224. கி³லானவத்து²கதா²

365. தேன கோ² பன ஸமயேன அஞ்ஞதரஸ்ஸ பி⁴க்கு²னோ குச்சி²விகாராபா³தோ⁴ ஹோதி. ஸோ ஸகே முத்தகரீஸே பலிபன்னோ ஸேதி. அத² கோ² ப⁴க³வா ஆயஸ்மதா ஆனந்தே³ன பச்சா²ஸமணேன ஸேனாஸனசாரிகம் ஆஹிண்ட³ந்தோ யேன தஸ்ஸ பி⁴க்கு²னோ விஹாரோ தேனுபஸங்கமி. அத்³த³ஸா கோ² ப⁴க³வா தம் பி⁴க்கு²ம் ஸகே முத்தகரீஸே பலிபன்னம் ஸயமானம், தி³ஸ்வான யேன ஸோ பி⁴க்கு² தேனுபஸங்கமி, உபஸங்கமித்வா தம் பி⁴க்கு²ம் ஏதத³வோச – ‘‘கிம் தே, பி⁴க்கு², ஆபா³தோ⁴’’தி? ‘‘குச்சி²விகாரோ மே, ப⁴க³வா’’தி. ‘‘அத்தி² பன தே, பி⁴க்கு², உபட்டா²கோ’’தி? ‘‘நத்தி², ப⁴க³வா’’தி. ‘‘கிஸ்ஸ தம் பி⁴க்கூ² ந உபட்டே²ந்தீ’’தி? ‘‘அஹம் கோ², ப⁴ந்தே, பி⁴க்கூ²னம் அகாரகோ; தேன மம் பி⁴க்கூ² ந உபட்டே²ந்தீ’’தி. அத² கோ² ப⁴க³வா ஆயஸ்மந்தம் ஆனந்த³ம் ஆமந்தேஸி – ‘‘க³ச்சா²னந்த³, உத³கம் ஆஹர, இமம் பி⁴க்கு²ம் நஹாபேஸ்ஸாமா’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ படிஸ்ஸுணித்வா உத³கம் ஆஹரி. ப⁴க³வா உத³கம் ஆஸிஞ்சி. ஆயஸ்மா ஆனந்தோ³ பரிதோ⁴வி. ப⁴க³வா ஸீஸதோ அக்³க³ஹேஸி. ஆயஸ்மா ஆனந்தோ³ பாத³தோ உச்சாரேத்வா மஞ்சகே நிபாதேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² படிபுச்சி² – ‘‘அத்தி², பி⁴க்க²வே, அமுகஸ்மிம் விஹாரே பி⁴க்கு² கி³லானோ’’தி? ‘‘அத்தி², ப⁴க³வா’’தி. ‘‘கிம் தஸ்ஸ, பி⁴க்க²வே, பி⁴க்கு²னோ ஆபா³தோ⁴’’தி? ‘‘தஸ்ஸ, ப⁴ந்தே, ஆயஸ்மதோ குச்சி²விகாராபா³தோ⁴’’தி. ‘‘அத்தி² பன, பி⁴க்க²வே, தஸ்ஸ பி⁴க்கு²னோ உபட்டா²கோ’’தி? ‘‘நத்தி², ப⁴க³வா’’தி. ‘‘கிஸ்ஸ தம் பி⁴க்கூ² ந உபட்டே²ந்தீ’’தி? ‘‘ஏஸோ, ப⁴ந்தே, பி⁴க்கு² பி⁴க்கூ²னம் அகாரகோ; தேன தம் பி⁴க்கூ² ந உபட்டே²ந்தீ’’தி. ‘‘நத்தி² வோ, பி⁴க்க²வே, மாதா, நத்தி² பிதா, யே வோ உபட்ட²ஹேய்யும். தும்ஹே சே, பி⁴க்க²வே, அஞ்ஞமஞ்ஞம் ந உபட்ட²ஹிஸ்ஸத², அத² கோ சரஹி உபட்ட²ஹிஸ்ஸதி? யோ, பி⁴க்க²வே, மம் உபட்ட²ஹேய்ய ஸோ கி³லானம் உபட்ட²ஹேய்ய. ஸசே உபஜ்ஜா²யோ ஹோதி, உபஜ்ஜா²யேன யாவஜீவம் உபட்டா²தப்³போ³; வுட்டா²னமஸ்ஸ ஆக³மேதப்³ப³ம். ஸசே ஆசரியோ ஹோதி, ஆசரியேன யாவஜீவம் உபட்டா²தப்³போ³; வுட்டா²னமஸ்ஸ ஆக³மேதப்³ப³ம். ஸசே ஸத்³தி⁴விஹாரிகோ ஹோதி, ஸத்³தி⁴விஹாரிகேன யாவஜீவம் உபட்டா²தப்³போ³; வுட்டா²னமஸ்ஸ ஆக³மேதப்³ப³ம். ஸசே அந்தேவாஸிகோ ஹோதி, அந்தேவாஸிகேன யாவஜீவம் உபட்டா²தப்³போ³; வுட்டா²னமஸ்ஸ ஆக³மேதப்³ப³ம். ஸசே ஸமானுபஜ்ஜா²யகோ ஹோதி, ஸமானுபஜ்ஜா²யகேன யாவஜீவம் உபட்டா²தப்³போ³; வுட்டா²னமஸ்ஸ ஆக³மேதப்³ப³ம். ஸசே ஸமானாசரியகோ ஹோதி, ஸமானாசரியகேன யாவஜீவம் உபட்டா²தப்³போ³; வுட்டா²னமஸ்ஸ ஆக³மேதப்³ப³ம். ஸசே ந ஹோதி உபஜ்ஜா²யோ வா ஆசரியோ வா ஸத்³தி⁴விஹாரிகோ வா அந்தேவாஸிகோ வா ஸமானுபஜ்ஜா²யகோ வா ஸமானாசரியகோ வா ஸங்கே⁴ன உபட்டா²தப்³போ³. நோ சே உபட்ட²ஹேய்ய, ஆபத்தி து³க்கடஸ்ஸ’’.

366. பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானோ தூ³பட்டோ² ஹோதி – அஸப்பாயகாரீ ஹோதி, ஸப்பாயே மத்தம் ந ஜானாதி, பே⁴ஸஜ்ஜம் ந படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ யதா²பூ⁴தம் ஆபா³த⁴ம் நாவிகத்தா ஹோதி ‘அபி⁴க்கமந்தம் வா அபி⁴க்கமதீதி, படிக்கமந்தம் வா படிக்கமதீதி, டி²தம் வா டி²தோ’தி, உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அனதி⁴வாஸகஜாதிகோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ கி³லானோ தூ³பட்டோ² ஹோதி.

பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானோ ஸூபட்டோ² ஹோதி – ஸப்பாயகாரீ ஹோதி, ஸப்பாயே மத்தம் ஜானாதி, பே⁴ஸஜ்ஜம் படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ யதா²பூ⁴தம் ஆபா³த⁴ம் ஆவிகத்தா ஹோதி ‘அபி⁴க்கமந்தம் வா அபி⁴க்கமதீதி, படிக்கமந்தம் வா படிக்கமதீதி, டி²தம் வா டி²தோ’தி, உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகோ ஹோதி. இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ கி³லானோ ஸூபட்டோ² ஹோதி.

பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானுபட்டா²கோ நாலம் கி³லானம் உபட்டா²தும் – ந படிப³லோ ஹோதி பே⁴ஸஜ்ஜம் ஸம்விதா⁴தும், ஸப்பாயாஸப்பாயம் ந ஜானாதி, அஸப்பாயம் உபனாமேதி ஸப்பாயம் அபனாமேதி, ஆமிஸந்தரோ கி³லானம் உபட்டா²தி நோ மேத்தசித்தோ, ஜேகு³ச்சீ² ஹோதி உச்சாரம் வா பஸ்ஸாவம் வா கே²ளம் வா வந்தம் வா நீஹாதும், ந படிப³லோ ஹோதி கி³லானம் காலேன காலம் த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேதும். இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ கி³லானுபட்டா²கோ நாலம் கி³லானம் உபட்டா²தும்.

பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானுபட்டா²கோ அலம் கி³லானம் உபட்டா²தும் – படிப³லோ ஹோதி பே⁴ஸஜ்ஜம் ஸம்விதா⁴தும், ஸப்பாயாஸப்பாயம் ஜானாதி, அஸப்பாயம் அபனாமேதி ஸப்பாயம் உபனாமேதி, மேத்தசித்தோ கி³லானம் உபட்டா²தி நோ ஆமிஸந்தரோ, அஜேகு³ச்சீ² ஹோதி உச்சாரம் வா பஸ்ஸாவம் வா கே²ளம் வா வந்தம் வா நீஹாதும், படிப³லோ ஹோதி கி³லானம் காலேன காலம் த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேதும். இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ கி³லானுபட்டா²கோ அலம் கி³லானம் உபட்டா²துந்தி.

கி³லானவத்து²கதா² நிட்டி²தா.