166. படிக்³க³ஹிதாதி³அனுஜானனா

277. [பாசி. 295] தேன கோ² பன ஸமயேன ஆயஸ்மதோ உபனந்த³ஸ்ஸ ஸக்யபுத்தஸ்ஸ உபட்டா²ககுலம் ஸங்க⁴ஸ்ஸத்தா²ய கா²த³னீயம் பாஹேஸி – அய்யஸ்ஸ உபனந்த³ஸ்ஸ த³ஸ்ஸேத்வா ஸங்க⁴ஸ்ஸ தா³தப்³ப³ந்தி. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ கா³மம் பிண்டா³ய பவிட்டோ² ஹோதி. அத² கோ² தே மனுஸ்ஸா ஆராமம் க³ந்த்வா பி⁴க்கூ² புச்சி²ம்ஸு – ‘‘கஹம், ப⁴ந்தே, அய்யோ உபனந்தோ³’’தி? ‘‘ஏஸாவுஸோ, ஆயஸ்மா உபனந்தோ³ ஸக்யபுத்தோ கா³மம் பிண்டா³ய பவிட்டோ²’’தி. ‘‘இத³ம், ப⁴ந்தே, கா²த³னீயம் அய்யஸ்ஸ உபனந்த³ஸ்ஸ த³ஸ்ஸேத்வா ஸங்க⁴ஸ்ஸ தா³தப்³ப³’’ந்தி. ப⁴க³வதோ ஏதமத்த²ம் ஆரோசேஸும். தேன ஹி, பி⁴க்க²வே, படிக்³க³ஹேத்வா நிக்கி²பத² யாவ உபனந்தோ³ ஆக³ச்ச²தீதி. அத² கோ² ஆயஸ்மா உபனந்தோ³ ஸக்யபுத்தோ புரேப⁴த்தம் குலானி பயிருபாஸித்வா தி³வா ஆக³ச்ச²தி. தேன கோ² பன ஸமயேன பி⁴க்கூ² து³ப்³பி⁴க்கே² அப்பமத்தகேபி பவாரேந்தி, படிஸங்கா²பி படிக்கி²பந்தி, ஸப்³போ³ ச ஸங்கோ⁴ பவாரிதோ ஹோதி, பி⁴க்கூ² குக்குச்சாயந்தா ந படிக்³க³ண்ஹந்தி. படிக்³க³ண்ஹத², பி⁴க்க²வே, பரிபு⁴ஞ்ஜத². அனுஜானாமி, பி⁴க்க²வே, புரேப⁴த்தம் படிக்³க³ஹிதம் பு⁴த்தாவினா பவாரிதேன அனதிரித்தம் பரிபு⁴ஞ்ஜிதுந்தி.

278. அத² கோ² ப⁴க³வா ராஜக³ஹே யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. அனுபுப்³பே³ன சாரிகம் சரமானோ யேன ஸாவத்தி² தத³வஸரி. தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மதோ ஸாரிபுத்தஸ்ஸ காயடா³ஹாபா³தோ⁴ ஹோதி. அத² கோ² ஆயஸ்மா மஹாமோக்³க³ல்லானோ யேனாயஸ்மா ஸாரிபுத்தோ தேனுபஸங்கமி, உபஸங்கமித்வா ஆயஸ்மந்தம் ஸாரிபுத்தம் ஏதத³வோச – ‘‘புப்³பே³ தே, ஆவுஸோ ஸாரிபுத்த, காயடா³ஹாபா³தோ⁴ கேன பா²ஸு ஹோதீ’’தி? ‘‘பி⁴ஸேஹி ச மே, ஆவுஸோ, முளாலிகாஹி சா’’தி. அத² கோ² ஆயஸ்மா மஹாமோக்³க³ல்லானோ ஸேய்யதா²பி நாம ப³லவா புரிஸோ ஸம்மிஞ்ஜிதம் வா பா³ஹம் பஸாரேய்ய, பஸாரிதம் வா பா³ஹம் ஸமிஞ்ஜேய்ய, ஏவமேவ ஜேதவனே அந்தரஹிதோ மந்தா³கினியா போக்க²ரணியா தீரே பாதுரஹோஸி. அத்³த³ஸா கோ² அஞ்ஞதரோ நாகோ³ ஆயஸ்மந்தம் மஹாமோக்³க³ல்லானம் தூ³ரதோவ ஆக³ச்ச²ந்தம், தி³ஸ்வான ஆயஸ்மந்தம் மஹாமோக்³க³ல்லானம் ஏதத³வோச – ‘‘ஏது கோ², ப⁴ந்தே, அய்யோ மஹாமோக்³க³ல்லானோ. ஸ்வாக³தம், ப⁴ந்தே, அய்யஸ்ஸ மஹாமோக்³க³ல்லானஸ்ஸ. கேன, ப⁴ந்தே, அய்யஸ்ஸ அத்தோ²; கிம் த³ம்மீ’’தி? ‘‘பி⁴ஸேஹி ச மே, ஆவுஸோ, அத்தோ², முளாலிகாஹி சா’’தி. அத² கோ² ஸோ நாகோ³ அஞ்ஞதரம் நாக³ம் ஆணாபேஸி – ‘‘தேன ஹி, ப⁴ணே, அய்யஸ்ஸ பி⁴ஸே ச முளாலிகாயோ ச யாவத³த்த²ம் தே³ஹீ’’தி. அத² கோ² ஸோ நாகோ³ மந்தா³கினிம் போக்க²ரணிம் ஓகா³ஹேத்வா, ஸோண்டா³ய பி⁴ஸஞ்ச முளாலிகஞ்ச அப்³பா³ஹித்வா, ஸுவிக்கா²லிதம் விக்கா²லேத்வா, ப⁴ண்டி³கம் ப³ந்தி⁴த்வா யேனாயஸ்மா மஹாமோக்³க³ல்லானோ தேனுபஸங்கமி. அத² கோ² ஆயஸ்மா மஹாமோக்³க³ல்லானோ – ஸேய்யதா²பி நாம ப³லவா புரிஸோ ஸமிஞ்ஜிதம் வா பா³ஹம் பஸாரேய்ய, பஸாரிதம் வா பா³ஹம் ஸமிஞ்ஜேய்ய, ஏவமேவ – மந்தா³கினியா போக்க²ரணியா தீரே அந்தரஹிதோ ஜேதவனே பாதுரஹோஸி. ஸோபி கோ² நாகோ³ மந்தா³கினியா போக்க²ரணியா தீரே அந்தரஹிதோ ஜேதவனே பாதுரஹோஸி. அத² கோ² ஸோ நாகோ³ ஆயஸ்மதோ மஹாமோக்³க³ல்லானஸ்ஸ பி⁴ஸே ச முளாலிகாயோ ச படிக்³க³ஹாபேத்வா ஜேதவனே அந்தரஹிதோ மந்தா³கினியா போக்க²ரணியா தீரே பாதுரஹோஸி. அத² கோ² ஆயஸ்மா மஹாமோக்³க³ல்லானோ ஆயஸ்மதோ ஸாரிபுத்தஸ்ஸ பி⁴ஸே ச முளாலிகாயோ ச உபனாமேஸி. அத² கோ² ஆயஸ்மதோ ஸாரிபுத்தஸ்ஸ பி⁴ஸே ச முளாலிகாயோ ச பு⁴த்தஸ்ஸ காயடா³ஹாபா³தோ⁴ படிப்பஸ்ஸம்பி⁴. ப³ஹூ பி⁴ஸா ச முளாலிகாயோ ச அவஸிட்டா² ஹோந்தி. தேன கோ² பன ஸமயேன பி⁴க்கூ² து³ப்³பி⁴க்கே² அப்பமத்தகேபி பவாரேந்தி, படிஸங்கா²பி படிக்கி²பந்தி, ஸப்³போ³ ச ஸங்கோ⁴ பவாரிதோ ஹோதி. பி⁴க்கூ² குக்குச்சாயந்தா ந படிக்³க³ண்ஹந்தி. படிக்³க³ண்ஹத², பி⁴க்க²வே, பரிபு⁴ஞ்ஜத². அனுஜானாமி, பி⁴க்க²வே, வனட்ட²ம் போக்க²ரட்ட²ம் பு⁴த்தாவினா பவாரிதேன அனதிரித்தம் பரிபு⁴ஞ்ஜிதுந்தி.

தேன கோ² பன ஸமயேன ஸாவத்தி²யம் ப³ஹும் ப²லகா²த³னீயம் உப்பன்னம் ஹோதி, கப்பியகாரகோ ச ந ஹோதி. பி⁴க்கூ² குக்குச்சாயந்தா ப²லம் ந பரிபு⁴ஞ்ஜந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, அபீ³ஜம் நிப்³ப³த்தபீ³ஜம் [நிப்³ப³ட்டபீ³ஜம் (ஸீ.), நிப்³ப³டபீ³ஜம் (ஸ்யா.), நிப்பட்டபீ³ஜம் (க.)] அகதகப்பம் ப²லம் பரிபு⁴ஞ்ஜிதுந்தி.

படிக்³க³ஹிதாதி³ அனுஜானனா நிட்டி²தா.