124. ஸங்க⁴பவாரணாதி³ப்பபே⁴தா³

215. தேன கோ² பன ஸமயேன அஞ்ஞதரஸ்மிம் ஆவாஸே தத³ஹு பவாரணாய பஞ்ச பி⁴க்கூ² விஹரந்தி. அத² கோ² தேஸம் பி⁴க்கூ²னம் ஏதத³ஹோஸி – ‘‘ப⁴க³வதா பஞ்ஞத்தம் ‘ஸங்கே⁴ன பவாரேதப்³ப³’ந்தி. மயஞ்சம்ஹா பஞ்ச ஜனா. கத²ம் நு கோ² அம்ஹேஹி பவாரேதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பஞ்சன்னம் ஸங்கே⁴ பவாரேதுந்தி.

216. தேன கோ² பன ஸமயேன அஞ்ஞதரஸ்மிம் ஆவாஸே தத³ஹு பவாரணாய சத்தாரோ பி⁴க்கூ² விஹரந்தி. அத² கோ² தேஸம் பி⁴க்கூ²னம் ஏதத³ஹோஸி – ‘‘ப⁴க³வதா அனுஞ்ஞாதம் பஞ்சன்னம் ஸங்கே⁴ பவாரேதுந்தி. மயஞ்சம்ஹா சத்தாரோ ஜனா. கத²ம் நு கோ² அம்ஹேஹி பவாரேதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, சதுன்னம் அஞ்ஞமஞ்ஞம் பவாரேதும். ஏவஞ்ச பன, பி⁴க்க²வே, பவாரேதப்³ப³ம். ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³ –

‘‘ஸுணந்து மே ஆயஸ்மந்தோ. அஜ்ஜ பவாரணா. யதா³யஸ்மந்தானம் பத்தகல்லம், மயம் அஞ்ஞமஞ்ஞம் பவாரேய்யாமா’’தி.

தே²ரேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா தே பி⁴க்கூ² ஏவமஸ்ஸு வசனீயா – ‘‘அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

நவகேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா தே பி⁴க்கூ² ஏவமஸ்ஸு வசனீயா – ‘‘அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தோ அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

தேன கோ² பன ஸமயேன அஞ்ஞதரஸ்மிம் ஆவாஸே தத³ஹு பவாரணாய தயோ பி⁴க்கூ² விஹரந்தி. அத² கோ² தேஸம் பி⁴க்கூ²னம் ஏதத³ஹோஸி – ‘‘ப⁴க³வதா அனுஞ்ஞாதம் பஞ்சன்னம் ஸங்கே⁴ பவாரேதும், சதுன்னம் அஞ்ஞமஞ்ஞம் பவாரேதும். மயஞ்சம்ஹா தயோ ஜனா. கத²ம் நு கோ² அம்ஹேஹி பவாரேதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, திண்ணம் அஞ்ஞமஞ்ஞம் பவாரேதும். ஏவஞ்ச பன, பி⁴க்க²வே, பவாரேதப்³ப³ம். ப்³யத்தேன பி⁴க்கு²னா படிப³லேன தே பி⁴க்கூ² ஞாபேதப்³பா³ –

‘‘ஸுணந்து மே ஆயஸ்மந்தா. அஜ்ஜ பவாரணா. யதா³யஸ்மந்தானம் பத்தகல்லம், மயம் அஞ்ஞமஞ்ஞம் பவாரேய்யாமா’’தி.

தே²ரேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா தே பி⁴க்கூ² ஏவமஸ்ஸு வசனீயா – ‘‘அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தா அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தா அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

நவகேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா தே பி⁴க்கூ² ஏவமஸ்ஸு வசனீயா – ‘‘அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தா அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா. வத³ந்து மம் ஆயஸ்மந்தா அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

217. தேன கோ² பன ஸமயேன அஞ்ஞதரஸ்மிம் ஆவாஸே தத³ஹு பவாரணாய த்³வே பி⁴க்கூ² விஹரந்தி. அத² கோ² தேஸம் பி⁴க்கூ²னம் ஏதத³ஹோஸி – ‘‘ப⁴க³வதா அனுஞ்ஞாதம் பஞ்சன்னம் ஸங்கே⁴ பவாரேதும், சதுன்னம் அஞ்ஞமஞ்ஞம் பவாரேதும், திண்ணம் அஞ்ஞமஞ்ஞம் பவாரேதும். மயஞ்சம்ஹா த்³வே ஜனா. கத²ம் நு கோ² அம்ஹேஹி பவாரேதப்³ப³’’ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, த்³வின்னம் அஞ்ஞமஞ்ஞம் பவாரேதும். ஏவஞ்ச பன, பி⁴க்க²வே, பவாரேதப்³ப³ம். தே²ரேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா நவோ பி⁴க்கு² ஏவமஸ்ஸ வசனீயோ – ‘‘அஹம், ஆவுஸோ, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா. வத³து மம் ஆயஸ்மா அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ஆவுஸோ, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா. வத³து மம் ஆயஸ்மா அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

நவகேன பி⁴க்கு²னா ஏகம்ஸம் உத்தராஸங்க³ம் கரித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா தே²ரோ பி⁴க்கு² ஏவமஸ்ஸ வசனீயோ – ‘‘அஹம், ப⁴ந்தே, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா. வத³து மம் ஆயஸ்மா அனுகம்பம் உபாதா³ய. பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ப⁴ந்தே, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா. வத³து மம் ஆயஸ்மா அனுகம்பம் உபாதா³ய. பஸ்ஸந்தோ படிகரிஸ்ஸாமீ’’தி.

218. தேன கோ² பன ஸமயேன அஞ்ஞதரஸ்மிம் ஆவாஸே தத³ஹு பவாரணாய ஏகோ பி⁴க்கு² விஹரதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா அனுஞ்ஞாதம் பஞ்சன்னம் ஸங்கே⁴ பவாரேதும், சதுன்னம் அஞ்ஞமஞ்ஞம் பவாரேதும், திண்ணம் அஞ்ஞமஞ்ஞம் பவாரேதும், த்³வின்னம் அஞ்ஞமஞ்ஞம் பவாரேதும். அஹஞ்சம்ஹி ஏககோ. கத²ம் நு கோ² மயா பவாரேதப்³ப³’’ந்தி? ப⁴க³வதோ ஏதமத்த²ம் ஆரோசேஸும்.

இத⁴ பன, பி⁴க்க²வே, அஞ்ஞதரஸ்மிம் ஆவாஸே தத³ஹு பவாரணாய ஏகோ பி⁴க்கு² விஹரதி. தேன, பி⁴க்க²வே, பி⁴க்கு²னா யத்த² பி⁴க்கூ² படிக்கமந்தி உபட்டா²னஸாலாய வா மண்ட³பே வா ருக்க²மூலே வா, ஸோ தே³ஸோ ஸம்மஜ்ஜித்வா பானீயம் பரிபோ⁴ஜனீயம் உபட்டா²பேத்வா ஆஸனம் பஞ்ஞபேத்வா பதீ³பம் கத்வா நிஸீதி³தப்³ப³ம். ஸசே அஞ்ஞே பி⁴க்கூ² ஆக³ச்ச²ந்தி, தேஹி ஸத்³தி⁴ம் பவாரேதப்³ப³ம்; நோ சே ஆக³ச்ச²ந்தி, ‘அஜ்ஜ மே பவாரணா’தி அதி⁴ட்டா²தப்³ப³ம். நோ சே அதி⁴ட்டே²ய்ய, ஆபத்தி து³க்கடஸ்ஸ.

தத்ர, பி⁴க்க²வே, யத்த² பஞ்ச பி⁴க்கூ² விஹரந்தி, ந ஏகஸ்ஸ பவாரணம் ஆஹரித்வா

சதூஹி ஸங்கே⁴ பவாரேதப்³ப³ம். பவாரேய்யும் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² சத்தாரோ பி⁴க்கூ² விஹரந்தி, ந ஏகஸ்ஸ பவாரணம் ஆஹரித்வா தீஹி அஞ்ஞமஞ்ஞம் பவாரேதப்³ப³ம். பவாரேய்யும் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² தயோ பி⁴க்கூ² விஹரந்தி, ந ஏகஸ்ஸ பவாரணம் ஆஹரித்வா த்³வீஹி அஞ்ஞமஞ்ஞம் பவாரேதப்³ப³ம். பவாரேய்யும் சே, ஆபத்தி து³க்கடஸ்ஸ. தத்ர, பி⁴க்க²வே, யத்த² த்³வே பி⁴க்கூ² விஹரந்தி, ந ஏகஸ்ஸ பவாரணம் ஆஹரித்வா ஏகேன அதி⁴ட்டா²தப்³ப³ம். அதி⁴ட்டே²ய்ய சே, ஆபத்தி து³க்கடஸ்ஸாதி.

ஸங்க⁴பவாரணாதி³ப்பபே⁴தா³ நிட்டி²தா.