206. ஸேட்டி²புத்தவத்து²

333. தேன கோ² பன ஸமயேன பா³ராணஸேய்யகஸ்ஸ ஸேட்டி²புத்தஸ்ஸ மோக்க²சிகாய கீளந்தஸ்ஸ அந்தக³ண்டா²பா³தோ⁴ ஹோதி, யேன யாகு³பி பீதா ந ஸம்மா பரிணாமம் க³ச்ச²தி, ப⁴த்தம்பி பு⁴த்தம் ந ஸம்மா பரிணாமம் க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ ஹோதி லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. அத² கோ² பா³ராணஸேய்யகஸ்ஸ ஸேட்டி²ஸ்ஸ ஏதத³ஹோஸி – ‘‘மய்ஹம் கோ² புத்தஸ்ஸ தாதி³ஸோ ஆபா³தோ⁴, யேன யாகு³பி பீதா ந ஸம்மா பரிணாமம் க³ச்ச²தி, ப⁴த்தம்பி பு⁴த்தம் ந ஸம்மா பரிணாமம் க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. யம்னூனாஹம் ராஜக³ஹம் க³ந்த்வா ராஜானம் ஜீவகம் வேஜ்ஜம் யாசேய்யம் புத்தம் மே திகிச்சி²து’’ந்தி. அத² கோ² பா³ராணஸேய்யகோ ஸேட்டி² ராஜக³ஹம் க³ந்த்வா யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி, உபஸங்கமித்வா ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச – ‘‘மய்ஹம் கோ², தே³வ, புத்தஸ்ஸ தாதி³ஸோ ஆபா³தோ⁴, யேன யாகு³பி பீதா ந ஸம்மா பரிணாமம் க³ச்ச²தி, ப⁴த்தம்பி பு⁴த்தம் ந ஸம்மா பரிணாமம் க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. ஸாது⁴ தே³வோ ஜீவகம் வேஜ்ஜம் ஆணாபேது புத்தம் மே திகிச்சி²து’’ந்தி.

அத² கோ² ராஜா மாக³தோ⁴ ஸேனியோ பி³ம்பி³ஸாரோ ஜீவகம் கோமாரப⁴ச்சம் ஆணாபேஸி – ‘‘க³ச்ச², ப⁴ணே ஜீவக, பா³ராணஸிம் க³ந்த்வா பா³ராணஸேய்யகம் ஸேட்டி²புத்தம் திகிச்சா²ஹீ’’தி. ‘‘ஏவம், தே³வா’’தி கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா பா³ராணஸிம் க³ந்த்வா யேன பா³ராணஸேய்யகோ ஸேட்டி²புத்தோ தேனுபஸங்கமி, உபஸங்கமித்வா பா³ராணஸேய்யகஸ்ஸ ஸேட்டி²புத்தஸ்ஸ விகாரம் ஸல்லக்கே²த்வா ஜனம் உஸ்ஸாரேத்வா திரோகரணியம் பரிக்கி²பித்வா த²ம்பே⁴ உப்³ப³ந்தி⁴த்வா [உபனிப³ந்தி⁴த்வா (ஸீ. ஸ்யா.)] ப⁴ரியம் புரதோ ட²பேத்வா உத³ரச்ச²விம் உப்பாடேத்வா அந்தக³ண்டி²ம் நீஹரித்வா ப⁴ரியாய த³ஸ்ஸேஸி – ‘‘பஸ்ஸ தே ஸாமிகஸ்ஸ ஆபா³த⁴ம், இமினா யாகு³பி பீதா ந ஸம்மா பரிணாமம் க³ச்ச²தி, ப⁴த்தம்பி பு⁴த்தம் ந ஸம்மா பரிணாமம் க³ச்ச²தி, உச்சாரோபி பஸ்ஸாவோபி ந பகு³ணோ; இமினாயம் கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி. அந்தக³ண்டி²ம் வினிவேடே²த்வா அந்தானி படிபவேஸேத்வா உத³ரச்ச²விம் ஸிப்³பி³த்வா ஆலேபம் அதா³ஸி. அத² கோ² பா³ராணஸேய்யகோ ஸேட்டி²புத்தோ நசிரஸ்ஸேவ அரோகோ³ அஹோஸி. அத² கோ² பா³ராணஸேய்யகோ ஸேட்டி² ‘புத்தோ மே அரோகோ³ டி²தோ’தி [அரோகா³பிதோதி (ஸீ.)] ஜீவகஸ்ஸ கோமாரப⁴ச்சஸ்ஸ ஸோளஸஸஹஸ்ஸானி பாதா³ஸி. அத² கோ² ஜீவகோ கோமாரப⁴ச்சோ தானி ஸோளஸஸஹஸ்ஸானி ஆதா³ய புனதே³வ ராஜக³ஹம் பச்சாக³ஞ்சி².

ஸேட்டி²புத்தவத்து² நிட்டி²தம்.