225. மதஸந்தககதா²

367. தேன கோ² பன ஸமயேன த்³வே பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. தே அஞ்ஞதரம் ஆவாஸம் உபக³ச்சி²ம்ஸு. தத்த² அஞ்ஞதரோ பி⁴க்கு² கி³லானோ ஹோதி. அத² கோ² தேஸம் பி⁴க்கூ²னம் ஏதத³ஹோஸி – ‘‘ப⁴க³வதா கோ², ஆவுஸோ, கி³லானுபட்டா²னம் வண்ணிதம். ஹந்த³, மயம், ஆவுஸோ, இமம் பி⁴க்கு²ம் உபட்ட²ஹேமா’’தி. தே தம் உபட்ட²ஹிம்ஸு. ஸோ தேஹி உபட்ட²ஹியமானோ காலமகாஸி. அத² கோ² தே பி⁴க்கூ² தஸ்ஸ பி⁴க்கு²னோ பத்தசீவரமாதா³ய ஸாவத்தி²ம் க³ந்த்வா ப⁴க³வதோ ஏதமத்த²ம் ஆரோசேஸும். ‘‘பி⁴க்கு²ஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபிச கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன திசீவரஞ்ச பத்தஞ்ச கி³லானுபட்டா²கானம் தா³தும். ஏவஞ்ச பன, பி⁴க்க²வே, தா³தப்³ப³ம். தேன கி³லானுபட்டா²கேன பி⁴க்கு²னா ஸங்க⁴ம் உபஸங்கமித்வா ஏவமஸ்ஸ வசனீயோ – ‘இத்த²ன்னாமோ, ப⁴ந்தே, பி⁴க்கு² காலங்கதோ. இத³ம் தஸ்ஸ திசீவரஞ்ச பத்தோ சா’’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ பி⁴க்கு² காலங்கதோ. இத³ம் தஸ்ஸ திசீவரஞ்ச பத்தோ ச. யதி³ ஸங்க⁴ஸ்ஸ பத்தகல்லம், ஸங்கோ⁴ இமம் திசீவரஞ்ச பத்தஞ்ச கி³லானுபட்டா²கானம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ பி⁴க்கு² காலங்கதோ. இத³ம் தஸ்ஸ திசீவரஞ்ச பத்தோ ச. ஸங்கோ⁴ இமம் திசீவரஞ்ச பத்தஞ்ச கி³லானுபட்டா²கானம் தே³தி. யஸ்ஸாயஸ்மதோ க²மதி இமஸ்ஸ திசீவரஸ்ஸ ச பத்தஸ்ஸ ச கி³லானுபட்டா²கானம் தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னம் இத³ம் ஸங்கே⁴ன திசீவரஞ்ச பத்தோ ச கி³லானுபட்டா²கானம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

368. தேன கோ² பன ஸமயேன அஞ்ஞதரோ ஸாமணேரோ காலங்கதோ ஹோதி. ப⁴க³வதோ ஏதமத்த²ம் ஆரோசேஸும். ஸாமணேரஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபி ச கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன சீவரஞ்ச பத்தஞ்ச கி³லானுபட்டா²கானம் தா³தும். ஏவஞ்ச பன, பி⁴க்க²வே, தா³தப்³ப³ம். தேன கி³லானுபட்டா²கேன பி⁴க்கு²னா ஸங்க⁴ம் உபஸங்கமித்வா ஏவமஸ்ஸ வசனீயோ – ‘‘இத்த²ன்னாமோ, ப⁴ந்தே, ஸாமணேரோ காலங்கதோ, இத³ம் தஸ்ஸ சீவரஞ்ச பத்தோ சா’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ஸாமணேரோ காலங்கதோ. இத³ம் தஸ்ஸ சீவரஞ்ச பத்தோ ச. யதி³ ஸங்க⁴ஸ்ஸ பத்தகல்லம், ஸங்கோ⁴ இமம் சீவரஞ்ச பத்தஞ்ச கி³லானுபட்டா²கானம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ஸாமணேரோ காலங்கதோ. இத³ம் தஸ்ஸ சீவரஞ்ச பத்தோ ச. ஸங்கோ⁴ இமம் சீவரஞ்ச பத்தஞ்ச கி³லானுபட்டா²கானம் தே³தி. யஸ்ஸாயஸ்மதோ க²மதி இமஸ்ஸ சீவரஸ்ஸ ச பத்தஸ்ஸ ச கி³லானுபட்டா²கானம் தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘தி³ன்னம் இத³ம் ஸங்கே⁴ன சீவரஞ்ச பத்தோ ச கி³லானுபட்டா²கானம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

369. தேன கோ² பன ஸமயேன அஞ்ஞதரோ பி⁴க்கு² ச ஸாமணேரோ ச கி³லானம் உபட்ட²ஹிம்ஸு. ஸோ தேஹி உபட்ட²ஹியமானோ காலமகாஸி. அத² கோ² தஸ்ஸ கி³லானுபட்டா²கஸ்ஸ பி⁴க்கு²னோ ஏதத³ஹோஸி – ‘‘கத²ம் நு கோ² கி³லானுபட்டா²கஸ்ஸ ஸாமணேரஸ்ஸ சீவரபடிவீஸோ தா³தப்³போ³’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³லானுபட்டா²கஸ்ஸ ஸாமணேரஸ்ஸ ஸமகம் படிவீஸம் தா³துந்தி.

தேன கோ² பன ஸமயேன அஞ்ஞதரோ பி⁴க்கு² ப³ஹுப⁴ண்டோ³ ப³ஹுபரிக்கா²ரோ காலங்கதோ ஹோதி. ப⁴க³வதோ ஏதமத்த²ம் ஆரோசேஸும். பி⁴க்கு²ஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபி ச கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன திசீவரஞ்ச பத்தஞ்ச கி³லானுபட்டா²கானம் தா³தும். யம் தத்த² லஹுப⁴ண்ட³ம் லஹுபரிக்கா²ரம் தம் ஸம்முகீ²பூ⁴தேன ஸங்கே⁴ன பா⁴ஜேதும். யம் தத்த² க³ருப⁴ண்ட³ம் க³ருபரிக்கா²ரம் தம் ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ அவிஸ்ஸஜ்ஜிகம் அவேப⁴ங்கி³கந்தி.

மதஸந்தககதா² நிட்டி²தா.