3. ஓவாத³வக்³கோ³

1. ஓவாத³ஸிக்கா²பத³ம்

144. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன தே²ரா பி⁴க்கூ² பி⁴க்கு²னியோ ஓவத³ந்தா லாபி⁴னோ ஹோந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். அத² கோ² ச²ப்³ப³க்³கி³யானம் பி⁴க்கூ²னம் ஏதத³ஹோஸி – ‘‘ஏதரஹி கோ², ஆவுஸோ, தே²ரா பி⁴க்கூ² பி⁴க்கு²னியோ ஓவத³ந்தா லாபி⁴னோ ஹோந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். ஹந்தா³வுஸோ, மயம்பி பி⁴க்கு²னியோ ஓவதா³மா’’தி. அத² கோ² ச²ப்³ப³க்³கி³யா பி⁴க்கூ² பி⁴க்கு²னியோ உபஸங்கமித்வா ஏதத³வோசும் – ‘‘அம்ஹேபி, ப⁴கி³னியோ, உபஸங்கமத²; மயம்பி ஓவதி³ஸ்ஸாமா’’தி.

அத² கோ² தா பி⁴க்கு²னியோ யேன ச²ப்³ப³க்³கி³யா பி⁴க்கூ² தேனுபஸங்கமிம்ஸு; உபஸங்கமித்வா ச²ப்³ப³க்³கி³யே பி⁴க்கூ² அபி⁴வாதே³த்வா ஏகமந்தம் நிஸீதி³ம்ஸு. அத² கோ² ச²ப்³ப³க்³கி³யா பி⁴க்கூ² பி⁴க்கு²னீனம் பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேஸும் – ‘‘க³ச்ச²த², ப⁴கி³னியோ’’தி. அத² கோ² தா பி⁴க்கு²னியோ யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்ட²ம்ஸு. ஏகமந்தம் டி²தா கோ² தா பி⁴க்கு²னியோ ப⁴க³வா ஏதத³வோச – ‘‘கச்சி, பி⁴க்கு²னியோ, ஓவாதோ³ இத்³தோ⁴ அஹோஸீ’’தி? ‘‘குதோ, ப⁴ந்தே, ஓவாதோ³ இத்³தோ⁴ ப⁴விஸ்ஸதி! அய்யா ச²ப்³ப³க்³கி³யா பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேஸு’’ந்தி. அத² கோ² ப⁴க³வா தா பி⁴க்கு²னியோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² தா பி⁴க்கு²னியோ ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா ப⁴க³வந்தம் அபி⁴வாதே³த்வா பத³க்கி²ணம் கத்வா பக்கமிம்ஸு.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ச²ப்³ப³க்³கி³யே பி⁴க்கூ² படிபுச்சி² – ‘‘ஸச்சம் கிர தும்ஹே, பி⁴க்க²வே, பி⁴க்கு²னீனம் பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²னீனம் பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பி⁴க்கு²னோவாத³கம் ஸம்மன்னிதும். ஏவஞ்ச பன, பி⁴க்க²வே, ஸம்மன்னிதப்³போ³. பட²மம் பி⁴க்கு² யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

145. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²ம் பி⁴க்கு²னோவாத³கம் ஸம்மன்னேய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் பி⁴க்கு²ம் பி⁴க்கு²னோவாத³கம் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ பி⁴க்கு²னோவாத³கஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி – ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமம் பி⁴க்கு²ம் பி⁴க்கு²னோவாத³கம் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ பி⁴க்கு²னோவாத³கஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘ஸம்மதோ ஸங்கே⁴ன இத்த²ன்னாமோ பி⁴க்கு² பி⁴க்கு²னோவாத³கோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

அத² கோ² ப⁴க³வா ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா து³ப்³ப⁴ரதாய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

146. ‘‘யோ பன பி⁴க்கு² அஸம்மதோ பி⁴க்கு²னியோ ஓவதே³ய்ய பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

147. தேன கோ² பன ஸமயேன தே²ரா பி⁴க்கூ² ஸம்மதா பி⁴க்கு²னியோ ஓவத³ந்தா ததே²வ லாபி⁴னோ ஹோந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். அத² கோ² ச²ப்³ப³க்³கி³யானம் பி⁴க்கூ²னம் ஏதத³ஹோஸி – ‘‘ஏதரஹி கோ², ஆவுஸோ, தே²ரா பி⁴க்கூ² ஸம்மதா பி⁴க்கு²னியோ ஓவத³ந்தா ததே²வ லாபி⁴னோ ஹோந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். ஹந்தா³வுஸோ, மயம்பி நிஸ்ஸீமம் க³ந்த்வா அஞ்ஞமஞ்ஞம் பி⁴க்கு²னோவாத³கம் ஸம்மன்னித்வா பி⁴க்கு²னியோ ஓவதா³மா’’தி. அத² கோ² ச²ப்³ப³க்³கி³யா பி⁴க்கூ² நிஸ்ஸீமம் க³ந்த்வா அஞ்ஞமஞ்ஞம் பி⁴க்கு²னோவாத³கம் ஸம்மன்னித்வா பி⁴க்கு²னியோ உபஸங்கமித்வா ஏதத³வோசும் – ‘‘மயம்பி, ப⁴கி³னியோ, ஸம்மதா. அம்ஹேபி உபஸங்கமத². மயம்பி ஓவதி³ஸ்ஸாமா’’தி.

அத² கோ² தா பி⁴க்கு²னியோ யேன ச²ப்³ப³க்³கி³யா பி⁴க்கூ² தேனுபஸங்கமிம்ஸு; உபஸங்கமித்வா ச²ப்³ப³க்³கி³யே பி⁴க்கூ² அபி⁴வாதே³த்வா ஏகமந்தம் நிஸீதி³ம்ஸு. அத² கோ² ச²ப்³ப³க்³கி³யா பி⁴க்கூ² பி⁴க்கு²னீனம் பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேஸும் – ‘‘க³ச்ச²த² ப⁴கி³னியோ’’தி. அத² கோ² தா பி⁴க்கு²னியோ யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்ட²ம்ஸு. ஏகமந்தம் டி²தா கோ² தா பி⁴க்கு²னியோ ப⁴க³வா ஏதத³வோச – ‘‘கச்சி, பி⁴க்கு²னியோ, ஓவாதோ³ இத்³தோ⁴ அஹோஸீ’’தி? ‘‘குதோ, ப⁴ந்தே, ஓவாதோ³ இத்³தோ⁴ ப⁴விஸ்ஸதி! அய்யா ச²ப்³ப³க்³கி³யா பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேஸு’’ந்தி.

அத² கோ² ப⁴க³வா தா பி⁴க்கு²னியோ த⁴ம்மியா கதா²ய ஸந்த³ஸ்ஸேஸி…பே… அத² கோ² தா பி⁴க்கு²னியோ ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா ப⁴க³வந்தம் அபி⁴வாதே³த்வா பத³க்கி²ணம் கத்வா பக்கமிம்ஸு. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ச²ப்³ப³க்³கி³யே பி⁴க்கூ² படிபுச்சி² – ‘‘ஸச்சம் கிர தும்ஹே, பி⁴க்க²வே, பி⁴க்கு²னீனம் பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²னீனம் பரித்தஞ்ஞேவ த⁴ம்மிம் கத²ம் கத்வா தி³வஸம் திரச்சா²னகதா²ய வீதினாமேத்வா உய்யோஜேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அட்ட²ஹங்கே³ஹி ஸமன்னாக³தம் பி⁴க்கு²ம் பி⁴க்கு²னோவாத³கம் ஸம்மன்னிதும். ஸீலவா ஹோதி, பாதிமோக்க²ஸம்வரஸம்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் அபி⁴வத³ந்தி ததா²ரூபாஸ்ஸ த⁴ம்மா ப³ஹுஸ்ஸுதா ஹோந்தி தா⁴தா வசஸா பரிசிதா மனஸா அனுபேக்கி²தா தி³ட்டி²யா ஸுப்படிவித்³தா⁴; உப⁴யானி கோ² பனஸ்ஸ பாதிமோக்கா²னி வித்தா²ரேன ஸ்வாக³தானி ஹோந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ; கல்யாணவாசோ ஹோதி கல்யாணவாக்கரணோ; யேபு⁴ய்யேன பி⁴க்கு²னீனம் பியோ ஹோதி மனாபோ; படிப³லோ ஹோதி பி⁴க்கு²னியோ ஓவதி³தும்; ந கோ² பனேதம் [பன தம் (?)] ப⁴க³வந்தம் உத்³தி³ஸ்ஸ பப்³ப³ஜிதாய காஸாயவத்த²வஸனாய க³ருத⁴ம்மம் அஜ்ஜா²பன்னபுப்³போ³ ஹோதி; வீஸதிவஸ்ஸோ வா ஹோதி அதிரேகவீஸதிவஸ்ஸோ வா – அனுஜானாமி, பி⁴க்க²வே, இமேஹி அட்ட²ஹங்கே³ஹி ஸமன்னாக³தம் பி⁴க்கு²ம் பி⁴க்கு²னோவாத³கம் ஸம்மன்னிது’’ந்தி.

148. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அஸம்மதோ நாம ஞத்திசதுத்தே²ன கம்மேன அஸம்மதோ.

பி⁴க்கு²னியோ நாம உப⁴தோஸங்கே⁴ உபஸம்பன்னா.

ஓவதே³ய்யாதி அட்ட²ஹி க³ருத⁴ம்மேஹி ஓவத³தி, ஆபத்தி பாசித்தியஸ்ஸ. அஞ்ஞேன த⁴ம்மேன ஓவத³தி, ஆபத்தி து³க்கடஸ்ஸ. ஏகதோஉபஸம்பன்னம் ஓவத³தி, ஆபத்தி து³க்கடஸ்ஸ.

149. தேன ஸம்மதேன பி⁴க்கு²னா பரிவேணம் ஸம்மஜ்ஜித்வா பானீயம் பரிபோ⁴ஜனீயம் உபட்டா²பேத்வா ஆஸனம் பஞ்ஞபேத்வா து³தியம் க³ஹேத்வா நிஸீதி³தப்³ப³ம். பி⁴க்கு²னீஹி தத்த² க³ந்த்வா தம் பி⁴க்கு²ம் அபி⁴வாதே³த்வா ஏகமந்தம் நிஸீதி³தப்³ப³ம். தேன பி⁴க்கு²னா புச்சி²தப்³பா³ – ‘‘ஸமக்³கா³த்த², ப⁴கி³னியோ’’தி? ஸசே ‘‘ஸமக்³கா³ம்ஹாய்யா’’தி ப⁴ணந்தி, ‘‘வத்தந்தி, ப⁴கி³னியோ, அட்ட² க³ருத⁴ம்மா’’தி? ஸசே ‘‘வத்தந்தாய்யா’’தி ப⁴ணந்தி, ‘‘ஏஸோ, ப⁴கி³னியோ, ஓவாதோ³’’தி நிய்யாதே³தப்³போ³ [நிய்யாதேதப்³போ³ (இதிபி)]. ஸசே ‘‘ந வத்தந்தாய்யா’’தி ப⁴ணந்தி, ஓஸாரேதப்³பா³. ‘‘வஸ்ஸஸதூபஸம்பன்னாய பி⁴க்கு²னியா தத³ஹுபஸம்பன்னஸ்ஸ பி⁴க்கு²னோ அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் காதப்³ப³ம்; அயம்பி த⁴ம்மோ ஸக்கத்வா க³ருகத்வா மானேத்வா பூஜேத்வா யாவஜீவம் அனதிக்கமனீயோ. ந பி⁴க்கு²னியா அபி⁴க்கு²கே ஆவாஸே வஸ்ஸம் வஸிதப்³ப³ம்; அயம்பி த⁴ம்மோ ஸக்கத்வா க³ருகத்வா மானேத்வா பூஜேத்வா யாவஜீவம் அனதிக்கமனீயோ. அன்வத்³த⁴மாஸம் பி⁴க்கு²னியா பி⁴க்கு²ஸங்க⁴தோ த்³வே த⁴ம்மா பச்சாஸீஸிதப்³பா³ [பச்சாஸிம்ஸிதப்³பா³ (இதிபி)] உபோஸத²புச்ச²கஞ்ச ஓவாது³பஸங்கமனஞ்ச, அயம்பி த⁴ம்மோ…பே… வஸ்ஸம் வுட்டா²ய பி⁴க்கு²னியா உப⁴தோஸங்கே⁴ தீஹி டா²னேஹி பவாரேதப்³ப³ம் தி³ட்டே²ன வா ஸுதேன வா பரிஸங்காய வா; அயம்பி த⁴ம்மோ…பே… க³ருத⁴ம்மம் அஜ்ஜா²பன்னாய பி⁴க்கு²னியா உப⁴தோஸங்கே⁴ பக்க²மானத்தம் சரிதப்³ப³ம்; அயம்பி த⁴ம்மோ…பே… த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா²ய ஸிக்க²மானாய உப⁴தோஸங்கே⁴ உபஸம்பதா³ பரியேஸிதப்³பா³; அயம்பி த⁴ம்மோ…பே… ந பி⁴க்கு²னியா கேன சி பரியாயேன பி⁴க்கு² அக்கோஸிதப்³போ³ பரிபா⁴ஸிதப்³போ³; அயம்பி த⁴ம்மோ…பே… அஜ்ஜதக்³கே³ ஓவடோ பி⁴க்கு²னீனம் பி⁴க்கூ²ஸு வசனபதோ², அனோவடோ பி⁴க்கூ²னம் பி⁴க்கு²னீஸு வசனபதோ²; அயம்பி த⁴ம்மோ ஸக்கத்வா க³ருகத்வா மானேத்வா பூஜேத்வா யாவஜீவம் அனதிக்கமனீயோ’’தி.

ஸசே ‘‘ஸமக்³கா³ம்ஹாய்யா’’தி ப⁴ணந்தம் அஞ்ஞம் த⁴ம்மம் ப⁴ணதி, ஆபத்தி து³க்கடஸ்ஸ. ஸசே ‘‘வக்³கா³ம்ஹாய்யா’’தி ப⁴ணந்தம் அட்ட² க³ருத⁴ம்மே ப⁴ணதி, ஆபத்தி து³க்கடஸ்ஸ. ஓவாத³ம் அனிய்யாதே³த்வா அஞ்ஞம் த⁴ம்மம் ப⁴ணதி, ஆபத்தி து³க்கடஸ்ஸ.

150. அத⁴ம்மகம்மே அத⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி, ஆபத்தி பாசித்தியஸ்ஸ. அத⁴ம்மகம்மே அத⁴ம்மகம்மஸஞ்ஞீ வக்³க³ம் பி⁴க்கு²னீஸங்க⁴ம் வேமதிகோ ஓவத³தி, ஆபத்தி பாசித்தியஸ்ஸ. அத⁴ம்மகம்மே அத⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் ஸமக்³க³ஸஞ்ஞீ ஓவத³தி, ஆபத்தி பாசித்தியஸ்ஸ.

அத⁴ம்மகம்மே வேமதிகோ வக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி, ஆபத்தி பாசித்தியஸ்ஸ. அத⁴ம்மகம்மே வேமதிகோ வக்³க³ம் பி⁴க்கு²னிஸங்க⁴ம் வேமதிகோ ஓவத³தி, ஆபத்தி பாசித்தியஸ்ஸ. அத⁴ம்மகம்மே வேமதிகோ வக்³க³ம் பி⁴க்கு²னிஸங்க⁴ம் ஸமக்³க³ஸஞ்ஞீ ஓவத³தி, ஆபத்தி பாசித்தியஸ்ஸ.

அத⁴ம்மகம்மே த⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி, ஆபத்தி பாசித்தியஸ்ஸ. அத⁴ம்மகம்மே த⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் வேமதிகோ ஓவத³தி, ஆபத்தி பாசித்தியஸ்ஸ. அத⁴ம்மகம்மே த⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் ஸமக்³க³ஸஞ்ஞீ ஓவத³தி, ஆபத்தி பாசித்தியஸ்ஸ.

அத⁴ம்மகம்மே அத⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி, ஆபத்தி பாசித்தியஸ்ஸ. அத⁴ம்மகம்மே அத⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் வேமதிகோ ஓவத³தி, ஆபத்தி பாசித்தியஸ்ஸ. அத⁴ம்மகம்மே அத⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் ஸமக்³க³ஸஞ்ஞீ ஓவத³தி, ஆபத்தி பாசித்தியஸ்ஸ.

அத⁴ம்மகம்மே வேமதிகோ ஸமக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி…பே… வேமதிகோ ஓவத³தி…பே… ஸமக்³க³ஸஞ்ஞீ ஓவத³தி, ஆபத்தி பாசித்தியஸ்ஸ.

அத⁴ம்மகம்மே த⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி…பே… வேமதிகோ ஓவத³தி…பே… ஸமக்³க³ஸஞ்ஞீ ஓவத³தி, ஆபத்தி பாசித்தியஸ்ஸ.

151. த⁴ம்மகம்மே அத⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி, ஆபத்தி து³க்கடஸ்ஸ. த⁴ம்மகம்மே அத⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் வேமதிகோ ஓவத³தி…பே… ஸமக்³க³ஸஞ்ஞீ ஓவத³தி, ஆபத்தி து³க்கடஸ்ஸ.

த⁴ம்மகம்மே வேமதிகோ வக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி…பே… வேமதிகோ ஓவத³தி…பே… ஸமக்³க³ஸஞ்ஞீ ஓவத³தி, ஆபத்தி து³க்கடஸ்ஸ.

த⁴ம்மகம்மே த⁴ம்மகம்மஸஞ்ஞீ வக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி…பே… வேமதிகோ ஓவத³தி…பே… ஸமக்³க³ஸஞ்ஞீ ஓவத³தி, ஆபத்தி து³க்கடஸ்ஸ.

த⁴ம்மகம்மே அத⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி…பே… வேமதிகோ ஓவத³தி…பே… ஸமக்³க³ஸஞ்ஞீ ஓவத³தி, ஆபத்தி து³க்கடஸ்ஸ.

த⁴ம்மகம்மே வேமதிகோ ஸமக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி…பே… வேமதிகோ ஓவத³தி…பே… ஸமக்³க³ஸஞ்ஞீ ஓவத³தி, ஆபத்தி து³க்கடஸ்ஸ.

த⁴ம்மகம்மே த⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் வக்³க³ஸஞ்ஞீ ஓவத³தி, ஆபத்தி து³க்கடஸ்ஸ. த⁴ம்மகம்மே த⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் வேமதிகோ ஓவத³தி, ஆபத்தி து³க்கடஸ்ஸ. த⁴ம்மகம்மே த⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் ஸமக்³க³ஸஞ்ஞீ ஓவத³தி, அனாபத்தி.

152. அனாபத்தி உத்³தே³ஸம் தே³ந்தோ, பரிபுச்ச²ம் தே³ந்தோ, ‘‘ஓஸாரேஹி அய்யா’’தி வுச்சமானோ, ஓஸாரேதி, பஞ்ஹம் புச்ச²தி, பஞ்ஹம் புட்டோ² கதே²தி, அஞ்ஞஸ்ஸத்தா²ய ப⁴ணந்தம் பி⁴க்கு²னியோ ஸுணந்தி, ஸிக்க²மானாய, ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

ஓவாத³ஸிக்கா²பத³ம் நிட்டி²தம் பட²மம்.

2. அத்த²ங்க³தஸிக்கா²பத³ம்

153. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன தே²ரா பி⁴க்கூ² பி⁴க்கு²னியோ ஓவத³ந்தி பரியாயேன. தேன கோ² பன ஸமயேன ஆயஸ்மதோ சூளபந்த²கஸ்ஸ பரியாயோ ஹோதி பி⁴க்கு²னியோ ஓவதி³தும். பி⁴க்கு²னியோ ஏவமாஹம்ஸு – ‘‘ந தா³னி அஜ்ஜ ஓவாதோ³ இத்³தோ⁴ ப⁴விஸ்ஸதி, தஞ்ஞேவ தா³னி உதா³னம் அய்யோ சூளபந்த²கோ புனப்புனம் ப⁴ணிஸ்ஸதீ’’தி. அத² கோ² தா பி⁴க்கு²னியோ யேனாயஸ்மா சூளபந்த²கோ தேனுபஸங்கமிம்ஸு; உபஸங்கமித்வா ஆயஸ்மந்தம் சூளபந்த²கம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தா பி⁴க்கு²னியோ ஆயஸ்மா சூளபந்த²கோ ஏதத³வோச – ‘‘ஸமக்³கா³த்த², ப⁴கி³னியோ’’தி? ‘‘ஸமக்³கா³ம்ஹாய்யா’’தி. ‘‘வத்தந்தி, ப⁴கி³னியோ, அட்ட² க³ருத⁴ம்மா’’தி? ‘‘வத்தந்தாய்யா’’தி. ‘‘ஏஸோ, ப⁴கி³னியோ, ஓவாதோ³’’தி நிய்யாதே³த்வா இமம் உதா³னம் புனப்புனம் அபா⁴ஸி –

[உதா³. 37] ‘‘அதி⁴சேதஸோ அப்பமஜ்ஜதோ, முனினோ மோனபதே²ஸு ஸிக்க²தோ;

ஸோகா ந ப⁴வந்தி தாதி³னோ, உபஸந்தஸ்ஸ ஸதா³ ஸதீமதோ’’தி.

பி⁴க்கு²னியோ ஏவமாஹம்ஸு – ‘‘நனு அவோசும்ஹா – ந தா³னி அஜ்ஜ ஓவாதோ³ இத்³தோ⁴ ப⁴விஸ்ஸதி, தஞ்ஞேவ தா³னி உதா³னம் அய்யோ சூளபந்த²கோ புனப்புனம் ப⁴ணிஸ்ஸதீ’’தி! அஸ்ஸோஸி கோ² ஆயஸ்மா சூளபந்த²கோ தாஸம் பி⁴க்கு²னீனம் இமம் கதா²ஸல்லாபம். அத² கோ² ஆயஸ்மா சூளபந்த²கோ வேஹாஸம் அப்³பு⁴க்³க³ந்த்வா ஆகாஸே அந்தலிக்கே² சங்கமதிபி திட்ட²திபி நிஸீத³திபி ஸேய்யம்பி கப்பேதி தூ⁴மாயதிபி பஜ்ஜலதிபி அந்தரதா⁴யதிபி, தஞ்சேவ [தஞ்ஞேவ (இதிபி)] உதா³னம் ப⁴ணதி அஞ்ஞஞ்ச ப³ஹும் பு³த்³த⁴வசனம். பி⁴க்கு²னியோ ஏவமாஹம்ஸு – ‘‘அச்ச²ரியம் வத போ⁴, அப்³பு⁴தம் வத போ⁴, ந வத நோ இதோ புப்³பே³ ஓவாதோ³ ஏவம் இத்³தோ⁴ பூ⁴தபுப்³போ³ யதா² அய்யஸ்ஸ சூளபந்த²கஸ்ஸா’’தி. அத² கோ² ஆயஸ்மா சூளபந்த²கோ தா பி⁴க்கு²னியோ யாவ ஸமந்த⁴காரா ஓவதி³த்வா உய்யோஜேஸி – க³ச்ச²த² ப⁴கி³னியோதி.

அத² கோ² தா பி⁴க்கு²னியோ நக³ரத்³வாரே த²கிதே ப³ஹினக³ரே வஸித்வா காலஸ்ஸேவ நக³ரம் பவிஸந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘அப்³ரஹ்மசாரினியோ இமா பி⁴க்கு²னியோ; ஆராமே பி⁴க்கூ²ஹி ஸத்³தி⁴ம் வஸித்வா இதா³னி நக³ரம் பவிஸந்தீ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா சூளபந்த²கோ அத்த²ங்க³தே ஸூரியே பி⁴க்கு²னியோ ஓவதி³ஸ்ஸதீ’’தி…பே… ‘‘ஸச்சம் கிர த்வம், சூளபந்த²க, அத்த²ங்க³தே ஸூரியே பி⁴க்கு²னியோ ஓவத³ஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், சூளபந்த²க, அத்த²ங்க³தே ஸூரியே பி⁴க்கு²னியோ ஓவதி³ஸ்ஸஸி! நேதம், சூளபந்த²க, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

154. ‘‘ஸம்மதோபி சே பி⁴க்கு² அத்த²ங்க³தே ஸூரியே பி⁴க்கு²னியோ ஓவதே³ய்ய, பாசித்திய’’ந்தி.

155. ஸம்மதோ நாம ஞத்திசதுத்தே²ன கம்மேன ஸம்மதோ.

அத்த²ங்க³தே ஸூரியேதி ஓக்³க³தே ஸூரியே.

பி⁴க்கு²னீ நாம உப⁴தோஸங்கே⁴ உபஸம்பன்னா.

ஓவதே³ய்யாதி அட்ட²ஹி வா க³ருத⁴ம்மேஹி அஞ்ஞேன வா த⁴ம்மேன ஓவத³தி, ஆபத்தி பாசித்தியஸ்ஸ.

156. அத்த²ங்க³தே அத்த²ங்க³தஸஞ்ஞீ ஓவத³தி, ஆபத்தி பாசித்தியஸ்ஸ. அத்த²ங்க³தே வேமதிகோ ஓவத³தி, ஆபத்தி பாசித்தியஸ்ஸ. அத்த²ங்க³தே அனத்த²ங்க³தஸஞ்ஞீ ஓவத³தி, ஆபத்தி பாசித்தியஸ்ஸ.

ஏகதோஉபஸம்பன்னாய ஓவத³தி, ஆபத்தி து³க்கடஸ்ஸ. அனத்த²ங்க³தே அத்த²ங்க³தஸஞ்ஞீ, ஆபத்தி து³க்கடஸ்ஸ. அனத்த²ங்க³தே வேமதிகோ, ஆபத்தி து³க்கடஸ்ஸ. அனத்த²ங்க³தே அனத்த²ங்க³தஸஞ்ஞீ, அனாபத்தி.

157. அனாபத்தி உத்³தே³ஸம் தே³ந்தோ, பரிபுச்ச²ம் தே³ந்தோ, ‘‘ஓஸாரேஹி அய்யா’’தி வுச்சமானோ, ஓஸாரேதி, பஞ்ஹம் புச்ச²தி, பஞ்ஹம் புட்டோ² கதே²தி, அஞ்ஞஸ்ஸத்தா²ய ப⁴ணந்தம் பி⁴க்கு²னியோ ஸுணந்தி, ஸிக்க²மானாய ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

அத்த²ங்க³தஸிக்கா²பத³ம் நிட்டி²தம் து³தியம்.

3. பி⁴க்கு²னுபஸ்ஸயஸிக்கா²பத³ம்

158. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. தேன கோ² பன ஸமயேன ச²ப்³ப³க்³கி³யா பி⁴க்கூ² பி⁴க்கு²னுபஸ்ஸயம் உபஸங்கமித்வா ச²ப்³ப³க்³கி³யா பி⁴க்கு²னியோ ஓவத³ந்தி. பி⁴க்கு²னியோ ச²ப்³ப³க்³கி³யா பி⁴க்கு²னியோ ஏதத³வோசும் – ‘‘ஏதா²ய்யே, ஓவாத³ம் க³மிஸ்ஸாமா’’தி. ‘‘யம்பி [யம் ஹி (க.)] மயம், அய்யே, க³ச்சே²ய்யாம ஓவாத³ஸ்ஸ காரணா, அய்யா ச²ப்³ப³க்³கி³யா இதே⁴வ ஆக³ந்த்வா அம்ஹே ஓவத³ந்தீ’’தி. பி⁴க்கு²னியோ உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவதி³ஸ்ஸந்தீ’’தி [ச²ப்³ப³க்³கி³யா பி⁴க்கு²னியோ ஓவாத³ம் ந க³ச்சி²ஸ்ஸந்தீதி (ஸீ.)]! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவதி³ஸ்ஸந்தீ’’தி…பே… ‘‘ஸச்சம் கிர தும்ஹே, பி⁴க்க²வே, பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவத³தா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவதி³ஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவதே³ய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

159. தேன கோ² பன ஸமயேன மஹாபஜாபதி கோ³தமீ கி³லானா ஹோதி. தே²ரா பி⁴க்கூ² யேன மஹாபஜாபதி கோ³தமீ தேனுபஸங்கமிம்ஸு; உபஸங்கமித்வா மஹாபஜாபதிம் கோ³தமிம் ஏதத³வோசும் – ‘‘கச்சி தே, கோ³தமி, க²மனீயம் கச்சி யாபனீய’’ந்தி? ‘‘ந மே, அய்யா, க²மனீயம் ந யாபனீயம்’’. ‘‘இங்க⁴ய்யா, த⁴ம்மம் தே³ஸேதா²’’தி. ‘‘ந, ப⁴கி³னி, கப்பதி பி⁴க்கு²னுபஸ்ஸயம் உபஸங்கமித்வா பி⁴க்கு²னியோ த⁴ம்மம் தே³ஸேது’’ந்தி குக்குச்சாயந்தா ந தே³ஸேஸும். அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன மஹாபஜாபதி கோ³தமீ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா மஹாபஜாபதிம் கோ³தமிம் ஏதத³வோச – ‘‘கச்சி தே, கோ³தமி, க²மனீயம் கச்சி யாபனீய’’ந்தி? ‘‘புப்³பே³ மே, ப⁴ந்தே, தே²ரா பி⁴க்கூ² ஆக³ந்த்வா த⁴ம்மம் தே³ஸேந்தி. தேன மே பா²ஸு ஹோதி. இதா³னி பன – ‘‘ப⁴க³வதா படிக்கி²த்த’’ந்தி, குக்குச்சாயந்தா ந தே³ஸேந்தி. தேன மே ந பா²ஸு ஹோதீ’’தி. அத² கோ² ப⁴க³வா மஹாபஜாபதிம் கோ³தமிம் த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பி⁴க்கு²னுபஸ்ஸயம் உபஸங்கமித்வா கி³லானம் பி⁴க்கு²னிம் ஓவதி³தும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

160. ‘‘யோ பன பி⁴க்கு² பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவதே³ய்ய, அஞ்ஞத்ர ஸமயா, பாசித்தியம். தத்தா²யம் ஸமயோ. கி³லானா ஹோதி பி⁴க்கு²னீ – அயம் தத்த² ஸமயோ’’தி.

161. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²னுபஸ்ஸயோ நாம யத்த² பி⁴க்கு²னியோ ஏகரத்தம்பி வஸந்தி.

உபஸங்கமித்வாதி தத்த² க³ந்த்வா.

பி⁴க்கு²னீ நாம உப⁴தோஸங்கே⁴ உபஸம்பன்னா.

ஓவதே³ய்யாதி அட்ட²ஹி க³ருத⁴ம்மேஹி ஓவத³தி, ஆபத்தி பாசித்தியஸ்ஸ.

அஞ்ஞத்ர ஸமயாதி ட²பேத்வா ஸமயம்.

கி³லானா நாம பி⁴க்கு²னீ ந ஸக்கோதி ஓவாதா³ய வா ஸம்வாஸாய வா க³ந்தும்.

162. உபஸம்பன்னாய உபஸம்பன்னஸஞ்ஞீ பி⁴க்கு²னுபஸ்ஸயம் உபஸங்கமித்வா அஞ்ஞத்ர ஸமயா ஓவத³தி, ஆபத்தி பாசித்தியஸ்ஸ. உபஸம்பன்னாய வேமதிகோ பி⁴க்கு²னுபஸ்ஸயம் உபஸங்கமித்வா அஞ்ஞத்ர ஸமயா ஓவத³தி, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞீ பி⁴க்கு²னுபஸ்ஸயம் உபஸங்கமித்வா அஞ்ஞத்ர ஸமயா ஓவத³தி, ஆபத்தி பாசித்தியஸ்ஸ.

அஞ்ஞேன த⁴ம்மேன ஓவத³தி, ஆபத்தி து³க்கடஸ்ஸ. ஏகதோஉபஸம்பன்னாய ஓவத³தி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னாய வேமதிகோ, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞீ, அனாபத்தி.

163. அனாபத்தி ஸமயே, உத்³தே³ஸம் தே³ந்தோ, பரிபுச்ச²ம் தே³ந்தோ, ‘‘ஓஸாரேஹி அய்யா’’தி வுச்சமானோ ஓஸாரேதி, பஞ்ஹம் புச்ச²தி, பஞ்ஹம் புட்டோ² கதே²தி, அஞ்ஞஸ்ஸத்தா²ய ப⁴ணந்தம் பி⁴க்கு²னியோ ஸுணந்தி, ஸிக்க²மானாய ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

பி⁴க்கு²னுபஸ்ஸயஸிக்கா²பத³ம் நிட்டி²தம் ததியம்.

4. ஆமிஸஸிக்கா²பத³ம்

164. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன தே²ரா பி⁴க்கூ² பி⁴க்கு²னியோ ஓவத³ந்தா லாபி⁴னோ ஹோந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானம். ச²ப்³ப³க்³கி³யா பி⁴க்கூ² ஏவம் வத³ந்தி – ‘‘ந ப³ஹுகதா தே²ரா பி⁴க்கூ² பி⁴க்கு²னியோ ஓவதி³தும்; ஆமிஸஹேது தே²ரா பி⁴க்கூ² பி⁴க்கு²னியோ ஓவத³ந்தீ’’தி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஏவம் வக்க²ந்தி – ‘ந ப³ஹுகதா தே²ரா பி⁴க்கூ² பி⁴க்கு²னியோ ஓவதி³தும்; ஆமிஸஹேது தே²ரா பி⁴க்கூ² பி⁴க்கு²னியோ ஓவத³ந்தீ’’’தி…பே… ‘‘ஸச்சம் கிர தும்ஹே, பி⁴க்க²வே, ஏவம் வதே³த² – ‘ந ப³ஹுகதா தே²ரா பி⁴க்கூ² பி⁴க்கு²னியோ ஓவதி³தும்; ஆமிஸஹேது தே²ரா பி⁴க்கூ² பி⁴க்கு²னியோ ஓவத³ந்தீ’’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, ஏவம் வக்க²த² – ந ப³ஹுகதா தே²ரா பி⁴க்கூ² பி⁴க்கு²னியோ ஓவதி³தும்; ஆமிஸஹேது தே²ரா பி⁴க்கூ² பி⁴க்கு²னியோ ஓவத³ந்தீதி! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

165. ‘‘யோ பன பி⁴க்கு² ஏவம் வதே³ய்ய – ‘ஆமிஸஹேது தே²ரா பி⁴க்கூ² பி⁴க்கு²னியோ ஓவந்த³தீ’தி, பாசித்திய’’ந்தி.

166. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

ஆமிஸஹேதூதி சீவரஹேது பிண்ட³பாதஹேது ஸேனாஸனஹேது கி³லானப்பச்சயபே⁴ஸஜ்ஜபரிக்கா²ரஹேது ஸக்காரஹேது க³ருகாரஹேது மானனஹேது வந்த³னஹேது பூஜனஹேது.

ஏவம் வதே³ய்யாதி உபஸம்பன்னம் ஸங்கே⁴ன ஸம்மதம் பி⁴க்கு²னோவாத³கம் அவண்ணம் கத்துகாமோ அயஸம் கத்துகாமோ மங்குகத்துகாமோ ஏவம் வதே³தி – ‘‘சீவரஹேது பிண்ட³பாதஹேது ஸேனாஸனஹேது கி³லானப்பச்சயபே⁴ஸஜ்ஜபரிக்கா²ரஹேது ஸக்காரஹேது க³ருகாரஹேது மானனஹேது வந்த³னஹேது பூஜனஹேது ஓவத³தீ’’தி ப⁴ணதி, ஆபத்தி பாசித்தியஸ்ஸ.

167. த⁴ம்மகம்மே த⁴ம்மகம்மஸஞ்ஞீ ஏவம் வதே³தி, ஆபத்தி பாசித்தியஸ்ஸ. த⁴ம்மகம்மே வேமதிகோ ஏவம் வதே³தி, ஆபத்தி பாசித்தியஸ்ஸ. த⁴ம்மகம்மே அத⁴ம்மகம்மஸஞ்ஞீ ஏவம் வதே³தி, ஆபத்தி பாசித்தியஸ்ஸ.

உபஸம்பன்னம் ஸங்கே⁴ன அஸம்மதம் பி⁴க்கு²னோவாத³கம் அவண்ணம் கத்துகாமோ அயஸம் கத்துகாமோ மங்குகத்துகாமோ ஏவம் வதே³தி – ‘‘சீவரஹேது…பே… பூஜனஹேது ஓவத³தீ’’தி ப⁴ணதி, ஆபத்தி து³க்கடஸ்ஸ. அனுபஸம்பன்னம் ஸங்கே⁴ன ஸம்மதம் வா அஸம்மதம் வா பி⁴க்கு²னோவாத³கம் அவண்ணம் கத்துகாமோ அயஸம் கத்துகாமோ மங்குகத்துகாமோ ஏவம் வதே³தி – ‘‘சீவரஹேது பிண்ட³பாதஹேது ஸேனாஸனஹேது கி³லானப்பச்சயபே⁴ஸஜ்ஜபரிக்கா²ரஹேது ஸக்காரஹேது க³ருகாரஹேது மானனஹேது வந்த³னஹேது பூஜனஹேது ஓவத³தீ’’தி ப⁴ணதி, ஆபத்தி து³க்கடஸ்ஸ. அத⁴ம்மகம்மே த⁴ம்மகம்மஸஞ்ஞீ, ஆபத்தி து³க்கடஸ்ஸ. அத⁴ம்மகம்மே வேமதிகோ, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞீ, ஆபத்தி து³க்கடஸ்ஸ.

168. அனாபத்தி பகதியா சீவரஹேது பிண்ட³பாதஹேது ஸேனாஸனஹேது கி³லானப்பச்சயபே⁴ஸஜ்ஜபரிக்கா²ரஹேது ஸக்காரஹேது க³ருகாரஹேது மானனஹேது வந்த³னஹேது பூஜனஹேது ஓவத³ந்தம் ப⁴ணதி, உம்மத்தகஸ்ஸ, ஆதி³கம்மிகஸ்ஸாதி.

ஆமிஸஸிக்கா²பத³ம் நிட்டி²தம் சதுத்த²ம்.

5. சீவரதா³னஸிக்கா²பத³ம்

169. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ பி⁴க்கு² ஸாவத்தி²யம் அஞ்ஞதரிஸ்ஸா விஸிகா²ய பிண்டா³ய சரதி. அஞ்ஞதராபி பி⁴க்கு²னீ தஸ்ஸா விஸிகா²ய பிண்டா³ய சரதி. அத² கோ² ஸோ பி⁴க்கு² தம் பி⁴க்கு²னிம் ஏதத³வோச – ‘‘க³ச்ச², ப⁴கி³னி, அமுகஸ்மிம் ஓகாஸே பி⁴க்கா² தி³ய்யதீ’’தி. ஸாபி கோ² ஏவமாஹ – ‘‘க³ச்சா²ய்ய, அமுகஸ்மிம் ஓகாஸே பி⁴க்கா² தி³ய்யதீ’’தி. தே அபி⁴ண்ஹத³ஸ்ஸனேன ஸந்தி³ட்டா² அஹேஸும். தேன கோ² பன ஸமயேன ஸங்க⁴ஸ்ஸ சீவரம் பா⁴ஜீயதி. அத² கோ² ஸா பி⁴க்கு²னீ ஓவாத³ம் க³ந்த்வா யேன ஸோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தம் கோ² தம் பி⁴க்கு²னிம் ஸோ பி⁴க்கு² ஏதத³வோச – ‘‘அயம் மே, ப⁴கி³னி, சீவரபடிவீஸோ [படிவிம்ஸோ (ஸீ.), படிவிஸோ (இதிபி)]; ஸாதி³யிஸ்ஸஸீ’’தி? ‘‘ஆமாய்ய, து³ப்³ப³லசீவராம்ஹீ’’தி.

அத² கோ² ஸோ பி⁴க்கு² தஸ்ஸா பி⁴க்கு²னியா சீவரம் அதா³ஸி. ஸோபி கோ² பி⁴க்கு² து³ப்³ப³லசீவரோ ஹோதி. பி⁴க்கூ² தம் பி⁴க்கு²ம் ஏதத³வோசும் – ‘‘கரோஹி தா³னி தே, ஆவுஸோ, சீவர’’ந்தி. அத² கோ² ஸோ பி⁴க்கு² பி⁴க்கூ²னம் ஏதமத்த²ம் ஆரோசேஸி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கு² பி⁴க்கு²னியா சீவரம் த³ஸ்ஸதீ’’தி…பே… ‘‘ஸச்சம் கிர த்வம், பி⁴க்கு², பி⁴க்கு²னியா சீவரம் அதா³ஸீ’’தி? ‘‘ஸச்சம், ப⁴க³வா’’தி. ‘‘ஞாதிகா தே, பி⁴க்கு², அஞ்ஞாதிகா’’தி? ‘‘அஞ்ஞாதிகா, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதிகாய ந ஜானாதி பதிரூபம் வா அப்பதிரூபம் வா ஸந்தம் வா அஸந்தம் வா. கத²ஞ்ஹி நாம த்வம், மோக⁴புரிஸ, அஞ்ஞாதிகாய பி⁴க்கு²னியா சீவரம் த³ஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² அஞ்ஞாதிகாய பி⁴க்கு²னியா சீவரம் த³தே³ய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

170. தேன கோ² பன ஸமயேன பி⁴க்கூ² குக்குச்சாயந்தா பி⁴க்கு²னீனம் பாரிவத்தகம் [பாரிவட்டகம் (இதிபி)] சீவரம் ந தே³ந்தி. பி⁴க்கு²னியோ உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம அய்யா அம்ஹாகம் பாரிவத்தகம் சீவரம் ந த³ஸ்ஸந்தீ’’தி! அஸ்ஸோஸும் கோ² பி⁴க்கூ² தாஸம் பி⁴க்கு²னீனம் உஜ்ஜா²யந்தீனம் கி²ய்யந்தீனம் விபாசேந்தீனம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பஞ்சன்னம் பாரிவத்தகம் தா³தும். பி⁴க்கு²ஸ்ஸ, பி⁴க்கு²னியா, ஸிக்க²மானாய, ஸாமணேரஸ்ஸ, ஸாமணேரியா – அனுஜானாமி, பி⁴க்க²வே, இமேஸம் பஞ்சன்னம் பாரிவத்தகம் தா³தும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

171. ‘‘யோ பன பி⁴க்கு² அஞ்ஞாதிகாய பி⁴க்கு²னியா சீவரம் த³தே³ய்ய, அஞ்ஞத்ர பாரிவத்தகா, பாசித்திய’’ந்தி.

172. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அஞ்ஞாதிகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.

பி⁴க்கு²னீ நாம உப⁴தோஸங்கே⁴ உபஸம்பன்னா.

சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²மம் [விகப்பனுபக³பச்சி²மம் (ஸீ.)].

அஞ்ஞத்ர பாரிவத்தகாதி ட²பேத்வா பாரிவத்தகம் தே³தி, ஆபத்தி பாசித்தியஸ்ஸ.

173. அஞ்ஞாதிகாய அஞ்ஞாதிகஸஞ்ஞீ சீவரம் தே³தி, அஞ்ஞத்ர பாரிவத்தகா, ஆபத்தி பாசித்தியஸ்ஸ. அஞ்ஞாதிகாய வேமதிகோ சீவரம் தே³தி, அஞ்ஞத்ர பாரிவத்தகா, ஆபத்தி பாசித்தியஸ்ஸ. அஞ்ஞாதிகாய ஞாதிகஸஞ்ஞீ சீவரம் தே³தி, அஞ்ஞத்ர பாரிவத்தகா, ஆபத்தி பாசித்தியஸ்ஸ.

ஏகதோ உபஸம்பன்னாய சீவரம் தே³தி, அஞ்ஞத்ர பாரிவத்தகா, ஆபத்தி து³க்கடஸ்ஸ. ஞாதிகாய அஞ்ஞாதிகஸஞ்ஞீ, ஆபத்தி து³க்கடஸ்ஸ. ஞாதிகாய வேமதிகோ, ஆபத்தி து³க்கடஸ்ஸ. ஞாதிகாய ஞாதிகஸஞ்ஞீ, அனாபத்தி.

174. அனாபத்தி ஞாதிகாய, பாரிவத்தகம் பரித்தேன வா விபுலம், விபுலேன வா பரித்தம், பி⁴க்கு²னீ விஸ்ஸாஸம் க³ண்ஹாதி, தாவகாலிகம் க³ண்ஹாதி, சீவரம் ட²பேத்வா அஞ்ஞம் பரிக்கா²ரம் தே³தி, ஸிக்க²மானாய, ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

சீவரதா³னஸிக்கா²பத³ம் நிட்டி²தம் பஞ்சமம்.

6. சீவரஸிப்³ப³னஸிக்கா²பத³ம்

175. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ பட்டோ [பட்டோ² (ஸீ. ஸ்யா.)] ஹோதி சீவரகம்மம் காதும். அஞ்ஞதரா பி⁴க்கு²னீ யேனாயஸ்மா உதா³யீ தேனுபஸங்கமி; உபஸங்கமித்வா ஆயஸ்மந்தம் உதா³யிம் ஏதத³வோச – ‘‘ஸாது⁴ மே, ப⁴ந்தே, அய்யோ சீவரம் ஸிப்³ப³தூ’’தி. அத² கோ² ஆயஸ்மா உதா³யீ தஸ்ஸா பி⁴க்கு²னியா சீவரம் ஸிப்³பி³த்வா ஸுரத்தம் ஸுபரிகம்மகதம் கத்வா மஜ்ஜே² படிபா⁴னசித்தம் வுட்டா²பேத்வா ஸம்ஹரித்வா நிக்கி²பி. அத² கோ² ஸா பி⁴க்கு²னீ யேனாயஸ்மா உதா³யீ தேனுபஸங்கமி; உபஸங்கமித்வா ஆயஸ்மந்தம் உதா³யிம் ஏதத³வோச – ‘‘கஹம் தம், ப⁴ந்தே, சீவர’’ந்தி? ‘‘ஹந்த³, ப⁴கி³னி, இமம் சீவரம் யதா²ஸம்ஹடம் ஹரித்வா நிக்கி²பித்வா யதா³ பி⁴க்கு²னிஸங்கோ⁴ ஓவாத³ம் ஆக³ச்ச²தி ததா³ இமம் சீவரம் பாருபித்வா பி⁴க்கு²னிஸங்க⁴ஸ்ஸ பிட்டி²தோ பிட்டி²தோ ஆக³ச்சா²’’தி. அத² கோ² ஸா பி⁴க்கு²னீ தம் சீவரம் யதா²ஸம்ஹடம் ஹரித்வா நிக்கி²பித்வா யதா³ பி⁴க்கு²னிஸங்கோ⁴ ஓவாத³ம் ஆக³ச்ச²தி ததா³ தம் சீவரம் பாருபித்வா பி⁴க்கு²னிஸங்க⁴ஸ்ஸ பிட்டி²தோ பிட்டி²தோ ஆக³ச்ச²தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘யாவ சி²ன்னிகா இமா பி⁴க்கு²னியோ து⁴த்திகா அஹிரிகாயோ, யத்ர ஹி நாம சீவரே படிபா⁴னசித்தம் வுட்டா²பேஸ்ஸந்தீ’’தி!

பி⁴க்கு²னியோ ஏவமாஹம்ஸு – ‘‘கஸ்ஸித³ம் கம்ம’’ந்தி? ‘‘அய்யஸ்ஸ உதா³யிஸ்ஸா’’தி. ‘‘யேபி தே சி²ன்னகா து⁴த்தகா அஹிரிகா தேஸம்பி ஏவரூபம் ந ஸோபே⁴ய்ய, கிம் பன அய்யஸ்ஸ உதா³யிஸ்ஸா’’தி! அத² கோ² தா பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உதா³யீ பி⁴க்கு²னியா சீவரம் ஸிப்³பி³ஸ்ஸதீ’’தி…பே… ஸச்சம் கிர த்வம், உதா³யி, பி⁴க்கு²னியா சீவரம் ஸிப்³ப³ஸீ’’தி? ‘‘ஸச்சம், ப⁴க³வா’’தி. ‘‘ஞாதிகா தே, உதா³யி, அஞ்ஞாதிகா’’தி? ‘‘அஞ்ஞாதிகா, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதிகாய ந ஜானாதி பதிரூபம் வா அப்பதிரூபம் வா பாஸாதி³கம் வா அபாஸாதி³கம் வா. கத²ஞ்ஹி நாம த்வம், மோக⁴புரிஸ, அஞ்ஞாதிகாய பி⁴க்கு²னியா சீவரம் ஸிப்³பி³ஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

176. ‘‘யோ பன பி⁴க்கு² அஞ்ஞாதிகாய பி⁴க்கு²னியா சீவரம் ஸிப்³பே³ய்ய வா ஸிப்³பா³பேய்ய வா, பாசித்திய’’ந்தி.

177. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

அஞ்ஞாதிகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.

பி⁴க்கு²னீ நாம உப⁴தோஸங்கே⁴ உபஸம்பன்னா.

சீவரம் நாம ச²ன்னம் சீவரானம் அஞ்ஞதரம் சீவரம்.

ஸிப்³பே³ய்யாதி ஸயம் ஸிப்³ப³தி ஆராபதே² ஆராபதே² ஆபத்தி பாசித்தியஸ்ஸ.

ஸிப்³பா³பேய்யாதி அஞ்ஞம் ஆணாபேதி, ஆபத்தி பாசித்தியஸ்ஸ. ஸகிம் ஆணத்தோ ப³ஹுகம்பி ஸிப்³ப³தி, ஆபத்தி பாசித்தியஸ்ஸ.

178. அஞ்ஞாதிகாய அஞ்ஞாதிகஸஞ்ஞீ சீவரம் ஸிப்³ப³தி வா ஸிப்³பா³பேதி வா, ஆபத்தி பாசித்தியஸ்ஸ. அஞ்ஞாதிகாய வேமதிகோ சீவரம் ஸிப்³ப³தி வா ஸிப்³பா³பேதி வா, ஆபத்தி பாசித்தியஸ்ஸ. அஞ்ஞாதிகாய ஞாதிகஸஞ்ஞீ சீவரம் ஸிப்³ப³தி வா ஸிப்³பா³பேதி வா, ஆபத்தி பாசித்தியஸ்ஸ.

ஏகதோஉபஸம்பன்னாய சீவரம் ஸிப்³ப³தி வா ஸிப்³பா³பேதி வா, ஆபத்தி து³க்கடஸ்ஸ. ஞாதிகாய அஞ்ஞாதிகஸஞ்ஞீ, ஆபத்தி து³க்கடஸ்ஸ. ஞாதிகாய வேமதிகோ, ஆபத்தி து³க்கடஸ்ஸ. ஞாதிகாய ஞாதிகஸஞ்ஞீ, அனாபத்தி.

179. அனாபத்தி ஞாதிகாய, சீவரம் ட²பேத்வா அஞ்ஞம் பரிக்கா²ரம் ஸிப்³ப³தி வா ஸிப்³பா³பேதி வா, ஸிக்க²மானாய, ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.

சீவரஸிப்³ப³னஸிக்கா²பத³ம் நிட்டி²தம் ச²ட்ட²ம்.

7. ஸம்விதா⁴னஸிக்கா²பத³ம்

180. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² பி⁴க்கு²னீஹி ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘யதே²வ மயம் ஸபஜாபதிகா ஆஹிண்டா³ம, ஏவமேவிமே ஸமணா ஸக்யபுத்தியா பி⁴க்கு²னீஹி ஸத்³தி⁴ம் ஸம்விதா⁴ய ஆஹிண்ட³ந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²னீஹி ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜிஸ்ஸந்தீ’’தி…பே… ‘‘ஸச்சம் கிர தும்ஹே, பி⁴க்க²வே, பி⁴க்கு²னீஹி ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²னீஹி ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத².

‘‘யோ பன பி⁴க்கு² பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜேய்ய, அந்தமஸோ கா³மந்தரம்பி, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

181. தேன கோ² பன ஸமயேன ஸம்ப³ஹுலா பி⁴க்கூ² ச பி⁴க்கு²னியோ ச ஸாகேதா ஸாவத்தி²ம் அத்³தா⁴னமக்³க³ப்படிபன்னா ஹோந்தி. அத² கோ² தா பி⁴க்கு²னியோ தே பி⁴க்கூ² ஏதத³வோசும் – ‘‘மயம்பி அய்யேஹி ஸத்³தி⁴ம் க³மிஸ்ஸாமா’’தி. ‘‘ந, ப⁴கி³னீ, கப்பதி பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜிதும். தும்ஹே வா பட²மம் க³ச்ச²த² மயம் வா க³மிஸ்ஸாமா’’தி. ‘‘அய்யா, ப⁴ந்தே, அக்³க³புரிஸா. அய்யாவ பட²மம் க³ச்ச²ந்தூ’’தி. அத² கோ² தாஸம் பி⁴க்கு²னீனம் பச்சா² க³ச்ச²ந்தீனம் அந்தராமக்³கே³ சோரா அச்சி²ந்தி³ம்ஸு ச தூ³ஸேஸுஞ்ச. அத² கோ² தா பி⁴க்கு²னியோ ஸாவத்தி²ம் க³ந்த்வா பி⁴க்கு²னீனம் ஏதமத்த²ம் ஆரோசேஸும். பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஸத்த²க³மனீயே மக்³கே³ ஸாஸங்கஸம்மதே ஸப்படிப⁴யே பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

182. ‘‘யோ பன பி⁴க்கு² பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜேய்ய, அந்தமஸோ கா³மந்தரம்பி, அஞ்ஞத்ர ஸமயா, பாசித்தியம். தத்தா²யம் ஸமயோ . ஸத்த²க³மனீயோ ஹோதி மக்³கோ³ ஸாஸங்கஸம்மதோ ஸப்படிப⁴யோ – அயம் தத்த² ஸமயோ’’தி.

183. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²னீ நாம உப⁴தோஸங்கே⁴ உபஸம்பன்னா.

ஸத்³தி⁴ந்தி ஏகதோ.

ஸம்விதா⁴யாதி – ‘‘க³ச்சா²ம, ப⁴கி³னி, க³ச்சா²மாய்ய; க³ச்சா²மாய்ய, க³ச்சா²ம, ப⁴கி³னி; அஜ்ஜ வா ஹிய்யோ வா பரே வா க³ச்சா²மா’’தி ஸம்வித³ஹதி, ஆபத்தி து³க்கடஸ்ஸ.

அந்தமஸோ கா³மந்தரம்பீதி குக்குடஸம்பாதே கா³மே, கா³மந்தரே கா³மந்தரே ஆபத்தி பாசித்தியஸ்ஸ. அகா³மகே அரஞ்ஞே, அத்³த⁴யோஜனே அத்³த⁴யோஜனே ஆபத்தி பாசித்தியஸ்ஸ.

அஞ்ஞத்ர ஸமயாதி ட²பேத்வா ஸமயம்.

ஸத்த²க³மனீயோ நாம மக்³கோ³ ந ஸக்கா ஹோதி வினா ஸத்தே²ன க³ந்தும்.

ஸாஸங்கம் நாம தஸ்மிம் மக்³கே³ [யஸ்மிம் மக்³கே³ (?)] சோரானம் நிவிட்டோ²காஸோ தி³ஸ்ஸதி, பு⁴த்தோகாஸோ தி³ஸ்ஸதி, டி²தோகாஸோ தி³ஸ்ஸதி, நிஸின்னோகாஸோ தி³ஸ்ஸதி, நிபன்னோகாஸோ தி³ஸ்ஸதி.

ஸப்படிப⁴யம் நாம தஸ்மிம் மக்³கே³ சோரேஹி மனுஸ்ஸா ஹதா தி³ஸ்ஸந்தி, விலுத்தா தி³ஸ்ஸந்தி, ஆகோடிதா தி³ஸ்ஸந்தி, ஸப்படிப⁴யம் க³ந்த்வா அப்படிப⁴யம் த³ஸ்ஸேத்வா உய்யோஜேதப்³பா³ – ‘‘க³ச்ச²த² ப⁴கி³னியோ’’தி.

184. ஸம்வித³ஹிதே ஸம்வித³ஹிதஸஞ்ஞீ ஏகத்³தா⁴னமக்³க³ம் படிபஜ்ஜதி, அந்தமஸோ கா³மந்தரம்பி, அஞ்ஞத்ர ஸமயா, ஆபத்தி பாசித்தியஸ்ஸ. ஸம்வித³ஹிதே வேமதிகோ ஏகத்³தா⁴னமக்³க³ம் படிபஜ்ஜதி, அந்தமஸோ கா³மந்தரம்பி, அஞ்ஞத்ர ஸமயா, ஆபத்தி பாசித்தியஸ்ஸ. ஸம்வித³ஹிதே, அஸம்வித³ஹிதஸஞ்ஞீ ஏகத்³தா⁴னமக்³க³ம் படிபஜ்ஜதி, அந்தமஸோ கா³மந்தரம்பி, அஞ்ஞத்ர ஸமயா, ஆபத்தி பாசித்தியஸ்ஸ.

பி⁴க்கு² ஸம்வித³ஹதி பி⁴க்கு²னீ ந ஸம்வித³ஹதி, ஆபத்தி து³க்கடஸ்ஸ. அஸம்வித³ஹிதே ஸம்வித³ஹிதஸஞ்ஞீ, ஆபத்தி து³க்கடஸ்ஸ. அஸம்வித³ஹிதே வேமதிகோ, ஆபத்தி து³க்கடஸ்ஸ. அஸம்வித³ஹிதே அஸம்வித³ஹிதஸஞ்ஞீ, அனாபத்தி.

185. அனாபத்தி ஸமயே, அஸம்வித³ஹித்வா க³ச்ச²தி, பி⁴க்கு²னீ ஸம்வித³ஹதி, பி⁴க்கு² ந ஸம்வித³ஹதி, விஸங்கேதேன க³ச்ச²ந்தி, ஆபதா³ஸு, உம்மத்தகஸ்ஸ, ஆதி³கம்மிகஸ்ஸாதி.

ஸம்விதா⁴னஸிக்கா²பத³ம் நிட்டி²தம் ஸத்தமம்.

8. நாவாபி⁴ருஹனஸிக்கா²பத³ம்

186. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² பி⁴க்கு²னீஹி ஸத்³தி⁴ம் ஸம்விதா⁴ய ஏகம் நாவம் [ஏகனாவம் (ஸ்யா.)] அபி⁴ருஹந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘யதே²வ மயம் ஸபஜாபதிகா நாவாய [ஏகனாவாய (ஸ்யா.)] கீளாம, ஏவமேவிமே ஸமணா ஸக்யபுத்தியா பி⁴க்கு²னீஹி ஸத்³தி⁴ம் ஸம்விதா⁴ய நாவாய கீளந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²னீஹி ஸத்³தி⁴ம் ஸம்விதா⁴ய ஏகம் நாவம் அபி⁴ருஹிஸ்ஸந்தீ’’தி…பே… ‘‘ஸச்சம் கிர தும்ஹே, பி⁴க்க²வே, பி⁴க்கு²னீஹி ஸத்³தி⁴ம் ஸம்விதா⁴ய ஏகம் நாவம் அபி⁴ருஹதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, பி⁴க்கு²னீஹி ஸத்³தி⁴ம் ஸம்விதா⁴ய ஏகம் நாவம் அபி⁴ருஹிஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² பி⁴க்கு²னியா ஸத்³தி⁴ம் ஸம்விதா⁴ய ஏகம் நாவம் [ஏகனாவம் (ஸ்யா.)] அபி⁴ருஹேய்ய, உத்³த⁴ம்கா³மினிம் வா அதோ⁴கா³மினிம் வா, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.

187. தேன கோ² பன ஸமயேன ஸம்ப³ஹுலா பி⁴க்கூ² ச பி⁴க்கு²னியோ ச ஸாகேதா ஸாவத்தி²ம் அத்³தா⁴னமக்³க³ப்படிபன்னா ஹோந்தி. அந்தராமக்³கே³ நதீ³ தரிதப்³பா³ [உத்தரிதப்³பா³ (ஸ்யா.)] ஹோதி. அத² கோ² தா பி⁴க்கு²னியோ தே பி⁴க்கூ² ஏதத³வோசும் – ‘‘மயம்பி அய்யேஹி ஸத்³தி⁴ம் உத்தரிஸ்ஸாமா’’தி. ‘‘ந, ப⁴கி³னீ, கப்பதி பி⁴க்கு²னியா ஸத்³தி⁴ம் ஸம்விதா⁴ய ஏகம் நாவம் அபி⁴ருஹிதும்; தும்ஹே வா பட²மம் உத்தரத² மயம் வா உத்தரிஸ்ஸாமா’’தி. ‘‘அய்யா, ப⁴ந்தே, அக்³க³புரிஸா. அய்யாவ பட²மம் உத்தரந்தூ’’தி. அத² கோ² தாஸம் பி⁴க்கு²னீனம் பச்சா² உத்தரந்தீனம் சோரா அச்சி²ந்தி³ம்ஸு ச தூ³ஸேஸுஞ்ச. அத² கோ² தா பி⁴க்கு²னியோ ஸாவத்தி²ம் க³ந்த்வா பி⁴க்கு²னீனம் ஏதமத்த²ம் ஆரோசேஸும். பி⁴க்கு²னியோ பி⁴க்கூ²னம் ஏதமத்த²ம் ஆரோசேஸும். பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, திரியம் தரணாய பி⁴க்கு²னியா ஸத்³தி⁴ம் ஸம்விதா⁴ய ஏகம் நாவம் அபி⁴ருஹிதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

188. ‘‘யோ பன பி⁴க்கு² பி⁴க்கு²னியா ஸத்³தி⁴ம் ஸம்விதா⁴ய ஏகம் நாவம் அபி⁴ருஹேய்ய உத்³த⁴ம்கா³மினிம் வா அதோ⁴கா³மினிம் வா, அஞ்ஞத்ர திரியம் தரணாய, பாசித்திய’’ந்தி.

189. யோ பனாதி யோ யாதி³ஸோ…பே… பி⁴க்கூ²தி…பே… அயம் இமஸ்மிம் அத்தே² அதி⁴ப்பேதோ பி⁴க்கூ²தி.

பி⁴க்கு²னீ நாம உப⁴தோஸங்கே⁴ உபஸம்பன்னா.

ஸத்³தி⁴ந்தி ஏகதோ.

ஸம்விதா⁴யாதி ‘‘அபி⁴ருஹாம, ப⁴கி³னி, அபி⁴ருஹாமாய்ய; அபி⁴ருஹாமாய்ய, அபி⁴ருஹாம, ப⁴கி³னி; அஜ்ஜ வா ஹிய்யோ வா பரே வா அபி⁴ருஹாமா’’தி ஸம்வித³ஹதி ஆபத்தி து³க்கடஸ்ஸ.

பி⁴க்கு²னியா அபி⁴ருள்ஹே பி⁴க்கு² அபி⁴ருஹதி, ஆபத்தி பாசித்தியஸ்ஸ. பி⁴க்கு²ம்ஹி அபி⁴ருள்ஹே பி⁴க்கு²னீ அபி⁴ருஹதி, ஆபத்தி பாசித்தியஸ்ஸ. உபோ⁴ வா அபி⁴ருஹந்தி, ஆபத்தி பாசித்தியஸ்ஸ.

உத்³த⁴ம்கா³மினிந்தி உஜ்ஜவனிகாய.

அதோ⁴கா³மினிந்தி ஓஜவனிகாய.

அஞ்ஞத்ர திரியம் தரணாயாதி ட²பேத்வா திரியம் தரணம்.

குக்குடஸம்பாதே கா³மே, கா³மந்தரே கா³மந்தரே ஆபத்தி பாசித்தியஸ்ஸ. அகா³மகே அரஞ்ஞே, அட்³ட⁴யோஜனே அட்³ட⁴யோஜனே ஆபத்தி பாசித்தியஸ்ஸ.

190. ஸம்வித³ஹிதே ஸம்வித³ஹிதஸஞ்ஞீ ஏகம் நாவம் அபி⁴ருஹதி உத்³த⁴ம்கா³மினிம் வா அதோ⁴கா³மினிம் வா, அஞ்ஞத்ர திரியம் தரணாய, ஆபத்தி பாசித்தியஸ்ஸ. ஸம்வித³ஹிதே வேமதிகோ ஏகம் நாவம் அபி⁴ருஹதி உத்³த⁴ம்கா³மினிம் வா அதோ⁴கா³மினிம் வா, அஞ்ஞத்ர திரியம் தரணாய, ஆபத்தி பாசித்தியஸ்ஸ. ஸம்வித³ஹிதே அஸம்வித³ஹிதஸஞ்ஞீ ஏகம் நாவம் அபி⁴ருஹதி உத்³த⁴ம்கா³மினிம் வா அதோ⁴கா³மினிம் வா, அஞ்ஞத்ர திரியம் தரணாய, ஆபத்தி பாசித்தியஸ்ஸ.

பி⁴க்கு² ஸம்வித³ஹதி, பி⁴க்கு²னீ ந ஸம்வித³ஹதி, ஆபத்தி து³க்கடஸ்ஸ. அஸம்வித³ஹிதே ஸம்வித³ஹிதஸஞ்ஞீ, ஆபத்தி து³க்கடஸ்ஸ. அஸம்வித³ஹிதே வேமதிகோ, ஆபத்தி து³க்கடஸ்ஸ. அஸம்வித³ஹிதே, அஸம்வித³ஹிதஸஞ்ஞீ, அனாபத்தி.

191. அனாபத்தி திரியம் தரணாய, அஸம்வித³ஹித்வா அபி⁴ருஹந்தி, பி⁴க்கு²னீ ஸம்வித³ஹதி, பி⁴க்கு² ந ஸம்வித³ஹதி, விஸங்கேதேன அபி⁴ருஹந்தி, ஆபதா³ஸு உம்மத்தகஸ்ஸ, ஆதி³கம்மிஸ்ஸாதி.

நாவாபி⁴ருஹனஸிக்கா²பத³ம் நிட்டி²தம் அட்ட²மம்.

9. பரிபாசிதஸிக்கா²பத³ம்

192. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன து²ல்லனந்தா³ பி⁴க்கு²னீ அஞ்ஞதரஸ்ஸ குலஸ்ஸ குலூபிகா ஹோதி நிச்சப⁴த்திகா. தேன ச க³ஹபதினா தே²ரா பி⁴க்கூ² நிமந்திதா ஹோந்தி. அத² கோ² து²ல்லனந்தா³ பி⁴க்கு²னீ புப்³ப³ண்ஹஸமயம் நிவாஸேத்வா பத்தசீவரமாதா³ய யேன தம் குலம் தேனுபஸங்கமி; உபஸங்கமித்வா தம் க³ஹபதிம் ஏதத³வோச – ‘‘கிமித³ம், க³ஹபதி, பஹூதம் கா²த³னீயம் போ⁴ஜனீயம் படியத்த’’ந்தி? ‘‘தே²ரா மயா, அய்யே, நிமந்திதா’’தி. ‘‘கே பன தே, க³ஹபதி, தே²ரா’’தி? ‘‘அய்யோ ஸாரிபுத்தோ அய்யோ மஹாமோக்³க³ல்லானோ அய்யோ மஹாகச்சானோ அய்யோ மஹாகோட்டி²கோ அய்யோ மஹாகப்பினோ அய்யோ மஹாசுந்தோ³ அய்யோ அனுருத்³தோ⁴ அய்யோ ரேவதோ அய்யோ உபாலி அய்யோ ஆனந்தோ³ அய்யோ ராஹுலோ’’தி. ‘‘கிம் பன த்வம், க³ஹபதி, மஹானாகே³ திட்ட²மானே சேடகே நிமந்தேஸீ’’தி?

‘‘கே பன தே, அய்யே, மஹானாகா³’’தி? ‘‘அய்யோ தே³வத³த்தோ அய்யோ கோகாலிகோ அய்யோ கடமோத³கதிஸ்ஸகோ [கடமோரகதிஸ்ஸகோ (ஸீ.) கதமோரகதிஸ்ஸகோ (ஸ்யா.)] அய்யோ க²ண்ட³தே³வியா புத்தோ அய்யோ ஸமுத்³த³த³த்தோ’’தி. அயம் சரஹி து²ல்லனந்தா³ய பி⁴க்கு²னியா அந்தரா கதா² விப்பகதா, அத² தே தே²ரா பி⁴க்கூ² பவிஸிம்ஸு. ‘‘ஸச்சம் மஹானாகா³ கோ² தயா, க³ஹபதி, நிமந்திதா’’தி. ‘‘இதா³னேவ கோ² த்வம், அய்யே, சேடகே அகாஸி; இதா³னி மஹானாகே³’’தி. க⁴ரதோ ச நிக்கட்³டி⁴, நிச்சப⁴த்தஞ்ச பச்சி²ந்தி³. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம தே³வத³த்தோ ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜிஸ்ஸதீ’’தி…பே… ‘‘ஸச்சம் கிர த்வம், தே³வத³த்த, ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜிஸ்ஸஸி. நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

‘‘யோ பன பி⁴க்கு² ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜேய்ய, பாசித்திய’’ந்தி.

ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதி.