203. ஸேட்டி²ப⁴ரியாவத்து²

330. தேன கோ² பன ஸமயேன ஸாகேதே ஸேட்டி²ப⁴ரியாய ஸத்தவஸ்ஸிகோ ஸீஸாபா³தோ⁴ ஹோதி. ப³ஹூ மஹந்தா மஹந்தா தி³ஸாபாமோக்கா² வேஜ்ஜா ஆக³ந்த்வா நாஸக்கி²ம்ஸு அரோக³ம் காதும். ப³ஹும் ஹிரஞ்ஞம் ஆதா³ய அக³மம்ஸு. அத² கோ² ஜீவகோ கோமாரப⁴ச்சோ ஸாகேதம் பவிஸித்வா மனுஸ்ஸே புச்சி² – ‘‘கோ, ப⁴ணே, கி³லானோ, கம் திகிச்சா²மீ’’தி? ‘‘ஏதிஸ்ஸா, ஆசரிய, ஸேட்டி²ப⁴ரியாய ஸத்தவஸ்ஸிகோ ஸீஸாபா³தோ⁴; க³ச்ச², ஆசரிய, ஸேட்டி²ப⁴ரியம் திகிச்சா²ஹீ’’தி. அத² கோ² ஜீவகோ கோமாரப⁴ச்சோ யேன ஸேட்டி²ஸ்ஸ க³ஹபதிஸ்ஸ நிவேஸனம் தேனுபஸங்கமி; உபஸங்கமித்வா தோ³வாரிகம் ஆணாபேஸி – ‘‘க³ச்ச², ப⁴ணே தோ³வாரிக, ஸேட்டி²ப⁴ரியாய பாவத³ – ‘வேஜ்ஜோ, அய்யே, ஆக³தோ, ஸோ தம் த³ட்டு²காமோ’’’தி. ‘‘ஏவம், ஆசரியா’’தி கோ² ஸோ தோ³வாரிகோ ஜீவகஸ்ஸ கோமாரப⁴ச்சஸ்ஸ படிஸ்ஸுத்வா யேன ஸேட்டி²ப⁴ரியா தேனுபஸங்கமி, உபஸங்கமித்வா ஸேட்டி²ப⁴ரியம் ஏதத³வோச – ‘‘வேஜ்ஜோ, அய்யே, ஆக³தோ; ஸோ தம் த³ட்டு²காமோ’’தி. ‘‘கீதி³ஸோ, ப⁴ணே தோ³வாரிக, வேஜ்ஜோ’’தி? ‘‘த³ஹரகோ, அய்யே’’தி. ‘‘அலம், ப⁴ணே தோ³வாரிக, கிம் மே த³ஹரகோ வேஜ்ஜோ கரிஸ்ஸதி? ப³ஹூ மஹந்தா மஹந்தா தி³ஸாபாமோக்கா² வேஜ்ஜா ஆக³ந்த்வா நாஸக்கி²ம்ஸு அரோக³ம் காதும். ப³ஹும் ஹிரஞ்ஞம் ஆதா³ய அக³மம்ஸூ’’தி. அத² கோ² ஸோ தோ³வாரிகோ யேன ஜீவகோ கோமாரப⁴ச்சோ தேனுபஸங்கமி; உபஸங்கமித்வா ஜீவகம் கோமாரப⁴ச்சம் ஏதத³வோச – ‘‘ஸேட்டி²ப⁴ரியா, ஆசரிய, ஏவமாஹ – ‘அலம், ப⁴ணே தோ³வாரிக, கிம் மே த³ஹரகோ வேஜ்ஜோ கரிஸ்ஸதி? ப³ஹூ மஹந்தா மஹந்தா தி³ஸாபாமோக்கா² வேஜ்ஜா ஆக³ந்த்வா நாஸக்கி²ம்ஸு அரோக³ம் காதும். ப³ஹும் ஹிரஞ்ஞம் ஆதா³ய அக³மம்ஸூ’’’தி. ‘‘க³ச்ச², ப⁴ணே தோ³வாரிக, ஸேட்டி²ப⁴ரியாய பாவத³ – ‘வேஜ்ஜோ, அய்யே, ஏவமாஹ – மா கிர, அய்யே, புரே கிஞ்சி அதா³ஸி. யதா³ அரோகா³ அஹோஸி ததா³ யம் இச்சே²ய்யாஸி தம் த³ஜ்ஜேய்யாஸீ’’’தி. ‘‘ஏவம், ஆசரியா’’தி கோ² ஸோ தோ³வாரிகோ ஜீவகஸ்ஸ கோமாரப⁴ச்சஸ்ஸ படிஸ்ஸுத்வா யேன ஸேட்டி²ப⁴ரியா தேனுபஸங்கமி; உபஸங்கமித்வா ஸேட்டி²ப⁴ரியம் ஏதத³வோச – ‘‘வேஜ்ஜோ, அய்யே, ஏவமாஹ – ‘மா கிர, அய்யே, புரே கிஞ்சி அதா³ஸி. யதா³ அரோகா³ அஹோஸி ததா³ யம் இச்சே²ய்யாஸி தம் த³ஜ்ஜேய்யாஸீ’’’தி. ‘‘தேன ஹி, ப⁴ணே தோ³வாரிக, வேஜ்ஜோ ஆக³ச்ச²தூ’’தி. ‘‘ஏவம், அய்யே’’தி கோ² ஸோ தோ³வாரிகோ ஸேட்டி²ப⁴ரியாய படிஸ்ஸுத்வா யேன ஜீவகோ கோமாரப⁴ச்சோ தேனுபஸங்கமி, உபஸங்கமித்வா ஜீவகம் கோமாரப⁴ச்சம் ஏதத³வோச – ‘‘ஸேட்டி²ப⁴ரியா தம், ஆசரிய, பக்கோஸதீ’’தி.

அத² கோ² ஜீவகோ கோமாரப⁴ச்சோ யேன ஸேட்டி²ப⁴ரியா தேனுபஸங்கமி, உபஸங்கமித்வா ஸேட்டி²ப⁴ரியாய விகாரம் ஸல்லக்கே²த்வா ஸேட்டி²ப⁴ரியம் ஏதத³வோச – ‘‘பஸதேன, அய்யே, ஸப்பினா அத்தோ²’’தி. அத² கோ² ஸேட்டி²ப⁴ரியா ஜீவகஸ்ஸ கோமாரப⁴ச்சஸ்ஸ பஸதம் ஸப்பிம் தா³பேஸி. அத² கோ² ஜீவகோ கோமாரப⁴ச்சோ தம் பஸதம் ஸப்பிம் நானாபே⁴ஸஜ்ஜேஹி நிப்பசித்வா ஸேட்டி²ப⁴ரியம் மஞ்சகே உத்தானம் நிபாதேத்வா [நிபஜ்ஜாபேத்வா (ஸீ. ஸ்யா.)] நத்து²தோ அதா³ஸி. அத² கோ² தம் ஸப்பிம் நத்து²தோ தி³ன்னம் முக²தோ உக்³க³ஞ்சி². அத² கோ² ஸேட்டி²ப⁴ரியா படிக்³க³ஹே நிட்டு²பி⁴த்வா தா³ஸிம் ஆணாபேஸி – ‘‘ஹந்த³, ஜே, இமம் ஸப்பிம் பிசுனா க³ண்ஹாஹீ’’தி. அத² கோ² ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘அச்ச²ரியம் [அச்ச²ரியம் வத போ⁴ (ஸ்யா.)] யாவ லூகா²யம் க⁴ரணீ, யத்ர ஹி நாம இமம் ச²ட்³ட³னீயத⁴ம்மம் ஸப்பிம் பிசுனா கா³ஹாபேஸ்ஸதி. ப³ஹுகானி ச மே மஹக்³கா⁴னி [மஹக்³கா⁴னி மஹக்³கா⁴னி (ஸீ. ஸ்யா.)] பே⁴ஸஜ்ஜானி உபக³தானி. கிம்பி மாயம் கிஞ்சி [கஞ்சி (ஸ்யா.)] தே³ய்யத⁴ம்மம் த³ஸ்ஸதீ’’தி. அத² கோ² ஸேட்டி²ப⁴ரியா ஜீவகஸ்ஸ கோமாரப⁴ச்சஸ்ஸ விகாரம் ஸல்லக்கே²த்வா ஜீவகம் கோமாரப⁴ச்சம் ஏதத³வோச – ‘‘கிஸ்ஸ த்வம், ஆசரிய, விமனோஸீ’’தி? இத⁴ மே ஏதத³ஹோஸி – ‘‘அச்ச²ரியம் யாவ லூகா²யம் த⁴ரணீ, யத்ர ஹி நாம இமம் ச²ட்³ட³னீயத⁴ம்மம் ஸப்பிம் பிசுனா கா³ஹாபேஸ்ஸதி. ப³ஹுகானி ச மே மஹக்³கா⁴னி ஸஜ்ஜானி உபக³தானி. கிம்பி மாயம் கிஞ்சி தே³ய்யத⁴ம்மம் த³ஸ்ஸதீ’’தி. ‘‘மயம் கோ², ஆசரிய, ஆகா³ரிகா நாம உபஜானாமேதஸ்ஸ ஸம்யமஸ்ஸ. வரமேதம் ஸப்பி தா³ஸானம் வா கம்மகரானம் வா பாத³ப்³ப⁴ஞ்ஜனம் வா பதீ³பகரணே வா ஆஸித்தம். மா கோ² த்வம், ஆசரிய, விமனோ அஹோஸி. ந தே தே³ய்யத⁴ம்மோ ஹாயிஸ்ஸதீ’’தி. அத² கோ² ஜீவகோ கோமாரப⁴ச்சோ ஸேட்டி²ப⁴ரியாய ஸத்தவஸ்ஸிகம் ஸீஸாபா³த⁴ம் ஏகேனேவ நத்து²கம்மேன அபகட்³டி⁴. அத² கோ² ஸேட்டி²ப⁴ரியா அரோகா³ ஸமானா ஜீவகஸ்ஸ கோமாரப⁴ச்சஸ்ஸ சத்தாரி ஸஹஸ்ஸானி பாதா³ஸி. புத்தோ – மாதா மே அரோகா³ டி²தாதி சத்தாரி ஸஹஸ்ஸானி பாதா³ஸி. ஸுணிஸா – ஸஸ்ஸு மே அரோகா³ டி²தாதி சத்தாரி ஸஹஸ்ஸானி பாதா³ஸி. ஸேட்டி² க³ஹபதி – ப⁴ரியா மே அரோகா³ டி²தாதி சத்தாரி ஸஹஸ்ஸானி பாதா³ஸி தா³ஸஞ்ச தா³ஸிஞ்ச அஸ்ஸரத²ஞ்ச.

அத² கோ² ஜீவகோ கோமாரப⁴ச்சோ தானி ஸோளஸஸஹஸ்ஸானி ஆதா³ய தா³ஸஞ்ச தா³ஸிஞ்ச அஸ்ஸரத²ஞ்ச யேன ராஜக³ஹம் தேன பக்காமி. அனுபுப்³பே³ன யேன ராஜக³ஹம் யேன அப⁴யோ ராஜகுமாரோ தேனுபஸங்கமி, உபஸங்கமித்வா அப⁴யம் ராஜகுமாரம் ஏதத³வோச – ‘‘இத³ம் மே, தே³வ, பட²மகம்மம் ஸோளஸஸஹஸ்ஸானி தா³ஸோ ச தா³ஸீ ச அஸ்ஸரதோ² ச. படிக்³க³ண்ஹாது மே தே³வோ போஸாவனிக’’ந்தி. ‘‘அலம், ப⁴ணே ஜீவக; துய்ஹமேவ ஹோது. அம்ஹாகஞ்ஞேவ அந்தேபுரே நிவேஸனம் மாபேஹீ’’தி. ‘‘ஏவம், தே³வா’’தி கோ² ஜீவகோ கோமாரப⁴ச்சோ அப⁴யஸ்ஸ ராஜகுமாரஸ்ஸ படிஸ்ஸுத்வா அப⁴யஸ்ஸ ராஜகுமாரஸ்ஸ அந்தேபுரே நிவேஸனம் மாபேஸி.

ஸேட்டி²ப⁴ரியாவத்து² நிட்டி²தம்.