10. ரஹோனிஸஜ்ஜஸிக்கா²பத³ம்

198. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மதோ உதா³யிஸ்ஸ புராணது³தியிகா பி⁴க்கு²னீஸு பப்³ப³ஜிதா ஹோதி. ஸா ஆயஸ்மதோ உதா³யிஸ்ஸ ஸந்திகே அபி⁴க்க²ணம் ஆக³ச்ச²தி, ஆயஸ்மாபி உதா³யீ தஸ்ஸா பி⁴க்கு²னியா ஸந்திகே அபி⁴க்க²ணம் க³ச்ச²தி. தேன கோ² பன ஸமயேன ஆயஸ்மா உதா³யீ தஸ்ஸா பி⁴க்கு²னியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ பி⁴க்கு²னியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸ்ஸதீ’’தி…பே… ஸச்சம் கிர த்வம், உதா³யி, பி⁴க்கு²னியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸீதி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, பி⁴க்கு²னியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸ்ஸஸி! நேதம், மோக⁴புரிஸ அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

199. ‘‘யோ பன பி⁴க்கு² பி⁴க்கு²னியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேய்ய, பாசித்திய’’ந்தி.

200. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²னீ நாம உப⁴தோஸங்கே⁴ உபஸம்பன்னா.

ஸத்³தி⁴ந்தி ஏகதோ.

ஏகோ ஏகாயாதி பி⁴க்கு² சேவ ஹோதி பி⁴க்கு²னீ ச.

[பாசி. 286, 291; பாரா. 445,454] ரஹோ நாம சக்கு²ஸ்ஸ ரஹோ ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ம் வா நிக²ணீயமானே ப⁴முகம் வா உக்கி²பீயமானே ஸீஸம் வா உக்கி²பீயமானே பஸ்ஸிதும். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோதும்.

நிஸஜ்ஜம் கப்பேய்யாதி பி⁴க்கு²னியா நிஸின்னாய பி⁴க்கு² உபனிஸின்னோ வா ஹோதி உபனிபன்னோ வா, ஆபத்தி பாசித்தியஸ்ஸ.

பி⁴க்கு² நிஸின்னே பி⁴க்கு²னீ உபனிஸின்னா வா ஹோதி உபனிபன்னா வா, ஆபத்தி பாசித்தியஸ்ஸ. உபோ⁴ வா நிஸின்னா ஹோந்தி உபோ⁴ வா நிபன்னா, ஆபத்தி பாசித்தியஸ்ஸ.

201. ரஹோ ரஹோஸஞ்ஞீ ஏகோ ஏகாய நிஸஜ்ஜம் கப்பேதி, ஆபத்தி பாசித்தியஸ்ஸ. ரஹோ வேமதிகோ ஏகோ ஏகாய நிஸஜ்ஜம் கப்பேதி, ஆபத்தி பாசித்தியஸ்ஸ. ரஹோ அரஹோஸஞ்ஞீ ஏகோ ஏகாய நிஸஜ்ஜம் கப்பேதி, ஆபத்தி பாசித்தியஸ்ஸ.

அரஹோ ரஹோஸஞ்ஞீ, ஆபத்தி து³க்கடஸ்ஸ. அரஹோ வேமதிகோ, ஆபத்தி து³க்கடஸ்ஸ. அரஹோ அரஹோஸஞ்ஞீ, அனாபத்தி.

202. அனாபத்தி யோ கோசி விஞ்ஞூ து³தியோ ஹோதி, திட்ட²தி ந நிஸீத³தி, அரஹோபேக்கோ², அஞ்ஞவிஹிதோ நிஸீத³தி, உம்மத்தகஸ்ஸ, ஆதி³கம்மிகஸ்ஸாதி.

ரஹோனிஸஜ்ஜஸிக்கா²பத³ம் நிட்டி²தம் த³ஸமம்.

ஓவாத³வக்³கோ³ ததியோ.

தஸ்ஸுத்³தா³னம் –

அஸம்மதஅத்த²ங்க³தூ, பஸ்ஸயாமிஸதா³னேன;

ஸிப்³ப³தி அத்³தா⁴னம் நாவம் பு⁴ஞ்ஜேய்ய, ஏகோ ஏகாய தே த³ஸாதி.