9. பரிபாசிதஸிக்கா²பத³ம்

192. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன து²ல்லனந்தா³ பி⁴க்கு²னீ அஞ்ஞதரஸ்ஸ குலஸ்ஸ குலூபிகா ஹோதி நிச்சப⁴த்திகா. தேன ச க³ஹபதினா தே²ரா பி⁴க்கூ² நிமந்திதா ஹோந்தி. அத² கோ² து²ல்லனந்தா³ பி⁴க்கு²னீ புப்³ப³ண்ஹஸமயம் நிவாஸேத்வா பத்தசீவரமாதா³ய யேன தம் குலம் தேனுபஸங்கமி; உபஸங்கமித்வா தம் க³ஹபதிம் ஏதத³வோச – ‘‘கிமித³ம், க³ஹபதி, பஹூதம் கா²த³னீயம் போ⁴ஜனீயம் படியத்த’’ந்தி? ‘‘தே²ரா மயா, அய்யே, நிமந்திதா’’தி. ‘‘கே பன தே, க³ஹபதி, தே²ரா’’தி? ‘‘அய்யோ ஸாரிபுத்தோ அய்யோ மஹாமோக்³க³ல்லானோ அய்யோ மஹாகச்சானோ அய்யோ மஹாகோட்டி²கோ அய்யோ மஹாகப்பினோ அய்யோ மஹாசுந்தோ³ அய்யோ அனுருத்³தோ⁴ அய்யோ ரேவதோ அய்யோ உபாலி அய்யோ ஆனந்தோ³ அய்யோ ராஹுலோ’’தி. ‘‘கிம் பன த்வம், க³ஹபதி, மஹானாகே³ திட்ட²மானே சேடகே நிமந்தேஸீ’’தி?

‘‘கே பன தே, அய்யே, மஹானாகா³’’தி? ‘‘அய்யோ தே³வத³த்தோ அய்யோ கோகாலிகோ அய்யோ கடமோத³கதிஸ்ஸகோ [கடமோரகதிஸ்ஸகோ (ஸீ.) கதமோரகதிஸ்ஸகோ (ஸ்யா.)] அய்யோ க²ண்ட³தே³வியா புத்தோ அய்யோ ஸமுத்³த³த³த்தோ’’தி. அயம் சரஹி து²ல்லனந்தா³ய பி⁴க்கு²னியா அந்தரா கதா² விப்பகதா, அத² தே தே²ரா பி⁴க்கூ² பவிஸிம்ஸு. ‘‘ஸச்சம் மஹானாகா³ கோ² தயா, க³ஹபதி, நிமந்திதா’’தி. ‘‘இதா³னேவ கோ² த்வம், அய்யே, சேடகே அகாஸி; இதா³னி மஹானாகே³’’தி. க⁴ரதோ ச நிக்கட்³டி⁴, நிச்சப⁴த்தஞ்ச பச்சி²ந்தி³. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம தே³வத³த்தோ ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜிஸ்ஸதீ’’தி…பே… ‘‘ஸச்சம் கிர த்வம், தே³வத³த்த, ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜிஸ்ஸஸி. நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

193. தேன கோ² பன ஸமயேன அஞ்ஞதரோ பி⁴க்கு² ராஜக³ஹா பப்³ப³ஜிதோ ஞாதிகுலம் அக³மாஸி. மனுஸ்ஸா – ‘‘சிரஸ்ஸம்பி ப⁴த³ந்தோ ஆக³தோ’’தி ஸக்கச்சம் ப⁴த்தம் அகம்ஸு. தஸ்ஸ குலஸ்ஸ குலூபிகா பி⁴க்கு²னீ தே மனுஸ்ஸே ஏதத³வோச – ‘‘தே³த²ய்யஸ்ஸ, ஆவுஸோ, ப⁴த்த’’ந்தி. அத² கோ² ஸோ பி⁴க்கு² – ‘‘ப⁴க³வதா படிக்கி²த்தம் ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜிது’’ந்தி குக்குச்சாயந்தோ ந படிக்³க³ஹேஸி. நாஸக்கி² பிண்டா³ய சரிதும், சி²ன்னப⁴த்தோ அஹோஸி. அத² கோ² ஸோ பி⁴க்கு² ஆராமம் க³ந்த்வா பி⁴க்கூ²னம் ஏதமத்த²ம் ஆரோசேஸி. பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, புப்³பே³ கி³ஹிஸமாரம்பே⁴ ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

194. ‘‘யோ பன பி⁴க்கு² ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜேய்ய, அஞ்ஞத்ர புப்³பே³ கி³ஹிஸமாரம்பா⁴, பாசித்திய’’ந்தி.

195. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஜானாதி நாம ஸாமம் வா ஜானாதி அஞ்ஞே வா தஸ்ஸ ஆரோசேந்தி ஸா வா ஆரோசேதி.

பி⁴க்கு²னீ நாம உப⁴தோஸங்கே⁴ உபஸம்பன்னா.

பரிபாசேதி நாம புப்³பே³ அதா³துகாமானம் அகத்துகாமானம் – ‘‘அய்யோ பா⁴ணகோ, அய்யோ ப³ஹுஸ்ஸுதோ, அய்யோ ஸுத்தந்திகோ, அய்யோ வினயத⁴ரோ, அய்யோ த⁴ம்மகதி²கோ, தே³த² அய்யஸ்ஸ, கரோத² அய்யஸ்ஸா’’தி ஏஸா பரிபாசேதி நாம.

பிண்ட³பாதோ நாம பஞ்சன்னம் போ⁴ஜனானம் அஞ்ஞதரம் போ⁴ஜனம்.

அஞ்ஞத்ர புப்³பே³ கி³ஹிஸமாரம்பா⁴தி ட²பேத்வா கி³ஹிஸமாரம்ப⁴ம்.

கி³ஹிஸமாரம்போ⁴ நாம ஞாதகா வா ஹோந்தி பவாரிதா வா பகதிபடியத்தம் வா.

அஞ்ஞத்ர புப்³பே³ கி³ஹிஸமாரம்பா⁴ பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே, ஆபத்தி பாசித்தியஸ்ஸ.

196. பரிபாசிதே பரிபாசிதஸஞ்ஞீ பு⁴ஞ்ஜதி, அஞ்ஞத்ர புப்³பே³ கி³ஹிஸமாரம்பா⁴, ஆபத்தி பாசித்தியஸ்ஸ. பரிபாசிதே வேமதிகோ பு⁴ஞ்ஜதி, அஞ்ஞத்ர புப்³பே³ கி³ஹிஸமாரம்பா⁴, ஆபத்தி து³க்கடஸ்ஸ. பரிபாசிதே அபரிபாசிதஸஞ்ஞீ பு⁴ஞ்ஜதி, அஞ்ஞத்ர புப்³பே³ கி³ஹிஸமாரம்பா⁴, அனாபத்தி. ஏகதோஉபஸம்பன்னாய பரிபாசிதம் பு⁴ஞ்ஜதி, அஞ்ஞத்ர புப்³பே³ கி³ஹிஸமாரம்பா⁴, ஆபத்தி து³க்கடஸ்ஸ. அபரிபாசிதே பரிபாசிதஸஞ்ஞீ, ஆபத்தி து³க்கடஸ்ஸ. அபரிபாசித்தே வேமதிகோ, ஆபத்தி து³க்கடஸ்ஸ. அபரிபாசிதே அபரிபாசிதஸஞ்ஞீ, அனாபத்தி.

197. அனாபத்தி புப்³பே³ கி³ஹிஸமாரம்பே⁴, ஸிக்க²மானா பரிபாசேதி, ஸாமணேரீ பரிபாசேதி, பஞ்ச போ⁴ஜனானி ட²பேத்வா ஸப்³ப³த்த² அனாபத்தி, உம்மத்தகஸ்ஸ, ஆதி³கம்மிகஸ்ஸாதி.

பரிபாசிதஸிக்கா²பத³ம் நிட்டி²தம் நவமம்.