202. ஜீவகவத்து²

326. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன வேஸாலீ இத்³தா⁴ சேவ ஹோதி பி²தா [பீ²தா (ப³ஹூஸு)] ச ப³ஹுஜனா ச ஆகிண்ணமனுஸ்ஸா ச ஸுபி⁴க்கா² ச; ஸத்த ச பாஸாத³ஸஹஸ்ஸானி ஸத்த ச பாஸாத³ஸதானி ஸத்த ச பாஸாதா³; ஸத்த ச கூடாகா³ரஸஹஸ்ஸானி ஸத்த ச கூடாகா³ரஸதானி ஸத்த ச கூடாகா³ரானி; ஸத்த ச ஆராமஸஹஸ்ஸானி ஸத்த ச ஆராமஸதானி ஸத்த ச ஆராமா; ஸத்த ச போக்க²ரணீஸஹஸ்ஸானி ஸத்த ச போக்க²ரணீஸதானி ஸத்த ச போக்க²ரணியோ; அம்ப³பாலீ ச க³ணிகா அபி⁴ரூபா ஹோதி த³ஸ்ஸனீயா பாஸாதி³கா பரமாய வண்ணபோக்க²ரதாய ஸமன்னாக³தா, பத³க்கி²ணா [பத³க்கா² (ஸ்யா.)] நச்சே ச கீ³தே ச வாதி³தே ச, அபி⁴ஸடா அத்தி²கானம் அத்தி²கானம் மனுஸ்ஸானம் பஞ்ஞாஸாய ச ரத்திம் க³ச்ச²தி; தாய ச வேஸாலீ பி⁴ய்யோஸோமத்தாய உபஸோப⁴தி. அத² கோ² ராஜக³ஹகோ நேக³மோ வேஸாலிம் அக³மாஸி கேனசிதே³வ கரணீயேன. அத்³த³ஸா கோ² ராஜக³ஹகோ நேக³மோ வேஸாலிம் இத்³த⁴ஞ்சேவ பி²தஞ்ச ப³ஹுஜனஞ்ச ஆகிண்ணமனுஸ்ஸஞ்ச ஸுபி⁴க்க²ஞ்ச; ஸத்த ச பாஸாத³ஸஹஸ்ஸானி ஸத்த ச பாஸாத³ஸதானி ஸத்த ச பாஸாதே³; ஸத்த ச கூடாகா³ரஸஹஸ்ஸானி ஸத்த ச கூடாகா³ரஸதானி ஸத்த ச கூடாகா³ரானி; ஸத்த ச ஆராமஸஹஸ்ஸானி ஸத்த ச ஆராமஸதானி ஸத்த ச ஆராமே; ஸத்த ச போக்க²ரணீஸஹஸ்ஸானி ஸத்த ச போக்க²ரணீஸதானி ஸத்த ச போக்க²ரணியோ; அம்ப³பாலிஞ்ச க³ணிகம் அபி⁴ரூபம் த³ஸ்ஸனீயம் பாஸாதி³கம் பரமாய வண்ணபோக்க²ரதாய ஸமன்னாக³தம், பத³க்கி²ணம் [பத³க்க²ம் (ஸ்யா.)] நச்சே ச கீ³தே ச வாதி³தே ச, அபி⁴ஸடம் அத்தி²கானம் அத்தி²கானம் மனுஸ்ஸானம் பஞ்ஞாஸாய ச ரத்திம் க³ச்ச²ந்திம், தாய ச வேஸாலிம் பி⁴ய்யோஸோமத்தாய உபஸோப⁴ந்திம்.

327. அத² கோ² ராஜக³ஹகோ நேக³மோ வேஸாலியம் தம் கரணீயம் தீரேத்வா புனதே³வ ராஜக³ஹம் பச்சாக³ஞ்சி². யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி, உபஸங்கமித்வா ராஜானம் மாக³த⁴ம் ஸேனியம் பி³ம்பி³ஸாரம் ஏதத³வோச – ‘‘வேஸாலீ, தே³வ, இத்³தா⁴ சேவ பி²தா ச ப³ஹுஜனா ச ஆகிண்ணமனுஸ்ஸா ச ஸுபி⁴க்கா² ச; ஸத்த ச பாஸாத³ஸஹஸ்ஸானி…பே… தாய ச வேஸாலீ பி⁴ய்யோஸோமத்தாய உபஸோப⁴தி. ஸாது⁴, தே³வ, மயம்பி க³ணிகம் வுட்டா²பேஸ்ஸாமா’’தி [வுட்டா²பேய்யாம (க.)]. ‘‘தேன ஹி, ப⁴ணே, தாதி³ஸிம் குமாரிம் ஜானாத² யம் தும்ஹே க³ணிகம் வுட்டா²பேய்யாதா²’’தி. தேன கோ² பன ஸமயேன ராஜக³ஹே ஸாலவதீ நாம குமாரீ அபி⁴ரூபா ஹோதி த³ஸ்ஸனீயா பாஸாதி³கா பரமாய வண்ணபோக்க²ரதாய ஸமன்னாக³தா. அத² கோ² ராஜக³ஹகோ நேக³மோ ஸாலவதிம் குமாரிம் க³ணிகம் வுட்டா²பேஸி. அத² கோ² ஸாலவதீ க³ணிகா நசிரஸ்ஸேவ பத³க்கி²ணா அஹோஸி நச்சே ச கீ³தே ச வாதி³தே ச, அபி⁴ஸடா அத்தி²கானம் அத்தி²கானம் மனுஸ்ஸானம் படிஸதேன ச ரத்திம் க³ச்ச²தி. அத² கோ² ஸாலவதீ க³ணிகா நசிரஸ்ஸேவ க³ப்³பி⁴னீ அஹோஸி. அத² கோ² ஸாலவதியா க³ணிகாய ஏதத³ஹோஸி – ‘‘இத்தீ² கோ² க³ப்³பி⁴னீ புரிஸானம் அமனாபா. ஸசே மம் கோசி ஜானிஸ்ஸதி ஸாலவதீ க³ணிகா க³ப்³பி⁴னீதி, ஸப்³போ³ மே ஸக்காரோ ப⁴ஞ்ஜிஸ்ஸதி [பரிஹாயிஸ்ஸதி (ஸீ. ஸ்யா.)]. யம்னூனாஹம் கி³லானம் படிவேதே³ய்ய’’ந்தி. அத² கோ² ஸாலவதீ க³ணிகா தோ³வாரிகம் ஆணாபேஸி – ‘‘மா, ப⁴ணே தோ³வாரிக, கோசி புரிஸோ பாவிஸி. யோ ச மம் புச்ச²தி, ‘கி³லானா’தி படிவேதே³ஹீ’’தி. ‘‘ஏவம், அய்யே’’தி கோ² ஸோ தோ³வாரிகோ ஸாலவதியா க³ணிகாய பச்சஸ்ஸோஸி. அத² கோ² ஸாலவதீ க³ணிகா தஸ்ஸ க³ப்³ப⁴ஸ்ஸ பரிபாகமன்வாய புத்தம் விஜாயி. அத² கோ² ஸாலவதீ க³ணிகா தா³ஸிம் ஆணாபேஸி – ‘‘ஹந்த³, ஜே, இமம் தா³ரகம் கத்தரஸுப்பே பக்கி²பித்வா நீஹரித்வா ஸங்காரகூடே ச²ட்³டே³ஹீ’’தி. ‘‘ஏவம், அய்யே’’தி கோ² ஸா தா³ஸீ ஸாலவதியா க³ணிகாய படிஸ்ஸுத்வா தம் தா³ரகம் கத்தரஸுப்பே பக்கி²பித்வா நீஹரித்வா ஸங்காரகூடே ச²ட்³டே³ஸி.

328. தேன கோ² பன ஸமயேன அப⁴யோ நாம ராஜகுமாரோ காலஸ்ஸேவ ராஜுபட்டா²னம் க³ச்ச²ந்தோ அத்³த³ஸ தம் தா³ரகம் காகேஹி ஸம்பரிகிண்ணம், தி³ஸ்வான மனுஸ்ஸே புச்சி² – ‘‘கிம் ஏதம், ப⁴ணே, காகேஹி ஸம்பரிகிண்ண’’ந்தி? ‘‘தா³ரகோ, தே³வா’’தி. ‘‘ஜீவதி, ப⁴ணே’’தி? ‘‘ஜீவதி, தே³வா’’தி. ‘‘தேன ஹி, ப⁴ணே, தம் தா³ரகம் அம்ஹாகம் அந்தேபுரம் நேத்வா தா⁴தீனம் தே³த² போஸேது’’ந்தி. ‘‘ஏவம், தே³வா’’தி கோ² தே மனுஸ்ஸா அப⁴யஸ்ஸ ராஜகுமாரஸ்ஸ படிஸ்ஸுத்வா தம் தா³ரகம் அப⁴யஸ்ஸ ராஜகுமாரஸ்ஸ அந்தேபுரம் நேத்வா தா⁴தீனம் அத³ம்ஸு – ‘‘போஸேதா²’’தி. தஸ்ஸ ஜீவதீதி ‘ஜீவகோ’தி நாமம் அகம்ஸு. குமாரேன போஸாபிதோதி ‘கோமாரப⁴ச்சோ’தி நாமம் அகம்ஸு. அத² கோ² ஜீவகோ கோமாரப⁴ச்சோ நசிரஸ்ஸேவ விஞ்ஞுதம் பாபுணி. அத² கோ² ஜீவகோ கோமாரப⁴ச்சோ யேன அப⁴யோ ராஜகுமாரோ தேனுபஸங்கமி; உபஸங்கமித்வா அப⁴யம் ராஜகுமாரம் ஏதத³வோச – ‘‘கா மே, தே³வ, மாதா, கோ பிதா’’தி? ‘‘அஹம்பி கோ² தே, ப⁴ணே ஜீவக, மாதரம் ந ஜானாமி; அபி சாஹம் தே பிதா; மயாஸி [மயாபி (க.)] போஸாபிதோ’’தி. அத² கோ² ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமானி கோ² ராஜகுலானி ந ஸுகரானி அஸிப்பேன உபஜீவிதும். யம்னூனாஹம் ஸிப்பம் ஸிக்கே²ய்ய’’ந்தி.

329. தேன கோ² பன ஸமயேன தக்கஸிலாயம் [தக்கஸீலாயம் (க.)] தி³ஸாபாமோக்கோ² வேஜ்ஜோ படிவஸதி. அத² கோ² ஜீவகோ கோமாரப⁴ச்சோ அப⁴யம் ராஜகுமாரம் அனாபுச்சா² யேன தக்கஸிலா தேன பக்காமி. அனுபுப்³பே³ன யேன தக்கஸிலா, யேன வேஜ்ஜோ தேனுபஸங்கமி; உபஸங்கமித்வா தம் வேஜ்ஜம் ஏதத³வோச – ‘‘இச்சா²மஹம், ஆசரிய, ஸிப்பம் ஸிக்கி²து’’ந்தி. ‘‘தேன ஹி, ப⁴ணே ஜீவக, ஸிக்க²ஸ்ஸூ’’தி. அத² கோ² ஜீவகோ கோமாரப⁴ச்சோ ப³ஹுஞ்ச க³ண்ஹாதி லஹுஞ்ச க³ண்ஹாதி ஸுட்டு² ச உபதா⁴ரேதி, க³ஹிதஞ்சஸ்ஸ ந ஸம்முஸ்ஸதி [ந பமுஸ்ஸதி (ஸீ. ஸ்யா.)]. அத² கோ² ஜீவகஸ்ஸ கோமாரப⁴ச்சஸ்ஸ ஸத்தன்னம் வஸ்ஸானம் அச்சயேன ஏதத³ஹோஸி – ‘‘அஹம், கோ² ப³ஹுஞ்ச க³ண்ஹாமி லஹுஞ்ச க³ண்ஹாமி ஸுட்டு² ச உபதா⁴ரேமி, க³ஹிதஞ்ச மே ந ஸம்முஸ்ஸதி, ஸத்த ச மே வஸ்ஸானி அதீ⁴யந்தஸ்ஸ, நயிமஸ்ஸ ஸிப்பஸ்ஸ அந்தோ பஞ்ஞாயதி. கதா³ இமஸ்ஸ ஸிப்பஸ்ஸ அந்தோ பஞ்ஞாயிஸ்ஸதீ’’தி. அத² கோ² ஜீவகோ கோமாரப⁴ச்சோ யேன ஸோ வேஜ்ஜோ தேனுபஸங்கமி, உபஸங்கமித்வா தம் வேஜ்ஜம் ஏதத³வோச – ‘‘அஹம் கோ², ஆசரிய, ப³ஹுஞ்ச க³ண்ஹாமி லஹுஞ்ச க³ண்ஹாமி ஸுட்டு² ச உபதா⁴ரேமி, க³ஹிதஞ்ச மே ந ஸம்முஸ்ஸதி, ஸத்த ச மே வஸ்ஸானி அதீ⁴யந்தஸ்ஸ, நயிமஸ்ஸ ஸிப்பஸ்ஸ அந்தோ பஞ்ஞாயதி. கதா³ இமஸ்ஸ ஸிப்பஸ்ஸ அந்தோ பஞ்ஞாயிஸ்ஸதீ’’தி? ‘‘தேன ஹி, ப⁴ணே ஜீவக, க²ணித்திம் ஆதா³ய தக்கஸிலாய ஸமந்தா யோஜனம் ஆஹிண்டி³த்வா யம் கிஞ்சி அபே⁴ஸஜ்ஜம் பஸ்ஸேய்யாஸி தம் ஆஹரா’’தி. ‘‘ஏவம், ஆசரியா’’தி கோ² ஜீவகோ கோமாரப⁴ச்சோ தஸ்ஸ வேஜ்ஜஸ்ஸ படிஸ்ஸுத்வா க²ணித்திம் ஆதா³ய தக்கஸிலாய ஸமந்தா யோஜனம் ஆஹிண்ட³ந்தோ ந கிஞ்சி அபே⁴ஸஜ்ஜம் அத்³த³ஸ. அத² கோ² ஜீவகோ கோமாரப⁴ச்சோ யேன ஸோ வேஜ்ஜோ தேனுபஸங்கமி, உபஸங்கமித்வா தம் வேஜ்ஜம் ஏதத³வோச – ‘‘ஆஹிண்ட³ந்தோம்ஹி, ஆசரிய, தக்கஸிலாய ஸமந்தா யோஜனம், ந கிஞ்சி [ஆஹிண்டந்தோ ந கிஞ்சி (க.)] அபே⁴ஸஜ்ஜம் அத்³த³ஸ’’ந்தி. ‘‘ஸுஸிக்கி²தோஸி, ப⁴ணே ஜீவக. அலம் தே ஏத்தகம் ஜீவிகாயா’’தி ஜீவகஸ்ஸ கோமாரப⁴ச்சஸ்ஸ பரித்தம் பாதே²ய்யம் பாதா³ஸி. அத² கோ² ஜீவகோ கோமாரப⁴ச்சோ தம் பரித்தம் பாதே²ய்யம் ஆதா³ய யேன ராஜக³ஹம் தேன பக்காமி. அத² கோ² ஜீவகஸ்ஸ கோமாரப⁴ச்சஸ்ஸ தம் பரித்தம் பாதே²ய்யம் அந்தராமக்³கே³ ஸாகேதே பரிக்க²யம் அக³மாஸி. அத² கோ² ஜீவகஸ்ஸ கோமாரப⁴ச்சஸ்ஸ ஏதத³ஹோஸி – ‘‘இமே கோ² மக்³கா³ கந்தாரா அப்போத³கா அப்பப⁴க்கா², ந ஸுகரா அபாதே²ய்யேன க³ந்தும். யம்னூனாஹம் பாதே²ய்யம் பரியேஸேய்ய’’ந்தி.

ஜீவகவத்து² நிட்டி²தம்.