261. அப்படிகம்மே உக்கே²பனீயகம்மவிவாத³கதா²

438. இத⁴ பன, பி⁴க்க²வே, பி⁴க்கு² ஆபத்திம் ஆபஜ்ஜித்வா ந இச்ச²தி ஆபத்திம் படிகாதும். தத்ர சே பி⁴க்கூ²னம் ஏவம் ஹோதி – ‘‘அயம் கோ², ஆவுஸோ, பி⁴க்கு² ஆபத்திம் ஆபஜ்ஜித்வா ந இச்ச²தி ஆபத்திம் படிகாதும். ஹந்த³ஸ்ஸ மயம் ஆபத்தியா அப்படிகம்மே உக்கே²பனீயகம்மம் கரோமா’’தி. தே தஸ்ஸ ஆபத்தியா அப்படிகம்மே உக்கே²பனீயகம்மம் கரோந்தி – அத⁴ம்மேன வக்³கா³…பே… அத⁴ம்மேன ஸமக்³கா³… த⁴ம்மேன வக்³கா³… த⁴ம்மபதிரூபகேன வக்³கா³… த⁴ம்மபதிரூபகேன ஸமக்³கா³. தத்ரட்டோ² ஸங்கோ⁴ விவத³தி – ‘‘அத⁴ம்மேன வக்³க³கம்மம், அத⁴ம்மேன ஸமக்³க³கம்மம், த⁴ம்மேன வக்³க³கம்மம், த⁴ம்மபதிரூபகேன வக்³க³கம்மம், த⁴ம்மபதிரூபகேன ஸமக்³க³கம்மம், அகதம் கம்மம் து³க்கடம் கம்மம் புன காதப்³ப³ம் கம்ம’’ந்தி. தத்ர, பி⁴க்க²வே, யே தே பி⁴க்கூ² ஏவமாஹம்ஸு – ‘‘த⁴ம்மபதிரூபகேன ஸமக்³க³கம்ம’’ந்தி; யே ச தே பி⁴க்கூ² ஏவமாஹம்ஸு – ‘‘அகதம் கம்மம் து³க்கடம் கம்மம் புன காதப்³ப³ம் கம்ம’’ந்தி, இமே தத்த² பி⁴க்கூ² த⁴ம்மவாதி³னோ. இமே பஞ்ச வாரா ஸம்கி²த்தா.

அப்படிகம்மே உக்கே²பனீயகம்மவிவாத³கதா² நிட்டி²தா.