205. ராஜக³ஹஸேட்டி²வத்து²

332. தேன கோ² பன ஸமயேன ராஜக³ஹகஸ்ஸ ஸேட்டி²ஸ்ஸ ஸத்தவஸ்ஸிகோ ஸீஸாபா³தோ⁴ ஹோதி. ப³ஹூ மஹந்தா மஹந்தா தி³ஸாபாமோக்கா² வேஜ்ஜா ஆக³ந்த்வா நாஸக்கி²ம்ஸு அரோக³ம் காதும். ப³ஹும் ஹிரஞ்ஞம் ஆதா³ய அக³மம்ஸு. அபி ச, வேஜ்ஜேஹி பச்சக்கா²தோ ஹோதி. ஏகச்சே வேஜ்ஜா ஏவமாஹம்ஸு – ‘‘பஞ்சமம் தி³வஸம் ஸேட்டி² க³ஹபதி காலம் கரிஸ்ஸதீ’’தி. ஏகச்சே வேஜ்ஜா ஏவமாஹம்ஸு – ‘‘ஸத்தமம் தி³வஸம் ஸேட்டி² க³ஹபதி காலம் கரிஸ்ஸதீ’’தி. அத² கோ² ராஜக³ஹகஸ்ஸ நேக³மஸ்ஸ ஏதத³ஹோஸி – ‘‘அயம் கோ² ஸேட்டி² க³ஹபதி ப³ஹூபகாரோ ரஞ்ஞோ சேவ நேக³மஸ்ஸ ச. அபி ச, வேஜ்ஜேஹி பச்சக்கா²தோ. ஏகச்சே வேஜ்ஜா ஏவமாஹம்ஸு – ‘பஞ்சமம் தி³வஸம் ஸேட்டி² க³ஹபதி காலம் கரிஸ்ஸதீ’தி. ஏகச்சே வேஜ்ஜா ஏவமாஹம்ஸு – ‘ஸத்தமம் தி³வஸம் ஸேட்டி² க³ஹபதி காலம் கரிஸ்ஸதீ’தி. அயஞ்ச ரஞ்ஞோ ஜீவகோ வேஜ்ஜோ தருணோ ப⁴த்³ரகோ. யம்னூன மயம் ராஜானம் ஜீவகம் வேஜ்ஜம் யாசேய்யாம ஸேட்டி²ம் க³ஹபதிம் திகிச்சி²து’’ந்தி. அத² கோ² ராஜக³ஹகோ நேக³மோ யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி; உபஸங்கமித்வா ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச – ‘‘அயம், தே³வ, ஸேட்டி² க³ஹபதி ப³ஹூபகாரோ தே³வஸ்ஸ சேவ நேக³மஸ்ஸ ச; அபி ச, வேஜ்ஜேஹி பச்சக்கா²தோ. ஏகச்சே வேஜ்ஜா ஏவமாஹம்ஸு – பஞ்சமம் தி³வஸம் ஸேட்டி² க³ஹபதி காலம் கரிஸ்ஸதீதி. ஏகச்சே வேஜ்ஜா ஏவமாஹம்ஸு – ஸத்தமம் தி³வஸம் ஸேட்டி² க³ஹபதி காலம் கரிஸ்ஸதீதி. ஸாது⁴ தே³வோ ஜீவகம் வேஜ்ஜம் ஆணாபேது ஸேட்டி²ம் க³ஹபதிம் திகிச்சி²து’’ந்தி.

அத² கோ² ராஜா மாக³தோ⁴ ஸேனியோ பி³ம்பி³ஸாரோ ஜீவகம் கோமாரப⁴ச்சம் ஆணாபேஸி – ‘‘க³ச்ச², ப⁴ணே ஜீவக, ஸேட்டி²ம் க³ஹபதிம் திகிச்சா²ஹீ’’தி. ‘‘ஏவம், தே³வா’’தி கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா யேன ஸேட்டி² க³ஹபதி தேனுபஸங்கமி; உபஸங்கமித்வா ஸேட்டி²ஸ்ஸ க³ஹபதிஸ்ஸ விகாரம் ஸல்லக்கே²த்வா ஸேட்டி²ம் க³ஹபதிம் ஏதத³வோச – ‘‘ஸசே த்வம், க³ஹபதி, அரோகோ³ ப⁴வேய்யாஸி [ஸசாஹம் தம் க³ஹபதி அரோகா³பேய்யம் (ஸீ.), ஸசாஹம் தம் க³ஹபதி அரோக³ம் கரேய்யம் (ஸ்யா.)] கிம் மே அஸ்ஸ தே³ய்யத⁴ம்மோ’’தி? ‘‘ஸப்³ப³ம் ஸாபதேய்யஞ்ச தே, ஆசரிய, ஹோது, அஹஞ்ச தே தா³ஸோ’’தி. ‘‘ஸக்கி²ஸ்ஸஸி பன த்வம், க³ஹபதி, ஏகேன பஸ்ஸேன ஸத்தமாஸே நிபஜ்ஜிது’’ந்தி? ‘‘ஸக்கோமஹம், ஆசரிய, ஏகேன பஸ்ஸேன ஸத்தமாஸே நிபஜ்ஜிது’’ந்தி. ‘‘ஸக்கி²ஸ்ஸஸி பன த்வம், க³ஹபதி, து³தியேன பஸ்ஸேன ஸத்தமாஸே நிபஜ்ஜிது’’ந்தி? ‘‘ஸக்கோமஹம், ஆசரிய, து³தியேன பஸ்ஸேன ஸத்தமாஸே நிபஜ்ஜிது’’ந்தி. ‘‘ஸக்கி²ஸ்ஸஸி பன த்வம், க³ஹபதி, உத்தானோ ஸத்தமாஸே நிபஜ்ஜிது’’ந்தி? ‘‘ஸக்கோமஹம், ஆசரிய, உத்தானோ ஸத்தமாஸே நிபஜ்ஜிது’’ந்தி.

அத² கோ² ஜீவகோ கோமாரப⁴ச்சோ ஸேட்டி²ம் க³ஹபதிம் மஞ்சகே நிபாதேத்வா [நிபஜ்ஜாபேத்வா (ஸீ. ஸ்யா.)] மஞ்சகே [மஞ்சகேன (ஸீ.)] ஸம்ப³ந்தி⁴த்வா ஸீஸச்ச²விம் உப்பாடேத்வா [பா²லேத்வா (ஸீ.)] ஸிப்³பி³னிம் வினாமேத்வா த்³வே பாணகே நீஹரித்வா மஹாஜனஸ்ஸ த³ஸ்ஸேஸி – ‘‘பஸ்ஸத²ய்யே [பஸ்ஸேஸ்யாத² (ஸீ.), பஸ்ஸத² (ஸ்யா.), பஸ்ஸத²ய்யோ (க.)], இமே த்³வே பாணகே, ஏகம் கு²த்³த³கம் ஏகம் மஹல்லகம். யே தே ஆசரியா ஏவமாஹம்ஸு – பஞ்சமம் தி³வஸம் ஸேட்டி² க³ஹபதி காலம் கரிஸ்ஸதீதி – தேஹாயம் மஹல்லகோ பாணகோ தி³ட்டோ². பஞ்சமம் தி³வஸம் ஸேட்டி²ஸ்ஸ க³ஹபதிஸ்ஸ மத்த²லுங்க³ம் பரியாதி³யிஸ்ஸதி. மத்த²லுங்க³ஸ்ஸ பரியாதா³னா ஸேட்டி² க³ஹபதி காலம் கரிஸ்ஸதி. ஸுதி³ட்டோ² தேஹி ஆசரியேஹி. யே தே ஆசரியா ஏவமாஹம்ஸு – ஸத்தமம் தி³வஸம் ஸேட்டி² க³ஹபதி காலம் கரிஸ்ஸதீதி – தேஹாயம் கு²த்³த³கோ பாணகோ தி³ட்டோ². ஸத்தமம் தி³வஸம் ஸேட்டி²ஸ்ஸ க³ஹபதிஸ்ஸ மத்த²லுங்க³ம் பரியாதி³யிஸ்ஸதி. மத்த²லுங்க³ஸ்ஸ பரியாதா³னா ஸேட்டி² க³ஹபதி காலம் கரிஸ்ஸதி. ஸுதி³ட்டோ² தேஹி ஆசரியேஹீ’’தி. ஸிப்³பி³னிம் ஸம்படிபாடேத்வா ஸீஸச்ச²விம் ஸிப்³பி³த்வா ஆலேபம் அதா³ஸி. அத² கோ² ஸேட்டி² க³ஹபதி ஸத்தாஹஸ்ஸ அச்சயேன ஜீவகம் கோமாரப⁴ச்சம் ஏதத³வோச – ‘‘நாஹம், ஆசரிய, ஸக்கோமி ஏகேன பஸ்ஸேன ஸத்தமாஸே நிபஜ்ஜிது’’ந்தி. ‘‘நனு மே த்வம், க³ஹபதி, படிஸ்ஸுணி – ஸக்கோமஹம், ஆசரிய, ஏகேன பஸ்ஸேன ஸத்தமாஸே நிபஜ்ஜிது’’ந்தி? ‘‘ஸச்சாஹம், ஆசரிய, படிஸ்ஸுணிம், அபாஹம் மரிஸ்ஸாமி, நாஹம் ஸக்கோமி ஏகேன பஸ்ஸேன ஸத்தமாஸே நிபஜ்ஜிது’’ந்தி. ‘‘தேன ஹி த்வம், க³ஹபதி, து³தியேன பஸ்ஸேன ஸத்தமாஸே நிபஜ்ஜாஹீ’’தி. அத² கோ² ஸேட்டி² க³ஹபதி ஸத்தாஹஸ்ஸ அச்சயேன ஜீவகம் கோமாரப⁴ச்சம் ஏதத³வோச – ‘‘நாஹம், ஆசரிய, ஸக்கோமி து³தியேன பஸ்ஸேன ஸத்தமாஸே நிபஜ்ஜிது’’ந்தி. ‘‘நனு மே த்வம், க³ஹபதி, படிஸ்ஸுணி – ஸக்கோமஹம், ஆசரிய, து³தியேன பஸ்ஸேன ஸத்தமாஸே நிபஜ்ஜிது’’ந்தி? ‘‘ஸச்சாஹம், ஆசரிய, படிஸ்ஸுணிம், அபாஹம் மரிஸ்ஸாமி, நாஹம், ஆசரிய, ஸக்கோமி து³தியேன பஸ்ஸேன ஸத்தமாஸே நிபஜ்ஜிது’’ந்தி. ‘‘தேன ஹி த்வம், க³ஹபதி, உத்தானோ ஸத்தமாஸே நிபஜ்ஜாஹீ’’தி. அத² கோ² ஸேட்டி² க³ஹபதி ஸத்தாஹஸ்ஸ அச்சயேன ஜீவகம் கோமாரப⁴ச்சம் ஏதத³வோச – ‘‘நாஹம், ஆசரிய, ஸக்கோமி உத்தானோ ஸத்தமாஸே நிபஜ்ஜிது’’ந்தி. ‘‘நனு மே த்வம், க³ஹபதி, படிஸ்ஸுணி – ஸக்கோமஹம், ஆசரிய, உத்தானோ ஸத்தமாஸே நிபஜ்ஜிது’’ந்தி? ‘‘ஸச்சாஹம், ஆசரிய, படிஸ்ஸுணிம், அபாஹம் மரிஸ்ஸாமி, நாஹம் ஸக்கோமி உத்தானோ ஸத்தமாஸே நிபஜ்ஜிது’’ந்தி. ‘‘அஹம் சே தம், க³ஹபதி, ந வதே³ய்யம், ஏத்தகம்பி த்வம் ந நிபஜ்ஜேய்யாஸி, அபி ச படிகச்சேவ மயா ஞாதோ – தீஹி ஸத்தாஹேஹி ஸேட்டி² க³ஹபதி அரோகோ³ ப⁴விஸ்ஸதீதி. உட்டே²ஹி, க³ஹபதி, அரோகோ³ஸி. ஜானாஸி கிம் மே தே³ய்யத⁴ம்மோ’’தி? ‘‘ஸப்³ப³ம் ஸாபதேய்யஞ்ச தே, ஆசரிய, ஹோது, அஹஞ்ச தே தா³ஸோ’’தி. ‘‘அலம், க³ஹபதி, மா மே த்வம் ஸப்³ப³ம் ஸாபதேய்யம் அதா³ஸி, மா ச மே தா³ஸோ. ரஞ்ஞோ ஸதஸஹஸ்ஸம் தே³ஹி, மய்ஹம் ஸதஸஹஸ்ஸ’’ந்தி. அத² கோ² ஸேட்டி² க³ஹபதி அரோகோ³ ஸமானோ ரஞ்ஞோ ஸதஸஹஸ்ஸம் அதா³ஸி, ஜீவகஸ்ஸ கோமாரப⁴ச்சஸ்ஸ ஸதஸஹஸ்ஸம்.

ராஜக³ஹஸேட்டி²வத்து² நிட்டி²தம்.