234. கஸ்ஸபகோ³த்தபி⁴க்கு²வத்து²

380. தேன ஸமயேன பு³த்³தோ⁴ ப⁴க³வா சம்பாயம் விஹரதி க³க்³க³ராய போக்க²ரணியா தீரே. தேன கோ² பன ஸமயேன காஸீஸு ஜனபதே³ வாஸப⁴கா³மோ நாம ஹோதி. தத்த² கஸ்ஸபகோ³த்தோ நாம பி⁴க்கு² ஆவாஸிகோ ஹோதி தந்திப³த்³தோ⁴ உஸ்ஸுக்கம் ஆபன்னோ – கிந்தி அனாக³தா ச பேஸலா பி⁴க்கூ² ஆக³ச்சே²ய்யும், ஆக³தா ச பேஸலா பி⁴க்கூ² பா²ஸு விஹரேய்யும், அயஞ்ச ஆவாஸோ வுத்³தி⁴ம் விருள்ஹிம் வேபுல்லம் ஆபஜ்ஜேய்யாதி. தேன கோ² பன ஸமயேன ஸம்ப³ஹுலா பி⁴க்கூ² காஸீஸு சாரிகம் சரமானா யேன வாஸப⁴கா³மோ தத³வஸரும். அத்³த³ஸா கோ² கஸ்ஸபகோ³த்தோ பி⁴க்கு² தே பி⁴க்கூ² தூ³ரதோவ ஆக³ச்ச²ந்தே, தி³ஸ்வான ஆஸனம் பஞ்ஞபேஸி, பாதோ³த³கம் பாத³பீட²ம் பாத³கத²லிகம் உபனிக்கி²பி, பச்சுக்³க³ந்த்வா பத்தசீவரம் படிக்³க³ஹேஸி, பானீயேன ஆபுச்சி², நஹானே உஸ்ஸுக்கம் அகாஸி, உஸ்ஸுக்கம்பி அகாஸி யாகு³யா கா²த³னீயே ப⁴த்தஸ்மிம். அத² கோ² தேஸம் ஆக³ந்துகானம் பி⁴க்கூ²னம் ஏதத³ஹோஸி – ‘‘ப⁴த்³த³கோ கோ² அயம், ஆவுஸோ, ஆவாஸிகோ பி⁴க்கு² நஹானே உஸ்ஸுக்கம் கரோதி, உஸ்ஸுக்கம்பி கரோதி யாகு³யா கா²த³னீயே ப⁴த்தஸ்மிம். ஹந்த³, மயம், ஆவுஸோ, இதே⁴வ வாஸப⁴கா³மே நிவாஸம் கப்பேமா’’தி. அத² கோ² தே ஆக³ந்துகா பி⁴க்கூ² தத்தே²வ வாஸப⁴கா³மே நிவாஸம் கப்பேஸும்.

அத² கோ² கஸ்ஸபகோ³த்தஸ்ஸ பி⁴க்கு²னோ ஏதத³ஹோஸி – ‘‘யோ கோ² இமேஸம் ஆக³ந்துகானம் பி⁴க்கூ²னம் ஆக³ந்துககிலமதோ² ஸோ படிப்பஸ்ஸத்³தோ⁴. யேபிமே கோ³சரே அப்பகதஞ்ஞுனோ தேதா³னிமே கோ³சரே பகதஞ்ஞுனோ. து³க்கரம் கோ² பன பரகுலேஸு யாவஜீவம் உஸ்ஸுக்கம் காதும், விஞ்ஞத்தி ச மனுஸ்ஸானம் அமனாபா. யம்னூனாஹம் ந உஸ்ஸுக்கம் கரேய்யம் யாகு³யா கா²த³னீயே ப⁴த்தஸ்மி’’ந்தி. ஸோ ந உஸ்ஸுக்கம் அகாஸி யாகு³யா கா²த³னீயே ப⁴த்தஸ்மிம். அத² கோ² தேஸம் ஆக³ந்துகானம் பி⁴க்கூ²னம் ஏதத³ஹோஸி – ‘‘புப்³பே³ க்²வாயம், ஆவுஸோ, ஆவாஸிகோ பி⁴க்கு² நஹானே உஸ்ஸுக்கம் அகாஸி, உஸ்ஸுக்கம்பி அகாஸி யாகு³யா கா²த³னீயே ப⁴த்தஸ்மிம். ஸோதா³னாயம் ந உஸ்ஸுக்கம் கரோதி யாகு³யா கா²த³னீயே ப⁴த்தஸ்மிம். து³ட்டோ²தா³னாயம், ஆவுஸோ, ஆவாஸிகோ பி⁴க்கு². ஹந்த³, மயம், ஆவுஸோ, ஆவாஸிகம் [இமம் ஆவாஸிகம் (ஸ்யா.)] பி⁴க்கு²ம் உக்கி²பாமா’’தி. அத² கோ² தே ஆக³ந்துகா பி⁴க்கூ² ஸன்னிபதித்வா கஸ்ஸபகோ³த்தம் பி⁴க்கு²ம் ஏதத³வோசும் – ‘‘புப்³பே³ கோ² த்வம், ஆவுஸோ, நஹானே உஸ்ஸுக்கம் கரோஸி, உஸ்ஸுக்கம்பி கரோஸி யாகு³யா கா²த³னீயே ப⁴த்தஸ்மிம். ஸோதா³னி த்வம் ந உஸ்ஸுக்கம் கரோஸி யாகு³யா கா²த³னீயே ப⁴த்தஸ்மிம். ஆபத்திம் த்வம், ஆவுஸோ, ஆபன்னோ. பஸ்ஸஸேதம் ஆபத்தி’’ந்தி? ‘‘நத்தி² மே, ஆவுஸோ, ஆபத்தி, யமஹம் பஸ்ஸேய்ய’’ந்தி. அத² கோ² தே ஆக³ந்துகா பி⁴க்கூ² கஸ்ஸபகோ³த்தம் பி⁴க்கு²ம் ஆபத்தியா அத³ஸ்ஸனே உக்கி²பிம்ஸு.

அத² கோ² கஸ்ஸபகோ³த்தஸ்ஸ பி⁴க்கு²னோ ஏதத³ஹோஸி – ‘‘அஹம் கோ² ஏதம் ந ஜானாமி ‘ஆபத்தி வா ஏஸா அனாபத்தி வா, ஆபன்னோ சம்ஹி [வம்ஹி (?)] அனாபன்னோ வா, உக்கி²த்தோ சம்ஹி அனுக்கி²த்தோ வா, த⁴ம்மிகேன வா அத⁴ம்மிகேன வா, குப்பேன வா அகுப்பேன வா, டா²னாரஹேன வா அட்டா²னாரஹேன வா’. யம்னூனாஹம் சம்பம் க³ந்த்வா ப⁴க³வந்தம் ஏதமத்த²ம் புச்சே²ய்ய’’ந்தி. அத² கோ² கஸ்ஸபகோ³த்தோ பி⁴க்கு² ஸேனாஸனம் ஸம்ஸாமேத்வா பத்தசீவரமாதா³ய யேன சம்பா தேன பக்காமி. அனுபுப்³பே³ன யேன சம்பா யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஆசிண்ணம் கோ² பனேதம் பு³த்³தா⁴னம் ப⁴க³வந்தானம் ஆக³ந்துகேஹி பி⁴க்கூ²ஹி ஸத்³தி⁴ம் படிஸம்மோதி³தும். அத² கோ² ப⁴க³வா கஸ்ஸபகோ³த்தம் பி⁴க்கு²ம் ஏதத³வோச – ‘‘கச்சி, பி⁴க்கு², க²மனீயம், கச்சி யாபனீயம், கச்சி அப்பகிலமதே²ன அத்³தா⁴னம் ஆக³தோ, குதோ ச த்வம், பி⁴க்கு², ஆக³ச்ச²ஸீ’’தி? ‘‘க²மனீயம், ப⁴க³வா; யாபனீயம், ப⁴க³வா; அப்பகிலமதே²ன சாஹம், ப⁴ந்தே, அத்³தா⁴னம் ஆக³தோ. அத்தி², ப⁴ந்தே, காஸீஸு ஜனபதே³ வாஸப⁴கா³மோ நாம. தத்தா²ஹம், ப⁴க³வா, ஆவாஸிகோ தந்திப³த்³தோ⁴ உஸ்ஸுக்கம் ஆபன்னோ – ‘கிந்தி அனாக³தா ச பேஸலா பி⁴க்கூ² ஆக³ச்சே²ய்யும், ஆக³தா ச பேஸலா பி⁴க்கூ² பா²ஸு விஹரேய்யும், அயஞ்ச ஆவாஸோ வுத்³தி⁴ம் விருள்ஹிம் வேபுல்லம் ஆபஜ்ஜேய்யா’தி. அத² கோ², ப⁴ந்தே, ஸம்ப³ஹுலா பி⁴க்கூ² காஸீஸு சாரிகம் சரமானா யேன வாஸப⁴கா³மோ தத³வஸரும். அத்³த³ஸம் கோ² அஹம், ப⁴ந்தே, தே பி⁴க்கூ² தூ³ரதோவ ஆக³ச்ச²ந்தே, தி³ஸ்வான ஆஸனம் பஞ்ஞபேஸிம், பாதோ³த³கம் பாத³பீட²ம் பாத³கத²லிகம் உபனிக்கி²பிம், பச்சுக்³க³ந்த்வா பத்தசீவரம் படிக்³க³ஹேஸிம், பானீயேன அபுச்சி²ம், நஹானே உஸ்ஸுக்கம் அகாஸிம், உஸ்ஸுக்கம்பி அகாஸிம் யாகு³யா கா²த³னீயே ப⁴த்தஸ்மிம். அத² கோ² தேஸம், ப⁴ந்தே, ஆக³ந்துகானம் பி⁴க்கூ²னம் ஏதத³ஹோஸி – ‘ப⁴த்³த³கோ கோ² அயம் ஆவுஸோ ஆவாஸிகோ பி⁴க்கு² நஹானே உஸ்ஸுக்கம் கரோதி, உஸ்ஸுக்கம்பி கரோதி யாகு³யா கா²த³னீயே ப⁴த்தஸ்மிம். ஹந்த³, மயம், ஆவுஸோ, இதே⁴வ வாஸப⁴கா³மே நிவாஸம் கப்பேமா’தி. அத² கோ² தே, ப⁴ந்தே, ஆக³ந்துகா பி⁴க்கூ² தத்தே²வ வாஸப⁴கா³மே நிவாஸம் கப்பேஸும். தஸ்ஸ மய்ஹம், ப⁴ந்தே, ஏதத³ஹோஸி – ‘யோ கோ² இமேஸம் ஆக³ந்துகானம் பி⁴க்கூ²னம் ஆக³ந்துககிலமதோ² ஸோ படிப்பஸ்ஸத்³தோ⁴. யேபிமே கோ³சரே அப்பகதஞ்ஞுனோ தேதா³னிமே கோ³சரே பகதஞ்ஞுனோ. து³க்கரம் கோ² பன பரகுலேஸு யாவஜீவம் உஸ்ஸுக்கம் காதும், விஞ்ஞத்தி ச மனுஸ்ஸானம் அமனாபா. யம்னூனாஹம் ந உஸ்ஸுக்கம் கரேய்யம் யாகு³யா கா²த³னீயே ப⁴த்தஸ்மி’ந்தி. ஸோ கோ² அஹம், ப⁴ந்தே, ந உஸ்ஸுக்கம் அகாஸிம் யாகு³யா கா²த³னீயே ப⁴த்தஸ்மிம். அத² கோ² தேஸம், ப⁴ந்தே, ஆக³ந்துகானம் பி⁴க்கூ²னம் ஏதத³ஹோஸி – ‘புப்³பே³ க்²வாயம், ஆவுஸோ, ஆவாஸிகோ பி⁴க்கு² நஹானே உஸ்ஸுக்கம் கரோதி, உஸ்ஸுக்கம்பி கரோதி யாகு³யா கா²த³னீயே ப⁴த்தஸ்மிம். ஸோதா³னாயம் ந உஸ்ஸுக்கம் கரோதி யாகு³யா கா²த³னீயே ப⁴த்தஸ்மிம். து³ட்டோ²தா³னாயம், ஆவுஸோ, ஆவாஸிகோ பி⁴க்கு². ஹந்த³, மயம், ஆவுஸோ, ஆவாஸிகம் பி⁴க்கு²ம் உக்கி²பாமா’தி. அத² கோ² தே, ப⁴ந்தே, ஆக³ந்துகா பி⁴க்கூ² ஸன்னிபதித்வா மம் ஏதத³வோசும் – ‘புப்³பே³ கோ² த்வம், ஆவுஸோ, நஹானே உஸ்ஸுக்கம் கரோஸி, உஸ்ஸுக்கம்பி கரோஸி யாகு³யா கா²த³னீயே ப⁴த்தஸ்மிம். ஸோதா³னி த்வம் ந உஸ்ஸுக்கம் கரோஸி யாகு³யா கா²த³னீயே ப⁴த்தஸ்மிம். ஆபத்திம் த்வம், ஆவுஸோ, ஆபன்னோ. பஸ்ஸஸேதம் ஆபத்தி’ந்தி? ‘நத்தி² மே, ஆவுஸோ, ஆபத்தி யமஹம் பஸ்ஸேய்ய’ந்தி. அத² கோ² தே, ப⁴ந்தே, ஆக³ந்துகா பி⁴க்கூ² மம் ஆபத்தியா அத³ஸ்ஸனே உக்கி²பிம்ஸு. தஸ்ஸ மய்ஹம், ப⁴ந்தே, ஏதத³ஹோஸி – ‘அஹம் கோ² ஏதம் ந ஜானாமி ‘ஆபத்தி வா ஏஸா அனாபத்தி வா, ஆபன்னோ சம்ஹி அனாபன்னோ வா, உக்கி²த்தோ சம்ஹி அனுக்கி²த்தோ வா, த⁴ம்மிகேன வா அத⁴ம்மிகேன வா, குப்பேன வா அகுப்பேன வா, டா²னாரஹேன வா அட்டா²னாரஹேன வா’. யம்னூனாஹம் சம்பம் க³ந்த்வா ப⁴க³வந்தம் ஏதமத்த²ம் புச்சே²ய்ய’ந்தி. ததோ அஹம், ப⁴க³வா, ஆக³ச்சா²மீ’’தி. ‘‘அனாபத்தி ஏஸா, பி⁴க்கு², நேஸா ஆபத்தி. அனாபன்னோஸி, நஸி ஆபன்னோ. அனுக்கி²த்தோஸி, நஸி உக்கி²த்தோ. அத⁴ம்மிகேனாஸி கம்மேன உக்கி²த்தோ குப்பேன அட்டா²னாரஹேன. க³ச்ச² த்வம், பி⁴க்கு², தத்தே²வ வாஸப⁴கா³மே நிவாஸம் கப்பேஹீ’’தி. ‘‘ஏவம், ப⁴ந்தே’’தி கோ² கஸ்ஸபகோ³த்தோ பி⁴க்கு² ப⁴க³வதோ படிஸ்ஸுணித்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா யேன வாஸப⁴கா³மோ தேன பக்காமி.

381. அத² கோ² தேஸம் ஆக³ந்துகானம் பி⁴க்கூ²னம் அஹுதே³வ குக்குச்சம், அஹு விப்படிஸாரோ – ‘‘அலாபா⁴ வத நோ, ந வத நோ லாபா⁴, து³ல்லத்³த⁴ம் வத நோ, ந வத நோ ஸுலத்³த⁴ம், யே மயம் ஸுத்³த⁴ம் பி⁴க்கு²ம் அனாபத்திகம் அவத்து²ஸ்மிம் அகாரணே உக்கி²பிம்ஹா. ஹந்த³, மயம், ஆவுஸோ, சம்பம் க³ந்த்வா ப⁴க³வதோ ஸந்திகே அச்சயம் அச்சயதோ தே³ஸேமா’’தி. அத² கோ² தே ஆக³ந்துகா பி⁴க்கூ² ஸேனாஸனம் ஸம்ஸாமேத்வா பத்தசீவரமாதா³ய யேன சம்பா தேன பக்கமிம்ஸு. அனுபுப்³பே³ன யேன சம்பா யேன ப⁴க³வா தேனுபஸங்கமிம்ஸு, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஆசிண்ணம் கோ² பனேதம் பு³த்³தா⁴னம் ப⁴க³வந்தானம் ஆக³ந்துகேஹி பி⁴க்கூ²ஹி ஸத்³தி⁴ம் படிஸம்மோதி³தும். அத² கோ² ப⁴க³வா தே பி⁴க்கூ² ஏதத³வோச – ‘‘கச்சி, பி⁴க்க²வே, க²மனீயம், கச்சி யாபனீயம், கச்சித்த² அப்பகிலமதே²ன அத்³தா⁴னம் ஆக³தா, குதோ ச தும்ஹே, பி⁴க்க²வே, ஆக³ச்ச²தா²’’தி? ‘‘க²மனீயம், ப⁴க³வா; யாபனீயம், ப⁴க³வா; அப்பகிலமதே²ன ச மயம், ப⁴ந்தே, அத்³தா⁴னம் ஆக³தா. அத்தி², ப⁴ந்தே, காஸீஸு ஜனபதே³ வாஸப⁴கா³மோ நாம. ததோ மயம், ப⁴க³வா, ஆக³ச்சா²மா’’தி. ‘‘தும்ஹே, பி⁴க்க²வே, ஆவாஸிகம் பி⁴க்கு²ம் உக்கி²பித்தா²’’தி? ‘‘ஏவம், ப⁴ந்தே’’தி. ‘‘கிஸ்மிம், பி⁴க்க²வே, வத்து²ஸ்மிம் காரணே’’தி? ‘‘அவத்து²ஸ்மிம், ப⁴க³வா, அகாரணே’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸா, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம தும்ஹே, மோக⁴புரிஸா, ஸுத்³த⁴ம் பி⁴க்கு²ம் அனாபத்திகம் அவத்து²ஸ்மிம் அகாரணே உக்கி²பிஸ்ஸத². நேதம், மோக⁴புரிஸா, அப்பஸன்னானம் வா பஸாதா³ய…பே…’’ விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ஸுத்³தோ⁴ பி⁴க்கு² அனாபத்திகோ அவத்து²ஸ்மிம் அகாரணே உக்கி²பிதப்³போ³. யோ உக்கி²பேய்ய, ஆபத்தி து³க்கடஸ்ஸா’’தி.

அத² கோ² தே பி⁴க்கூ² உட்டா²யாஸனா ஏகம்ஸம் உத்தராஸங்க³ம் கரித்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோசும் – ‘‘அச்சயோ நோ, ப⁴ந்தே, அச்சக³மா யதா²பா³லே யதா²மூள்ஹே யதா²அகுஸலே, யே மயம் ஸுத்³த⁴ம் பி⁴க்கு²ம் அனாபத்திகம் அவத்து²ஸ்மிம் அகாரணே உக்கி²பிம்ஹா. தேஸம் நோ, ப⁴ந்தே, ப⁴க³வா அச்சயம் அச்சயதோ படிக்³க³ண்ஹாது ஆயதிம் ஸம்வராயா’’தி. ‘‘தக்³க⁴, தும்ஹே, பி⁴க்க²வே, அச்சயோ அச்சக³மா யதா²பா³லே யதா²மூள்ஹே யதா²அகுஸலே, யே தும்ஹே ஸுத்³த⁴ம் பி⁴க்கு²ம் அனாபத்திகம் அவத்து²ஸ்மிம் அகாரணே உக்கி²பித்த². யதோ ச கோ² தும்ஹே, பி⁴க்க²வே, அச்சயம் அச்சயதோ தி³ஸ்வா யதா²த⁴ம்மம் படிகரோத², தம் வோ மயம் படிக்³க³ண்ஹாம. வுத்³தி⁴ஹேஸா, பி⁴க்க²வே, அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி, ஆயதிம் [ஆயதிம் ச (ஸீ.)] ஸம்வரம் ஆபஜ்ஜதீ’’தி.

கஸ்ஸபகோ³த்தபி⁴க்கு²வத்து² நிட்டி²தம்.