212. பம்ஸுகூலபரியேஸனகதா²

341. தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. ஏகச்சே பி⁴க்கூ² ஸுஸானம் ஓக்கமிம்ஸு பம்ஸுகூலாய, ஏகச்சே பி⁴க்கூ² நாக³மேஸும். யே தே பி⁴க்கூ² ஸுஸானம் ஓக்கமிம்ஸு பம்ஸுகூலாய தே பம்ஸுகூலானி லபி⁴ம்ஸு. யே தே பி⁴க்கூ² நாக³மேஸும் தே ஏவமாஹம்ஸு – ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு – ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம. கிஸ்ஸ தும்ஹே நாக³மித்தா²’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, நாக³மேந்தானம் நாகாமா பா⁴க³ம் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. ஏகச்சே பி⁴க்கூ² ஸுஸானம் ஓக்கமிம்ஸு பம்ஸுகூலாய, ஏகச்சே பி⁴க்கூ² ஆக³மேஸும். யே தே பி⁴க்கூ² ஸுஸானம் ஓக்கமிம்ஸு பம்ஸுகூலாய தே பம்ஸுகூலானி லபி⁴ம்ஸு. யே தே பி⁴க்கூ² ஆக³மேஸும் தே ஏவமாஹம்ஸு – ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு – ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம. கிஸ்ஸ தும்ஹே ந ஓக்கமித்தா²’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஆக³மேந்தானம் அகாமா பா⁴க³ம் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. ஏகச்சே பி⁴க்கூ² பட²மம் ஸுஸானம் ஓக்கமிம்ஸு பம்ஸுகூலாய, ஏகச்சே பி⁴க்கூ² பச்சா² ஓக்கமிம்ஸு. யே தே பி⁴க்கூ² பட²மம் ஸுஸானம் ஓக்கமிம்ஸு பம்ஸுகூலாய தே பம்ஸுகூலானி லபி⁴ம்ஸு. யே தே பி⁴க்கூ² பச்சா² ஓக்கமிம்ஸு தே ந லபி⁴ம்ஸு. தே ஏவமாஹம்ஸு – ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு – ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம. கிஸ்ஸ தும்ஹே பச்சா² ஓக்கமித்தா²’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பச்சா² ஓக்கந்தானம் நாகாமா பா⁴க³ம் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. தே ஸதி³ஸா ஸுஸானம் ஓக்கமிம்ஸு பம்ஸுகூலாய. ஏகச்சே பி⁴க்கூ² பம்ஸுகூலானி லபி⁴ம்ஸு, ஏகச்சே பி⁴க்கூ² ந லபி⁴ம்ஸு. யே தே பி⁴க்கூ² ந லபி⁴ம்ஸு, தே ஏவமாஹம்ஸு – ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு – ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம. கிஸ்ஸ தும்ஹே ந லபி⁴த்தா²’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸதி³ஸானம் ஓக்கந்தானம் அகாமா பா⁴க³ம் தா³துந்தி.

தேன கோ² பன ஸமயேன ஸம்ப³ஹுலா பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹோந்தி. தே கதிகம் கத்வா ஸுஸானம் ஓக்கமிம்ஸு பம்ஸுகூலாய. ஏகச்சே பி⁴க்கூ² பம்ஸுகூலானி லபி⁴ம்ஸு, ஏகச்சே பி⁴க்கூ² ந லபி⁴ம்ஸு. யே தே பி⁴க்கூ² ந லபி⁴ம்ஸு தே ஏவமாஹம்ஸு – ‘‘அம்ஹாகம்பி, ஆவுஸோ, பா⁴க³ம் தே³தா²’’தி. தே ஏவமாஹம்ஸு – ‘‘ந மயம், ஆவுஸோ, தும்ஹாகம் பா⁴க³ம் த³ஸ்ஸாம. கிஸ்ஸ தும்ஹே ந லபி⁴த்தா²’’தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கதிகம் கத்வா ஓக்கந்தானம் அகாமா பா⁴க³ம் தா³துந்தி.

பம்ஸுகூலபரியேஸனகதா² நிட்டி²தா.