204. பி³ம்பி³ஸாரராஜவத்து²

331. தேன கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ப⁴க³ந்த³லாபா³தோ⁴ ஹோதி. ஸாடகா லோஹிதேன மக்கி²யந்தி. தே³வியோ தி³ஸ்வா உப்பண்டே³ந்தி – ‘‘உதுனீ தா³னி தே³வோ, புப்ப²ம் தே³வஸ்ஸ உப்பன்னம், ந சிரம் [நசிரஸ்ஸேவ (ஸ்யா.)] தே³வோ விஜாயிஸ்ஸதீ’’தி. தேன ராஜா மங்கு ஹோதி. அத² கோ² ராஜா மாக³தோ⁴ ஸேனியோ பி³ம்பி³ஸாரோ அப⁴யம் ராஜகுமாரம் ஏதத³வோச – ‘‘மய்ஹம் கோ², ப⁴ணே அப⁴ய, தாதி³ஸோ ஆபா³தோ⁴, ஸாடகா லோஹிதேன மக்கி²யந்தி, தே³வியோ மம் தி³ஸ்வா உப்பண்டே³ந்தி – ‘உதுனீ தா³னி தே³வோ, புப்ப²ம் தே³வஸ்ஸ உப்பன்னம், ந சிரம் தே³வோ விஜாயிஸ்ஸதீ’தி. இங்க⁴, ப⁴ணே அப⁴ய, தாதி³ஸம் வேஜ்ஜம் ஜானாஹி யோ மம் திகிச்சே²ய்யா’’தி. ‘‘அயம், தே³வ, அம்ஹாகம் ஜீவகோ வேஜ்ஜோ தருணோ ப⁴த்³ரகோ. ஸோ தே³வம் திகிச்சி²ஸ்ஸதீ’’தி. ‘‘தேன ஹி, ப⁴ணே அப⁴ய, ஜீவகம் வேஜ்ஜம் ஆணாபேஹி; ஸோ மம் திகிச்சி²ஸ்ஸதீ’’தி. அத² கோ² அப⁴யோ ராஜகுமாரோ ஜீவகம் கோமாரப⁴ச்சம் ஆணாபேஸி – ‘‘க³ச்ச², ப⁴ணே ஜீவக, ராஜானம் திகிச்சா²ஹீ’’தி. ‘‘ஏவம், தே³வா’’தி கோ² ஜீவகோ கோமாரப⁴ச்சோ அப⁴யஸ்ஸ ராஜகுமாரஸ்ஸ படிஸ்ஸுத்வா நகே²ன பே⁴ஸஜ்ஜம் ஆதா³ய யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி, உபஸங்கமித்வா ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச – ‘‘ஆபா³த⁴ம் தே, தே³வ, பஸ்ஸாமா’’தி [பஸ்ஸாமீதி (ஸ்யா.)]. அத² கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ப⁴க³ந்த³லாபா³த⁴ம் ஏகேனேவ ஆலேபேன அபகட்³டி⁴. அத² கோ² ராஜா மாக³தோ⁴ ஸேனியோ பி³ம்பி³ஸாரோ அரோகோ³ ஸமானோ பஞ்ச இத்தி²ஸதானி ஸப்³பா³லங்காரம் பூ⁴ஸாபேத்வா ஓமுஞ்சாபேத்வா புஞ்ஜம் காராபேத்வா ஜீவகம் கோமாரப⁴ச்சம் ஏதத³வோச – ‘‘ஏதம், ப⁴ணே ஜீவக, பஞ்சன்னம் இத்தி²ஸதானம் ஸப்³பா³லங்காரம் துய்ஹம் ஹோதூ’’தி. ‘‘அலம், தே³வ, அதி⁴காரம் மே தே³வோ ஸரதூ’’தி. ‘‘தேன ஹி, ப⁴ணே ஜீவக, மம் உபட்ட²ஹ, இத்தா²கா³ரஞ்ச, பு³த்³த⁴ப்பமுக²ஞ்ச பி⁴க்கு²ஸங்க⁴’’ந்தி. ‘‘ஏவம், தே³வா’’தி கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பச்சஸ்ஸோஸி.

பி³ம்பி³ஸாரராஜவத்து² நிட்டி²தம்.