143. வத்து²ட²பனாதி³

239. இத⁴ பன, பி⁴க்க²வே, பி⁴க்கு² தத³ஹு பவாரணாய ஸங்க⁴மஜ்ஜே² உதா³ஹரேய்ய – ‘‘ஸுணாது மே, ப⁴ந்தே, ஸங்கோ⁴. இத³ம் வத்து² பஞ்ஞாயதி, ந புக்³க³லோ. யதி³ ஸங்க⁴ஸ்ஸ பத்தகல்லம், வத்து²ம் ட²பேத்வா ஸங்கோ⁴ பவாரேய்யா’’தி. ஸோ ஏவமஸ்ஸ வசனீயோ – ‘‘ப⁴க³வதா கோ², ஆவுஸோ, விஸுத்³தா⁴னம் பவாரணா பஞ்ஞத்தா. ஸசே வத்து² பஞ்ஞாயதி, ந புக்³க³லோ, இதா³னேவ நம் வதே³ஹீ’’தி.

இத⁴ பன, பி⁴க்க²வே, பி⁴க்கு² தத³ஹு பவாரணாய ஸங்க⁴மஜ்ஜே² உதா³ஹரேய்ய – ‘‘ஸுணாது மே, ப⁴ந்தே, ஸங்கோ⁴. அயம் புக்³க³லோ பஞ்ஞாயதி, ந வத்து². யதி³ ஸங்க⁴ஸ்ஸ பத்தகல்லம், புக்³க³லம் ட²பேத்வா ஸங்கோ⁴ பவாரேய்யா’’தி. ஸோ ஏவமஸ்ஸ வசனீயோ – ‘‘ப⁴க³வதா கோ², ஆவுஸோ, ஸமக்³கா³னம் பவாரணா பஞ்ஞத்தா. ஸசே புக்³க³லோ பஞ்ஞாயதி, ந வத்து², இதா³னேவ நம் வதே³ஹீ’’தி.

இத⁴ பன, பி⁴க்க²வே, பி⁴க்கு² தத³ஹு பவாரணாய ஸங்க⁴மஜ்ஜே² உதா³ஹரேய்ய – ‘‘ஸுணாது மே, ப⁴ந்தே, ஸங்கோ⁴. இத³ம் வத்து² ச புக்³க³லோ ச பஞ்ஞாயதி. யதி³ ஸங்க⁴ஸ்ஸ பத்தகல்லம், வத்து²ஞ்ச புக்³க³லஞ்ச ட²பேத்வா ஸங்கோ⁴ பவாரேய்யா’’தி. ஸோ ஏவமஸ்ஸ வசனீயோ – ‘‘ப⁴க³வதா கோ², ஆவுஸோ, விஸுத்³தா⁴னஞ்ச ஸமக்³கா³னஞ்ச பவாரணா பஞ்ஞத்தா. ஸசே வத்து² ச புக்³க³லோ ச பஞ்ஞாயதி, இதா³னேவ நம் வதே³ஹீ’’தி.

புப்³பே³ சே, பி⁴க்க²வே, பவாரணாய வத்து² பஞ்ஞாயதி, பச்சா² புக்³க³லோ, கல்லம் வசனாய. புப்³பே³ சே, பி⁴க்க²வே, பவாரணாய புக்³க³லோ பஞ்ஞாயதி, பச்சா² வத்து², கல்லம் வசனாய. புப்³பே³ சே, பி⁴க்க²வே, பவாரணாய வத்து² ச புக்³க³லோ ச பஞ்ஞாயதி, தம் சே கதாய பவாரணாய உக்கோடேதி, உக்கோடனகம் பாசித்தியந்தி.

வத்து²ட²பனாதி³ நிட்டி²தா.