168. மனுஸ்ஸமம்ஸபடிக்கே²பகதா²

280. அத² கோ² ப⁴க³வா ராஜக³ஹே யதா²பி⁴ரந்தம் விஹரித்வா யேன பா³ராணஸீ தேன சாரிகம் பக்காமி. அனுபுப்³பே³ன சாரிகம் சரமானோ யேன பா³ராணஸீ தத³வஸரி. தத்ர ஸுத³ம் ப⁴க³வா பா³ராணஸியம் விஹரதி இஸிபதனே மிக³தா³யே. தேன கோ² பன ஸமயேன பா³ராணஸியம் ஸுப்பியோ ச உபாஸகோ ஸுப்பியா ச உபாஸிகா உப⁴தோபஸன்னா ஹோந்தி, தா³யகா, காரகா, ஸங்கு⁴பட்டா²கா. அத² கோ² ஸுப்பியா உபாஸிகா ஆராமம் க³ந்த்வா விஹாரேன விஹாரம் பரிவேணேன பரிவேணம் உபஸங்கமித்வா பி⁴க்கூ² புச்ச²தி – ‘‘கோ, ப⁴ந்தே, கி³லானோ, கஸ்ஸ கிம் ஆஹரியதூ’’தி? தேன கோ² பன ஸமயேன அஞ்ஞதரேன பி⁴க்கு²னா விரேசனம் பீதம் ஹோதி. அத² கோ² ஸோ பி⁴க்கு² ஸுப்பியம் உபாஸிகம் ஏதத³வோச – ‘‘மயா கோ², ப⁴கி³னி, விரேசனம் பீதம். அத்தோ² மே படிச்சா²த³னீயேனா’’தி. ‘‘ஸுட்டு², அய்ய, ஆஹரியிஸ்ஸதீ’’தி க⁴ரம் க³ந்த்வா அந்தேவாஸிம் ஆணாபேஸி – ‘‘க³ச்ச², ப⁴ணே, பவத்தமம்ஸம் ஜானாஹீ’’தி. ஏவம், அய்யேதி கோ² ஸோ புரிஸோ ஸுப்பியாய உபாஸிகாய படிஸ்ஸுணித்வா கேவலகப்பம் பா³ராணஸிம் ஆஹிண்ட³ந்தோ ந அத்³த³ஸ பவத்தமம்ஸம். அத² கோ² ஸோ புரிஸோ யேன ஸுப்பியா உபாஸிகா தேனுபஸங்கமி, உபஸங்கமித்வா ஸுப்பியம் உபாஸிகம் ஏதத³வோச – ‘‘நத்த²ய்யே பவத்தமம்ஸம். மாகா⁴தோ அஜ்ஜா’’தி. அத² கோ² ஸுப்பியாய உபாஸிகாய ஏதத³ஹோஸி – ‘‘தஸ்ஸ கோ² கி³லானஸ்ஸ பி⁴க்கு²னோ படிச்சா²த³னீயம் அலப⁴ந்தஸ்ஸ ஆபா³தோ⁴ வா அபி⁴வட்³டி⁴ஸ்ஸதி, காலங்கிரியா வா ப⁴விஸ்ஸதி. ந கோ² மேதம் பதிரூபம் யாஹம் படிஸ்ஸுணித்வா ந ஹராபேய்ய’’ந்தி. போத்த²னிகம் க³ஹேத்வா ஊருமம்ஸம் உக்கந்தித்வா தா³ஸியா அதா³ஸி – ‘‘ஹந்த³, ஜே, இமம் மம்ஸம் ஸம்பாதே³த்வா அமுகஸ்மிம் விஹாரே பி⁴க்கு² கி³லானோ, தஸ்ஸ த³ஜ்ஜாஹி. யோ ச மம் புச்ச²தி, ‘கி³லானா’தி படிவேதே³ஹீ’’தி. உத்தராஸங்கே³ன ஊரும் வேடே²த்வா ஓவரகம் பவிஸித்வா மஞ்சகே நிபஜ்ஜி. அத² கோ² ஸுப்பியோ உபாஸகோ க⁴ரம் க³ந்த்வா தா³ஸிம் புச்சி² – ‘‘கஹம் ஸுப்பியா’’தி? ‘‘ஏஸாய்ய ஓவரகே நிபன்னா’’தி. அத² கோ² ஸுப்பியோ உபாஸகோ யேன ஸுப்பியா உபாஸிகா தேனுபஸங்கமி, உபஸங்கமித்வா ஸுப்பியம் உபாஸிகம் ஏதத³வோச – ‘‘கிஸ்ஸ நிபன்னாஸீ’’தி? ‘‘கி³லானாம்ஹீ’’தி. ‘‘கிம் தே ஆபா³தோ⁴’’தி? அத² கோ² ஸுப்பியா உபாஸிகா ஸுப்பியஸ்ஸ உபாஸகஸ்ஸ ஏதமத்த²ம் ஆரோசேஸி. அத² கோ² ஸுப்பியோ உபாஸகோ – அச்ச²ரியம் வத போ⁴! அப்³பு⁴தம் வத போ⁴! யாவ ஸத்³தா⁴யம் ஸுப்பியா பஸன்னா, யத்ர ஹி நாம அத்தனோபி மம்ஸானி பரிச்சத்தானி! கிம்பிமாய [கிம் பனிமாய (ஸீ. ஸ்யா.)] அஞ்ஞம் கிஞ்சி அதே³ய்யம் ப⁴விஸ்ஸதீதி – ஹட்டோ² உத³க்³கோ³ யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸுப்பியோ உபாஸகோ ப⁴க³வந்தம் ஏதத³வோச – ‘‘அதி⁴வாஸேது மே, ப⁴ந்தே, ப⁴க³வா ஸ்வாதனாய ப⁴த்தம், ஸத்³தி⁴ம் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² ஸுப்பியோ உபாஸகோ ப⁴க³வதோ அதி⁴வாஸனம் விதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ஸுப்பியோ உபாஸகோ தஸ்ஸா ரத்தியா அச்சயேன பணீதம் கா²த³னீயம் போ⁴ஜனீயம் படியாதா³பேத்வா ப⁴க³வதோ காலம் ஆரோசாபேஸி – ‘‘காலோ, ப⁴ந்தே, நிட்டி²தம் ப⁴த்த’’ந்தி. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய யேன ஸுப்பியஸ்ஸ உபாஸகஸ்ஸ நிவேஸனம் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³, ஸத்³தி⁴ம் பி⁴க்கு²ஸங்கே⁴ன. அத² கோ² ஸுப்பியோ உபாஸகோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தம் கோ² ஸுப்பியம் உபாஸகம் ப⁴க³வா ஏதத³வோச – ‘‘கஹம் ஸுப்பியா’’தி? ‘‘கி³லானா ப⁴க³வா’’தி. ‘‘தேன ஹி ஆக³ச்ச²தூ’’தி. ‘‘ந ப⁴க³வா உஸ்ஸஹதீ’’தி. ‘‘தேன ஹி பரிக்³க³ஹேத்வாபி ஆனேதா²’’தி. அத² கோ² ஸுப்பியோ உபாஸகோ ஸுப்பியம் உபாஸிகம் பரிக்³க³ஹேத்வா ஆனேஸி. தஸ்ஸா, ஸஹ த³ஸ்ஸனேன ப⁴க³வதோ, தாவ மஹாவணோ ருளஹோ அஹோஸி, ஸுச்ச²விலோமஜாதோ. அத² கோ² ஸுப்பியோ ச உபாஸகோ ஸுப்பியா ச உபாஸிகா – ‘‘அச்ச²ரியம் வத போ⁴! அப்³பு⁴தம் வத போ⁴! ததா²க³தஸ்ஸ மஹித்³தி⁴கதா மஹானுபா⁴வதா, யத்ர ஹி நாம ஸஹ த³ஸ்ஸனேன ப⁴க³வதோ தாவ மஹாவணோ ருளஹோ ப⁴விஸ்ஸதி, ஸுச்ச²விலோமஜாதோ’’தி – ஹட்டா² உத³க்³கா³ பு³த்³த⁴ப்பமுக²ம் பி⁴க்கு²ஸங்க⁴ம் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேத்வா ஸம்பவாரேத்வா ப⁴க³வந்தம் பு⁴த்தாவிம் ஓனீதபத்தபாணிம் ஏகமந்தம் நிஸீதி³ம்ஸு. அத² கோ² ப⁴க³வா ஸுப்பியஞ்ச உபாஸகம் ஸுப்பியஞ்ச உபாஸிகம் த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி.

அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா பி⁴க்கூ²

படிபுச்சி² – ‘‘கோ, பி⁴க்க²வே, ஸுப்பியம் உபாஸிகம் மம்ஸம் விஞ்ஞாபேஸீ’’தி? ஏவம் வுத்தே ஸோ பி⁴க்கு² ப⁴க³வந்தம் ஏதத³வோச – ‘‘அஹம் கோ², ப⁴ந்தே, ஸுப்பியம் உபாஸிகம் மம்ஸம் விஞ்ஞாபேஸி’’ந்தி. ‘‘ஆஹரியித்த² பி⁴க்கூ²’’தி? ‘‘ஆஹரியித்த² ப⁴க³வா’’தி. ‘‘பரிபு⁴ஞ்ஜி த்வம் பி⁴க்கூ²’’தி? ‘‘பரிபு⁴ஞ்ஜாமஹம் ப⁴க³வா’’தி. ‘‘படிவேக்கி² த்வம் பி⁴க்கூ²’’தி? ‘‘நாஹம் ப⁴க³வா படிவேக்கி²’’ந்தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, அப்படிவேக்கி²த்வா மம்ஸம் பரிபு⁴ஞ்ஜிஸ்ஸஸி. மனுஸ்ஸமம்ஸம் கோ² தயா, மோக⁴புரிஸ, பரிபு⁴த்தம். நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ஸந்தி, பி⁴க்க²வே, மனுஸ்ஸா ஸத்³தா⁴ பஸன்னா, தேஹி அத்தனோபி மம்ஸானி பரிச்சத்தானி. ந, பி⁴க்க²வே, மனுஸ்ஸமம்ஸம் பரிபு⁴ஞ்ஜிதப்³ப³ம். யோ பரிபு⁴ஞ்ஜேய்ய, ஆபத்தி து²ல்லச்சயஸ்ஸ. ந ச, பி⁴க்க²வே, அப்படிவேக்கி²த்வா மம்ஸம் பரிபு⁴ஞ்ஜிதப்³ப³ம். யோ பரிபு⁴ஞ்ஜேய்ய, ஆபத்தி து³க்கடஸ்ஸா’’தி.

மனுஸ்ஸமம்ஸபடிக்கே²பகதா² நிட்டி²தா.