139. வஜ்ஜனீயபுக்³க³லஸந்த³ஸ்ஸனா

233. ந, பி⁴க்க²வே, பி⁴க்கு²னியா நிஸின்னபரிஸாய பவாரேதப்³ப³ம். யோ பவாரேய்ய, ஆபத்தி து³க்கடஸ்ஸ. ந, பி⁴க்க²வே, ஸிக்க²மானாய…பே… ந ஸாமணேரஸ்ஸ…பே… ந ஸாமணேரியா…பே… ந ஸிக்க²ம் பச்சக்கா²தகஸ்ஸ…பே… ந அந்திமவத்து²ம் அஜ்ஜா²பன்னகஸ்ஸ நிஸின்னபரிஸாய பவாரேதப்³ப³ம். யோ பவாரேய்ய, ஆபத்தி து³க்கடஸ்ஸ.

ந ஆபத்தியா அத³ஸ்ஸனே உக்கி²த்தகஸ்ஸ நிஸின்னபரிஸாய பவாரேதப்³ப³ம். யோ பவாரேய்ய, யதா²த⁴ம்மோ காரேதப்³போ³. ந ஆபத்தியா அப்படிகம்மே உக்கி²த்தகஸ்ஸ…பே… ந பாபிகாய தி³ட்டி²யா அப்படினிஸ்ஸக்³கே³ உக்கி²த்தகஸ்ஸ நிஸின்னபரிஸாய பவாரேதப்³ப³ம். யோ பவாரேய்ய, யதா²த⁴ம்மோ காரேதப்³போ³.

ந பண்ட³கஸ்ஸ நிஸின்னபரிஸாய பவாரேதப்³ப³ம். யோ பவாரேய்ய, ஆபத்தி து³க்கடஸ்ஸ. ந தே²ய்யஸம்வாஸகஸ்ஸ…பே… ந தித்தி²யபக்கந்தகஸ்ஸ…பே… ந திரச்சா²னக³தஸ்ஸ…பே… ந மாதுகா⁴தகஸ்ஸ…பே… ந பிதுகா⁴தகஸ்ஸ…பே… ந அரஹந்தகா⁴தகஸ்ஸ…பே… ந பி⁴க்கு²னிதூ³ஸகஸ்ஸ …பே… ந ஸங்க⁴பே⁴த³கஸ்ஸ…பே… ந லோஹிதுப்பாத³கஸ்ஸ …பே… ந உப⁴தோப்³யஞ்ஜனகஸ்ஸ நிஸின்னபரிஸாய பவாரேதப்³ப³ம். யோ பவாரேய்ய, ஆபத்தி து³க்கடஸ்ஸ.

ந, பி⁴க்க²வே, பாரிவாஸிகபவாரணாதா³னேன பவாரேதப்³ப³ம், அஞ்ஞத்ர அவுட்டி²தாய பரிஸாய. ந ச, பி⁴க்க²வே, அப்பவாரணாய பவாரேதப்³ப³ம், அஞ்ஞத்ர ஸங்க⁴ஸாமக்³கி³யாதி.

வஜ்ஜனீயபுக்³க³லஸந்த³ஸ்ஸனா நிட்டி²தா.

து³தியபா⁴ணவாரோ நிட்டி²தோ.