207. பஜ்ஜோதராஜவத்து²

334. தேன கோ² பன ஸமயேன ரஞ்ஞோ [உஜ்ஜேனியம் ரஞ்ஞோ (ஸ்யா.)] பஜ்ஜோதஸ்ஸ பண்டு³ரோகா³பா³தோ⁴ ஹோதி. ப³ஹூ மஹந்தா மஹந்தா தி³ஸாபாமோக்கா² வேஜ்ஜா ஆக³ந்த்வா நாஸக்கி²ம்ஸு அரோக³ம் காதும். ப³ஹும் ஹிரஞ்ஞம் ஆதா³ய அக³மம்ஸு. அத² கோ² ராஜா பஜ்ஜோதோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஸந்திகே தூ³தம் பாஹேஸி – ‘‘மய்ஹம் கோ² தாதி³ஸோ ஆபா³தோ⁴, ஸாது⁴ தே³வோ ஜீவகம் வேஜ்ஜம் ஆணாபேது, ஸோ மம் திகிச்சி²ஸ்ஸதீ’’தி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ஜீவகம் கோமாரப⁴ச்சம் ஆணாபேஸி – ‘‘க³ச்ச², ப⁴ணே ஜீவக; உஜ்ஜேனிம் க³ந்த்வா ராஜானம் பஜ்ஜோதம் திகிச்சா²ஹீ’’தி. ‘‘ஏவம், தே³வா’’தி கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா உஜ்ஜேனிம் க³ந்த்வா யேன ராஜா பஜ்ஜோதோ தேனுபஸங்கமி; உபஸங்கமித்வா ரஞ்ஞோ பஜ்ஜோதஸ்ஸ விகாரம் ஸல்லக்கே²த்வா ராஜானம் பஜ்ஜோதம் ஏதத³வோச – ‘‘ஸப்பிம் தே³ஹி [இத³ம் பத³த்³வயம் ஸீ. ஸ்யா. போத்த²கேஸு நத்தி²], ஸப்பிம் தே³வ, நிப்பசிஸ்ஸாமி. தம் தே³வோ பிவிஸ்ஸதீ’’தி. ‘‘அலம், ப⁴ணே ஜீவக, யம் தே ஸக்கா வினா ஸப்பினா அரோக³ம் காதும் தம் கரோஹி. ஜேகு³ச்ச²ம் மே ஸப்பி, படிகூல’’ந்தி. அத² கோ² ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமஸ்ஸ கோ² ரஞ்ஞோ தாதி³ஸோ ஆபா³தோ⁴, ந ஸக்கா வினா ஸப்பினா அரோக³ம் காதும். யம்னூனாஹம் ஸப்பிம் நிப்பசேய்யம் கஸாவவண்ணம் கஸாவக³ந்த⁴ம் கஸாவரஸ’’ந்தி. அத² கோ² ஜீவகோ கோமாரப⁴ச்சோ நானாபே⁴ஸஜ்ஜேஹி ஸப்பிம் நிப்பசி கஸாவவண்ணம் கஸாவக³ந்த⁴ம் கஸாவரஸம். அத² கோ² ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமஸ்ஸ கோ² ரஞ்ஞோ ஸப்பி பீதம் பரிணாமேந்தம் உத்³தே³கம் த³ஸ்ஸதி. சண்டோ³யம் ராஜா கா⁴தாபேய்யாபி மம். யம்னூனாஹம் படிகச்சேவ ஆபுச்சே²ய்ய’’ந்தி. அத² கோ² ஜீவகோ கோமாரப⁴ச்சோ யேன ராஜா பஜ்ஜோதோ தேனுபஸங்கமி, உபஸங்கமித்வா ராஜானம் பஜ்ஜோதம் ஏதத³வோச – ‘‘மயம் கோ², தே³வ, வேஜ்ஜா நாம தாதி³ஸேன முஹுத்தேன மூலானி உத்³த⁴ராம பே⁴ஸஜ்ஜானி ஸம்ஹராம. ஸாது⁴ தே³வோ வாஹனாகா³ரேஸு ச த்³வாரேஸு ச ஆணாபேது – யேன வாஹனேன ஜீவகோ இச்ச²தி தேன வாஹனேன க³ச்ச²து, யேன த்³வாரேன இச்ச²தி தேன த்³வாரேன க³ச்ச²து, யம் காலம் இச்ச²தி தம் காலம் க³ச்ச²து, யம் காலம் இச்ச²தி தம் காலம் பவிஸதூ’’தி. அத² கோ² ராஜா பஜ்ஜோதோ வாஹனாகா³ரேஸு ச த்³வாரேஸு ச ஆணாபேஸி – ‘‘யேன வாஹனேன ஜீவகோ இச்ச²தி தேன வாஹனேன க³ச்ச²து, யேன த்³வாரேன இச்ச²தி தேன த்³வாரேன க³ச்ச²து, யம் காலம் இச்ச²தி தம் காலம் க³ச்ச²து, யம் காலம் இச்ச²தி தம் காலம் பவிஸதூ’’தி.

தேன கோ² பன ஸமயேன ரஞ்ஞோ பஜ்ஜோதஸ்ஸ ப⁴த்³த³வதிகா நாம ஹத்தி²னிகா பஞ்ஞாஸயோஜனிகா ஹோதி. அத² கோ² ஜீவகோ கோமாரப⁴ச்சோ ரஞ்ஞோ பஜ்ஜோதஸ்ஸ ஸப்பிம் [தம் ஸப்பிம் (ஸ்யா.)] உபனாமேஸி – ‘‘கஸாவம் தே³வோ பிவதூ’’தி. அத² கோ² ஜீவகோ கோமாரப⁴ச்சோ ராஜானம் பஜ்ஜோதம் ஸப்பிம் பாயேத்வா ஹத்தி²ஸாலம் க³ந்த்வா ப⁴த்³த³வதிகாய ஹத்தி²னிகாய நக³ரம்ஹா நிப்பதி.

அத² கோ² ரஞ்ஞோ பஜ்ஜோதஸ்ஸ தம் ஸப்பி பீதம் பரிணாமேந்தம் உத்³தே³கம் அதா³ஸி. அத² கோ² ராஜா பஜ்ஜோதோ மனுஸ்ஸே ஏதத³வோச – ‘‘து³ட்டே²ன, ப⁴ணே, ஜீவகேன ஸப்பிம் பாயிதோம்ஹி. தேன ஹி, ப⁴ணே, ஜீவகம் வேஜ்ஜம் விசினதா²’’தி. ‘‘ப⁴த்³த³வதிகாய, தே³வ, ஹத்தி²னிகாய நக³ரம்ஹா நிப்பதிதோ’’தி. தேன கோ² பன ஸமயேன ரஞ்ஞோ பஜ்ஜோதஸ்ஸ காகோ நாம தா³ஸோ ஸட்டி²யோஜனிகோ ஹோதி, அமனுஸ்ஸேன படிச்ச ஜாதோ. அத² கோ² ராஜா பஜ்ஜோதோ காகம் தா³ஸம் ஆணாபேஸி – ‘‘க³ச்ச², ப⁴ணே காக, ஜீவகம் வேஜ்ஜம் நிவத்தேஹி – ராஜா தம், ஆசரிய, நிவத்தாபேதீதி. ஏதே கோ², ப⁴ணே காக, வேஜ்ஜா நாம ப³ஹுமாயா. மா சஸ்ஸ கிஞ்சி படிக்³க³ஹேஸீ’’தி.

அத² கோ² காகோ தா³ஸோ ஜீவகம் கோமாரப⁴ச்சம் அந்தராமக்³கே³ கோஸம்பி³யம் ஸம்பா⁴வேஸி

பாதராஸம் கரோந்தம். அத² கோ² காகோ தா³ஸோ ஜீவகம் கோமாரப⁴ச்சம் ஏதத³வோச – ‘‘ராஜா தம், ஆசரிய, நிவத்தாபேதீ’’தி. ‘‘ஆக³மேஹி, ப⁴ணே காக, யாவ பு⁴ஞ்ஜாம [பு⁴ஞ்ஜாமி (ஸீ. ஸ்யா.)]. ஹந்த³, ப⁴ணே காக, பு⁴ஞ்ஜஸ்ஸூ’’தி. ‘‘அலம், ஆசரிய, ரஞ்ஞாம்ஹி ஆணத்தோ – ஏதே கோ², ப⁴ணே காக, வேஜ்ஜா நாம ப³ஹுமாயா, மா சஸ்ஸ கிஞ்சி படிக்³க³ஹேஸீ’’தி. தேன கோ² பன ஸமயேன ஜீவகோ கோமாரப⁴ச்சோ நகே²ன பே⁴ஸஜ்ஜம் ஓலும்பேத்வா ஆமலகஞ்ச கா²த³தி பானீயஞ்ச பிவதி. அத² கோ² ஜீவகோ கோமாரப⁴ச்சோ காகம் தா³ஸம் ஏதத³வோச – ‘‘ஹந்த³, ப⁴ணே காக, ஆமலகஞ்ச கா²த³ பானீயஞ்ச பிவஸ்ஸூ’’தி. அத² கோ² காகோ தா³ஸோ – அயம் கோ² வேஜ்ஜோ ஆமலகஞ்ச கா²த³தி பானீயஞ்ச பிவதி, ந அரஹதி கிஞ்சி பாபகம் ஹோதுந்தி – உபட்³டா⁴மலகஞ்ச கா²தி³ பானீயஞ்ச அபாயி. தஸ்ஸ தம் உபட்³டா⁴மலகம் கா²தி³தம் தத்தே²வ நிச்சா²ரேஸி. அத² கோ² காகோ தா³ஸோ ஜீவகம் கோமாரப⁴ச்சம் ஏதத³வோச – ‘‘அத்தி² மே, ஆசரிய, ஜீவித’’ந்தி? ‘‘மா, ப⁴ணே காக, பா⁴யி, த்வம் சேவ அரோகோ³ ப⁴விஸ்ஸஸி ராஜா ச. சண்டோ³ ஸோ ராஜா கா⁴தாபேய்யாபி மம், தேனாஹம் ந நிவத்தாமீ’’தி ப⁴த்³த³வதிகம் ஹத்தி²னிகம் காகஸ்ஸ நிய்யாதே³த்வா யேன ராஜக³ஹம் தேன பக்காமி. அனுபுப்³பே³ன யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி; உபஸங்கமித்வா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதமத்த²ம் ஆரோசேஸி. ‘‘ஸுட்டு², ப⁴ணே ஜீவக, அகாஸி யம்பி ந நிவத்தோ, சண்டோ³ ஸோ ராஜா கா⁴தாபேய்யாபி த’’ந்தி. அத² கோ² ராஜா பஜ்ஜோதோ அரோகோ³ ஸமானோ ஜீவகஸ்ஸ கோமாரப⁴ச்சஸ்ஸ ஸந்திகே தூ³தம் பாஹேஸி – ‘‘ஆக³ச்ச²து ஜீவகோ, வரம் த³ஸ்ஸாமீ’’தி. ‘‘அலம், அய்யோ [தே³வ (ஸ்யா.)], அதி⁴காரம் மே தே³வோ ஸரதூ’’தி.

பஜ்ஜோதராஜவத்து² நிட்டி²தம்.