁴ஜனே க³ணபோ⁴ஜனஸஞ்ஞீ, அஞ்ஞத்ர ஸமயா, பு⁴ஞ்ஜதி, ஆபத்தி பாசித்தியஸ்ஸ. க³ணபோ⁴ஜனே வேமதிகோ, அஞ்ஞத்ர ஸமயா, பு⁴ஞ்ஜதி, ஆபத்தி பாசித்தியஸ்ஸ. க³ணபோ⁴ஜனே நக³ணபோ⁴ஜனஸஞ்ஞீ, அஞ்ஞத்ர ஸமயா, பு⁴ஞ்ஜதி, ஆபத்தி பாசித்தியஸ்ஸ.
நக³ணபோ⁴ஜனே க³ணபோ⁴ஜனஸஞ்ஞீ, ஆபத்தி து³க்கடஸ்ஸ. நக³ணபோ⁴ஜனே வேமதிகோ, ஆபத்தி து³க்கடஸ்ஸ. நக³ணபோ⁴ஜனே நக³ணபோ⁴ஜனஸஞ்ஞீ, அனாபத்தி.
220. அனாபத்தி ஸமயே, த்³வே தயோ ஏகதோ பு⁴ஞ்ஜந்தி, பிண்டா³ய சரித்வா ஏகதோ ஸன்னிபதித்வா பு⁴ஞ்ஜந்தி, நிச்சப⁴த்தம், ஸலாகப⁴த்தம், பக்கி²கம், உபோஸதி²கம், பாடிபதி³கம், பஞ்ச போ⁴ஜனானி ட²பேத்வா ஸப்³ப³த்த² அனாபத்தி, உம்மத்தகஸ்ஸ, ஆதி³கம்மிகஸ்ஸாதி.
க³ணபோ⁴ஜனஸிக்கா²பத³ம் நிட்டி²தம் து³தியம்.
3. பரம்பரபோ⁴ஜனஸிக்கா²பத³ம்
221. தேன ஸமயேன பு³த்³தோ⁴ ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன வேஸாலியம் பணீதானம் ப⁴த்தானம் ப⁴த்தபடிபாடி அதி⁴ட்டி²தா ஹோதி. அத² கோ² அஞ்ஞதரஸ்ஸ த³லித்³த³ஸ்ஸ கம்மகாரஸ்ஸ [கம்மகரஸ்ஸ (ஸீ.)] ஏதத³ஹோஸி – ‘‘ந கோ² இத³ம் ஓரகம் ப⁴விஸ்ஸதி யத²யிமே மனுஸ்ஸா ஸக்கச்சம் ப⁴த்தம் கரோந்தி; யம்னூனாஹம்பி ப⁴த்தம் கரேய்ய’’ந்தி. அத² கோ² ஸோ த³லித்³தோ³ கம்மகாரோ யேன கிரபதிகோ தேனுபஸங்கமி; உபஸங்கமித்வா தம் கிரபதிகம் ஏதத³வோச – ‘‘இச்சா²மஹம், அய்யபுத்த, பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ ப⁴த்தம் காதும். தே³ஹி மே வேதன’’ந்தி. ஸோபி கோ² கிரபதிகோ ஸத்³தோ⁴ ஹோதி பஸன்னோ. அத² கோ² ஸோ கிரபதிகோ தஸ்ஸ த³லித்³த³ஸ்ஸ கம்மகாரஸ்ஸ அப்³பா⁴திரேகம் [அதிரேகம் (ஸ்யா.)] வேதனம் அதா³ஸி. அத² கோ² ஸோ த³லித்³தோ³ கம்மகாரோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ த³லித்³தோ³ கம்மகாரோ ப⁴க³வந்தம் ஏதத³வோச – ‘‘அதி⁴வாஸேது மே, ப⁴ந்தே, ப⁴க³வா ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’தி. ‘‘மஹா கோ², ஆவுஸோ, பி⁴க்கு²ஸங்கோ⁴. ஜானாஹீ’’தி. ‘‘ஹோது [ஹோது மே (க.)] ப⁴ந்தே, மஹா பி⁴க்கு²ஸங்கோ⁴. ப³ஹூ மே ப³த³ரா படியத்தா ப³த³ரமிஸ்ஸேன பேய்யா பரிபூரிஸ்ஸந்தீ’’தி. அதி⁴வாஸேஸி ப⁴க³வா துண்ஹீபா⁴வேன.
அத² கோ² ஸோ த³லித்³தோ³ கம்மகாரோ ப⁴க³வதோ அதி⁴வாஸனம் விதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அஸ்ஸோஸும் கோ² பி⁴க்கூ² – ‘‘த³லித்³தே³ன கிர கம்மகாரேன ஸ்வாதனாய பு³த்³த⁴ப்பமுகோ² பி⁴க்கு²ஸங்கோ⁴ நிமந்திதோ, ப³த³ரமிஸ்ஸேன பேய்யா பரிபூரிஸ்ஸந்தீ’’தி. தே காலஸ்ஸேவ பிண்டா³ய சரித்வா பு⁴ஞ்ஜிம்ஸு. அஸ்ஸோஸும் கோ² மனுஸ்ஸா – ‘‘த³லித்³தே³ன கிர கம்மகாரேன பு³த்³த⁴ப்பமுகோ² பி⁴க்கு²ஸங்கோ⁴ நிமந்திதோ’’தி. தே த³லித்³த³ஸ்ஸ கம்மகாரஸ்ஸ பஹூதம் கா²த³னீயம் போ⁴ஜனீயம் அபி⁴ஹரிம்ஸு. அத² கோ² ஸோ த³லித்³தோ³ கம்மகாரோ தஸ்ஸா ரத்தியா அச்சயேன பணீதம் கா²த³னீயம் போ⁴ஜனீயம் படியாதா³பேத்வா ப⁴க³வதோ காலம் ஆரோசாபேஸி – ‘‘காலோ, ப⁴ந்தே, நிட்டி²தம் ப⁴த்த’’ந்தி.
அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன தஸ்ஸ த³லித்³த³ஸ்ஸ கம்மகாரஸ்ஸ நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. அத² கோ² ஸோ த³லித்³தோ³ கம்மகாரோ ப⁴த்தக்³கே³ பி⁴க்கூ² பரிவிஸதி. பி⁴க்கூ² ஏவமாஹம்ஸு – ‘‘தோ²கம், ஆவுஸோ, தே³ஹி. தோ²கம், ஆவுஸோ, தே³ஹீ’’தி. ‘‘மா கோ² தும்ஹே, ப⁴ந்தே, ‘அயம் த³லித்³தோ³ கம்மகாரோ’தி தோ²கம் தோ²கம் படிக்³க³ண்ஹித்த². பஹூதம் மே கா²த³னீயம் போ⁴ஜனீயம் படியத்தம்.
படிக்³க³ண்ஹத², ப⁴ந்தே, யாவத³த்த²’’ந்தி. ‘‘ந கோ² மயம், ஆவுஸோ, ஏதம்காரணா தோ²கம் தோ²கம் படிக்³க³ண்ஹாம. அபிச, மயம் காலஸ்ஸேவ பிண்டா³ய சரித்வா பு⁴ஞ்ஜிம்ஹா; தேன மயம் தோ²கம் தோ²கம் படிக்³க³ண்ஹாமா’’தி.
அத² கோ² ஸோ த³லித்³தோ³ கம்மகாரோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா மயா நிமந்திதா அஞ்ஞத்ர பு⁴ஞ்ஜிஸ்ஸந்தி! ந சாஹம் படிப³லோ யாவத³த்த²ம் தா³து’’ந்தி? அஸ்ஸோஸும் கோ² பி⁴க்கூ² தஸ்ஸ த³லித்³த³ஸ்ஸ கம்மகாரஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² அஞ்ஞத்ர நிமந்திதா அஞ்ஞத்ர பு⁴ஞ்ஜிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கூ² அஞ்ஞத்ர நிமந்திதா அஞ்ஞத்ர பு⁴ஞ்ஜந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா அஞ்ஞத்ர நிமந்திதா அஞ்ஞத்ர பு⁴ஞ்ஜிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘பரம்பரபோ⁴ஜனே பாசித்திய’’ந்தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
222. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. அஞ்ஞதரோ பி⁴க்கு² பிண்ட³பாதம் ஆதா³ய யேன ஸோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் ஏதத³வோச – ‘‘பு⁴ஞ்ஜாஹி, ஆவுஸோ’’தி. ‘‘அலம், ஆவுஸோ, அத்தி² மே ப⁴த்தபச்சாஸா’’தி. தஸ்ஸ பி⁴க்கு²னோ பிண்ட³பாதோ உஸ்ஸூரே [உஸ்ஸூரேன (க.)] ஆஹரீயித்த². ஸோ பி⁴க்கு² ந சித்தரூபம் பு⁴ஞ்ஜி. ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கி³லானேன பி⁴க்கு²னா பரம்பரபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘பரம்பரபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
223. தேன கோ² பன ஸமயேன மனுஸ்ஸா சீவரதா³னஸமயே ஸசீவரப⁴த்தம் படியாதே³த்வா [படியாதா³பேத்வா (இதிபி)] பி⁴க்கூ² நிமந்தேந்தி – ‘‘போ⁴ஜேத்வா சீவரேன அச்சா²தே³ஸ்ஸாமா’’தி. பி⁴க்கூ² குக்குச்சாயந்தா நாதி⁴வாஸேந்தி – ‘‘படிக்கி²த்தம் ப⁴க³வதா பரம்பரபோ⁴ஜன’’ந்தி. சீவரம் பரித்தம் உப்பஜ்ஜதி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, சீவரதா³னஸமயே பரம்பரபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘பரம்பரபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
224. தேன கோ² பன ஸமயேன மனுஸ்ஸா சீவரகாரகே பி⁴க்கூ² ப⁴த்தேன நிமந்தேந்தி. பி⁴க்கூ² குக்குச்சாயந்தா நாதி⁴வாஸேந்தி – ‘‘படிக்கி²த்தம் ப⁴க³வதா பரம்பரபோ⁴ஜன’’ந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, சீவரகாரஸமயே பரம்பரபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
225. ‘‘பரம்பரபோ⁴ஜனே, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானஸமயோ, சீவரதா³னஸமயோ, சீவரகாரஸமயோ – அயம் தத்த² ஸமயோ’’தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
226. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய ஆயஸ்மதா ஆனந்தே³ன பச்சா²ஸமணேன யேன அஞ்ஞதரம் குலம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² தே மனுஸ்ஸா ப⁴க³வதோ ச ஆயஸ்மதோ ச ஆனந்த³ஸ்ஸ போ⁴ஜனம் அத³ம்ஸு. ஆயஸ்மா ஆனந்தோ³ குக்குச்சாயந்தோ ந படிக்³க³ண்ஹாதி. ‘‘க³ண்ஹாஹி [பதிக³ண்ஹாஹி (ஸீ.)], ஆனந்தா³’’தி. ‘‘அலம், ப⁴க³வா, அத்தி² மே ப⁴த்தபச்சாஸா’’தி. ‘‘தேனஹானந்த³, விகப்பேத்வா க³ண்ஹாஹீ’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, விகப்பேத்வா [ப⁴த்தபச்சாஸம் விகப்பேத்வா (ஸ்யா.)] பரம்பரபோ⁴ஜனம் பு⁴ஞ்ஜிதும். ஏவஞ்ச பன, பி⁴க்க²வே, விகப்பேதப்³ப³ம் – ‘மய்ஹம் ப⁴த்தபச்சாஸம் இத்த²ன்னாமஸ்ஸ த³ம்மீ’’’தி.
227. பரம்பரபோ⁴ஜனம் நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ, தம் ட²பேத்வா அஞ்ஞம் பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதி, ஏதம் பரம்பரபோ⁴ஜனம் நாம.
அஞ்ஞத்ர ஸமயாதி ட²பேத்வா ஸமயம்.
கி³லானஸமயோ நாம ந ஸக்கோதி ஏகாஸனே நிஸின்னோ யாவத³த்த²ம் பு⁴ஞ்ஜிதும். ‘‘கி³லானஸமயோ’’தி பு⁴ஞ்ஜிதப்³ப³ம்.
சீவரதா³னஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்ச மாஸா. ‘‘சீவரதா³னஸமயோ’’தி பு⁴ஞ்ஜிதப்³ப³ம்.
சீவரகாரஸமயோ நாம சீவரே கயிரமானே. ‘‘சீவரகாரஸமயோ’’தி பு⁴ஞ்ஜிதப்³ப³ம்.
‘‘அஞ்ஞத்ர ஸமயா பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.
228. பரம்பரபோ⁴ஜனே பரம்பரபோ⁴ஜனஸஞ்ஞீ, அஞ்ஞத்ர ஸமயா, பு⁴ஞ்ஜதி, ஆபத்தி பாசித்தியஸ்ஸ. பரம்பரபோ⁴ஜனே வேமதிகோ, அஞ்ஞத்ர ஸமயா, பு⁴ஞ்ஜதி, ஆபத்தி பாசித்தியஸ்ஸ. பரம்பரபோ⁴ஜனே நபரம்பரபோ⁴ஜனஸஞ்ஞீ, அஞ்ஞத்ர ஸமயா, பு⁴ஞ்ஜதி, ஆபத்தி பாசித்தியஸ்ஸ.
நபரம்பரபோ⁴ஜனே பரம்பரபோ⁴ஜனஸஞ்ஞீ, ஆபத்தி து³க்கடஸ்ஸ. நபரம்பரபோ⁴ஜனே வேமதிகோ, ஆபத்தி து³க்கடஸ்ஸ. நபரம்பரபோ⁴ஜனே நபரம்பரபோ⁴ஜனஸஞ்ஞீ, அனாபத்தி.
229. அனாபத்தி ஸமயே, விகப்பேத்வா பு⁴ஞ்ஜதி, த்³வே தயோ நிமந்தனே ஏகதோ பு⁴ஞ்ஜதி, நிமந்தனபடிபாடியா பு⁴ஞ்ஜதி, ஸகலேன கா³மேன நிமந்திதோ தஸ்மிம் கா³மே யத்த² கத்த²சி பு⁴ஞ்ஜதி, ஸகலேன பூகே³ன நிமந்திதோ தஸ்மிம் பூகே³ யத்த² கத்த²சி பு⁴ஞ்ஜதி, நிமந்தியமானோ பி⁴க்க²ம் க³ஹேஸ்ஸாமீதி ப⁴ணதி, நிச்சப⁴த்தே, ஸலாகப⁴த்தே, பக்கி²கே, உபோஸதி²கே, பாடிபதி³கே, பஞ்ச போ⁴ஜனானி ட²பேத்வா ஸப்³ப³த்த² அனாபத்தி, உம்மத்தகஸ்ஸ, ஆதி³கம்மிகஸ்ஸாதி.
பரம்பரபோ⁴ஜனஸிக்கா²பத³ம் நிட்டி²தம் ததியம்.
4. காணமாதுஸிக்கா²பத³ம்
230. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன காணமாதா உபாஸிகா ஸத்³தா⁴ ஹோதி பஸன்னா. காணா கா³மகே அஞ்ஞதரஸ்ஸ புரிஸஸ்ஸ தி³ன்னா ஹோதி. அத² கோ² காணா மாதுக⁴ரம் அக³மாஸி கேனசிதே³வ கரணீயேன. அத² கோ² காணாய ஸாமிகோ காணாய ஸந்திகே தூ³தம் பாஹேஸி – ‘‘ஆக³ச்ச²து காணா, இச்சா²மி காணாய ஆக³த’’ந்தி. அத² கோ² காணமாதா உபாஸிகா ‘‘கிஸ்மிம் விய ரித்தஹத்த²ம் க³ந்து’’ந்தி பூவம் [பூபம் (ண்வாதி³)] பசி. பக்கே பூவே அஞ்ஞதரோ பிண்ட³சாரிகோ பி⁴க்கு² காணமாதாய உபாஸிகாய நிவேஸனம் பாவிஸி. அத² கோ² காணமாதா உபாஸிகா தஸ்ஸ பி⁴க்கு²னோ பூவம் தா³பேஸி. ஸோ நிக்க²மித்வா அஞ்ஞஸ்ஸ ஆசிக்கி². தஸ்ஸபி பூவம் தா³பேஸி. ஸோபி நிக்க²மித்வா அஞ்ஞஸ்ஸ ஆசிக்கி². தஸ்ஸபி பூவம் தா³பேஸி. யதா²படியத்தம் பூவம் பரிக்க²யம் அக³மாஸி. து³தியம்பி கோ² காணாய ஸாமிகோ காணாய ஸந்திகே தூ³தம் பாஹேஸி – ‘‘ஆக³ச்ச²து காணா, இச்சா²மி காணாய ஆக³த’’ந்தி. து³தியம்பி கோ² காணமாதா உபாஸிகா ‘‘கிஸ்மிம் விய ரித்தஹத்தம் க³ந்து’’ந்தி பூவம் பசி. பக்கே பூவே அஞ்ஞதரோ பிண்ட³சாரிகோ பி⁴க்கு² காணமாதாய உபாஸிகாய நிவேஸனம் பாவிஸி. அத² கோ² காணமாதா உபாஸிகா தஸ்ஸ பி⁴க்கு²னோ பூவம் தா³பேஸி. ஸோ நிக்க²மித்வா அஞ்ஞஸ்ஸ ஆசிக்கி². தஸ்ஸபி பூவம் தா³பேஸி. ஸோபி நிக்க²மித்வா அஞ்ஞஸ்ஸ ஆசிக்கி². தஸ்ஸபி பூவம் தா³பேஸி. யதா²படியத்தம் பூவம் பரிக்க²யம் அக³மாஸி. ததியம்பி கோ² காணாய ஸாமிகோ காணாய ஸந்திகே தூ³தம் பாஹேஸி – ‘‘ஆக³ச்ச²து காணா, இச்சா²மி காணாய ஆக³தம். ஸசே காணா நாக³ச்சி²ஸ்ஸதி, அஹம் அஞ்ஞம் பஜாபதிம் ஆனேஸ்ஸாமீ’’தி. ததியம்பி கோ² காணமாதா உபாஸிகா கிஸ்மிம் விய ரித்தஹத்த²ம் க³ந்துந்தி பூவம் பசி. பக்கே பூவே அஞ்ஞதரோ பிண்ட³சாரிகோ பி⁴க்கு² காணமாதாய உபாஸிகாய நிவேஸனம் பாவிஸி. அத² கோ² காணமாதா உபாஸிகா தஸ்ஸ பி⁴க்கு²னோ பூவம் தா³பேஸி. ஸோ நிக்க²மித்வா அஞ்ஞஸ்ஸ ஆசிக்கி². தஸ்ஸபி பூவம் தா³பேஸி. ஸோபி நிக்க²மித்வா அஞ்ஞஸ்ஸ ஆசிக்கி². தஸ்ஸபி பூவம் தா³பேஸி. யதா²படியத்தம் பூவம் பரிக்க²யம் அக³மாஸி. அத² கோ² காணாய ஸாமிகோ அஞ்ஞம் பஜாபதிம் ஆனேஸி.
அஸ்ஸோஸி கோ² காணா – ‘‘தேன கிர புரிஸேன அஞ்ஞா பஜாபதி ஆனீதா’’தி. ஸா ரோத³ந்தீ அட்டா²ஸி. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன காணமாதாய உபாஸிகாய நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² காணமாதா உபாஸிகா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² காணமாதரம் உபாஸிகம் ப⁴க³வா ஏதத³வோச – ‘‘கிஸ்ஸாயம் காணா ரோத³தீ’’தி? அத² கோ² காணமாதா உபாஸிகா ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா காணமாதரம் உபாஸிகம் த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி.
231. தேன கோ² பன ஸமயேன அஞ்ஞதரோ ஸத்தோ² ராஜக³ஹா படியாலோகம் க³ந்துகாமோ ஹோதி. அஞ்ஞதரோ பிண்ட³சாரிகோ பி⁴க்கு² தம் ஸத்த²ம் பிண்டா³ய பாவிஸி. அஞ்ஞதரோ உபாஸகோ தஸ்ஸ பி⁴க்கு²னோ ஸத்தும் தா³பேஸி. ஸோ நிக்க²மித்வா அஞ்ஞஸ்ஸ ஆசிக்கி². தஸ்ஸபி ஸத்தும் தா³பேஸி. ஸோ நிக்க²மித்வா அஞ்ஞஸ்ஸ ஆசிக்கி². தஸ்ஸபி ஸத்தும் தா³பேஸி. யதா²படியத்தம் பாதே²ய்யம் பரிக்க²யம் அக³மாஸி. அத² கோ² ஸோ உபாஸகோ தே மனுஸ்ஸே ஏதத³வோச – ‘‘அஜ்ஜண்ஹோ, அய்யா, ஆக³மேத², யதா²படியத்தம் பாதே²ய்யம் அய்யானம் தி³ன்னம். பாதே²ய்யம் படியாதே³ஸ்ஸாமீ’’தி. ‘‘நாய்யோ [நாய்ய (ஸ்யா.)] ஸக்கா ஆக³மேதும், பயாதோ ஸத்தோ²’’தி அக³மம்ஸு. அத² கோ² தஸ்ஸ உபாஸகஸ்ஸ பாதே²ய்யம் படியாதே³த்வா பச்சா² க³ச்ச²ந்தஸ்ஸ சோரா அச்சி²ந்தி³ம்ஸு. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தம் ஜானித்வா படிக்³க³ஹேஸ்ஸந்தி! அயம் இமேஸம் த³த்வா பச்சா² க³ச்ச²ந்தோ சோரேஹி அச்சி²ன்னோ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கூ²னம் ஸிக்கா²பத³ம் பஞ்ஞபேஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய, ஸங்க⁴பா²ஸுதாய…பே… வினயானுக்³க³ஹாய. ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
232. ‘‘பி⁴க்கு²ம் பனேவ குலம் உபக³தம் பூவேஹி வா மந்தே²ஹி வா அபி⁴ஹட்டு²ம் பவாரேய்ய, ஆகங்க²மானேன பி⁴க்கு²னா த்³வத்திபத்தபூரா படிக்³க³ஹேதப்³பா³ ததோ சே உத்தரி படிக்³க³ண்ஹேய்ய பாசித்தியம். த்³வத்திபத்தபூரே படிக்³க³ஹேத்வா ததோ நீஹரித்வா பி⁴க்கூ²ஹி ஸத்³தி⁴ம் ஸம்விப⁴ஜிதப்³ப³ம். அயம் தத்த² ஸாமீசீ’’தி.
233. பி⁴க்கு²ம் பனேவ குலம் உபக³தந்தி குலம் நாம சத்தாரி குலானி – க²த்தியகுலம், ப்³ராஹ்மணகுலம், வேஸ்ஸகுலம், ஸுத்³த³குலம்.
உபக³தந்தி தத்த² க³தம்.
பூவம் நாம யம்கிஞ்சி பஹேணகத்தா²ய படியத்தம்.
மந்த²ம் நாம யம்கிஞ்சி பாதே²ய்யத்தா²ய படியத்தம்.
அபி⁴ஹட்டு²ம் பவாரேய்யாதி யாவதகம் இச்ச²ஸி தாவதகம் க³ண்ஹாஹீதி.
ஆகங்க²மானேனாதி இச்ச²மானேன.
த்³வத்திபத்தபூரா படிக்³க³ஹேதப்³பா³தி த்³வேதயோ பத்தபூரா படிக்³க³ஹேதப்³பா³.
ததோ சே உத்தரி படிக³ண்ஹேய்யாதி ததுத்தரி படிக்³க³ண்ஹாதி, ஆபத்தி பாசித்தியஸ்ஸ.
த்³வத்திபத்தபூரே படிக்³க³ஹேத்வா ததோ நிக்க²மந்தேன பி⁴க்கு²ம் பஸ்ஸித்வா ஆசிக்கி²தப்³ப³ம் – ‘‘அமுத்ர மயா த்³வத்திபத்தபூரா படிக்³க³ஹிதா, மா கோ² தத்த² படிக்³க³ண்ஹீ’’தி. ஸசே பஸ்ஸித்வா ந ஆசிக்க²தி, ஆபத்தி து³க்கடஸ்ஸ. ஸசே ஆசிக்கி²தே படிக்³க³ண்ஹாதி, ஆபத்தி து³க்கடஸ்ஸ.
ததோ நீஹரித்வா பி⁴க்கூ²ஹி ஸத்³தி⁴ம் ஸம்விப⁴ஜிதப்³ப³ந்தி படிக்கமனம் நீஹரித்வா ஸம்விப⁴ஜிதப்³ப³ம்.
அயம் தத்த² ஸாமீசீதி அயம் தத்த² அனுத⁴ம்மதா.
234. அதிரேகத்³வத்திபத்தபூரே அதிரேகஸஞ்ஞீ படிக்³க³ண்ஹாதி, ஆபத்தி பாசித்தியஸ்ஸ. அதிரேகத்³வத்திபத்தபூரே வேமதிகோ படிக்³க³ண்ஹாதி, ஆபத்தி பாசித்தியஸ்ஸ. அதிரேகத்³வத்திபத்தபூரே ஊனகஸஞ்ஞீ படிக்³க³ண்ஹாதி, ஆபத்தி பாசித்தியஸ்ஸ.
ஊனகத்³வத்திபத்தபூரே அதிரேகஸஞ்ஞீ, ஆபத்தி து³க்கடஸ்ஸ. ஊனகத்³வத்திபத்தபூரே வேமதிகோ, ஆபத்தி து³க்கடஸ்ஸ. ஊனகத்³வத்திபத்தபூரே ஊனகஸஞ்ஞீ, அனாபத்தி.
235. அனாபத்தி த்³வத்திபத்தபூரே படிக்³க³ண்ஹாதி, ஊனகத்³வத்திபத்தபூரே படிக்³க³ண்ஹாதி, ந பஹேணகத்தா²ய ந பாதே²ய்யத்தா²ய படியத்தம் தே³ந்தி, பஹேணகத்தா²ய வா பாதே²ய்யத்தா²ய வா படியத்தஸேஸகம் தே³ந்தி, க³மனே படிப்பஸ்ஸத்³தே⁴ தே³ந்தி, ஞாதகானம் பவாரிதானம், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.
காணமாதுஸிக்கா²பத³ம் நிட்டி²தம் சதுத்த²ம்.
5. பட²மபவாரணாஸிக்கா²பத³ம்
236. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ ப்³ராஹ்மணோ பி⁴க்கூ² நிமந்தேத்வா போ⁴ஜேஸி. பி⁴க்கூ² பு⁴த்தாவீ பவாரிதா ஞாதிகுலானி க³ந்த்வா ஏகச்சே பு⁴ஞ்ஜிம்ஸு ஏகச்சே பிண்ட³பாதம் ஆதா³ய அக³மம்ஸு. அத² கோ² ஸோ ப்³ராஹ்மணோ படிவிஸ்ஸகே [படிவிஸகே (யோஜனா)] ஏதத³வோச – ‘‘பி⁴க்கூ² மயா அய்யா ஸந்தப்பிதா. ஏத², தும்ஹேபி ஸந்தப்பேஸ்ஸாமீ’’தி. தே ஏவமாஹம்ஸு – ‘‘கிம் த்வம், அய்யோ [அய்ய (ஸ்யா.)], அம்ஹே ஸந்தப்பேஸ்ஸஸி? யேபி தயா நிமந்திதா தேபி அம்ஹாகம் க⁴ரானி ஆக³ந்த்வா ஏகச்சே பு⁴ஞ்ஜிம்ஸு ஏகச்சே பிண்ட³பாதம் ஆதா³ய அக³மம்ஸூ’’தி!
அத² கோ² ஸோ ப்³ராஹ்மணோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா அம்ஹாகம் க⁴ரே பு⁴ஞ்ஜித்வா அஞ்ஞத்ர பு⁴ஞ்ஜிஸ்ஸந்தி! ந சாஹம் படிப³லோ யாவத³த்த²ம் தா³து’’ந்தி! அஸ்ஸோஸும் கோ² பி⁴க்கூ² தஸ்ஸ ப்³ராஹ்மணஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² பு⁴த்தாவீ பவாரிதா அஞ்ஞத்ர பு⁴ஞ்ஜிஸ்ஸந்தீ’’தி…பே… ஸச்சம் கிர, பி⁴க்க²வே, பி⁴க்கூ² பு⁴த்தாவீ பவாரிதா அஞ்ஞத்ர பு⁴ஞ்ஜந்தீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா பு⁴த்தாவீ பவாரிதா அஞ்ஞத்ர பு⁴ஞ்ஜிஸ்ஸந்தி! நேதம், பி⁴க்க²வே, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
‘‘யோ பன பி⁴க்கு² பு⁴த்தாவீ பவாரிதோ கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்திய’’ந்தி.
ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.
237. தேன கோ² பன ஸமயேன பி⁴க்கூ² கி³லானானம் பி⁴க்கூ²னம் பணீதே பிண்ட³பாதே நீஹரந்தி. கி³லானா ந சித்தரூபம் பு⁴ஞ்ஜந்தி. தானி பி⁴க்கூ² ச²ட்டேந்தி. அஸ்ஸோஸி கோ² ப⁴க³வா உச்சாஸத்³த³ம் மஹாஸத்³த³ம் காகோரவஸத்³த³ம். ஸுத்வான ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ² ஸோ, ஆனந்த³, உச்சாஸத்³தோ³ மஹாஸத்³தோ³ காகோரவஸத்³தோ³’’தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ம் ஆரோசேஸி. ‘‘பு⁴ஞ்ஜேய்யும் பனானந்த³, பி⁴க்கூ² கி³லானாதிரித்த’’ந்தி. ‘‘ந பு⁴ஞ்ஜேய்யும், ப⁴க³வா’’தி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி பி⁴க்க²வே, கி³லானஸ்ஸ ச அகி³லானஸ்ஸ ச அதிரித்தம் பு⁴ஞ்ஜிதும். ஏவஞ்ச பன, பி⁴க்க²வே, அதிரித்தம் காதப்³ப³ம் – ‘‘அலமேதம் ஸப்³ப³’’ந்தி. ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
238. ‘‘யோ பன பி⁴க்கு² பு⁴த்தாவீ பவாரிதோ அனதிரித்தம் கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்திய’’ந்தி.
239. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.
பு⁴த்தாவீ நாம பஞ்சன்னம் போ⁴ஜனானம் அஞ்ஞதரம் போ⁴ஜனம் அந்தமஸோ குஸக்³கே³னபி பு⁴த்தம் ஹோதி.
பவாரிதோ நாம அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ அபி⁴ஹரதி, படிக்கே²போ பஞ்ஞாயதி.
அனதிரித்தம் நாம அகப்பியகதம் ஹோதி, அப்படிக்³க³ஹிதகதம் ஹோதி, அனுச்சாரிதகதம் ஹோதி, அஹத்த²பாஸே கதம் ஹோதி, அபு⁴த்தாவினா கதம் ஹோதி, பு⁴த்தாவினா பவாரிதேன ஆஸனா வுட்டி²தேன கதம் ஹோதி, ‘‘அலமேதம் ஸப்³ப³ந்தி அவுத்தம் ஹோதி, ந கி³லானாதிரித்தம் ஹோதி’’ – ஏதம் அனதிரித்தம் நாம.
அதிரித்தம் நாம கப்பியகதம் ஹோதி, படிக்³க³ஹிதகதம் ஹோதி, உச்சாரிதகதம் ஹோதி, ஹத்த²பாஸே கதம் ஹோதி, பு⁴த்தாவினா கதம் ஹோதி, பு⁴த்தாவினா பவாரிதேன ஆஸனா அவுட்டி²தேன கதம் ஹோதி, ‘‘அலமேதம் ஸப்³ப³’’ந்தி வுத்தம் ஹோதி, கி³லானாதிரித்தம் ஹோதி – ஏதம் அதிரித்தம் நாம.
கா²த³னீயம் நாம பஞ்ச போ⁴ஜனானி – யாமகாலிகம் ஸத்தாஹகாலிகம் யாவஜீவிகம் ட²பேத்வா அவஸேஸம் கா²த³னீயம் நாம.
போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம்.
‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.
240. அனதிரித்தே அனதிரித்தஸஞ்ஞீ கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ. அனதிரித்தே வேமதிகோ கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ. அனதிரித்தே அதிரித்தஸஞ்ஞீ கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ.
யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. அதிரித்தே அனதிரித்தஸஞ்ஞீ, ஆபத்தி து³க்கடஸ்ஸ. அதிரித்தே வேமதிகோ, ஆபத்தி து³க்கடஸ்ஸ. அதிரித்தே அதிரித்தஸஞ்ஞீ, அனாபத்தி.
241. அனாபத்தி அதிரித்தம் காராபேத்வா பு⁴ஞ்ஜதி, ‘‘அதிரித்தம் காராபேத்வா பு⁴ஞ்ஜிஸ்ஸாமீ’’தி படிக்³க³ண்ஹாதி, அஞ்ஞஸ்ஸத்தா²ய ஹரந்தோ க³ச்ச²தி, கி³லானஸ்ஸ ஸேஸகம் பு⁴ஞ்ஜதி, யாமகாலிகம் ஸத்தாஹகாலிகம் யாவஜீவிகம் ஸதி பச்சயே பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.
பட²மபவாரணாஸிக்கா²பத³ம் நிட்டி²தம் பஞ்சமம்.
6. து³தியபவாரணாஸிக்கா²பத³ம்
242. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன த்³வே பி⁴க்கூ² கோஸலேஸு ஜனபதே³ ஸாவத்தி²ம் அத்³தா⁴னமக்³க³ப்படிபன்னா ஹோந்தி. ஏகோ பி⁴க்கு² அனாசாரம் ஆசரதி. து³தியோ பி⁴க்கு² தம் பி⁴க்கு²ம் ஏதத³வோச – ‘‘மாவுஸோ, ஏவரூபமகாஸி, நேதம் கப்பதீ’’தி. ஸோ தஸ்மிம் உபனந்தி⁴. அத² கோ² தே பி⁴க்கூ² ஸாவத்தி²ம் அக³மம்ஸு. தேன கோ² பன ஸமயேன ஸாவத்தி²யம் அஞ்ஞதரஸ்ஸ பூக³ஸ்ஸ ஸங்க⁴ப⁴த்தம் ஹோதி. து³தியோ பி⁴க்கு² பு⁴த்தாவீ பவாரிதோ ஹோதி. உபனத்³தோ⁴ [உபனந்தோ⁴ (க.)] பி⁴க்கு² ஞாதிகுலம் க³ந்த்வா பிண்ட³பாதம் ஆதா³ய யேன ஸோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் ஏதத³வோச – ‘‘பு⁴ஞ்ஜாஹி, ஆவுஸோ’’தி. ‘‘அலம், ஆவுஸோ, பரிபுண்ணோம்ஹீ’’தி. ‘‘ஸுந்த³ரோ, ஆவுஸோ, பிண்ட³பாதோ, பு⁴ஞ்ஜாஹீ’’தி. அத² கோ² ஸோ பி⁴க்கு² தேன பி⁴க்கு²னா நிப்பீளியமானோ தம் பிண்ட³பாதம் பு⁴ஞ்ஜி. உபனத்³தோ⁴ பி⁴க்கு² தம் பி⁴க்கு²ம் ஏதத³வோச – ‘‘த்வம்பி [த்வம் ஹி (ஸ்யா.)] நாம, ஆவுஸோ, மம் வத்தப்³ப³ம் மஞ்ஞஸி யம் த்வம் பு⁴த்தாவீ பவாரிதோ அனதிரித்தம் போ⁴ஜனம் பு⁴ஞ்ஜஸீ’’தி. ‘‘நனு, ஆவுஸோ, ஆசிக்கி²தப்³ப³’’ந்தி. ‘‘நனு, ஆவுஸோ, புச்சி²தப்³ப³’’ந்தி.
அத² கோ² ஸோ பி⁴க்கு² பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² பி⁴க்கு²ம் பு⁴த்தாவிம் பவாரிதம் அனதிரித்தேன போ⁴ஜனேன அபி⁴ஹட்டு²ம் பவாரேஸ்ஸதீ’’ தி…பே… ஸச்சம் கிர த்வம், பி⁴க்கு², பி⁴க்கு²ம் பு⁴த்தாவிம் பவாரிதம் அனதிரித்தேன போ⁴ஜனேன அபி⁴ஹட்டு²ம் பவாரேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, பி⁴க்கு²ம் பு⁴த்தாவிம் பவாரிதம் அனதிரித்தேன போ⁴ஜனேன அபி⁴ஹட்டு²ம் பவாரேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன பி⁴க்க²வே இமம் ஸிக்கா²பத³ம் உத்³தி³ஸேய்யாத² –
243. ‘‘யோ பன பி⁴க்கு² பி⁴க்கு²ம் பு⁴த்தாவிம் பவாரிதம் அனதிரித்தேன கா²த³னீயேன வா போ⁴ஜனீயேன வா அபி⁴ஹட்டு²ம் பவாரேய்ய – ‘ஹந்த³, பி⁴க்கு², கா²த³ வா பு⁴ஞ்ஜ வா’தி, ஜானம் ஆஸாத³னாபேக்கோ², பு⁴த்தஸ்மிம், பாசித்திய’’ந்தி.
244. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.
பி⁴க்கு²ந்தி அஞ்ஞம் பி⁴க்கு²ம்.
பு⁴த்தாவீ நாம பஞ்சன்னம் போ⁴ஜனானம் அஞ்ஞதரம் போ⁴ஜனம், அந்தமஸோ குஸக்³கே³னபி பு⁴த்தம் ஹோதி.
பவாரிதோ நாம அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ அபி⁴ஹரதி, படிக்கே²போ பஞ்ஞாயதி.
அனதிரித்தம் நாம அகப்பியகதம் ஹோதி, அப்படிக்³க³ஹிதகதம் ஹோதி, அனுச்சாரிதகதம் ஹோதி, அஹத்த²பாஸே கதம் ஹோதி, அபு⁴த்தாவினா கதம் ஹோதி, பு⁴த்தாவினா பவாரிதேன ஆஸனா வுட்டி²தேன கதம் ஹோதி, ‘‘அலமேதம் ஸப்³ப³’’ந்தி அவுத்தம் ஹோதி, ந கி³லானாதிரித்தம் ஹோதி – ஏதம் அனதிரித்தம் நாம.
கா²த³னீயம் நாம பஞ்ச போ⁴ஜனானி – யாமகாலிகம் ஸத்தாஹகாலிகம் யாவஜீவிகம் ட²பேத்வா அவஸேஸம் கா²த³னீயம் நாம.
போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம்.
அபி⁴ஹட்டு²ம் பவாரேய்யாதி யாவதகம் இச்ச²ஸி தாவதகம் க³ண்ஹாஹீதி.
ஜானாதி நாம ஸாமம் வா ஜானாதி, அஞ்ஞே வா தஸ்ஸ ஆரோசேந்தி, ஸோ வா ஆரோசேதி.
ஆஸாத³னாபேக்கோ²தி ‘‘இமினா இமம் சோதே³ஸ்ஸாமி ஸாரேஸ்ஸாமி படிசோதே³ஸ்ஸாமி படிஸாரேஸ்ஸாமி மங்கு கரிஸ்ஸாமீ’’தி அபி⁴ஹரதி, ஆபத்தி து³க்கடஸ்ஸ. தஸ்ஸ வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. போ⁴ஜனபரியோஸானே ஆபத்தி பாசித்தியஸ்ஸ.
245. பவாரிதே பவாரிதஸஞ்ஞீ அனதிரித்தேன கா²த³னீயேன வா போ⁴ஜனீயேன வா அபி⁴ஹட்டு²ம் பவாரேதி, ஆபத்தி பாசித்தியஸ்ஸ. பவாரிதே வேமதிகோ அனதிரித்தேன கா²த³னீயேன வா போ⁴ஜனீயேன வா அபி⁴ஹட்டு²ம் பவாரேதி, ஆபத்தி து³க்கடஸ்ஸ. பவாரிதே அப்பவாரிதஸஞ்ஞீ அனதிரித்தேன கா²த³னீயேன வா போ⁴ஜனீயேன வா அபி⁴ஹட்டு²ம் பவாரேதி, அனாபத்தி. யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய அபி⁴ஹரதி, ஆபத்தி து³க்கடஸ்ஸ. தஸ்ஸ வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. அப்பவாரிதே பவாரிதஸஞ்ஞீ, ஆபத்தி து³க்கடஸ்ஸ. அப்பவாரிதே வேமதிகோ, ஆபத்தி து³க்கடஸ்ஸ. அப்பவாரிதே அப்பவாரிதஸஞ்ஞீ, அனாபத்தி.
246. அனாபத்தி அதிரித்தம் காராபேத்வா தே³தி, ‘‘அதிரித்தம் காராபேத்வா பு⁴ஞ்ஜாஹீ’’தி தே³தி, அஞ்ஞஸ்ஸத்தா²ய ஹரந்தோ க³ச்சா²ஹீதி தே³தி, கி³லானஸ்ஸ ஸேஸகம் தே³தி, ‘‘யாமகாலிகம் ஸத்தாஹகாலிகம் யாவஜீவிகம் ஸதி பச்சயே பரிபு⁴ஞ்ஜா’’தி தே³தி, உம்மத்தகஸ்ஸ, ஆதி³கம்மிகஸ்ஸாதி.
து³தியபவாரணாஸிக்கா²பத³ம் நிட்டி²தம் ச²ட்ட²ம்.
7. விகாலபோ⁴ஜனஸிக்கா²பத³ம்
247. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ராஜக³ஹே கி³ரக்³க³ஸமஜ்ஜோ ஹோதி. ஸத்தரஸவக்³கி³யா பி⁴க்கூ² கி³ரக்³க³ஸமஜ்ஜம் த³ஸ்ஸனாய அக³மம்ஸு. மனுஸ்ஸா ஸத்தரஸவக்³கி³யே பி⁴க்கூ² பஸ்ஸித்வா நஹாபேத்வா விலிம்பேத்வா போ⁴ஜேத்வா கா²த³னீயம் அத³ம்ஸு. ஸத்தரஸவக்³கி³யா பி⁴க்கூ² கா²த³னீயம் ஆதா³ய ஆராமம் க³ந்த்வா ச²ப்³ப³க்³கி³யே பி⁴க்கூ² ஏதத³வோசும் – ‘‘க³ண்ஹாதா²வுஸோ, கா²த³னீயம் கா²த³தா²’’தி. ‘‘குதோ தும்ஹேஹி, ஆவுஸோ, கா²த³னீயம் லத்³த⁴’’ந்தி? ஸத்தரஸவக்³கி³யா பி⁴க்கூ² ச²ப்³ப³க்³கி³யானம் பி⁴க்கூ²னம் ஏதமத்த²ம் ஆரோசேஸும். ‘‘கிம் பன தும்ஹே, ஆவுஸோ, விகாலே போ⁴ஜனம் பு⁴ஞ்ஜதா²’’தி? ‘‘ஏவமாவுஸோ’’தி. ச²ப்³ப³க்³கி³யா பி⁴க்கூ² உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸத்தரஸவக்³கி³யா பி⁴க்கூ² விகாலே போ⁴ஜனம் பு⁴ஞ்ஜிஸ்ஸந்தீ’’தி! அத² கோ² ச²ப்³ப³க்³கி³யா பி⁴க்கூ² பி⁴க்கூ²னம் ஏதமத்த²ம் ஆரோசேஸும். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸத்தரஸவக்³கி³யா பி⁴க்கூ² விகாலே போ⁴ஜனம் பு⁴ஞ்ஜிஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, விகாலே போ⁴ஜனம் பு⁴ஞ்ஜதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, விகாலே போ⁴ஜனம் பு⁴ஞ்ஜிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –
248. யோ பன பி⁴க்கு² விகாலே கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா, பாசித்திய’’ந்தி.
249. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.
விகாலோ நாம மஜ்ஜ²ன்ஹிகே வீதிவத்தே யாவ அருணுக்³க³மனா.
கா²த³னீயம் நாம பஞ்ச போ⁴ஜனானி – யாமகாலிகம் ஸத்தாஹகாலிகம் யாவஜீவிகம் ட²பேத்வா அவஸேஸம் கா²த³னீயம் நாம.
போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம்.
‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.
250. விகாலே விகாலஸஞ்ஞீ கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ. விகாலே வேமதிகோ கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ. விகாலே காலஸஞ்ஞீ கா²த³னீயம் வா போ⁴ஜனீயம் வா கா²த³தி வா பு⁴ஞ்ஜதி வா, ஆபத்தி பாசித்தியஸ்ஸ.
யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. காலே விகாலஸஞ்ஞீ, ஆபத்தி து³க்கடஸ்ஸ. காலே வேமதிகோ, ஆபத்தி து³க்கடஸ்ஸ. காலே காலஸஞ்ஞீ, அனாபத்தி.
251. அனாபத்தி யாமகாலிகம் ஸத்தாஹகாலிகம் யாவஜீவிகம் ஸதி பச்சயே பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.
விகாலபோ⁴ஜனஸிக்கா²பத³ம் நிட்டி²தம் ஸத்தமம்.