211. கம்ப³லானுஜானனாதி³கதா²

338. தேன கோ² பன ஸமயேன காஸிராஜா ஜீவகஸ்ஸ கோமாரப⁴ச்சஸ்ஸ அட்³ட⁴காஸிகம் கம்ப³லம் பாஹேஸி உபட்³ட⁴காஸினம் க²மமானம். அத² கோ² ஜீவகோ கோமாரப⁴ச்சோ தம் அட்³ட⁴காஸிகம் கம்ப³லம் ஆதா³ய யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஜீவகோ கோமாரப⁴ச்சோ ப⁴க³வந்தம் ஏதத³வோச – ‘‘அயம் மே, ப⁴ந்தே, அட்³ட⁴காஸிகோ கம்ப³லோ காஸிரஞ்ஞா பஹிதோ உபட்³ட⁴காஸினம் க²மமானோ. படிக்³க³ண்ஹாது மே, ப⁴ந்தே, ப⁴க³வா கம்ப³லம், யம் மமஸ்ஸ தீ³க⁴ரத்தம் ஹிதாய ஸுகா²யா’’தி. படிக்³க³ஹேஸி ப⁴க³வா கம்ப³லம். அத² கோ² ப⁴க³வா ஜீவகம் கோமாரப⁴ச்சம் த⁴ம்மியா கதா²ய ஸந்த³ஸ்ஸேஸி…பே… பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கம்ப³ல’’ந்தி.

339. தேன கோ² பன ஸமயேன ஸங்க⁴ஸ்ஸ உச்சாவசானி சீவரானி உப்பன்னானி ஹோந்தி. அத² கோ² பி⁴க்கூ²னம் ஏதத³ஹோஸி – ‘‘கிம் நு கோ² ப⁴க³வதா சீவரம் அனுஞ்ஞாதம், கிம் அனனுஞ்ஞாத’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ச² சீவரானி – கோ²மம் கப்பாஸிகம் கோஸேய்யம் கம்ப³லம் ஸாணம் ப⁴ங்க³ந்தி.

340. தேன கோ² பன ஸமயேன யே தே பி⁴க்கூ² க³ஹபதிசீவரம் ஸாதி³யந்தி தே குக்குச்சாயந்தா பம்ஸுகூலம் ந ஸாதி³யந்தி – ஏகம்யேவ ப⁴க³வதா சீவரம் அனுஞ்ஞாதம், ந த்³வேதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, க³ஹபதிசீவரம் ஸாதி³யந்தேன பம்ஸுகூலம்பி ஸாதி³யிதும்; தது³ப⁴யேனபாஹம், பி⁴க்க²வே, ஸந்துட்டி²ம் வண்ணேமீதி.

கம்ப³லானுஜானனாதி³கதா² நிட்டி²தா.