5. அசேலகவக்³கோ³

1. அசேலகஸிக்கா²பத³ம்

269. தேன ஸமயேன பு³த்³தோ⁴ ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன ஸங்க⁴ஸ்ஸ கா²த³னீயம் உஸ்ஸன்னம் ஹோதி. அத² கோ² ஆயஸ்மா ஆனந்தோ³ ப⁴க³வதோ ஏதமத்த²ம் ஆரோசேஸி. ‘‘தேனஹானந்த³, விகா⁴ஸாதா³னம் பூவம் தே³ஹீ’’தி. ‘‘ஏவம் ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ படிஸ்ஸுணித்வா விகா⁴ஸாதே³ படிபாடியா நிஸீதா³பேத்வா ஏகேகம் பூவம் தே³ந்தோ அஞ்ஞதரிஸ்ஸா பரிப்³பா³ஜிகாய ஏகம் மஞ்ஞமானோ த்³வே பூவே அதா³ஸி. ஸாமந்தா பரிப்³பா³ஜிகாயோ தம் பரிப்³பா³ஜிகம் ஏதத³வோசும் – ‘‘ஜாரோ தே ஏஸோ ஸமணோ’’தி. ‘‘ந மே ஸோ ஸமணோ ஜாரோ, ஏகம் மஞ்ஞமானோ த்³வே பூவே அதா³ஸீ’’தி. து³தியம்பி கோ²…பே… ததியம்பி கோ² ஆயஸ்மா ஆனந்தோ³ ஏகேகம் பூவம் தே³ந்தோ தஸ்ஸாயேவ பரிப்³பா³ஜிகாய ஏகம் மஞ்ஞமானோ த்³வே பூவே அதா³ஸி. ஸாமந்தா பரிப்³பா³ஜிகாயோ தம் பரிப்³பா³ஜிகம் ஏதத³வோசும் – ‘‘ஜாரோ தே ஏஸோ ஸமணோ’’தி. ‘‘ந மே ஸோ ஸமணோ ஜாரோ, ஏகம் மஞ்ஞமானோ த்³வே பூவே அதா³ஸீ’’தி. ‘‘ஜாரோ ந ஜாரோ’’தி ப⁴ண்டி³ம்ஸு. அஞ்ஞதரோபி ஆஜீவகோ பரிவேஸனம் அக³மாஸி. அஞ்ஞதரோ பி⁴க்கு² பஹூதேன ஸப்பினா ஓத³னம் மத்³தி³த்வா தஸ்ஸ ஆஜீவகஸ்ஸ மஹந்தம் பிண்ட³ம் அதா³ஸி. அத² கோ² ஸோ ஆஜீவகோ தம் பிண்ட³ம் ஆதா³ய அக³மாஸி. அஞ்ஞதரோ ஆஜீவகோ தம் ஆஜீவகம் ஏதத³வோச – ‘‘குதோ தயா, ஆவுஸோ, பிண்டோ³ லத்³தோ⁴’’தி? ‘‘தஸ்ஸாவுஸோ, ஸமணஸ்ஸ கோ³தமஸ்ஸ முண்ட³க³ஹபதிகஸ்ஸ பரிவேஸனாய லத்³தோ⁴’’தி.

அஸ்ஸோஸும் கோ² உபாஸகா தேஸம் ஆஜீவகானம் இமம் கதா²ஸல்லாபம். அத² கோ² தே உபாஸகா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே உபாஸகா ப⁴க³வந்தம் ஏதத³வோசும் – ‘‘இமே, ப⁴ந்தே, தித்தி²யா அவண்ணகாமா பு³த்³த⁴ஸ்ஸ அவண்ணகாமா த⁴ம்மஸ்ஸ அவண்ணகாமா ஸங்க⁴ஸ்ஸ. ஸாது⁴, ப⁴ந்தே, அய்யா தித்தி²யானம் ஸஹத்தா² ந த³தே³ய்யு’’ந்தி. அத² கோ² ப⁴க³வா தே உபாஸகே த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² தே உபாஸகா ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்கமிம்ஸு. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கூ²னம் ஸிக்கா²பத³ம் பஞ்ஞபேஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய, ஸங்க⁴பா²ஸுதாய …பே… ஸத்³த⁴ம்மட்டி²தியா, வினயானுக்³க³ஹாய. ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

270. ‘‘யோ பன பி⁴க்கு² அசேலகஸ்ஸ வா பரிப்³பா³ஜகஸ்ஸ வா பரிப்³பா³ஜிகாய வா ஸஹத்தா² கா²த³னீயம் வா போ⁴ஜனீயம் வா த³தே³ய்ய, பாசித்திய’’ந்தி.

271. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அசேலகோ நாம யோ கோசி பரிப்³பா³ஜகஸமாபன்னோ நக்³கோ³.

பரிப்³பா³ஜகோ நாம பி⁴க்கு²ஞ்ச ஸாமணேரஞ்ச ட²பேத்வா யோ கோசி பரிப்³பா³ஜகஸமாபன்னோ.

பரிப்³பா³ஜிகா நாம பி⁴க்கு²னிஞ்ச ஸிக்க²மானஞ்ச ஸாமணேரிஞ்ச ட²பேத்வா யா காசி பரிப்³பா³ஜிகஸமாபன்னா.

கா²த³னீயம் நாம பஞ்ச போ⁴ஜனானி – உத³கத³ந்தபோனம் ட²பேத்வா அவஸேஸம் கா²த³னீயம் நாம.

போ⁴ஜனீயம் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மம்ஸம்.

த³தே³ய்யாதி காயேன வா காயபடிப³த்³தே⁴ன வா நிஸ்ஸக்³கி³யேன வா தே³தி, ஆபத்தி பாசித்தியஸ்ஸ.

272. தித்தி²யே தித்தி²யஸஞ்ஞீ ஸஹத்தா² கா²த³னீயம் வா போ⁴ஜனீயம் வா தே³தி, ஆபத்தி பாசித்தியஸ்ஸ. தித்தி²யே வேமதிகோ ஸஹத்தா² கா²த³னீயம் வா போ⁴ஜனீயம் வா தே³தி, ஆபத்தி பாசித்தியஸ்ஸ. தித்தி²யே அதித்தி²யஸஞ்ஞீ ஸஹத்தா² கா²த³னீயம் வா போ⁴ஜனீயம் வா தே³தி, ஆபத்தி பாசித்தியஸ்ஸ.

உத³கத³ந்தபோனம் தே³தி, ஆபத்தி து³க்கடஸ்ஸ. அதித்தி²யே தித்தி²யஸஞ்ஞீ, ஆபத்தி து³க்கடஸ்ஸ. அதித்தி²யே வேமதிகோ, ஆபத்தி து³க்கடஸ்ஸ. அதித்தி²யே அதித்தி²யஸஞ்ஞீ, அனாபத்தி.

273. அனாபத்தி தா³பேதி ந தே³தி, உபனிக்கி²பித்வா தே³தி, பா³ஹிராலேபம் தே³தி, உம்மத்தகஸ்ஸ, ஆதி³கம்மிகஸ்ஸாதி.

அசேலகஸிக்கா²பத³ம் நிட்டி²தம் பட²மம்.

2. உய்யோஜனஸிக்கா²பத³ம்

274. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ பா⁴துனோ ஸத்³தி⁴விஹாரிகம் பி⁴க்கு²ம் ஏதத³வோச – ‘‘ஏஹாவுஸோ, கா³மம் பிண்டா³ய பவிஸிஸ்ஸாமா’’தி. தஸ்ஸ அதா³பேத்வா உய்யோஜேஸி – ‘‘க³ச்சா²வுஸோ, ந மே தயா ஸத்³தி⁴ம் கதா² வா நிஸஜ்ஜா வா பா²ஸு ஹோதி, ஏககஸ்ஸ மே கதா² வா நிஸஜ்ஜா வா பா²ஸு ஹோதீ’’தி. அத² கோ² ஸோ பி⁴க்கு² உபகட்டே² காலே நாஸக்கி² பிண்டா³ய சரிதும், படிக்கமனேபி ப⁴த்தவிஸ்ஸக்³க³ம் ந ஸம்பா⁴வேஸி, சி²ன்னப⁴த்தோ அஹோஸி. அத² கோ² ஸோ பி⁴க்கு² ஆராமம் க³ந்த்வா பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ பி⁴க்கு²ம் – ‘ஏஹாவுஸோ, கா³மம் பிண்டா³ய பவிஸிஸ்ஸாமா’தி தஸ்ஸ அதா³பேத்வா உய்யோஜேஸ்ஸதீ’’தி …பே… ஸச்சம் கிர த்வம், உபனந்த³, பி⁴க்கு²ம் – ‘‘ஏஹாவுஸோ, கா³மம் பிண்டா³ய பவிஸிஸ்ஸாமா’’தி தஸ்ஸ அதா³பேத்வா உய்யோஜேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, பி⁴க்கு²ம் – ‘‘ஏஹாவுஸோ, கா³மம் பிண்டா³ய பவிஸிஸ்ஸாமா’’தி தஸ்ஸ அதா³பேத்வா உய்யோஜேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

275. ‘‘யோ பன பி⁴க்கு² பி⁴க்கு²ம் – ‘‘ஏஹாவுஸோ, கா³மம் வா நிக³மம் வா பிண்டா³ய பவிஸிஸ்ஸாமா’தி தஸ்ஸ தா³பேத்வா வா அதா³பேத்வா வா உய்யோஜேய்ய – ‘க³ச்சா²வுஸோ, ந மே தயா ஸத்³தி⁴ம் கதா² வா நிஸஜ்ஜா வா பா²ஸு ஹோதி, ஏககஸ்ஸ மே கதா² வா நிஸஜ்ஜா வா பா²ஸு ஹோதீ’தி, ஏததே³வ பச்சயம் கரித்வா அனஞ்ஞம், பாசித்திய’’ந்தி.

276. யோ பனாதி யோ, யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²ந்தி அஞ்ஞம் பி⁴க்கு²ம்.

ஏஹாவுஸோ, கா³மம் வா நிக³மம் வாதி கா³மோபி நிக³மோபி நக³ரம்பி, கா³மோ சேவ நிக³மோ ச.

தஸ்ஸ தா³பேத்வாதி யாகு³ம் வா ப⁴த்தம் வா கா²த³னீயம் வா போ⁴ஜனீயம் வா தா³பேத்வா.

அதா³பேத்வாதி ந கிஞ்சி தா³பேத்வா.

உய்யோஜேய்யாதி மாதுகா³மேன ஸத்³தி⁴ம் ஹஸிதுகாமோ கீளிதுகாமோ ரஹோ நிஸீதி³துகாமோ அனாசாரம் ஆசரிதுகாமோ ஏவம் வதே³தி – ‘‘க³ச்சா²வுஸோ, ந மே தயா ஸத்³தி⁴ம் கதா² வா நிஸஜ்ஜா வா பா²ஸு ஹோதி, ஏககஸ்ஸ மே கதா² வா நிஸஜ்ஜா வா பா²ஸு ஹோதீ’’தி உய்யோஜேதி, ஆபத்தி து³க்கடஸ்ஸ. த³ஸ்ஸனூபசாரம் வா ஸவனூபசாரம் வா விஜஹந்தஸ்ஸ ஆபத்தி து³க்கடஸ்ஸ. விஜஹிதே, ஆபத்தி பாசித்தியஸ்ஸ.

ஏததே³வ பச்சயம் கரித்வா அனஞ்ஞந்தி ந அஞ்ஞோ கோசி பச்சயோ ஹோதி உய்யோஜேதும்.

277. உபஸம்பன்னே உபஸம்பன்னஸஞ்ஞீ உய்யோஜேதி, ஆபத்தி பாசித்தியஸ்ஸ. உபஸம்பன்னே வேமதிகோ உய்யோஜேதி, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞீ உய்யோஜேதி, ஆபத்தி பாசித்தியஸ்ஸ.

கலிஸாஸனம் ஆரோபேதி, ஆபத்தி து³க்கடஸ்ஸ. அனுபஸம்பன்னம் உய்யோஜேதி, ஆபத்தி து³க்கடஸ்ஸ. கலிஸாஸனம் ஆரோபேதி, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னே வேமதிகோ, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞீ, ஆபத்தி து³க்கடஸ்ஸ.

278. அனாபத்தி ‘‘உபோ⁴ ஏகதோ ந யாபேஸ்ஸாமா’’தி உய்யோஜேதி, ‘‘மஹக்³க⁴ம் ப⁴ண்ட³ம் பஸ்ஸித்வா லோப⁴த⁴ம்மம் உப்பாதே³ஸ்ஸதீ’’தி உய்யோஜேதி, ‘‘மாதுகா³மம் பஸ்ஸித்வா அனபி⁴ரதிம் உப்பாதே³ஸ்ஸதீ’’தி உய்யோஜேதி, ‘‘கி³லானஸ்ஸ வா ஓஹிய்யகஸ்ஸ வா விஹாரபாலஸ்ஸ வா யாகு³ம் வா ப⁴த்தம் வா கா²த³னீயம் வா போ⁴ஜனீயம் வா நீஹரா’’தி உய்யோஜேதி, ந அனாசாரம் ஆசரிதுகாமோ, ஸதி கரணீயே உய்யோஜேதி, உம்மத்தகஸ்ஸ, ஆதி³கம்மிகஸ்ஸாதி.

உய்யோஜனஸிக்கா²பத³ம் நிட்டி²தம் து³தியம்.

3. ஸபோ⁴ஜனஸிக்கா²பத³ம்

279. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ ஸஹாயகஸ்ஸ க⁴ரம் க³ந்த்வா தஸ்ஸ பஜாபதியா ஸத்³தி⁴ம் ஸயனிக⁴ரே [ஸயனீக⁴ரே (ஸ்யா.)] நிஸஜ்ஜம் கப்பேஸி. அத² கோ² ஸோ புரிஸோ யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ புரிஸோ பஜாபதிம் ஏதத³வோச – ‘‘த³தே³ஹாய்யஸ்ஸ பி⁴க்க²’’ந்தி. அத² கோ² ஸா இத்தீ² ஆயஸ்மதோ உபனந்த³ஸ்ஸ ஸக்யபுத்தஸ்ஸ பி⁴க்க²ம் அதா³ஸி. அத² கோ² ஸோ புரிஸோ ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘க³ச்ச²த², ப⁴ந்தே, யதோ அய்யஸ்ஸ பி⁴க்கா² தி³ன்னா’’தி. அத² கோ² ஸா இத்தீ² ஸல்லக்கே²த்வா – ‘‘பரியுட்டி²தோ அயம் புரிஸோ’’தி, ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘நிஸீத³த², ப⁴ந்தே, மா அக³மித்தா²’’தி. து³தியம்பி கோ² ஸோ புரிஸோ…பே… ததியம்பி கோ² ஸோ புரிஸோ ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘க³ச்ச²த², ப⁴ந்தே, யதோ அய்யஸ்ஸ பி⁴க்கா² தி³ன்னா’’தி. ததியம்பி கோ² ஸா இத்தீ² ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘நிஸீத³த², ப⁴ந்தே, மா அக³மித்தா²’’தி.

அத² கோ² ஸோ புரிஸோ நிக்க²மித்வா பி⁴க்கூ² உஜ்ஜா²பேஸி – ‘‘அயம், ப⁴ந்தே, அய்யோ உபனந்தோ³ மய்ஹம் பஜாபதியா ஸத்³தி⁴ம் ஸயனிக⁴ரே நிஸின்னோ. ஸோ மயா உய்யோஜீயமானோ ந இச்ச²தி க³ந்தும். ப³ஹுகிச்சா மயம் ப³ஹுகரணீயா’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேஸ்ஸதீ’’தி…பே… ஸச்சம் கிர த்வம், உபனந்த³, ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

280. ‘‘யோ பன பி⁴க்கு² ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேய்ய, பாசித்திய’’ந்தி.

281. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஸபோ⁴ஜனம் நாம குலம் இத்தீ² சேவ ஹோதி புரிஸோ ச, இத்தீ² ச புரிஸோ ச உபோ⁴ அனிக்க²ந்தா ஹோந்தி, உபோ⁴ அவீதராகா³.

அனுபக²ஜ்ஜாதி அனுபவிஸித்வா.

நிஸஜ்ஜம் கப்பேய்யாதி மஹல்லகே க⁴ரே பிட்ட²ஸங்கா⁴டஸ்ஸ [பிட்டி²ஸங்கா⁴டஸ்ஸ (ஸ்யா.)] ஹத்த²பாஸம் விஜஹித்வா நிஸீத³தி, ஆபத்தி பாசித்தியஸ்ஸ. கு²த்³த³கே க⁴ரே பிட்டி²வம்ஸம் அதிக்கமித்வா நிஸீத³தி, ஆபத்தி பாசித்தியஸ்ஸ.

282. ஸயனிக⁴ரே ஸயனிக⁴ரஸஞ்ஞீ ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேதி, ஆபத்தி பாசித்தியஸ்ஸ. ஸயனிக⁴ரே வேமதிகோ ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேதி, ஆபத்தி பாசித்தியஸ்ஸ. ஸயனிக⁴ரே நஸயனிக⁴ரஸஞ்ஞீ ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேதி, ஆபத்தி பாசித்தியஸ்ஸ.

நஸயனிக⁴ரே ஸயனிக⁴ரஸஞ்ஞீ, ஆபத்தி து³க்கடஸ்ஸ. நஸயனிக⁴ரே வேமதிகோ, ஆபத்தி து³க்கடஸ்ஸ. நஸயனிக⁴ரே நஸயனிக⁴ரஸஞ்ஞீ, அனாபத்தி.

283. அனாபத்தி மஹல்லகே க⁴ரே பிட்ட²ஸங்கா⁴டஸ்ஸ ஹத்த²பாஸம் அவிஜஹித்வா நிஸீத³தி, கு²த்³த³கே க⁴ரே பிட்டி²வம்ஸம் அனதிக்கமித்வா நிஸீத³தி, பி⁴க்கு² து³தியோ ஹோதி, உபோ⁴ நிக்க²ந்தா ஹோந்தி, உபோ⁴ வீதராகா³, நஸயனிக⁴ரே, உம்மத்தகஸ்ஸ, ஆதி³கம்மிகஸ்ஸாதி.

ஸபோ⁴ஜனஸிக்கா²பத³ம் நிட்டி²தம் ததியம்.

4. ரஹோபடிச்ச²ன்னஸிக்கா²பத³ம்

284. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ ஸஹாயகஸ்ஸ க⁴ரம் க³ந்த்வா தஸ்ஸ பஜாபதியா ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேஸி. அத² கோ² ஸோ புரிஸோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யோ உபனந்தோ³ மய்ஹம் பஜாபதியா ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேஸ்ஸதீ’’தி! அஸ்ஸோஸும் கோ² பி⁴க்கூ² தஸ்ஸ புரிஸஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – கத²ஞ்ஹி நாம ஆயஸ்மா உபனந்தோ³ ஸக்யபுத்தோ மாதுகா³மேன ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேஸ்ஸதீதி…பே… ஸச்சம் கிர த்வம், உபனந்த³, மாதுகா³மேன ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, மாதுகா³மேன ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

285. ‘‘யோ பன பி⁴க்கு² மாதுகா³மேன ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேய்ய, பாசித்திய’’ந்தி.

286. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

மாதுகா³மோ நாம மனுஸ்ஸித்தீ², ந யக்கீ² ந பேதீ ந திரச்சா²னக³தா, அந்தமஸோ தத³ஹுஜாதாபி தா³ரிகா, பகே³வ மஹத்தரீ.

ஸத்³தி⁴ந்தி ஏகதோ.

[பாசி. 200,291; பாரா. 445,454] ரஹோ நாம சக்கு²ஸ்ஸ ரஹோ ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ம் வா நிக²ணீயமானே ப⁴முகம் வா உக்கி²பீயமானே ஸீஸம் வா உக்கி²பீயமானே பஸ்ஸிதும். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோதும்.

[பாரா. 445] படிச்ச²ன்னம் நாம ஆஸனம் குட்டேன [குட்³டே³ன (ஸீ. ஸ்யா.)] வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கோத்த²ளியா [கோட்ட²ளியா (ஸீ. ஸ்யா.) கோத்த²ளிகாய (க.)] வா, யேன கேனசி படிச்ச²ன்னம் ஹோதி.

நிஸஜ்ஜம் கப்பேய்யாதி மாதுகா³மே நிஸின்னே பி⁴க்கு² உபனிஸின்னோ வா ஹோதி உபனிபன்னோ வா, ஆபத்தி பாசித்தியஸ்ஸ. பி⁴க்கு² நிஸின்னே மாதுகா³மோ உபனிஸின்னோ வா ஹோதி உபனிபன்னோ வா, ஆபத்தி பாசித்தியஸ்ஸ. உபோ⁴ வா நிஸின்னா ஹோந்தி உபோ⁴ வா நிபன்னா, ஆபத்தி பாசித்தியஸ்ஸ.

287. மாதுகா³மே மாதுகா³மஸஞ்ஞீ ரஹோ படிச்ச²ன்னே ஆஸனே நிஸஜ்ஜம் கப்பேதி, ஆபத்தி பாசித்தியஸ்ஸ. மாதுகா³மே வேமதிகோ ரஹோ படிச்ச²ன்னே ஆஸனே நிஸஜ்ஜம் கப்பேதி, ஆபத்தி பாசித்தியஸ்ஸ. மாதுகா³மே அமாதுகா³மஸஞ்ஞீ ரஹோ படிச்ச²ன்னே ஆஸனே நிஸஜ்ஜம் கப்பேதி, ஆபத்தி பாசித்தியஸ்ஸ.

யக்கி²யா வா பேதியா வா பண்ட³கேன வா திரச்சா²னக³தாய வா மனுஸ்ஸவிக்³க³ஹித்தி²யா வா ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேதி, ஆபத்தி து³க்கடஸ்ஸ. அமாதுகா³மே மாதுகா³மஸஞ்ஞீ, ஆபத்தி து³க்கடஸ்ஸ. அமாதுகா³மே வேமதிகோ, ஆபத்தி து³க்கடஸ்ஸ. அமாதுகா³மே அமாதுகா³மஸஞ்ஞீ, அனாபத்தி.

288. அனாபத்தி யோ கோசி விஞ்ஞூ புரிஸோ து³தியோ ஹோதி, திட்ட²தி ந நிஸீத³தி, அரஹோபேக்கோ², அஞ்ஞவிஹிதோ நிஸீத³தி, உம்மத்தகஸ்ஸ, ஆதி³கம்மிகஸ்ஸாதி.

ரஹோபடிச்ச²ன்னஸிக்கா²பத³ம் நிட்டி²தம் சதுத்த²ம்.

5. ரஹோனிஸஜ்ஜஸிக்கா²பத³ம்

289. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ ஸஹாயகஸ்ஸ க⁴ரம் க³ந்த்வா தஸ்ஸ பஜாபதியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸி. அத² கோ² ஸோ புரிஸோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யோ உபனந்தோ³ மய்ஹம் பஜாபதியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸ்ஸதீ’’தி! அஸ்ஸோஸும் கோ² பி⁴க்கூ² தஸ்ஸ புரிஸஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸ்ஸதீ’’தி…பே… ஸச்சம் கிர த்வம், உபனந்த³, மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸ்ஸஸி! நேதம், மோக⁴புரிஸ, அப்பஸன்னானம் வா பாஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

290. ‘‘யோ பன பி⁴க்கு² மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேய்ய, பாசித்திய’’ந்தி.

291. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

மாதுகா³மோ நாம மனுஸ்ஸித்தீ², ந யக்கீ² ந பேதீ ந திரச்சா²னக³தா, விஞ்ஞூ படிப³லா ஸுபா⁴ஸிதது³ப்³பா⁴ஸிதம் து³ட்டு²ல்லாது³ட்டு²ல்லம் ஆஜானிதும்.

ஸத்³தி⁴ந்தி ஏகதோ.

ஏகோ ஏகாயாதி பி⁴க்கு² சேவ ஹோதி மாதுகா³மோ ச.

[பாசி. 200,286; பாரா. 445,454] ரஹோ நாம சக்கு²ஸ்ஸ ரஹோ, ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ம் வா நிக²ணீயமானே ப⁴முகம் வா உக்கி²பீயமானே ஸீஸம் வா உக்கி²பீயமானே பஸ்ஸிதும். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோதும்.

நிஸஜ்ஜம் கப்பேய்யாதி மாதுகா³மே நிஸின்னே பி⁴க்கு² உபனிஸின்னோ வா ஹோதி உபனிபன்னோ வா, ஆபத்தி பாசித்தியஸ்ஸ. பி⁴க்கு² நிஸின்னே மாதுகா³மோ உபனிஸின்னோ வா ஹோதி உபனிபன்னோ வா, ஆபத்தி பாசித்தியஸ்ஸ. உபோ⁴ வா நிஸின்னா ஹோந்தி உபோ⁴ வா நிபன்னா, ஆபத்தி பாசித்தியஸ்ஸ.

292. மாதுகா³மே மாதுகா³மஸஞ்ஞீ ஏகோ ஏகாய ரஹோ நிஸஜ்ஜம் கப்பேதி, ஆபத்தி பாசித்தியஸ்ஸ. மாதுகா³மே வேமதிகோ ஏகோ ஏகாய ரஹோ நிஸஜ்ஜம் கப்பேதி, ஆபத்தி பாசித்தியஸ்ஸ. மாதுகா³மே அமாதுகா³மஸஞ்ஞீ ஏகோ ஏகாய ரஹோ நிஸஜ்ஜம் கப்பேதி, ஆபத்தி பாசித்தியஸ்ஸ.

யக்கி²யா வா பேதியா வா பண்ட³கேன வா திரச்சா²னக³தமனுஸ்ஸவிக்³க³ஹித்தி²யா வா [திரச்சா²னக³தாய வா மனுஸ்ஸவிக்³க³ஹித்தி²யா வா (க.)] ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேதி, ஆபத்தி து³க்கடஸ்ஸ. அமாதுகா³மே மாதுகா³மஸஞ்ஞீ, ஆபத்தி து³க்கடஸ்ஸ. அமாதுகா³மே வேமதிகோ, ஆபத்தி து³க்கடஸ்ஸ. அமாதுகா³மே அமாதுகா³மஸஞ்ஞீ, அனாபத்தி.

293. அனாபத்தி யோ கோசி விஞ்ஞூ புரிஸோ து³தியோ ஹோதி, திட்ட²தி ந நிஸீத³தி, அரஹோபேக்கோ² அஞ்ஞவிஹிதோ நிஸீத³தி, உம்மத்தகஸ்ஸ, ஆதி³கம்மிகஸ்ஸாதி.

ரஹோனிஸஜ்ஜஸிக்கா²பத³ம் நிட்டி²தம் பஞ்சமம்.

6. சாரித்தஸிக்கா²பத³ம்

294. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மதோ உபனந்த³ஸ்ஸ ஸக்யபுத்தஸ்ஸ உபட்டா²ககுலம் ஆயஸ்மந்தம் உபனந்த³ம் ஸக்யபுத்தம் ப⁴த்தேன நிமந்தேஸி. அஞ்ஞேபி பி⁴க்கூ² ப⁴த்தேன நிமந்தேஸி. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ புரேப⁴த்தம், குலானி பயிருபாஸதி. அத² கோ² தே பி⁴க்கூ² தே மனுஸ்ஸே ஏதத³வோசும் – ‘‘தே³தா²வுஸோ ப⁴த்த’’ந்தி. ‘‘ஆக³மேத², ப⁴ந்தே, யாவாய்யோ உபனந்தோ³ ஆக³ச்ச²தீ’’தி. து³தியம்பி கோ² தே பி⁴க்கூ²…பே… ததியம்பி கோ² தே பி⁴க்கூ² தே மனுஸ்ஸே ஏதத³வோசும் – ‘‘தே³தா²வுஸோ, ப⁴த்தம்; புரே காலோ அதிக்கமதீ’’தி. ‘‘யம்பி மயம், ப⁴ந்தே, ப⁴த்தம் கரிம்ஹா அய்யஸ்ஸ உபனந்த³ஸ்ஸ காரணா. ஆக³மேத², ப⁴ந்தே, யாவாய்யோ உபனந்தோ³ ஆக³ச்ச²தீ’’தி.

அத² கோ² ஆயஸ்மா உபனந்தோ³ ஸக்யபுத்தோ புரேப⁴த்தம் குலானி பயிருபாஸித்வா தி³வா ஆக³ச்ச²தி. பி⁴க்கூ² ந சித்தரூபம் பு⁴ஞ்ஜிம்ஸு. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ நிமந்திதோ ஸப⁴த்தோ ஸமானோ புரேப⁴த்தம் குலேஸு சாரித்தம் ஆபஜ்ஜிஸ்ஸதீ’’தி…பே… ஸச்சம் கிர த்வம், உபனந்த³, நிமந்திதோ ஸப⁴த்தோ ஸமானோ புரேப⁴த்தம் குலேஸு சாரித்தம் ஆபஜ்ஜஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, நிமந்திதோ ஸப⁴த்தோ ஸமானோ புரேப⁴த்தம் குலேஸு சாரித்தம் ஆபஜ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² நிமந்திதோ ஸப⁴த்தோ ஸமானோ புரேப⁴த்தம் குலேஸு சாரித்தம் ஆபஜ்ஜேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

295. [மஹாவ. 277] தேன கோ² பன ஸமயேன ஆயஸ்மதோ உபனந்த³ஸ்ஸ ஸக்யபுத்தஸ்ஸ உபட்டா²ககுலம் ஸங்க⁴ஸ்ஸத்தா²ய கா²த³னீயம் பாஹேஸி – ‘‘அய்யஸ்ஸ உபனந்த³ஸ்ஸ த³ஸ்ஸேத்வா ஸங்க⁴ஸ்ஸ தா³தப்³ப³’’ந்தி. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ கா³மம் பிண்டா³ய பவிட்டோ² ஹோதி. அத² கோ² தே மனுஸ்ஸா ஆராமம் க³ந்த்வா பி⁴க்கூ² புச்சி²ம்ஸு – ‘‘கஹம், ப⁴ந்தே, அய்யோ உபனந்தோ³’’தி? ‘‘ஏஸாவுஸோ, ஆயஸ்மா உபனந்தோ³ ஸக்யபுத்தோ கா³மம் பிண்டா³ய பவிட்டோ²’’தி. ‘‘இத³ம், ப⁴ந்தே, கா²த³னீயம் அய்யஸ்ஸ உபனந்த³ஸ்ஸ த³ஸ்ஸேத்வா ஸங்க⁴ஸ்ஸ தா³தப்³ப³’’ந்தி. ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, படிக்³க³ஹேத்வா நிக்கி²பத² யாவ உபனந்தோ³ ஆக³ச்ச²தீ’’தி.

அத² கோ² ஆயஸ்மா உபனந்தோ³ ஸக்யபுத்தோ – ‘‘ப⁴க³வதா படிக்கி²த்தம் புரேப⁴த்தம் குலேஸு சாரித்தம் ஆபஜ்ஜிது’’ந்தி பச்சா²ப⁴த்தம் குலானி பயிருபாஸித்வா தி³வா படிக்கமி, கா²த³னீயம் உஸ்ஸாரியித்த². யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ பச்சா²ப⁴த்தம் குலேஸு சாரித்தம் ஆபஜ்ஜிஸ்ஸதீ’’தி…பே… ஸச்சம் கிர த்வம், உபனந்த³, பச்சா²ப⁴த்தம் குலேஸு சாரித்தம் ஆபஜ்ஜஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, பச்சா²ப⁴த்தம் குலேஸு சாரித்தம் ஆபஜ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன பி⁴க்க²வே இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² நிமந்திதோ ஸப⁴த்தோ ஸமானோ புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

296. தேன கோ² பன ஸமயேன பி⁴க்கூ² சீவரதா³னஸமயே குக்குச்சாயந்தா குலானி ந பயிருபாஸந்தி. சீவரம் பரித்தம் உப்பஜ்ஜதி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, சீவரதா³னஸமயே குலானி பயிருபாஸிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² நிமந்திதோ ஸப⁴த்தோ ஸமானோ புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. சீவரதா³னஸமயோ – அயம் தத்த² ஸமயோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

297. தேன கோ² பன ஸமயேன பி⁴க்கூ² சீவரகம்மம் கரோந்தி, அத்தோ² ச ஹோதி ஸூசியாபி ஸுத்தேனபி ஸத்த²கேனபி. பி⁴க்கூ² குக்குச்சாயந்தா குலானி ந பயிருபாஸந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, சீவரகாரஸமயே குலானி பயிருபாஸிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² நிமந்திதோ ஸப⁴த்தோ ஸமானோ புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. சீவரதா³னஸமயோ, சீவரகாரஸமயோ – அயம் தத்த² ஸமயோ’’தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

298. தேன கோ² பன ஸமயேன பி⁴க்கூ² கி³லானா ஹோந்தி, அத்தோ² ச ஹோதி பே⁴ஸஜ்ஜேஹி. பி⁴க்கூ² குக்குச்சாயந்தா குலானி ந பயிருபாஸந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, ஸந்தம் பி⁴க்கு²ம் ஆபுச்சா² குலானி பயிருபாஸிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

299. ‘‘யோ பன பி⁴க்கு² நிமந்திதோ ஸப⁴த்தோ ஸமானோ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. சீவரதா³னஸமயோ, சீவரகாரஸமயோ – அயம் தத்த² ஸமயோ’’தி.

300. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

நிமந்திதோ நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ.

ஸப⁴த்தோ நாம யேன நிமந்திதோ தேன ஸப⁴த்தோ.

ஸந்தம் நாம பி⁴க்கு²ம் ஸக்கா ஹோதி ஆபுச்சா² பவிஸிதும்.

அஸந்தம் நாம பி⁴க்கு²ம் ந ஸக்கா ஹோதி ஆபுச்சா² பவிஸிதும்.

புரேப⁴த்தம் நாம யேன நிமந்திதோ தம் அபு⁴த்தாவீ.

பச்சா²ப⁴த்தம் நாம யேன நிமந்திதோ தம் அந்தமஸோ குஸக்³கே³னபி [அருணுக்³க³மனேபி (ஸீ.)] பு⁴த்தம் ஹோதி.

குலம் நாம சத்தாரி குலானி – க²த்தியகுலம், ப்³ராஹ்மணகுலம், வேஸ்ஸகுலம், ஸுத்³த³குலம்.

குலேஸு சாரித்தம் ஆபஜ்ஜேய்யாதி அஞ்ஞஸ்ஸ க⁴ரூபசாரம் ஓக்கமந்தஸ்ஸ ஆபத்தி து³க்கடஸ்ஸ. பட²மம் பாத³ம் உம்மாரம் அதிக்காமேதி, ஆபத்தி து³க்கடஸ்ஸ. து³தியம் பாத³ம் அதிக்காமேதி, ஆபத்தி பாசித்தியஸ்ஸ.

அஞ்ஞத்ர ஸமயாதி ட²பேத்வா ஸமயம்.

சீவரதா³னஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்ச மாஸா.

சீவரகாரஸமயோ நாம சீவரே கயிரமானே.

301. நிமந்திதே நிமந்திதஸஞ்ஞீ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜதி, அஞ்ஞத்ர ஸமயா, ஆபத்தி பாசித்தியஸ்ஸ. நிமந்திதே வேமதிகோ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜதி, அஞ்ஞத்ர ஸமயா, ஆபத்தி பாசித்தியஸ்ஸ. நிமந்திதே அனிமந்திதஸஞ்ஞீ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜதி, அஞ்ஞத்ர ஸமயா, ஆபத்தி பாசித்தியஸ்ஸ.

அனிமந்திதே நிமந்திதஸஞ்ஞீ, ஆபத்தி து³க்கடஸ்ஸ. அனிமந்திதே வேமதிகோ, ஆபத்தி து³க்கடஸ்ஸ. அனிமந்திதே அனிமந்திதஸஞ்ஞீ, அனாபத்தி.

302. அனாபத்தி ஸமயே, ஸந்தம் பி⁴க்கு²ம் ஆபுச்சா² பவிஸதி, அஸந்தம் பி⁴க்கு²ம் அனாபுச்சா² பவிஸதி, அஞ்ஞஸ்ஸ க⁴ரேன மக்³கோ³ ஹோதி, க⁴ரூபசாரேன மக்³கோ³ ஹோதி, அந்தராராமம் க³ச்ச²தி, பி⁴க்கு²னுபஸ்ஸயம் க³ச்ச²தி, தித்தி²யஸேய்யம் க³ச்ச²தி, படிக்கமனம் க³ச்ச²தி, ப⁴த்தியக⁴ரம் க³ச்ச²தி, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

சாரித்தஸிக்கா²பத³ம் நிட்டி²தம் ச²ட்ட²ம்.

7. மஹானாமஸிக்கா²பத³ம்

303. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. தேன கோ² பன ஸமயேன மஹானாமஸ்ஸ ஸக்கஸ்ஸ பே⁴ஸஜ்ஜம் உஸ்ஸன்னம் ஹோதி. அத² கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² மஹானாமோ ஸக்கோ ப⁴க³வந்தம் ஏதத³வோச – ‘‘இச்சா²மஹம், ப⁴ந்தே, ஸங்க⁴ம் சதுமாஸம் [சதும்மாஸம் (ஸீ.) சாதுமாஸம் (ஸ்யா.)] பே⁴ஸஜ்ஜேன பவாரேது’’ந்தி. ‘‘ஸாது⁴ ஸாது⁴, மஹானாம! தேன ஹி த்வம், மஹானாம, ஸங்க⁴ம் சதுமாஸம் பே⁴ஸஜ்ஜேன பவாரேஹீ’’தி. பி⁴க்கூ² குக்குச்சாயந்தா நாதி⁴வாஸேந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, சதுமாஸம் பே⁴ஸஜ்ஜப்பச்சயபவாரணம் ஸாதி³துந்தி.

304. தேன கோ² பன ஸமயேன பி⁴க்கூ² மஹானாமம் ஸக்கம் பரித்தம் பே⁴ஸஜ்ஜம் விஞ்ஞாபேந்தி. ததே²வ மஹானாமஸ்ஸ ஸக்கஸ்ஸ பே⁴ஸஜ்ஜம் உஸ்ஸன்னம் ஹோதி. து³தியம்பி கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² மஹானாமோ ஸக்கோ ப⁴க³வந்தம் ஏதத³வோச – ‘‘இச்சா²மஹம், ப⁴ந்தே, ஸங்க⁴ம் அபரம்பி சதுமாஸம் பே⁴ஸஜ்ஜேன பவாரேது’’ந்தி. ‘‘ஸாது⁴ ஸாது⁴, மஹானாம! தேன ஹி த்வம், மஹானாம, ஸங்க⁴ம் அபரம்பி சதுமாஸம் பே⁴ஸஜ்ஜேன பவாரேஹீ’’தி. பி⁴க்கூ² குக்குச்சாயந்தா நாதி⁴வாஸேந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, புன பவாரணம்பி ஸாதி³துந்தி.

305. தேன கோ² பன ஸமயேன பி⁴க்கூ² மஹானாமம் ஸக்கம் பரித்தம்யேவ பே⁴ஸஜ்ஜம் விஞ்ஞாபேந்தி. ததே²வ மஹானாமஸ்ஸ ஸக்கஸ்ஸ பே⁴ஸஜ்ஜம் உஸ்ஸன்னம் ஹோதி. ததியம்பி கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² மஹானாமோ ஸக்கோ ப⁴க³வந்தம் ஏதத³வோச – ‘‘இச்சா²மஹம், ப⁴ந்தே, ஸங்க⁴ம் யாவஜீவம் பே⁴ஸஜ்ஜேன பவாரேது’’ந்தி. ‘‘ஸாது⁴ ஸாது⁴, மஹானாம! தேன ஹி த்வம், மஹானாம, ஸங்க⁴ம் யாவஜீவம் பே⁴ஸஜ்ஜேன பவாரேஹீ’’தி. பி⁴க்கூ² குக்குச்சாயந்தா நாதி⁴வாஸேந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, நிச்சபவாரணம்பி ஸாதி³துந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² து³ன்னிவத்தா² ஹோந்தி து³ப்பாருதா அனாகப்பஸம்பன்னா. மஹானாமோ ஸக்கோ வத்தா ஹோதி – ‘‘கிஸ்ஸ தும்ஹே, ப⁴ந்தே, து³ன்னிவத்தா² து³ப்பாருதா அனாகப்பஸம்பன்னா? நனு நாம பப்³ப³ஜிதேன ஸுனிவத்தே²ன ப⁴விதப்³ப³ம் ஸுபாருதேன ஆகப்பஸம்பன்னேனா’’தி? ச²ப்³ப³க்³கி³யா பி⁴க்கூ² மஹானாமே ஸக்கே உபனந்தி⁴ம்ஸு. அத² கோ² ச²ப்³ப³க்³கி³யானம் பி⁴க்கூ²னம் ஏதத³ஹோஸி – ‘‘கேன நு கோ² மயம் உபாயேன மஹானாமம் ஸக்கம் மங்கு கரேய்யாமா’’தி? அத² கோ² ச²ப்³ப³க்³கி³யானம் பி⁴க்கூ²னம் ஏதத³ஹோஸி – ‘‘மஹானாமேன கோ², ஆவுஸோ, ஸக்கேன ஸங்கோ⁴ பே⁴ஸஜ்ஜேன பவாரிதோ. ஹந்த³ மயம், ஆவுஸோ, மஹானாமம் ஸக்கம் ஸப்பிம் விஞ்ஞாபேமா’’தி. அத² கோ² ச²ப்³ப³க்³கி³யா பி⁴க்கூ² யேன மஹானாமோ ஸக்கோ தேனுபஸங்கமிம்ஸு; உபஸங்கமித்வா மஹானாமம் ஸக்கம் ஏதத³வோசும் – ‘‘தோ³ணேன, ஆவுஸோ, ஸப்பினா அத்தோ²’’தி. ‘‘அஜ்ஜண்ஹோ, ப⁴ந்தே, ஆக³மேத². மனுஸ்ஸா வஜம் க³தா ஸப்பிம் ஆஹரிதும். காலம் ஆஹரிஸ்ஸதா²’’தி [காலே ஹரிஸ்ஸதா²தி (ஸ்யா.)].

து³தியம்பி கோ²…பே… ததியம்பி கோ² ச²ப்³ப³க்³கி³யா பி⁴க்கூ² மஹானாமம் ஸக்கம் ஏதத³வோசும் – ‘‘தோ³ணேன, ஆவுஸோ, ஸப்பினா அத்தோ²’’தி. ‘‘அஜ்ஜண்ஹோ, ப⁴ந்தே, ஆக³மேத². மனுஸ்ஸா வஜம் க³தா ஸப்பிம் ஆஹரிதும். காலம் ஆஹரிஸ்ஸதா²’’தி. ‘‘கிம் பன தயா, ஆவுஸோ, அதா³துகாமேன பவாரிதேன, யம் த்வம் பவாரேத்வா ந தே³ஸீ’’தி! அத² கோ² மஹானாமோ ஸக்கோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா – ‘அஜ்ஜண்ஹோ, ப⁴ந்தே, ஆக³மேதா²’தி வுச்சமானா நாக³மேஸ்ஸந்தீ’’தி! அஸ்ஸோஸும் கோ² பி⁴க்கூ² மஹானாமஸ்ஸ ஸக்கஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² மஹானாமேன ஸக்கேன – ‘அஜ்ஜண்ஹோ, ப⁴ந்தே, ஆக³மேதா²’தி வுச்சமானா நாக³மேஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, மஹானாமேன ஸக்கேன – ‘‘அஜ்ஜண்ஹோ, ப⁴ந்தே, ஆக³மேதா²’’தி வுச்சமானா நாக³மேதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, மஹானாமேன ஸக்கேன – ‘‘அஜ்ஜண்ஹோ, ப⁴ந்தே ஆக³மேதா²’’தி வுச்சமானா நாக³மேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே இமம் ஸிக்கா²பத³ம் உத்³தி³ஸேய்யாத² –

306. ‘‘அகி³லானேன பி⁴க்கு²னா சதுமாஸப்பச்சயபவாரணா ஸாதி³தப்³பா³, அஞ்ஞத்ர புனபவாரணாய, அஞ்ஞத்ர நிச்சபவாரணாய; ததோ சே உத்தரி ஸாதி³யேய்ய, பாசித்திய’’ந்தி.

307. அகி³லானேன பி⁴க்கு²னா சதுமாஸப்பச்சயபவாரணா ஸாதி³தப்³பா³தி கி³லானப்பச்சயபவாரணா ஸாதி³தப்³பா³.

புனபவாரணாபி ஸாதி³தப்³பா³தி யதா³ கி³லானோ ப⁴விஸ்ஸாமி ததா³ விஞ்ஞாபேஸ்ஸாமீதி.

நிச்சபவாரணாபி ஸாதி³தப்³பா³தி யதா³ கி³லானோ ப⁴விஸ்ஸாமி ததா³ விஞ்ஞாபேஸ்ஸாமீதி.

ததோ சே உத்தரி ஸாதி³யேய்யாதி அத்தி² பவாரணா பே⁴ஸஜ்ஜபரியந்தா ந ரத்திபரியந்தா, அத்தி² பவாரணா ரத்திபரியந்தா ந பே⁴ஸஜ்ஜபரியந்தா, அத்தி² பவாரணா பே⁴ஸஜ்ஜபரியந்தா ச ரத்திபரியந்தா ச, அத்தி² பவாரணா நேவ பே⁴ஸஜ்ஜபரியந்தா ந ரத்திபரியந்தா.

பே⁴ஸஜ்ஜபரியந்தா நாம பே⁴ஸஜ்ஜானி பரிக்³க³ஹிதானி ஹோந்தி – ‘‘ஏத்தகேஹி பே⁴ஸஜ்ஜேஹி பவாரேமீ’’தி. ரத்திபரியந்தா நாம ரத்தியோ பரிக்³க³ஹிதாயோ ஹோந்தி – ‘‘ஏத்தகாஸு ரத்தீஸு பவாரேமீ’’தி. பே⁴ஸஜ்ஜபரியந்தா ச ரத்திபரியந்தா ச நாம பே⁴ஸஜ்ஜானி ச பரிக்³க³ஹிதானி ஹோந்தி ரத்தியோ ச பரிக்³க³ஹிதாயோ ஹோந்தி – ‘‘ஏத்தகேஹி பே⁴ஸஜ்ஜேஹி ஏத்தகாஸு ரத்தீஸு பவாரேமீ’’தி. நேவ பே⁴ஸஜ்ஜபரியந்தா ந ரத்திபரியந்தா நாம பே⁴ஸஜ்ஜானி ச அபரிக்³க³ஹிதானி ஹோந்தி ரத்தியோ ச அபரிக்³க³ஹிதாயோ ஹோந்தி.

308. பே⁴ஸஜ்ஜபரியந்தே – யேஹி பே⁴ஸஜ்ஜேஹி பவாரிதோ ஹோதி தானி பே⁴ஸஜ்ஜானி ட²பேத்வா அஞ்ஞானி பே⁴ஸஜ்ஜானி விஞ்ஞாபேதி, ஆபத்தி பாசித்தியஸ்ஸ. ரத்திபரியந்தே – யாஸு ரத்தீஸு பவாரிதோ ஹோதி, தா ரத்தியோ ட²பேத்வா அஞ்ஞாஸு ரத்தீஸு விஞ்ஞாபேதி, ஆபத்தி பாசித்தியஸ்ஸ. பே⁴ஸஜ்ஜபரியந்தே ச ரத்திபரியந்தே ச – யேஹி பே⁴ஸஜ்ஜேஹி பவாரிதோ ஹோதி, தானி பே⁴ஸஜ்ஜானி ட²பேத்வா யாஸு ரத்தீஸு பவாரிதோ ஹோதி, தா ரத்தியோ ட²பேத்வா அஞ்ஞானி பே⁴ஸஜ்ஜானி அஞ்ஞாஸு ரத்தீஸு விஞ்ஞாபேதி, ஆபத்தி பாசித்தியஸ்ஸ. நேவ பே⁴ஸஜ்ஜபரியந்தே ந ரத்திபரியந்தே, அனாபத்தி.

309. ந பே⁴ஸஜ்ஜேன கரணீயேன [கரணீயே (ஸீ. ஸ்யா.)] பே⁴ஸஜ்ஜம் விஞ்ஞாபேதி, ஆபத்தி பாசித்தியஸ்ஸ. அஞ்ஞேன பே⁴ஸஜ்ஜேன கரணீயேன அஞ்ஞம் பே⁴ஸஜ்ஜம் விஞ்ஞாபேதி, ஆபத்தி பாசித்தியஸ்ஸ. ததுத்தரி ததுத்தரிஸஞ்ஞீ பே⁴ஸஜ்ஜம் விஞ்ஞாபேதி, ஆபத்தி பாசித்தியஸ்ஸ. ததுத்தரி வேமதிகோ பே⁴ஸஜ்ஜம் விஞ்ஞாபேதி, ஆபத்தி பாசித்தியஸ்ஸ. ததுத்தரி நததுத்தரிஸஞ்ஞீ பே⁴ஸஜ்ஜம் விஞ்ஞாபேதி, ஆபத்தி பாசித்தியஸ்ஸ.

நததுத்தரி ததுத்தரிஸஞ்ஞீ, ஆபத்தி து³க்கடஸ்ஸ. நததுத்தரி வேமதிகோ, ஆபத்தி து³க்கடஸ்ஸ. நததுத்தரி நததுத்தரிஸஞ்ஞீ, அனாபத்தி.

310. அனாபத்தி யேஹி பே⁴ஸஜ்ஜேஹி பவாரிதோ ஹோதி தானி பே⁴ஸஜ்ஜானி விஞ்ஞாபேதி, யாஸு ரத்தீஸு பவாரிதோ ஹோதி தாஸு ரத்தீஸு விஞ்ஞாபேதி, ‘‘இமேஹி தயா பே⁴ஸஜ்ஜேஹி பவாரிதாம்ஹ, அம்ஹாகஞ்ச இமினா ச இமினா ச பே⁴ஸஜ்ஜேன அத்தோ²’’தி ஆசிக்கி²த்வா விஞ்ஞாபேதி, ‘‘யாஸு தயா ரத்தீஸு பவாரிதாம்ஹ தாயோ ச ரத்தியோ வீதிவத்தா அம்ஹாகஞ்ச பே⁴ஸஜ்ஜேன அத்தோ²’’தி ஆசிக்கி²த்வா விஞ்ஞாபேதி, ஞாதகானம் பவாரிதானம், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.

மஹானாமஸிக்கா²பத³ம் நிட்டி²தம் ஸத்தமம்.

8. உய்யுத்தஸேனாஸிக்கா²பத³ம்

311. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ராஜா பஸேனதி³ கோஸலோ ஸேனாய அப்³பு⁴ய்யாதோ ஹோதி. ச²ப்³ப³க்³கி³யா பி⁴க்கூ² உய்யுத்தம் ஸேனம் த³ஸ்ஸனாய அக³மம்ஸு. அத்³த³ஸா கோ² ராஜா பஸேனதி³ கோஸலோ ச²ப்³ப³க்³கி³யே பி⁴க்கூ² தூ³ரதோவ ஆக³ச்ச²ந்தே. தி³ஸ்வான பக்கோஸாபேத்வா ஏதத³வோச – ‘‘கிஸ்ஸ தும்ஹே, ப⁴ந்தே, ஆக³தத்தா²’’தி? ‘‘மஹாராஜானம் மயம் த³ட்டு²காமா’’ [மஹாராஜ மஹாராஜானம் மயம் த³ட்டு²காமா (க.)] தி. ‘‘கிம், ப⁴ந்தே, மம் தி³ட்டே²ன யுத்³தா⁴பி⁴னந்தி³னம் [யுத்³தா⁴பி⁴னந்தி³னா (க.)]; நனு ப⁴க³வா பஸ்ஸிதப்³போ³’’தி? மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா உய்யுத்தம் ஸேனம் த³ஸ்ஸனாய ஆக³ச்சி²ஸ்ஸந்தி! அம்ஹாகம்பி அலாபா⁴, அம்ஹாகம்பி து³ல்லத்³த⁴ம், யே மயம் ஆஜீவஸ்ஸ ஹேது புத்ததா³ரஸ்ஸ காரணா ஸேனாய ஆக³ச்சா²மா’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² உய்யுத்தம் ஸேனம் த³ஸ்ஸனாய க³ச்சி²ஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, உய்யுத்தம் ஸேனம் த³ஸ்ஸனாய க³ச்ச²தா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, உய்யுத்தம் ஸேனம் த³ஸ்ஸனாய க³ச்சி²ஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² உய்யுத்தம் ஸேனம் த³ஸ்ஸனாய க³ச்சே²ய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

312. தேன கோ² பன ஸமயேன அஞ்ஞதரஸ்ஸ பி⁴க்கு²னோ மாதுலோ ஸேனாய கி³லானோ ஹோதி. ஸோ தஸ்ஸ பி⁴க்கு²னோ ஸந்திகே தூ³தம் பாஹேஸி – ‘‘அஹஞ்ஹி ஸேனாய கி³லானோ. ஆக³ச்ச²து ப⁴த³ந்தோ. இச்சா²மி ப⁴த³ந்தஸ்ஸ ஆக³த’’ந்தி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா ஸிக்கா²பத³ம் பஞ்ஞத்தம் – ‘ந உய்யுத்தம் ஸேனம் த³ஸ்ஸனாய க³ந்தப்³ப³’ந்தி. அயஞ்ச மே மாதுலோ ஸேனாய கி³லானோ. கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ததா²ரூபப்பச்சயா ஸேனாய க³ந்தும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

313. ‘‘யோ பன பி⁴க்கு² உய்யுத்தம் ஸேனம் த³ஸ்ஸனாய க³ச்சே²ய்ய, அஞ்ஞத்ர ததா²ரூபப்பச்சயா, பாசித்திய’’ந்தி.

314. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

உய்யுத்தா நாம ஸேனா கா³மதோ நிக்க²மித்வா நிவிட்டா² வா ஹோதி பயாதா வா.

ஸேனா நாம ஹத்தீ² அஸ்ஸா ரதா² பத்தீ. த்³வாத³ஸபுரிஸோ ஹத்தீ², திபுரிஸோ அஸ்ஸோ, சதுபுரிஸோ ரதோ², சத்தாரோ புரிஸா ஸரஹத்தா² பத்தி. த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தோ பஸ்ஸதி, ஆபத்தி பாசித்தியஸ்ஸ. த³ஸ்ஸனூபசாரம் விஜஹித்வா புனப்புனம் பஸ்ஸதி, ஆபத்தி பாசித்தியஸ்ஸ.

அஞ்ஞத்ர ததா²ரூபப்பச்சயாதி ட²பேத்வா ததா²ரூபப்பச்சயம்.

315. உய்யுத்தே உய்யுத்தஸஞ்ஞீ த³ஸ்ஸனாய க³ச்ச²தி, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ. உய்யுத்தே வேமதிகோ த³ஸ்ஸனாய க³ச்ச²தி, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ. உய்யுத்தே அனுய்யுத்தஸஞ்ஞீ த³ஸ்ஸனாய க³ச்ச²தி, அஞ்ஞத்ர ததா²ரூபப்பச்சயா, ஆபத்தி பாசித்தியஸ்ஸ.

ஏகமேகம் த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தோ பஸ்ஸதி, ஆபத்தி து³க்கடஸ்ஸ. த³ஸ்ஸனூபசாரம் விஜஹித்வா புனப்புனம் பஸ்ஸதி, ஆபத்தி து³க்கடஸ்ஸ. அனுய்யுத்தே உய்யுத்தஸஞ்ஞீ, ஆபத்தி து³க்கடஸ்ஸ. அனுய்யுத்தே வேமதிகோ, ஆபத்தி து³க்கடஸ்ஸ. அனுய்யுத்தே அனுய்யுத்தஸஞ்ஞீ, அனாபத்தி.

316. அனாபத்தி ஆராமே டி²தோ பஸ்ஸதி, பி⁴க்கு²ஸ்ஸ டி²தோகாஸம் வா நிஸின்னோகாஸம் வா நிபன்னோகாஸம் வா ஆக³ச்ச²தி, படிபத²ம் க³ச்ச²ந்தோ பஸ்ஸதி, ததா²ரூபப்பச்சயா, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

உய்யுத்தஸேனாஸிக்கா²பத³ம் நிட்டி²தம் அட்ட²மம்.

9. ஸேனாவாஸஸிக்கா²பத³ம்

317. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² ஸதி கரணீயே ஸேனம் க³ந்த்வா அதிரேகதிரத்தம் ஸேனாய வஸந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ஸேனாய வஸிஸ்ஸந்தி! அம்ஹாகம்பி அலாபா⁴, அம்ஹாகம்பி து³ல்லத்³த⁴ம், யே மயம் ஆஜீவஸ்ஸ ஹேது புத்ததா³ரஸ்ஸ காரணா ஸேனாய படிவஸாமா’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகதிரத்தம் ஸேனாய வஸிஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, அதிரேகதிரத்தம் ஸேனாய வஸதா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, அதிரேகதிரத்தம் ஸேனாய வஸிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

318. ‘‘ஸியா ச தஸ்ஸ பி⁴க்கு²னோ கோசிதே³வ பச்சயோ ஸேனம் க³மனாய, தி³ரத்ததிரத்தம் தேன பி⁴க்கு²னா ஸேனாய வஸிதப்³ப³ம். ததோ சே உத்தரிம் வஸேய்ய, பாசித்திய’’ந்தி.

319. ஸியா ச தஸ்ஸ பி⁴க்கு²னோ கோசிதே³வ பச்சயோ ஸேனம் க³மனாயாதி ஸியா பச்சயோ ஸியா கரணீயம்.

தி³ரத்ததிரத்தம் தேன பி⁴க்கு²னா ஸேனாய வஸிதப்³ப³ந்தி த்³வேதிஸ்ஸோ ரத்தியோ வஸிதப்³ப³ம்.

ததோ சே உத்தரி வஸேய்யாதி சதுத்தே² தி³வஸே அத்த²ங்க³தே ஸூரியே ஸேனாய வஸதி, ஆபத்தி பாசித்தியஸ்ஸ.

320. அதிரேகதிரத்தே அதிரேகஸஞ்ஞீ ஸேனாய வஸதி, ஆபத்தி பாசித்தியஸ்ஸ. அதிரேகதிரத்தே வேமதிகோ ஸேனாய வஸதி, ஆபத்தி பாசித்தியஸ்ஸ. அதிரேகதிரத்தே ஊனகஸஞ்ஞீ ஸேனாய வஸதி, ஆபத்தி பாசித்தியஸ்ஸ.

ஊனகதிரத்தே அதிரேகஸஞ்ஞீ, ஆபத்தி து³க்கடஸ்ஸ. ஊனகதிரத்தே வேமதிகோ, ஆபத்தி து³க்கடஸ்ஸ. ஊனகதிரத்தே ஊனகஸஞ்ஞீ, அனாபத்தி.

321. அனாபத்தி த்³வேதிஸ்ஸோ ரத்தியோ வஸதி, ஊனகத்³வேதிஸ்ஸோ ரத்தியோ வஸதி, த்³வே ரத்தியோ வஸித்வா ததியாய ரத்தியா புராருணா நிக்க²மித்வா புன வஸதி, கி³லானோ வஸதி, கி³லானஸ்ஸ கரணீயேன வஸதி, ஸேனா வா படிஸேனாய ருத்³தா⁴ ஹோதி, கேனசி பலிபு³த்³தோ⁴ ஹோதி, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

ஸேனாவாஸஸிக்கா²பத³ம் நிட்டி²தம் நவமம்.

10. உய்யோதி⁴கஸிக்கா²பத³ம்

322. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² தி³ரத்ததிரத்தம் ஸேனாய வஸமானா உய்யோதி⁴கம்பி ப³லக்³க³ம்பி ஸேனாப்³யூஹம்பி அனீகத³ஸ்ஸனம்பி க³ச்ச²ந்தி. அஞ்ஞதரோபி ச²ப்³ப³க்³கி³யோ பி⁴க்கு² உய்யோதி⁴கம் க³ந்த்வா கண்டே³ன படிவித்³தோ⁴ ஹோதி. மனுஸ்ஸா தம் பி⁴க்கு²ம் உப்பண்டே³ஸும் – ‘‘கச்சி, ப⁴ந்தே, ஸுயுத்³த⁴ம் அஹோஸி, கதி தே லக்கா²னி லத்³தா⁴னீ’’தி? ஸோ பி⁴க்கு² தேஹி மனுஸ்ஸேஹி உப்பண்டீ³யமானோ மங்கு அஹோஸி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா உய்யோதி⁴கம் த³ஸ்ஸனாய ஆக³ச்சி²ஸ்ஸந்தி! அம்ஹாகம்பி அலாபா⁴, அம்ஹாகம்பி து³ல்லத்³த⁴ம், யே மயம் ஆஜீவஸ்ஸ ஹேது புத்ததா³ரஸ்ஸ காரணா உய்யோதி⁴கம் ஆக³ச்சா²மா’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² உய்யோதி⁴கம் த³ஸ்ஸனாய க³ச்சி²ஸ்ஸந்தீ’’தி…பே… ஸச்சம் கிர தும்ஹே, பி⁴க்க²வே, உய்யோதி⁴கம் த³ஸ்ஸனாய க³ச்ச²தா²தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, உய்யோதி⁴கம் த³ஸ்ஸனாய க³ச்சி²ஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

323. ‘‘தி³ரத்ததிரத்தம் சே பி⁴க்கு² ஸேனாய வஸமானோ உய்யோதி⁴கம் வா ப³லக்³க³ம் வா ஸேனாப்³யூஹம் வா அனீகத³ஸ்ஸனம் வா க³ச்சே²ய்ய, பாசித்திய’’ந்தி.

324. தி³ரத்ததிரத்தம் சே பி⁴க்கு² ஸேனாய வஸமானோதி த்³வேதிஸ்ஸோ ரத்தியோ வஸமானோ.

உய்யோதி⁴கம் நாம யத்த² ஸம்பஹாரோ தி³ஸ்ஸதி.

ப³லக்³க³ம் நாம ஏத்தகா ஹத்தீ², ஏத்தகா அஸ்ஸா, ஏத்தகா ரதா², ஏத்தகா பத்தீ.

ஸேனாப்³யூஹம் நாம இதோ ஹத்தீ² ஹோந்து, இதோ அஸ்ஸா ஹோந்து, இதோ ரதா² ஹோந்து, இதோ பத்திகா ஹோந்து.

அனீகம் நாம ஹத்தா²னீகம், அஸ்ஸானீகம், ரதா²னீகம், பத்தானீகம். தயோ ஹத்தீ² பச்சி²மம் ஹத்தா²னீகம், தயோ அஸ்ஸா பச்சி²மம் அஸ்ஸானீகம், தயோ ரதா² பச்சி²மம் ரதா²னீகம், சத்தாரோ புரிஸா ஸரஹத்தா² பத்தீ பச்சி²மம் பத்தானீகம். த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தோ பஸ்ஸதி, ஆபத்தி பாசித்தியஸ்ஸ. த³ஸ்ஸனூபசாரம் விஜஹித்வா புனப்புனம் பஸ்ஸதி, ஆபத்தி பாசித்தியஸ்ஸ.