177. லிச்ச²வீவத்து²

289. [தீ³. நி. 2.161 ஆத³யோ] அஸ்ஸோஸும் கோ² வேஸாலிகா லிச்ச²வீ – ப⁴க³வா கிர கோடிகா³மம் அனுப்பத்தோதி. அத² கோ² வேஸாலிகா லிச்ச²வீ ப⁴த்³ரானி ப⁴த்³ரானி யானானி யோஜாபேத்வா ப⁴த்³ரம் ப⁴த்³ரம் யானம் அபி⁴ருஹித்வா ப⁴த்³ரேஹி ப⁴த்³ரேஹி யானேஹி வேஸாலியா நிய்யாஸும் ப⁴க³வந்தம் த³ஸ்ஸனாய. அப்பேகச்சே லிச்ச²வீ நீலா ஹோந்தி நீலவண்ணா நீலவத்தா² நீலாலங்காரா, அப்பேகச்சே லிச்ச²வீ பீதா ஹோந்தி பீதவண்ணா பீதவத்தா² பீதாலங்காரா, அப்பேகச்சே லிச்ச²வீ லோஹிதா ஹோந்தி லோஹிதவண்ணா லோஹிதவத்தா² லோஹிதாலங்காரா, அப்பேகச்சே லிச்ச²வீ ஓதா³தா ஹோந்தி ஓதா³தவண்ணா ஓதா³தவத்தா² ஓதா³தாலங்காரா. அத² கோ² அம்ப³பாலீ க³ணிகா த³ஹரானம் த³ஹரானம் லிச்ச²வீனம் ஈஸாய ஈஸம் யுகே³ன யுக³ம் சக்கேன சக்கம் அக்கே²ன அக்க²ம் படிவட்டேஸி [படிவத்தேஸி (க.)]. அத² கோ² தே லிச்ச²வீ அம்ப³பாலிம் க³ணிகம் ஏதத³வோசும் – ‘‘கிஸ்ஸ, ஜே அம்ப³பாலி, த³ஹரானம் த³ஹரானம் [அம்ஹாகம் த³ஹரானம் த³ஹரானம் (ஸீ. ஸ்யா.)] லிச்ச²வீனம் ஈஸாய ஈஸம் யுகே³ன யுக³ம் சக்கேன சக்கம் அக்கே²ன அக்க²ம் படிவட்டேஸீ’’தி? ‘‘ததா² ஹி பன மயா, அய்யபுத்தா, ஸ்வாதனாய பு³த்³த⁴ப்பமுகோ² பி⁴க்கு²ஸங்கோ⁴ நிமந்திதோ’’தி. ‘‘தே³ஹி, ஜே அம்ப³பாலி, அம்ஹாகம் ஏதம் ப⁴த்தம் ஸதஸஹஸ்ஸேனா’’தி. ‘‘ஸசேபி மே, அய்யபுத்தா, வேஸாலிம் ஸாஹாரம் த³ஜ்ஜேய்யாத², நேவ த³ஜ்ஜாஹம் தம் ப⁴த்த’’ந்தி. அத² கோ² தே லிச்ச²வீ அங்கு³லிம் போ²டேஸும் – ‘‘ஜிதம்ஹா வத, போ⁴, அம்ப³காய, பராஜிதம்ஹ வத, போ⁴, அம்ப³காயா’’தி. அத² கோ² தே லிச்ச²வீ யேன ப⁴க³வா தேனுபஸங்கமிம்ஸு. அத்³த³ஸா கோ² ப⁴க³வா தே லிச்ச²வீ தூ³ரதோவ ஆக³ச்ச²ந்தே, தி³ஸ்வான பி⁴க்கூ² ஆமந்தேஸி – ‘‘யேஹி, பி⁴க்க²வே, பி⁴க்கூ²ஹி தே³வா தாவதிம்ஸா அதி³ட்ட²புப்³பா³, ஓலோகேத², பி⁴க்க²வே, லிச்ச²வீபரிஸம்; அபலோகேத², பி⁴க்க²வே, லிச்ச²வீபரிஸம்; உபஸம்ஹரத², பி⁴க்க²வே, லிச்ச²வீபரிஸம் தாவதிம்ஸபரிஸ’’ந்தி. அத² கோ² தே லிச்ச²வீ யாவதிகா யானஸ்ஸ பூ⁴மி, யானேன க³ந்த்வா யானா பச்சோரோஹித்வா பத்திகாவ யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னே கோ² தே லிச்ச²வீ ப⁴க³வா த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² தே லிச்ச²வீ, ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹம்ஸிதா ப⁴க³வந்தம் ஏதத³வோசும் – ‘‘அதி⁴வாஸேது நோ, ப⁴ந்தே, ப⁴க³வா ஸ்வாதனாய ப⁴த்தம் ஸத்³தி⁴ம் பி⁴க்கு²ஸங்கே⁴னா’’தி. ‘‘அதி⁴வுட்டோ²ம்ஹி, லிச்ச²வீ, ஸ்வாதனாய அம்ப³பாலியா க³ணிகாய ப⁴த்த’’ந்தி. அத² கோ² தே லிச்ச²வீ அங்கு³லிம் போ²டேஸும் – ‘‘ஜிதம்ஹ வத, போ⁴, அம்ப³காய, பராஜிதம்ஹ வத, போ⁴, அம்ப³காயா’’தி. அத² கோ² தே லிச்ச²வீ ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்கமிம்ஸு.

அத² கோ² ப⁴க³வா கோடிகா³மே யதா²பி⁴ரந்தம் விஹரித்வா [மஹாபரினிப்³பா³னஸுத்தே அனுஸந்தி⁴ அஞ்ஞதா² ஆக³தோ] யேன நாதிகா [நாதி³கா (ஸீ. ஸ்யா.)] தேனுபஸங்கமி. தத்ர ஸுத³ம் ப⁴க³வா நாதிகே விஹரதி கி³ஞ்ஜகாவஸதே². அத² கோ² அம்ப³பாலீ க³ணிகா தஸ்ஸா ரத்தியா அச்சயேன ஸகே ஆராமே பணீதம் கா²த³னீயம் போ⁴ஜனீயம் படியாதா³பேத்வா ப⁴க³வதோ காலம் ஆரோசாபேஸி – ‘‘காலோ, ப⁴ந்தே, நிட்டி²தம் ப⁴த்த’’ந்தி. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன அம்ப³பாலியா க³ணிகாய பரிவேஸனா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. அத² கோ² அம்ப³பாலீ க³ணிகா பு³த்³த⁴ப்பமுக²ம் பி⁴க்கு²ஸங்க⁴ம் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேத்வா ஸம்பவாரேத்வா ப⁴க³வந்தம் பு⁴த்தாவிம் ஓனீதபத்தபாணிம் ஏகமந்தம் நிஸீதி³. ஏகமந்தம் நிஸின்னா கோ² அம்ப³பாலீ க³ணிகா ப⁴க³வந்தம் ஏதத³வோச – ‘‘இமாஹம், ப⁴ந்தே, அம்ப³வனம் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ த³ம்மீ’’தி. படிக்³க³ஹேஸி ப⁴க³வா ஆராமம். அத² கோ² ப⁴க³வா அம்ப³பாலிம் க³ணிகம் த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா யேன மஹாவனம் தேனுபஸங்கமி. தத்ர ஸுத³ம் ப⁴க³வா வேஸாலியம் விஹரதி மஹாவனே கூடாகா³ரஸாலாயம்.

லிச்ச²வீவத்து² நிட்டி²தம்.

லிச்ச²விபா⁴ணவாரோ நிட்டி²தோ ததியோ.