3. வஸ்ஸூபனாயிகக்க²ந்த⁴கோ

107. வஸ்ஸூபனாயிகானுஜானனா

184. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ப⁴க³வதா பி⁴க்கூ²னம் வஸ்ஸாவாஸோ அபஞ்ஞத்தோ ஹோதி. தேஇத⁴ பி⁴க்கூ² ஹேமந்தம்பி கி³ம்ஹம்பி வஸ்ஸம்பி சாரிகம் சரந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ஹேமந்தம்பி கி³ம்ஹம்பி வஸ்ஸம்பி சாரிகம் சரிஸ்ஸந்தி, ஹரிதானி திணானி ஸம்மத்³த³ந்தா, ஏகிந்த்³ரியம் ஜீவம் விஹேடே²ந்தா, ப³ஹூ கு²த்³த³கே பாணே ஸங்கா⁴தம் ஆபாதே³ந்தா. இமே ஹி நாம அஞ்ஞதித்தி²யா து³ரக்கா²தத⁴ம்மா வஸ்ஸாவாஸம் அல்லீயிஸ்ஸந்தி ஸங்கஸாயிஸ்ஸந்தி. இமே ஹி நாம ஸகுந்தகா ருக்க²க்³கே³ஸு குலாவகானி கரித்வா வஸ்ஸாவாஸம் அல்லீயிஸ்ஸந்தி ஸங்கஸாயிஸ்ஸந்தி [ஸங்காஸயிஸ்ஸந்தி (ஸீ. ஸ்யா.)]. இமே பன ஸமணா ஸக்யபுத்தியா ஹேமந்தம்பி கி³ம்ஹம்பி வஸ்ஸம்பி சாரிகம் சரந்தி, ஹரிதானி திணானி ஸம்மத்³த³ந்தா, ஏகிந்த்³ரியம் ஜீவம் விஹேடே²ந்தா, ப³ஹூ கு²த்³த³கே பாணே ஸங்கா⁴தம் ஆபாதே³ந்தா’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, வஸ்ஸம் உபக³ந்து’’ந்தி. அத² கோ² பி⁴க்கூ²னம் ஏதத³ஹோஸி – ‘‘கதா³ நு கோ² வஸ்ஸம் உபக³ந்தப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, வஸ்ஸானே வஸ்ஸம் உபக³ந்துந்தி.

அத² கோ² பி⁴க்கூ²னம் ஏதத³ஹோஸி – ‘‘கதி நு கோ² வஸ்ஸூபனாயிகா’’தி? ப⁴க³வதோ ஏதமத்த²ம்

ஆரோசேஸும். த்³வேமா, பி⁴க்க²வே, வஸ்ஸூபனாயிகா – புரிமிகா, பச்சி²மிகா. அபரஜ்ஜுக³தாய ஆஸாள்ஹியா புரிமிகா உபக³ந்தப்³பா³, மாஸக³தாய ஆஸாள்ஹியா பச்சி²மிகா உபக³ந்தப்³பா³ – இமா கோ², பி⁴க்க²வே, த்³வே வஸ்ஸூபனாயிகாதி.

வஸ்ஸூபனாயிகானுஜானனா நிட்டி²தா.

108. வஸ்ஸானே சாரிகாபடிக்கே²பாதி³

185. தேன கோ² பன ஸமயேன ச²ப்³ப³க்³கி³யா பி⁴க்கூ² வஸ்ஸம் உபக³ந்த்வா அந்தராவஸ்ஸம் சாரிகம் சரந்தி. மனுஸ்ஸா ததே²வ உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ஹேமந்தம்பி கி³ம்ஹம்பி வஸ்ஸம்பி சாரிகம் சரிஸ்ஸந்தி, ஹரிதானி திணானி ஸம்மத்³த³ந்தா, ஏகிந்த்³ரியம் ஜீவம் விஹேடே²ந்தா, ப³ஹூ கு²த்³த³கே பாணே ஸங்கா⁴தம் ஆபாதே³ந்தா. இமே ஹி நாம அஞ்ஞதித்தி²யா து³ரக்கா²தத⁴ம்மா வஸ்ஸாவாஸம் அல்லீயிஸ்ஸந்தி ஸங்கஸாயிஸ்ஸந்தி. இமே ஹி நாம ஸகுந்தகா ருக்க²க்³கே³ஸு குலாவகானி கரித்வா வஸ்ஸாவாஸம் அல்லீயிஸ்ஸந்தி ஸங்கஸாயிஸ்ஸந்தி. இமே பன ஸமணா ஸக்யபுத்தியா ஹேமந்தம்பி கி³ம்ஹம்பி வஸ்ஸம்பி சாரிகம் சரந்தி, ஹரிதானி திணானி ஸம்மத்³த³ந்தா, ஏகிந்த்³ரியம் ஜீவம் விஹேடே²ந்தா, ப³ஹூ கு²த்³த³கே பாணே ஸங்கா⁴தம் ஆபாதே³ந்தா’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² வஸ்ஸம் உபக³ந்த்வா அந்தராவஸ்ஸம் சாரிகம் சரிஸ்ஸந்தீ’’தி? அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, வஸ்ஸம் உபக³ந்த்வா புரிமம் வா தேமாஸம் பச்சி²மம் வா தேமாஸம் அவஸித்வா சாரிகா பக்கமிதப்³பா³. யோ பக்கமேய்ய, ஆபத்தி து³க்கடஸ்ஸா’’தி.

186. தேன கோ² பன ஸமயேன ச²ப்³ப³க்³கி³யா பி⁴க்கூ² ந இச்ச²ந்தி வஸ்ஸம் உபக³ந்தும். ப⁴க³வதோ ஏதமத்த²ம் ஆரோசேஸும். ந, பி⁴க்க²வே, வஸ்ஸம் ந உபக³ந்தப்³ப³ம். யோ ந உபக³ச்சே²ய்ய, ஆபத்தி து³க்கடஸ்ஸாதி.

தேன கோ² பன ஸமயேன ச²ப்³ப³க்³கி³யா பி⁴க்கூ² தத³ஹு வஸ்ஸூபனாயிகாய வஸ்ஸம் அனுபக³ந்துகாமா ஸஞ்சிச்ச ஆவாஸம் அதிக்கமந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, தத³ஹு வஸ்ஸூபனாயிகாய வஸ்ஸம் அனுபக³ந்துகாமேன ஸஞ்சிச்ச ஆவாஸோ அதிக்கமிதப்³போ³. யோ அதிக்கமேய்ய, ஆபத்தி து³க்கடஸ்ஸாதி.

தேன கோ² பன ஸமயேன ராஜா மாக³தோ⁴ ஸேனியோ பி³ம்பி³ஸாரோ வஸ்ஸம் உக்கட்³டி⁴துகாமோ

பி⁴க்கூ²னம் ஸந்திகே தூ³தம் பாஹேஸி – யதி³ பனாய்யா ஆக³மே ஜுண்ஹே வஸ்ஸம் உபக³ச்சே²ய்யுந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ராஜூனம் அனுவத்திதுந்தி.

வஸ்ஸானே சாரிகாபடிக்கே²பாதி³ நிட்டி²தா.

109. ஸத்தாஹகரணீயானுஜானனா

187. அத² கோ² ப⁴க³வா ராஜக³ஹே யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. அனுபுப்³பே³ன சாரிகம் சரமானோ யேன ஸாவத்தி² தத³வஸரி. தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன கோஸலேஸு ஜனபதே³ உதே³னேன உபாஸகேன ஸங்க⁴ம் உத்³தி³ஸ்ஸ விஹாரோ காராபிதோ ஹோதி. ஸோ பி⁴க்கூ²னம் ஸந்திகே தூ³தம் பாஹேஸி – ‘‘ஆக³ச்ச²ந்து ப⁴த³ந்தா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி. பி⁴க்கூ² ஏவமாஹம்ஸு – ‘‘ப⁴க³வதா, ஆவுஸோ, பஞ்ஞத்தம் ‘ந வஸ்ஸம் உபக³ந்த்வா புரிமம் வா தேமாஸம் பச்சி²மம் வா தேமாஸம் அவஸித்வா சாரிகா பக்கமிதப்³பா³’தி. ஆக³மேது உதே³னோ உபாஸகோ, யாவ பி⁴க்கூ² வஸ்ஸம் வஸந்தி. வஸ்ஸம்வுட்டா² ஆக³மிஸ்ஸந்தி. ஸசே பனஸ்ஸ அச்சாயிகம் கரணீயம், தத்தே²வ ஆவாஸிகானம் பி⁴க்கூ²னம் ஸந்திகே விஹாரம் பதிட்டா²பேதூ’’தி. உதே³னோ உபாஸகோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா மயா பஹிதே ந ஆக³ச்சி²ஸ்ஸந்தி. அஹஞ்ஹி தா³யகோ காரகோ ஸங்கு⁴பட்டா²கோ’’தி. அஸ்ஸோஸும் கோ² பி⁴க்கூ² உதே³னஸ்ஸ உபாஸகஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஸத்தன்னம் ஸத்தாஹகரணீயேன பஹிதே க³ந்தும், ந த்வேவ அப்பஹிதே. பி⁴க்கு²ஸ்ஸ, பி⁴க்கு²னியா, ஸிக்க²மானாய, ஸாமணேரஸ்ஸ, ஸாமணேரியா, உபாஸகஸ்ஸ, உபாஸிகாய – அனுஜானாமி, பி⁴க்க²வே, இமேஸம் ஸத்தன்னம் ஸத்தாஹகரணீயேன பஹிதே க³ந்தும், ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³’’.

188. இத⁴ பன, பி⁴க்க²வே, உபாஸகேன ஸங்க⁴ம் உத்³தி³ஸ்ஸ விஹாரோ காராபிதோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து ப⁴த³ந்தா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, உபாஸகேன ஸங்க⁴ம் உத்³தி³ஸ்ஸ அட்³ட⁴யோகோ³ காராபிதோ ஹோதி…பே… பாஸாதோ³ காராபிதோ ஹோதி… ஹம்மியம் காராபிதம் ஹோதி… கு³ஹா காராபிதா ஹோதி… பரிவேணம் காராபிதம் ஹோதி… கோட்ட²கோ காராபிதோ ஹோதி… உபட்டா²னஸாலா காராபிதா ஹோதி… அக்³கி³ஸாலா காராபிதா ஹோதி… கப்பியகுடி காராபிதா ஹோதி… வச்சகுடி காராபிதா ஹோதி… சங்கமோ காராபிதோ ஹோதி … சங்கமனஸாலா காராபிதா ஹோதி… உத³பானோ காராபிதோ ஹோதி … உத³பானஸாலா காராபிதா ஹோதி… ஜந்தாக⁴ரம் காராபிதம் ஹோதி… ஜந்தாக⁴ரஸாலா காராபிதா ஹோதி… போக்க²ரணீ காராபிதா ஹோதி… மண்ட³போ காராபிதோ ஹோதி… ஆராமோ காராபிதோ ஹோதி… ஆராமவத்து² காராபிதம் ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து ப⁴த³ந்தா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, உபாஸகேன ஸம்ப³ஹுலே பி⁴க்கூ² உத்³தி³ஸ்ஸ…பே… ஏகம் பி⁴க்கு²ம் உத்³தி³ஸ்ஸ விஹாரோ காராபிதோ ஹோதி… அட்³ட⁴யோகோ³ காராபிதோ ஹோதி… பாஸாதோ³ காராபிதோ ஹோதி … ஹம்மியம் காராபிதம் ஹோதி… கு³ஹா காராபிதா ஹோதி… பரிவேணம் காராபிதம் ஹோதி… கோட்ட²கோ காராபிதோ ஹோதி… உபட்டா²னஸாலா காராபிதா ஹோதி… அக்³கி³ஸாலா காராபிதா ஹோதி… கப்பியகுடி காராபிதா ஹோதி… வச்சகுடி காராபிதா ஹோதி… சங்கமோ காராபிதோ ஹோதி… சங்கமனஸாலா காராபிதா ஹோதி… உத³பானோ காராபிதோ ஹோதி… உத³பானஸாலா காராபிதா ஹோதி… ஜந்தாக⁴ரம் காராபிதம் ஹோதி… ஜந்தாக⁴ரஸாலா காராபிதா ஹோதி… போக்க²ரணீ காராபிதா ஹோதி… மண்ட³போ காராபிதோ ஹோதி… ஆராமோ காராபிதோ ஹோதி… ஆராமவத்து² காராபிதம் ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து ப⁴த³ந்தா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, உபாஸகேன பி⁴க்கு²னிஸங்க⁴ம் உத்³தி³ஸ்ஸ…பே… ஸம்ப³ஹுலா பி⁴க்கு²னியோ உத்³தி³ஸ்ஸ…பே… ஏகம் பி⁴க்கு²னிம் உத்³தி³ஸ்ஸ…பே… ஸம்ப³ஹுலா ஸிக்க²மானாயோ உத்³தி³ஸ்ஸ…பே… ஏகம் ஸிக்க²மானம் உத்³தி³ஸ்ஸ…பே… ஸம்ப³ஹுலே ஸாமணேரே உத்³தி³ஸ்ஸ…பே… ஏகம் ஸாமணேரம் உத்³தி³ஸ்ஸ…பே… ஸம்ப³ஹுலா ஸாமணேரியோ உத்³தி³ஸ்ஸ…பே… ஏகம் ஸாமணேரிம் உத்³தி³ஸ்ஸ விஹாரோ காராபிதோ ஹோதி…பே… அட்³ட⁴யோகோ³ காராபிதோ ஹோதி… பாஸாதோ³ காராபிதோ ஹோதி… ஹம்மியம் காராபிதம் ஹோதி… கு³ஹா காராபிதா ஹோதி… பரிவேணம் காராபிதம் ஹோதி… கோட்ட²கோ காராபிதோ ஹோதி… உபட்டா²னஸாலா காராபிதா ஹோதி… அக்³கி³ஸாலா காராபிதா ஹோதி … கப்பியகுடி காராபிதா ஹோதி… சங்கமோ காராபிதோ ஹோதி… சங்கமனஸாலா காராபிதா ஹோதி… உத³பானோ காராபிதோ ஹோதி… உத³பானஸாலா காராபிதா ஹோதி… போக்க²ரணீ காராபிதா ஹோதி… மண்ட³போ காராபிதோ ஹோதி… ஆராமோ காராபிதோ ஹோதி… ஆராமவத்து² காராபிதம் ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து ப⁴த³ந்தா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

189. இத⁴ பன, பி⁴க்க²வே, உபாஸகேன அத்தனோ அத்தா²ய நிவேஸனம் காராபிதம் ஹோதி…பே… ஸயனிக⁴ரம் காராபிதம் ஹோதி… உதோ³ஸிதோ காராபிதோ ஹோதி… அட்டோ காராபிதோ ஹோதி… மாளோ காராபிதோ ஹோதி… ஆபணோ காராபிதோ ஹோதி… ஆபணஸாலா காராபிதா ஹோதி… பாஸாதோ³ காராபிதோ ஹோதி… ஹம்மியம் காராபிதம் ஹோதி… கு³ஹா காராபிதா ஹோதி… பரிவேணம் காராபிதம் ஹோதி… கோட்ட²கோ காராபிதோ ஹோதி… உபட்டா²னஸாலா காராபிதா ஹோதி… அக்³கி³ஸாலா காராபிதா ஹோதி… ரஸவதீ காராபிதா ஹோதி… சங்கமோ காராபிதோ ஹோதி… சங்கமனஸாலா காராபிதா ஹோதி… உத³பானோ காராபிதோ ஹோதி… உத³பானஸாலா காராபிதா ஹோதி… போக்க²ரணீ காராபிதா ஹோதி… மண்ட³போ காராபிதோ ஹோதி… ஆராமோ காராபிதோ ஹோதி … ஆராமவத்து² காராபிதம் ஹோதி… புத்தஸ்ஸ வா வாரேய்யம் ஹோதி… தீ⁴துயா வா வாரேய்யம் ஹோதி… கி³லானோ வா ஹோதி… அபி⁴ஞ்ஞாதம் வா ஸுத்தந்தம் ப⁴ணதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘ஆக³ச்ச²ந்து ப⁴த³ந்தா, இமம் ஸுத்தந்தம் பரியாபுணிஸ்ஸந்தி, புராயம் ஸுத்தந்தோ ந பலுஜ்ஜதீ’தி. அஞ்ஞதரம் வா பனஸ்ஸ கிச்சம் ஹோதி – கரணீயம் வா, ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து ப⁴த³ந்தா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

190. இத⁴ பன, பி⁴க்க²வே, உபாஸிகாய ஸங்க⁴ம் உத்³தி³ஸ்ஸ விஹாரோ காராபிதோ ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து அய்யா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, உபாஸிகாய ஸங்க⁴ம் உத்³தி³ஸ்ஸ அட்³ட⁴யோகோ³ காராபிதோ ஹோதி…பே… பாஸாதோ³ காராபிதோ ஹோதி… ஹம்மியம் காராபிதம் ஹோதி… கு³ஹா காராபிதா ஹோதி… பரிவேணம் காராபிதம் ஹோதி… கோட்ட²கோ காராபிதோ ஹோதி… உபட்டா²னஸாலா காராபிதா ஹோதி… அக்³கி³ஸாலா காராபிதா ஹோதி… கப்பியகுடி காராபிதா ஹோதி… வச்சகுடி காராபிதா ஹோதி… சங்கமோ காராபிதோ ஹோதி… சங்கமனஸாலா காராபிதா ஹோதி… உத³பானோ காராபிதோ ஹோதி… உத³பானஸாலா காராபிதா ஹோதி… ஜந்தாக⁴ரம் காராபிதம் ஹோதி… ஜந்தாக⁴ரஸாலா காராபிதா ஹோதி… போக்க²ரணீ காராபிதா ஹோதி… மண்ட³போ காராபிதோ ஹோதி… ஆராமோ காராபிதோ ஹோதி… ஆராமவத்து² காராபிதம் ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து அய்யா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, உபாஸிகாய ஸம்ப³ஹுலே பி⁴க்கூ² உத்³தி³ஸ்ஸ…பே… ஏகம் பி⁴க்கு²ம் உத்³தி³ஸ்ஸ…பே… பி⁴க்கு²னிஸங்க⁴ம் உத்³தி³ஸ்ஸ…பே… ஸம்ப³ஹுலா பி⁴க்கு²னியோ உத்³தி³ஸ்ஸ…பே… ஏகம் பி⁴க்கு²னிம் உத்³தி³ஸ்ஸ…பே… ஸம்ப³ஹுலா ஸிக்க²மானாயோ உத்³தி³ஸ்ஸ…பே… ஏகம் ஸிக்க²மானம் உத்³தி³ஸ்ஸ…பே… ஸம்ப³ஹுலே ஸாமணேரே உத்³தி³ஸ்ஸ…பே… ஏகம் ஸாமணேரம் உத்³தி³ஸ்ஸ…பே… ஸம்ப³ஹுலா ஸாமணேரியோ உத்³தி³ஸ்ஸ…பே… ஏகம் ஸாமணேரிம் உத்³தி³ஸ்ஸ…பே….

191. இத⁴ பன, பி⁴க்க²வே, உபாஸிகாய அத்தனோ அத்தா²ய நிவேஸனம் காராபிதம் ஹோதி…பே… ஸயனிக⁴ரம் காராபிதம் ஹோதி… உதோ³ஸிதோ காராபிதோ ஹோதி… அட்டோ காராபிதோ ஹோதி… மாளோ காராபிதோ ஹோதி… ஆபணோ காராபிதோ ஹோதி… ஆபணஸாலா காராபிதா ஹோதி… பாஸாதோ³ காராபிதோ ஹோதி… ஹம்மியம் காராபிதம் ஹோதி… கு³ஹா காராபிதா ஹோதி… பரிவேணம் காராபிதம் ஹோதி… கோட்ட²கோ காராபிதோ ஹோதி… உபட்டா²னஸாலா காராபிதா ஹோதி… அக்³கி³ஸாலா காராபிதா ஹோதி… ரஸவதீ காராபிதா ஹோதி… சங்கமோ காராபிதோ ஹோதி… சங்கமனஸாலா காராபிதா ஹோதி… உத³பானோ காராபிதோ ஹோதி … உத³பானஸாலா காராபிதா ஹோதி… போக்க²ரணீ காராபிதா ஹோதி… மண்ட³போ காராபிதோ ஹோதி… ஆராமோ காராபிதோ ஹோதி… ஆராமவத்து² காராபிதம் ஹோதி… புத்தஸ்ஸ வா வாரேய்யம் ஹோதி… தீ⁴துயா வா வாரேய்யம் ஹோதி… கி³லானா வா ஹோதி… அபி⁴ஞ்ஞாதம் வா ஸுத்தந்தம் ப⁴ணதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து அய்யா, இமம் ஸுத்தந்தம் பரியாபுணிஸ்ஸந்தி, புராயம் ஸுத்தந்தோ பலுஜ்ஜதீ’’தி. அஞ்ஞதரம் வா பனஸ்ஸா கிச்சம் ஹோதி கரணீயம் வா, ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘ஆக³ச்ச²ந்து அய்யா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

192. இத⁴ பன, பி⁴க்க²வே, பி⁴க்கு²னா ஸங்க⁴ம் உத்³தி³ஸ்ஸ…பே… பி⁴க்கு²னியா ஸங்க⁴ம் உத்³தி³ஸ்ஸ… ஸிக்க²மானாய ஸங்க⁴ம் உத்³தி³ஸ்ஸ… ஸாமணேரேன ஸங்க⁴ம் உத்³தி³ஸ்ஸ… ஸாமணேரியா ஸங்க⁴ம் உத்³தி³ஸ்ஸ … ஸம்ப³ஹுலே பி⁴க்கூ² உத்³தி³ஸ்ஸ… ஏகம் பி⁴க்கு²ம் உத்³தி³ஸ்ஸ… பி⁴க்கு²னிஸங்க⁴ம் உத்³தி³ஸ்ஸ… ஸம்ப³ஹுலா பி⁴க்கு²னியோ உத்³தி³ஸ்ஸ… ஏகம் பி⁴க்கு²னிம் உத்³தி³ஸ்ஸ… ஸம்ப³ஹுலா ஸிக்க²மானாயோ உத்³தி³ஸ்ஸ… ஏகம் ஸிக்க²மானம் உத்³தி³ஸ்ஸ… ஸம்ப³ஹுலே ஸாமணேரே உத்³தி³ஸ்ஸ… ஏகம் ஸாமணேரம் உத்³தி³ஸ்ஸ… ஸம்ப³ஹுலா ஸாமணேரியோ உத்³தி³ஸ்ஸ… ஏகம் ஸாமணேரிம் உத்³தி³ஸ்ஸ… அத்தனோ அத்தா²ய விஹாரோ காராபிதோ ஹோதி…பே… அட்³ட⁴யோகோ³ காராபிதோ ஹோதி… பாஸாதோ³ காராபிதோ ஹோதி… ஹம்மியம் காராபிதம் ஹோதி… கு³ஹா காராபிதா ஹோதி… பரிவேணம் காராபிதம் ஹோதி … கோட்ட²கோ காராபிதோ ஹோதி… உபட்டா²னஸாலா காராபிதா ஹோதி… அக்³கி³ஸாலா காராபிதா ஹோதி… கப்பியகுடி காராபிதா ஹோதி… சங்கமோ காராபிதோ ஹோதி… சங்கமனஸாலா காராபிதா ஹோதி… உத³பானோ காராபிதோ ஹோதி… உத³பானஸாலா காராபிதா ஹோதி… போக்க²ரணீ காராபிதா ஹோதி… மண்ட³போ காராபிதோ ஹோதி… ஆராமோ காராபிதோ ஹோதி… ஆராமவத்து² காராபிதம் ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய… ‘‘ஆக³ச்ச²ந்து அய்யா, இச்சா²மி தா³னஞ்ச தா³தும், த⁴ம்மஞ்ச ஸோதும், பி⁴க்கூ² ச பஸ்ஸிது’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³தி.

ஸத்தாஹகரணீயானுஜானதா நிட்டி²தா.

110. பஞ்சன்னம் அப்பஹிதேபி அனுஜானனா

193. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. ஸோ பி⁴க்கூ²னம் ஸந்திகே தூ³தம் பாஹேஸி – ‘‘அஹஞ்ஹி கி³லானோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பஞ்சன்னம் ஸத்தாஹகரணீயேன அப்பஹிதேபி க³ந்தும், பகே³வ பஹிதே. பி⁴க்கு²ஸ்ஸ, பி⁴க்கு²னியா, ஸிக்க²மானாய, ஸாமணேரஸ்ஸ, ஸாமணேரியா – அனுஜானாமி, பி⁴க்க²வே, இமேஸம் பஞ்சன்னம் ஸத்தாஹகரணீயேன அப்பஹிதேபி க³ந்தும், பகே³வ பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு² கி³லானோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி கி³லானோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கி³லானப⁴த்தம் வா பரியேஸிஸ்ஸாமி, கி³லானுபட்டா²கப⁴த்தம் வா பரியேஸிஸ்ஸாமி, கி³லானபே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா, உபட்ட²ஹிஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ அனபி⁴ரதி உப்பன்னா ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அனபி⁴ரதி மே உப்பன்னா, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘அனபி⁴ரதம் வூபகாஸேஸ்ஸாமி வா, வூபகாஸாபேஸ்ஸாமி வா, த⁴ம்மகத²ம் வாஸ்ஸ கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ குக்குச்சம் உப்பன்னம் ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘குக்குச்சம் மே உப்பன்னம், ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘குக்குச்சம் வினோதே³ஸ்ஸாமி வா, வினோதா³பேஸ்ஸாமி வா, த⁴ம்மகத²ம் வாஸ்ஸ கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ தி³ட்டி²க³தம் உப்பன்னம் ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘தி³ட்டி²க³தம் மே உப்பன்னம், ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘தி³ட்டி²க³தம் விவேசேஸ்ஸாமி வா, விவேசாபேஸ்ஸாமி வா, த⁴ம்மகத²ம் வாஸ்ஸ கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு² க³ருத⁴ம்மம் அஜ்ஜா²பன்னோ ஹோதி பரிவாஸாரஹோ. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி க³ருத⁴ம்மம் அஜ்ஜா²பன்னோ பரிவாஸாரஹோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘பரிவாஸதா³னம் உஸ்ஸுக்கம் கரிஸ்ஸாமி வா, அனுஸ்ஸாவேஸ்ஸாமி வா, க³ணபூரகோ வா ப⁴விஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு² மூலாய படிகஸ்ஸனாரஹோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி மூலாய படிகஸ்ஸனாரஹோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘மூலாய படிகஸ்ஸனம் உஸ்ஸுக்கம் கரிஸ்ஸாமி வா, அனுஸ்ஸாவேஸ்ஸாமி வா, க³ணபூரகோ வா ப⁴விஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு² மானத்தாரஹோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி மானத்தாரஹோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘மானத்ததா³னம் உஸ்ஸுக்கம் கரிஸ்ஸாமி வா, அனுஸ்ஸாவேஸ்ஸாமி வா, க³ணபூரகோ வா ப⁴விஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு² அப்³பா⁴னாரஹோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி அப்³பா⁴னாரஹோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘அப்³பா⁴னம் உஸ்ஸுக்கம் கரிஸ்ஸாமி வா, அனுஸ்ஸாவேஸ்ஸாமி வா, க³ணபூரகோ வா ப⁴விஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ ஸங்கோ⁴ கம்மம் கத்துகாமோ ஹோதி தஜ்ஜனீயம் வா, நியஸ்ஸம் வா, பப்³பா³ஜனீயம் வா, படிஸாரணீயம் வா, உக்கே²பனீயம் வா. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘ஸங்கோ⁴ மே கம்மம் கத்துகாமோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கிந்தி நு கோ² ஸங்கோ⁴ கம்மம் ந கரேய்ய, லஹுகாய வா பரிணாமேய்யா’’தி. ஸத்தாஹம் ஸன்னிவத்தோ காதப்³போ³.

கதம் வா பனஸ்ஸ ஹோதி ஸங்கே⁴ன கம்மம் தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா. ஸோ சே பி⁴க்கூ²னம் ஸந்திகே தூ³தம் பஹிணேய்ய ‘‘ஸங்கோ⁴ மே கம்மம் அகாஸி, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கிந்தி நு கோ² ஸம்மா வத்தேய்ய, லோமம் பாதேய்ய, நேத்தா²ரம் வத்தேய்ய, ஸங்கோ⁴ தம் கம்மம் படிப்பஸ்ஸம்பே⁴ய்யா’’தி. ஸத்தாஹம் ஸன்னிவத்தோ காதப்³போ³.

194. இத⁴ பன, பி⁴க்க²வே, பி⁴க்கு²னீ கி³லானா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி கி³லானா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கி³லானப⁴த்தம் வா பரியேஸிஸ்ஸாமி, கி³லானுபட்டா²கப⁴த்தம் வா பரியேஸிஸ்ஸாமி, கி³லானபே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா, உபட்ட²ஹிஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²னியா அனபி⁴ரதி உப்பன்னா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அனபி⁴ரதி மே உப்பன்னா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘அனபி⁴ரதம் வூபகாஸேஸ்ஸாமி வா, வூபகாஸாபேஸ்ஸாமி வா, த⁴ம்மகத²ம் வாஸ்ஸா கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²னியா குக்குச்சம் உப்பன்னம் ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘குக்குச்சம் மே உப்பன்னம், ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘குக்குச்சம் வினோதே³ஸ்ஸாமி வா, வினோதா³பேஸ்ஸாமி வா, த⁴ம்மகத²ம் வாஸ்ஸா கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²னியா தி³ட்டி²க³தம் உப்பன்னம் ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘தி³ட்டி²க³தம் மே உப்பன்னம், ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘தி³ட்டி²க³தம் விவேசேஸ்ஸாமி வா, விவேசாபேஸ்ஸாமி வா, த⁴ம்மகத²ம் வாஸ்ஸா கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²னீ க³ருத⁴ம்மம் அஜ்ஜா²பன்னா ஹோதி மானத்தாரஹா. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி க³ருத⁴ம்மம் அஜ்ஜா²பன்னா மானத்தாரஹா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘மானத்ததா³னம் உஸ்ஸுக்கம் கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²னீ மூலாய படிகஸ்ஸனாரஹா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி மூலாய படிகஸ்ஸனாரஹா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘மூலாய படிகஸ்ஸனம் உஸ்ஸுக்கம் கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²னீ அப்³பா⁴னாரஹா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி அப்³பா⁴னாரஹா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘அப்³பா⁴னம் உஸ்ஸுக்கம் கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²னியா ஸங்கோ⁴ கம்மம் கத்துகாமோ ஹோதி – தஜ்ஜனீயம் வா, நியஸ்ஸம் வா, பப்³பா³ஜனீயம் வா, படிஸாரணீயம் வா, உக்கே²பனீயம் வா. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘ஸங்கோ⁴ மே கம்மம் கத்துகாமோ, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கிந்தி நு கோ² ஸங்கோ⁴ கம்மம் ந கரேய்ய, லஹுகாய வா பரிணாமேய்யா’’தி. ஸத்தாஹம் ஸன்னிவத்தோ காதப்³போ³.

கதம் வா பனஸ்ஸா ஹோதி ஸங்கே⁴ன கம்மம் – தஜ்ஜனீயம் வா, நியஸ்ஸம் வா, பப்³பா³ஜனீயம் வா, படிஸாரணீயம் வா, உக்கே²பனீயம் வா. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘ஸங்கோ⁴ மே கம்மம் அகாஸி, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கிந்தி நு கோ² ஸம்மா வத்தேய்ய, லோமம் பாதேய்ய, நேத்தா²ரம் வத்தேய்ய, ஸங்கோ⁴ தம் கம்மம் படிப்பஸ்ஸம்பே⁴ய்யா’’தி. ஸத்தாஹம் ஸன்னிவத்தோ காதப்³போ³.

195. இத⁴ பன, பி⁴க்க²வே, ஸிக்க²மானா கி³லானா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி கி³லானா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி – க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கி³லானப⁴த்தம் வா பரியேஸிஸ்ஸாமி, கி³லானுபட்டா²கப⁴த்தம் வா பரியேஸிஸ்ஸாமி, கி³லானபே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா, உபட்ட²ஹிஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, ஸிக்க²மானாய அனபி⁴ரதி உப்பன்னா ஹோதி…பே… ஸிக்க²மானாய குக்குச்சம் உப்பன்னம் ஹோதி… ஸிக்க²மானாய தி³ட்டி²க³தம் உப்பன்னம் ஹோதி… ஸிக்க²மானாய ஸிக்கா² குபிதா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘ஸிக்கா² மே குபிதா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘ஸிக்கா²ஸமாதா³னம் உஸ்ஸுக்கம் கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, ஸிக்க²மானா உபஸம்பஜ்ஜிதுகாமா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி உபஸம்பஜ்ஜிதுகாமா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – உபஸம்பத³ம் உஸ்ஸுக்கம் கரிஸ்ஸாமி வா, அனுஸ்ஸாவேஸ்ஸாமி வா, க³ணபூரகோ வா ப⁴விஸ்ஸாமீதி. ஸத்தாஹம் ஸன்னிவத்தோ காதப்³போ³.

196. இத⁴ பன, பி⁴க்க²வே, ஸாமணேரோ கி³லானோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி கி³லானோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கி³லானப⁴த்தம் வா பரியேஸிஸ்ஸாமி, கி³லானுபட்டா²கப⁴த்தம் வா பரியேஸிஸ்ஸாமி, கி³லானபே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா, உபட்ட²ஹிஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, ஸாமணேரஸ்ஸ அனபி⁴ரதி உப்பன்னா ஹோதி…பே… ஸாமணேரஸ்ஸ குக்குச்சம் உப்பன்னம் ஹோதி… ஸாமணேரஸ்ஸ தி³ட்டி²க³தம் உப்பன்னம் ஹோதி… ஸாமணேரோ வஸ்ஸம் புச்சி²துகாமோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி வஸ்ஸம் புச்சி²துகாமோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘புச்சி²ஸ்ஸாமி வா, ஆசிக்கி²ஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, ஸாமணேரோ உபஸம்பஜ்ஜிதுகாமோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி உபஸம்பஜ்ஜிதுகாமோ, ஆக³ச்ச²ந்து பி⁴க்கூ², இச்சா²மி பி⁴க்கூ²னம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘உபஸம்பத³ம் உஸ்ஸுக்கம் கரிஸ்ஸாமி வா, அனுஸ்ஸாவேஸ்ஸாமி வா, க³ணபூரகோ வா ப⁴விஸ்ஸாமீ’’தி. ஸத்தாஹம் ஸன்னிவத்தோ காதப்³போ³.

197. இத⁴ பன, பி⁴க்க²வே, ஸாமணேரீ கி³லானா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி கி³லானா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கி³லானப⁴த்தம் வா பரியேஸிஸ்ஸாமி, கி³லானுபட்டா²கப⁴த்தம் வா பரியேஸிஸ்ஸாமி, கி³லானபே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா, உபட்ட²ஹிஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, ஸாமணேரியா அனபி⁴ரதி உப்பன்னா ஹோதி…பே… ஸாமணேரியா குக்குச்சம் உப்பன்னம் ஹோதி… ஸாமணேரியா தி³ட்டி²க³தம் உப்பன்னம் ஹோதி… ஸாமணேரீ வஸ்ஸம் புச்சி²துகாமா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி வஸ்ஸம் புச்சி²துகாமா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘புச்சி²ஸ்ஸாமி வா, ஆசிக்கி²ஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, ஸாமணேரீ ஸிக்க²ம் ஸமாதி³யிதுகாமா ஹோதி. ஸா சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி ஸிக்க²ம் ஸமாதி³யிதுகாமா, ஆக³ச்ச²ந்து அய்யா, இச்சா²மி அய்யானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘ஸிக்கா²ஸமாதா³னம் உஸ்ஸுக்கம் கரிஸ்ஸாமீ’’தி. ஸத்தாஹம் ஸன்னிவத்தோ காதப்³போ³தி.

பஞ்சன்னம் அப்பஹிதேபி அனுஜானனா நிட்டி²தா.

111. ஸத்தன்னம் அப்பஹிதேபி அனுஜானனா

198. தேன கோ² பன ஸமயேன அஞ்ஞதரஸ்ஸ பி⁴க்கு²னோ மாதா கி³லானா ஹோதி. ஸா புத்தஸ்ஸ ஸந்திகே தூ³தம் பாஹேஸி – ‘‘அஹஞ்ஹி கி³லானா, ஆக³ச்ச²து மே புத்தோ, இச்சா²மி புத்தஸ்ஸ ஆக³த’’ந்தி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தம் ஸத்தன்னம் ஸத்தாஹகரணீயேன பஹிதே க³ந்தும், ந த்வேவ அப்பஹிதே; பஞ்சன்னம் ஸத்தாஹகரணீயேன அப்பஹிதேபி க³ந்தும், பகே³வ பஹிதேதி. அயஞ்ச மே மாதா கி³லானா, ஸா ச அனுபாஸிகா, கத²ம் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸத்தன்னம் ஸத்தாஹகரணீயேன அப்பஹிதேபி க³ந்தும், பகே³வ பஹிதே. பி⁴க்கு²ஸ்ஸ, பி⁴க்கு²னியா, ஸிக்க²மானாய, ஸாமணேரஸ்ஸ, ஸாமணேரியா, மாதுயா ச பிதுஸ்ஸ ச – அனுஜானாமி, பி⁴க்க²வே, இமேஸம் ஸத்தன்னம் ஸத்தாஹகரணீயேன அப்பஹிதேபி க³ந்தும், பகே³வ பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ மாதா கி³லானா ஹோதி. ஸா சே புத்தஸ்ஸ ஸந்திகே தூ³தம் பஹிணேய்ய – ‘‘அஹஞ்ஹி கி³லானா, ஆக³ச்ச²து மே புத்தோ, இச்சா²மி புத்தஸ்ஸ ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கி³லானப⁴த்தம் வா பரியேஸிஸ்ஸாமி, கி³லானுபட்டா²கப⁴த்தம் வா பரியேஸிஸ்ஸாமி, கி³லானபே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா, உபட்ட²ஹிஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ பிதா கி³லானோ ஹோதி. ஸோ சே புத்தஸ்ஸ ஸந்திகே தூ³தம் பஹிணேய்ய – ‘‘அஹஞ்ஹி கி³லானோ, ஆக³ச்ச²து மே புத்தோ, இச்சா²மி புத்தஸ்ஸ ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, அப்பஹிதேபி, பகே³வ பஹிதே – ‘‘கி³லானப⁴த்தம் வா பரியேஸிஸ்ஸாமி, கி³லானுபட்டா²கப⁴த்தம் வா பரியேஸிஸ்ஸாமி, கி³லானபே⁴ஸஜ்ஜம் வா பரியேஸிஸ்ஸாமி, புச்சி²ஸ்ஸாமி வா, உபட்ட²ஹிஸ்ஸாமி வா’’தி. ஸத்தாஹம் ஸன்னிவத்தோ காதப்³போ³.

ஸத்தன்னம் அப்பஹிதேபி அனுஜானனா நிட்டி²தா.

112. பஹிதேயேவ அனுஜானனா

199. இத⁴ பன, பி⁴க்க²வே, பி⁴க்கு²ஸ்ஸ பா⁴தா கி³லானோ ஹோதி. ஸோ சே பா⁴துனோ ஸந்திகே தூ³தம் பஹிணேய்ய – ‘‘அஹஞ்ஹி கி³லானோ, ஆக³ச்ச²து மே பா⁴தா, இச்சா²மி பா⁴துனோ ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ ப⁴கி³னீ கி³லானா ஹோதி. ஸா சே பா⁴துனோ ஸந்திகே தூ³தம் பஹிணேய்ய – ‘‘அஹஞ்ஹி கி³லானா, ஆக³ச்ச²து மே பா⁴தா, இச்சா²மி பா⁴துனோ ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²ஸ்ஸ ஞாதகோ கி³லானோ ஹோதி. ஸோ சே பி⁴க்கு²ஸ்ஸ ஸந்திகே தூ³தம் பஹிணேய்ய – ‘‘அஹஞ்ஹி கி³லானோ, ஆக³ச்ச²து ப⁴த³ந்தோ, இச்சா²மி ப⁴த³ந்தஸ்ஸ ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

இத⁴ பன, பி⁴க்க²வே, பி⁴க்கு²க³திகோ கி³லானோ ஹோதி. ஸோ சே பி⁴க்கூ²னம் ஸந்திகே தூ³தம் பஹிணேய்ய – ‘‘அஹஞ்ஹி கி³லானோ, ஆக³ச்ச²ந்து ப⁴த³ந்தா, இச்சா²மி ப⁴த³ந்தானம் ஆக³த’’ந்தி, க³ந்தப்³ப³ம், பி⁴க்க²வே, ஸத்தாஹகரணீயேன, பஹிதே, ந த்வேவ அப்பஹிதே. ஸத்தாஹம் ஸன்னிவத்தோ காதப்³போ³.

தேன கோ² பன ஸமயேன ஸங்க⁴ஸ்ஸ விஹாரோ உந்த்³ரியதி. அஞ்ஞதரேன உபாஸகேன அரஞ்ஞே ப⁴ண்ட³ம் சே²தா³பிதம் ஹோதி. ஸோ பி⁴க்கூ²னம் ஸந்திகே தூ³தம் பாஹேஸி – ‘‘ஸசே ப⁴த³ந்தா தம் ப⁴ண்ட³ம் ஆவஹாபேய்யும், த³ஜ்ஜாஹம் தம் ப⁴ண்ட³’’ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸங்க⁴கரணீயேன க³ந்தும். ஸத்தாஹம் ஸன்னிவத்தோ காதப்³போ³தி.

பஹிதேயேவ அனுஜானனா நிட்டி²தா.

வஸ்ஸாவாஸபா⁴ணவாரோ நிட்டி²தோ.

113. அந்தராயே அனாபத்திவஸ்ஸச்சே²த³வாரோ

200. தேன கோ² பன ஸமயேன கோஸலேஸு ஜனபதே³ அஞ்ஞதரஸ்மிம் ஆவாஸே வஸ்ஸூபக³தா பி⁴க்கூ² வாளேஹி உப்³பா³ள்ஹா ஹோந்தி. க³ண்ஹிம்ஸுபி பரிபாதிம்ஸுபி. ப⁴க³வதோ ஏதமத்த²ம் ஆரோசேஸும்.

இத⁴ பன, பி⁴க்க²வே, வஸ்ஸூபக³தா பி⁴க்கூ² வாளேஹி உப்³பா³ள்ஹா ஹோந்தி. க³ண்ஹந்திபி பரிபாதேந்திபி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தா பி⁴க்கூ² ஸரீஸபேஹி உப்³பா³ள்ஹா ஹோந்தி. ட³ம்ஸந்திபி பரிபாதேந்திபி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தா பி⁴க்கூ² சோரேஹி உப்³பா³ள்ஹா ஹோந்தி. விலும்பந்திபி ஆகோடேந்திபி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தா பி⁴க்கூ² பிஸாசேஹி உப்³பா³ள்ஹா ஹோந்தி. ஆவிஸந்திபி ஹனந்திபி [ஓஜம்பி ஹரந்தி (ஸீ.), ஹரந்திபி (ஸ்யா.)]. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தானம் பி⁴க்கூ²னம் கா³மோ அக்³கி³னா த³ட்³டோ⁴ ஹோதி. பி⁴க்கூ² பிண்ட³கேன கிலமந்தி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தானம் பி⁴க்கூ²னம் ஸேனாஸனம் அக்³கி³னா த³ட்³ட⁴ம் ஹோதி. பி⁴க்கூ² ஸேனாஸனேன கிலமந்தி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தானம் பி⁴க்கூ²னம் கா³மோ உத³கேன வூள்ஹோ ஹோதி. பி⁴க்கூ² பிண்ட³கேன கிலமந்தி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தானம் பி⁴க்கூ²னம் ஸேனாஸனம் உத³கேன வூள்ஹம் ஹோதி. பி⁴க்கூ² ஸேனாஸனேன கிலமந்தி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸாதி.

201. தேன கோ² பன ஸமயேன அஞ்ஞதரஸ்மிம் ஆவாஸே வஸ்ஸூபக³தானம் பி⁴க்கூ²னம் கா³மோ சோரேஹி வுட்டா²ஸி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யேன கா³மோ தேன க³ந்துந்தி.

கா³மோ த்³வேதா⁴ பி⁴ஜ்ஜித்த². ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யேன ப³ஹுதரா தேன க³ந்துந்தி.

ப³ஹுதரா அஸ்ஸத்³தா⁴ ஹோந்தி அப்பஸன்னா. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யேன ஸத்³தா⁴ பஸன்னா தேன க³ந்துந்தி.

தேன கோ² பன ஸமயேன கோஸலேஸு ஜனபதே³ அஞ்ஞதரஸ்மிம் ஆவாஸே வஸ்ஸூபக³தா பி⁴க்கூ² ந லபி⁴ம்ஸு லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். ப⁴க³வதோ ஏதமத்த²ம் ஆரோசேஸும்.

இத⁴ பன, பி⁴க்க²வே, வஸ்ஸூபக³தா பி⁴க்கூ² ந லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தா பி⁴க்கூ² லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், ந லப⁴ந்தி ஸப்பாயானி போ⁴ஜனானி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தா பி⁴க்கூ² லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், லப⁴ந்தி ஸப்பாயானி போ⁴ஜனானி, ந லப⁴ந்தி ஸப்பாயானி பே⁴ஸஜ்ஜானி. ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தா பி⁴க்கூ² லப⁴ந்தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம், லப⁴ந்தி ஸப்பாயானி போ⁴ஜனானி, லப⁴ந்தி ஸப்பாயானி பே⁴ஸஜ்ஜானி, ந லப⁴ந்தி பதிரூபம் உபட்டா²கம். ஏஸேவ அந்தராயோதி பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தம் பி⁴க்கு²ம் இத்தீ² நிமந்தேதி – ‘‘ஏஹி, ப⁴ந்தே, ஹிரஞ்ஞம் வா தே தே³மி, ஸுவண்ணம் வா தே தே³மி, கே²த்தம் வா தே தே³மி, வத்து²ம் வா தே தே³மி, கா³வும் வா தே தே³மி, கா³விம் வா தே தே³மி, தா³ஸம் வா தே தே³மி, தா³ஸிம் வா தே தே³மி, தீ⁴தரம் வா தே தே³மி ப⁴ரியத்தா²ய, அஹம் வா தே ப⁴ரியா ஹோமி, அஞ்ஞம் வா தே ப⁴ரியம் ஆனேமீ’’தி. தத்ர சே பி⁴க்கு²னோ ஏவம் ஹோதி, ‘லஹுபரிவத்தம் கோ² சித்தம் வுத்தம் ப⁴க³வதா, ஸியாபி மே ப்³ரஹ்மசரியஸ்ஸ அந்தராயோ’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தம் பி⁴க்கு²ம் வேஸீ நிமந்தேதி…பே… து²ல்லகுமாரீ நிமந்தேதி… பண்ட³கோ நிமந்தேதி… ஞாதகா நிமந்தேந்தி… ராஜானோ நிமந்தேந்தி… சோரா நிமந்தேந்தி… து⁴த்தா நிமந்தேந்தி – ‘‘ஏஹி, ப⁴ந்தே, ஹிரஞ்ஞம் வா தே தே³ம, ஸுவண்ணம் வா தே தே³ம, கே²த்தம் வா தே தே³ம, வத்து²ம் வா தே தே³ம, கா³வும் வா தே தே³ம, கா³விம் வா தே தே³ம, தா³ஸம் வா தே தே³ம, தா³ஸிம் வா தே தே³ம, தீ⁴தரம் வா தே தே³ம ப⁴ரியத்தா²ய, அஞ்ஞம் வா தே ப⁴ரியம் ஆனேமா’’தி. தத்ர சே பி⁴க்கு²னோ ஏவம் ஹோதி, ‘லஹுபரிவத்தம் கோ² சித்தம் வுத்தம் ப⁴க³வதா, ஸியாபி மே ப்³ரஹ்மசரியஸ்ஸ அந்தராயோ’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² அஸ்ஸாமிகம் நிதி⁴ம் பஸ்ஸதி. தத்ர சே பி⁴க்கு²னோ ஏவம் ஹோதி, ‘லஹுபரிவத்தம் கோ² சித்தம் வுத்தம் ப⁴க³வதா, ஸியாபி மே ப்³ரஹ்மசரியஸ்ஸ அந்தராயோ’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

அந்தராயே அனாபத்திவஸ்ஸச்சே²த³வாரோ நிட்டி²தோ.

114. ஸங்க⁴பே⁴தே³ அனாபத்திவஸ்ஸச்சே²த³வாரோ

202. இத⁴ பன, பி⁴க்க²வே, வஸ்ஸூபக³தோ பி⁴க்கு² பஸ்ஸதி ஸம்ப³ஹுலே பி⁴க்கூ² ஸங்க⁴பே⁴தா³ய பரக்கமந்தே. தத்ர சே பி⁴க்கு²னோ ஏவம் ஹோதி, ‘க³ருகோ கோ² ஸங்க⁴பே⁴தோ³ வுத்தோ ப⁴க³வதா; மா மயி ஸம்முகீ²பூ⁴தே ஸங்கோ⁴ பி⁴ஜ்ஜீ’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அஸுகஸ்மிம் கிர ஆவாஸே ஸம்ப³ஹுலா பி⁴க்கூ² ஸங்க⁴பே⁴தா³ய பரக்கமந்தீ’’தி. தத்ர சே பி⁴க்கு²னோ ஏவம் ஹோதி, ‘க³ருகோ கோ² ஸங்க⁴பே⁴தோ³ வுத்தோ ப⁴க³வதா; மா மயி ஸம்முகீ²பூ⁴தே ஸங்கோ⁴ பி⁴ஜ்ஜீ’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அஸுகஸ்மிம் கிர ஆவாஸே ஸம்ப³ஹுலா பி⁴க்கூ² ஸங்க⁴பே⁴தா³ய பரக்கமந்தீ’’தி. தத்ர சே பி⁴க்கு²னோ ஏவம் ஹோதி – ‘‘தே கோ² மே பி⁴க்கூ² மித்தா. த்யாஹம் வக்கா²மி ‘க³ருகோ கோ², ஆவுஸோ, ஸங்க⁴பே⁴தோ³ வுத்தோ ப⁴க³வதா; மாயஸ்மந்தானம் ஸங்க⁴பே⁴தோ³ ருச்சித்தா²’தி. கரிஸ்ஸந்தி மே வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அஸுகஸ்மிம் கிர ஆவாஸே ஸம்ப³ஹுலா பி⁴க்கூ² ஸங்க⁴பே⁴தா³ய பரக்கமந்தீ’’தி. தத்ர சே பி⁴க்கு²னோ ஏவம் ஹோதி – ‘‘தே கோ² மே பி⁴க்கூ² ந மித்தா; அபி ச யே தேஸம் மித்தா, தே மே மித்தா. த்யாஹம் வக்கா²மி. தே வுத்தா தே வக்க²ந்தி ‘க³ருகோ கோ², ஆவுஸோ, ஸங்க⁴பே⁴தோ³ வுத்தோ ப⁴க³வதா; மாயஸ்மந்தானம் ஸங்க⁴பே⁴தோ³ ருச்சித்தா²’தி. கரிஸ்ஸந்தி தேஸம் வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அஸுகஸ்மிம் கிர ஆவாஸே ஸம்ப³ஹுலேஹி பி⁴க்கூ²ஹி ஸங்கோ⁴ பி⁴ன்னோ’’தி. தத்ர சே பி⁴க்கு²னோ ஏவம் ஹோதி – ‘‘தே கோ² மே பி⁴க்கூ² மித்தா. த்யாஹம் வக்கா²மி ‘க³ருகோ கோ², ஆவுஸோ, ஸங்க⁴பே⁴தோ³ வுத்தோ ப⁴க³வதா; மாயஸ்மந்தானம் ஸங்க⁴பே⁴தோ³ ருச்சித்தா²’தி. கரிஸ்ஸந்தி மே வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அஸுகஸ்மிம் கிர ஆவாஸே ஸம்ப³ஹுலேஹி பி⁴க்கூ²ஹி ஸங்கோ⁴ பி⁴ன்னோ’’தி. தத்ர சே பி⁴க்கு²னோ ஏவம் ஹோதி – ‘‘தே கோ² மே பி⁴க்கூ² ந மித்தா; அபி ச, யே தேஸம் மித்தா தே மே மித்தா. த்யாஹம் வக்கா²மி. தே வுத்தா தே வக்க²ந்தி ‘க³ருகோ கோ², ஆவுஸோ, ஸங்க⁴பே⁴தோ³ வுத்தோ ப⁴க³வதா; மாயஸ்மந்தானம் ஸங்க⁴பே⁴தோ³ ருச்சித்தா²’தி. கரிஸ்ஸந்தி தேஸம் வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அமுகஸ்மிம் கிர ஆவாஸே ஸம்ப³ஹுலா பி⁴க்கு²னியோ ஸங்க⁴பே⁴தா³ய பரக்கமந்தீ’’தி. தத்ர சே பி⁴க்கு²னோ ஏவம் ஹோதி – ‘‘தா கோ² மே பி⁴க்கு²னியோ மித்தா. தாஹம் வக்கா²மி ‘க³ருகோ கோ², ப⁴கி³னியோ, ஸங்க⁴பே⁴தோ³ வுத்தோ ப⁴க³வதா; மா ப⁴கி³னீனம் ஸங்க⁴பே⁴தோ³ ருச்சித்தா²’தி. கரிஸ்ஸந்தி மே வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸ.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அமுகஸ்மிம் கிர ஆவாஸே ஸம்ப³ஹுலா பி⁴க்கு²னியோ ஸங்க⁴பே⁴தா³ய பரக்கமந்தீ’’தி. தத்ர சே பி⁴க்கு²னோ ஏவம் ஹோதி – ‘‘தா கோ² மே பி⁴க்கு²னியோ ந மித்தா. அபி ச, யா தாஸம் மித்தா, தா மே மித்தா. தாஹம் வக்கா²மி. தா வுத்தா தா வக்க²ந்தி ‘க³ருகோ கோ², ப⁴கி³னியோ, ஸங்க⁴பே⁴தோ³ வுத்தோ ப⁴க³வதா. மா ப⁴கி³னீனம் ஸங்க⁴பே⁴தோ³ ருச்சித்தா²’தி. கரிஸ்ஸந்தி தாஸம் வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸதி.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அமுகஸ்மிம் கிர ஆவாஸே ஸம்ப³ஹுலாஹி பி⁴க்கு²னீஹி ஸங்கோ⁴ பி⁴ன்னோ’’தி. தத்ர சே பி⁴க்கு²னோ ஏவம் ஹோதி – ‘‘தா கோ² மே பி⁴க்கு²னியோ மித்தா. தாஹம் வக்கா²மி ‘க³ருகோ கோ², ப⁴கி³னியோ, ஸங்க⁴பே⁴தோ³ வுத்தோ ப⁴க³வதா. மா ப⁴கி³னீனம் ஸங்க⁴பே⁴தோ³ ருச்சித்தா²’தி. கரிஸ்ஸந்தி மே வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸதி.

இத⁴ பன, பி⁴க்க²வே, வஸ்ஸூபக³தோ பி⁴க்கு² ஸுணாதி – ‘‘அமுகஸ்மிம் கிர ஆவாஸே ஸம்ப³ஹுலாஹி பி⁴க்கு²னீஹி ஸங்கோ⁴ பி⁴ன்னோ’’தி. தத்ர சே பி⁴க்கு²னோ ஏவம் ஹோதி – ‘‘தா கோ² மே பி⁴க்கு²னியோ ந மித்தா. அபி ச, யா தாஸம் மித்தா தா மே மித்தா. தாஹம் வக்கா²மி. தா வுத்தா தா வக்க²ந்தி ‘க³ருகோ கோ², ப⁴கி³னியோ [அய்யாயோ (ஸீ.)], ஸங்க⁴பே⁴தோ³ வுத்தோ ப⁴க³வதா; மா ப⁴கி³னீனம் [அய்யானம் (ஸீ.)] ஸங்க⁴பே⁴தோ³ ருச்சித்தா²’தி. கரிஸ்ஸந்தி தாஸம் வசனம், ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தீ’’தி, பக்கமிதப்³ப³ம். அனாபத்தி வஸ்ஸச்சே²த³ஸ்ஸாதி.

ஸங்க⁴பே⁴தே³ அனாபத்திவஸ்ஸச்சே²த³வாரோ நிட்டி²தோ.

115. வஜாதீ³ஸு வஸ்ஸூபக³மனம்

203. தேன கோ² பன ஸமயேன அஞ்ஞதரோ பி⁴க்கு² வஜே வஸ்ஸம் உபக³ந்துகாமோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, வஜே வஸ்ஸம் உபக³ந்துந்தி. வஜோ வுட்டா²ஸி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, யேன வஜோ தேன க³ந்துந்தி.

தேன கோ² பன ஸமயேன அஞ்ஞதரோ பி⁴க்கு² உபகட்டா²ய வஸ்ஸூபனாயிகாய ஸத்தே²ன க³ந்துகாமோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸத்தே² வஸ்ஸம் உபக³ந்துந்தி.

தேன கோ² பன ஸமயேன அஞ்ஞதரோ பி⁴க்கு² உபகட்டா²ய வஸ்ஸூபனாயிகாய நாவாய க³ந்துகாமோ ஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, நாவாய வஸ்ஸம் உபக³ந்துந்தி.

வஜாதீ³ஸு வஸ்ஸூபக³மனம் நிட்டி²தம்.

116. வஸ்ஸம் அனுபக³ந்தப்³ப³ட்டா²னானி

204. தேன கோ² பன ஸமயேன பி⁴க்கூ² ருக்க²ஸுஸிரே வஸ்ஸம் உபக³ச்ச²ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி பிஸாசில்லிகா’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ருக்க²ஸுஸிரே வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² ருக்க²விடபி⁴யா வஸ்ஸம் உபக³ச்ச²ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி மிக³லுத்³த³கா’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ருக்க²விடபி⁴யா வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² அஜ்ஜோ²காஸே வஸ்ஸம் உபக³ச்ச²ந்தி. தே³வே வஸ்ஸந்தே ருக்க²மூலம்பி நிப்³ப³கோஸம்பி உபதா⁴வந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, அஜ்ஜோ²காஸே வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² அஸேனாஸனிகா வஸ்ஸம் உபக³ச்ச²ந்தி. ஸீதேனபி கிலமந்தி, உண்ஹேனபி கிலமந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² ச²வகுடிகாய வஸ்ஸம் உபக³ச்ச²ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி ச²வடா³ஹகா’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ச²வகுடிகாய வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² ச²த்தே வஸ்ஸம் உபக³ச்ச²ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி கோ³பாலகா’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ச²த்தே வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸாதி.

தேன கோ² பன ஸமயேன பி⁴க்கூ² சாடியா வஸ்ஸம் உபக³ச்ச²ந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஸேய்யதா²பி தித்தி²யா’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, சாடியா வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸாதி.

வஸ்ஸம் அனுபக³ந்தப்³ப³ட்டா²னானி நிட்டி²தா.

117. அத⁴ம்மிககதிகா

205. தேன கோ² பன ஸமயேன ஸாவத்தி²யா ஸங்கே⁴ன ஏவரூபா கதிகா கதா ஹோதி – அந்தராவஸ்ஸம் ந பப்³பா³ஜேதப்³ப³ந்தி. விஸாகா²ய மிகா³ரமாதுயா நத்தா பி⁴க்கூ² உபஸங்கமித்வா பப்³ப³ஜ்ஜம் யாசி. பி⁴க்கூ² ஏவமாஹம்ஸு – ‘‘ஸங்கே⁴ன கோ², ஆவுஸோ, ஏவரூபா கதிகா கதா ‘அந்தராவஸ்ஸம் ந பப்³பா³ஜேதப்³ப³’ந்தி. ஆக³மேஹி, ஆவுஸோ, யாவ பி⁴க்கூ² வஸ்ஸம் வஸந்தி. வஸ்ஸம்வுட்டா² பப்³பா³ஜேஸ்ஸந்தீ’’தி. அத² கோ² தே பி⁴க்கூ² வஸ்ஸம்வுட்டா² விஸாகா²ய மிகா³ரமாதுயா நத்தாரம் ஏதத³வோசும் – ‘‘ஏஹி, தா³னி, ஆவுஸோ, பப்³ப³ஜாஹீ’’தி. ஸோ ஏவமாஹ – ‘‘ஸசாஹம், ப⁴ந்தே, பப்³ப³ஜிதோ அஸ்ஸம், அபி⁴ரமேய்யாமஹம் [அபி⁴ரமேய்யம் சாஹம் (ஸீ.)]. ந தா³னாஹம், ப⁴ந்தே, பப்³ப³ஜிஸ்ஸாமீ’’தி. விஸாகா² மிகா³ரமாதா உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா ஏவரூபம் கதிகம் கரிஸ்ஸந்தி ‘ந அந்தராவஸ்ஸம் பப்³பா³ஜேதப்³ப³’ந்தி. கம் காலம் த⁴ம்மோ ந சரிதப்³போ³’’தி? அஸ்ஸோஸும் கோ² பி⁴க்கூ² விஸாகா²ய மிகா³ரமாதுயா உஜ்ஜா²யந்தியா கி²ய்யந்தியா விபாசேந்தியா. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஏவரூபா கதிகா காதப்³பா³ – ‘ந அந்தராவஸ்ஸம் பப்³பா³ஜேதப்³ப³’ந்தி. யோ கரேய்ய, ஆபத்தி து³க்கடஸ்ஸாதி.

அத⁴ம்மிககதிகா நிட்டி²தா.

118. படிஸ்ஸவது³க்கடாபத்தி

206. தேன கோ² பன ஸமயேன ஆயஸ்மதா உபனந்தே³ன ஸக்யபுத்தேன ரஞ்ஞோ பஸேனதி³ஸ்ஸ கோஸலஸ்ஸ வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ அத்³த³ஸ அந்தராமக்³கே³ த்³வே ஆவாஸே ப³ஹுசீவரகே. தஸ்ஸ ஏதத³ஹோஸி – ‘‘யம்னூனாஹம் இமேஸு த்³வீஸு ஆவாஸேஸு வஸ்ஸம் வஸேய்யம். ஏவம் மே ப³ஹும் சீவரம் [ப³ஹுசீவரம் (க.)] உப்பஜ்ஜிஸ்ஸதீ’’தி. ஸோ தேஸு த்³வீஸு ஆவாஸேஸு வஸ்ஸம் வஸி. ராஜா பஸேனதி³ கோஸலோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யோ உபனந்தோ³ ஸக்யபுத்தோ அம்ஹாகம் வஸ்ஸாவாஸம் படிஸ்ஸுணித்வா விஸம்வாதே³ஸ்ஸதி. நனு ப⁴க³வதா அனேகபரியாயேன முஸாவாதோ³ க³ரஹிதோ, முஸாவாதா³ வேரமணீ பஸத்தா²’’தி. அஸ்ஸோஸும் கோ² பி⁴க்கூ² ரஞ்ஞோ பஸேனதி³ஸ்ஸ கோஸலஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ ரஞ்ஞோ பஸேனதி³ஸ்ஸ கோஸலஸ்ஸ வஸ்ஸாவாஸம் படிஸ்ஸுணித்வா விஸம்வாதே³ஸ்ஸதி. நனு ப⁴க³வதா அனேகபரியாயேன முஸாவாதோ³ க³ரஹிதோ, முஸாவாதா³ வேரமணீ பஸத்தா²’’தி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே பி⁴க்கு²ஸங்க⁴ம் ஸன்னிபாதாபேத்வா ஆயஸ்மந்தம் உபனந்த³ம் ஸக்யபுத்தம் படிபுச்சி² – ‘‘ஸச்சம் கிர த்வம், உபனந்த³, ரஞ்ஞோ பஸேனதி³ஸ்ஸ கோஸலஸ்ஸ வஸ்ஸாவாஸம் படிஸ்ஸுணித்வா விஸம்வாதே³ஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, ரஞ்ஞோ பஸேனதி³ஸ்ஸ கோஸலஸ்ஸ வஸ்ஸாவாஸம் படிஸ்ஸுணித்வா விஸம்வாதே³ஸ்ஸஸி. நனு மயா, மோக⁴புரிஸ, அனேகபரியாயேன முஸாவாதோ³ க³ரஹிதோ, முஸாவாதா³ வேரமணீ பஸத்தா². நேதம், மோக⁴புரிஸ, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

207. இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ பஸ்ஸதி அந்தராமக்³கே³ த்³வே ஆவாஸே ப³ஹுசீவரகே. தஸ்ஸ ஏவம் ஹோதி – ‘‘யம்னூனாஹம் இமேஸு த்³வீஸு ஆவாஸேஸு வஸ்ஸம் வஸேய்யம். ஏவம் மே ப³ஹும் சீவரம் உப்பஜ்ஜிஸ்ஸதீ’’தி. ஸோ தேஸு த்³வீஸு ஆவாஸேஸு வஸ்ஸம் வஸதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ [பாடிபதே³ன (க.)] விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ அகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ ஸகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா அகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா ஸகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் ப³ஹித்³தா⁴ வீதினாமேதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் அந்தோ ஸன்னிவத்தம் கரோதி. தஸ்ஸ, பி⁴க்க²வே, பி⁴க்கு²னோ புரிமிகா ச பஞ்ஞாயதி, படிஸ்ஸவே ச அனாபத்தி.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ ஸத்தாஹம் அனாக³தாய பவாரணாய ஸகரணீயோ பக்கமதி. ஆக³ச்சே²ய்ய வா ஸோ, பி⁴க்க²வே, பி⁴க்கு² தம் ஆவாஸம் ந வா ஆக³ச்சே²ய்ய, தஸ்ஸ, பி⁴க்க²வே, பி⁴க்கு²னோ புரிமிகா ச பஞ்ஞாயதி, படிஸ்ஸவே ச அனாபத்தி.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ந்த்வா உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ அகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி புரிமிகாய. ஸோ தம் ஆவாஸம் க³ந்த்வா உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ ஸகரணீயோ பக்கமதி…பே… ஸோ த்³வீஹதீஹம் வஸித்வா அகரணீயோ பக்கமதி…பே… ஸோ த்³வீஹதீஹம் வஸித்வா ஸகரணீயோ பக்கமதி…பே… ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் ப³ஹித்³தா⁴ வீதினாமேதி. தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ…பே… ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் அந்தோ ஸன்னிவத்தம் கரோதி. தஸ்ஸ, பி⁴க்க²வே, பி⁴க்கு²னோ புரிமிகா ச பஞ்ஞாயதி, படிஸ்ஸவே ச அனாபத்தி…பே… ஸோ ஸத்தாஹம் அனாக³தாய பவாரணாய ஸகரணீயோ பக்கமதி. ஆக³ச்சே²ய்ய வா ஸோ, பி⁴க்க²வே, பி⁴க்கு² தம் ஆவாஸம் ந வா ஆக³ச்சே²ய்ய, தஸ்ஸ, பி⁴க்க²வே, பி⁴க்கு²னோ புரிமிகா ச பஞ்ஞாயதி, படிஸ்ஸவே ச அனாபத்தி.

208. இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ அகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ ஸகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா அகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா ஸகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் ப³ஹித்³தா⁴ வீதினாமேதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் அந்தோ ஸன்னிவத்தம் கரோதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச பஞ்ஞாயதி, படிஸ்ஸவே ச அனாபத்தி.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ச்ச²ந்தோ ப³ஹித்³தா⁴ உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ ஸத்தாஹம் அனாக³தாய கோமுதி³யா சாதுமாஸினியா ஸகரணீயோ பக்கமதி. ஆக³ச்சே²ய்ய வா ஸோ, பி⁴க்க²வே, பி⁴க்கு² தம் ஆவாஸம் ந வா ஆக³ச்சே²ய்ய, தஸ்ஸ, பி⁴க்க²வே, பி⁴க்கு²னோ பச்சி²மிகா ச பஞ்ஞாயதி, படிஸ்ஸவே ச அனாபத்தி.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ந்த்வா உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ அகரணீயோ பக்கமதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ந்த்வா உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ தத³ஹேவ ஸகரணீயோ பக்கமதி…பே… ஸோ த்³வீஹதீஹம் வஸித்வா அகரணீயோ பக்கமதி …பே… ஸோ த்³வீஹதீஹம் வஸித்வா ஸகரணீயோ பக்கமதி…பே… ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் ப³ஹித்³தா⁴ வீதினாமேதி. தஸ்ஸ, பி⁴க்க²வே, பி⁴க்கு²னோ பச்சி²மிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ…பே… ஸோ த்³வீஹதீஹம் வஸித்வா ஸத்தாஹகரணீயேன பக்கமதி. ஸோ தம் ஸத்தாஹம் அந்தோ ஸன்னிவத்தம் கரோதி. தஸ்ஸ பி⁴க்க²வே, பி⁴க்கு²னோ பச்சி²மிகா ச பஞ்ஞாயதி, படிஸ்ஸவே ச அனாபத்தி.

இத⁴ பன, பி⁴க்க²வே, பி⁴க்கு²னா வஸ்ஸாவாஸோ படிஸ்ஸுதோ ஹோதி பச்சி²மிகாய. ஸோ தம் ஆவாஸம் க³ந்த்வா உபோஸத²ம் கரோதி, பாடிபதே³ விஹாரம் உபேதி, ஸேனாஸனம் பஞ்ஞபேதி, பானீயம் பரிபோ⁴ஜனீயம் உபட்டா²பேதி, பரிவேணம் ஸம்மஜ்ஜதி. ஸோ ஸத்தாஹம் அனாக³தாய கோமுதி³யா சாதுமாஸினியா ஸகரணீயோ பக்கமதி. ஆக³ச்சே²ய்ய வா ஸோ, பி⁴க்க²வே, பி⁴க்கு² தம் ஆவாஸம் ந வா ஆக³ச்சே²ய்ய, தஸ்ஸ, பி⁴க்க²வே, பி⁴க்கு²னோ பச்சி²மிகா ச பஞ்ஞாயதி, படிஸ்ஸவே ச அனாபத்தீதி.

படிஸ்ஸவது³க்கடாபத்தி நிட்டி²தா.

வஸ்ஸூபனாயிகக்க²ந்த⁴கோ ததியோ.

119. தஸ்ஸுத்³தா³னம்

உபக³ந்தும் கதா³ சேவ, கதி அந்தராவஸ்ஸ ச;

ந இச்ச²ந்தி ச ஸஞ்சிச்ச, உக்கட்³டி⁴தும் உபாஸகோ.

கி³லானோ மாதா ச பிதா, பா⁴தா ச அத² ஞாதகோ;

பி⁴க்கு²க³திகோ விஹாரோ, வாளா சாபி ஸரீஸபா.