81. சோத³னாகதா²

153. தேன கோ² பன ஸமயேன ச²ப்³ப³க்³கி³யா பி⁴க்கூ² அனோகாஸகதம் பி⁴க்கு²ம் ஆபத்தியா சோதே³ந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, அனோகாஸகதோ பி⁴க்கு² ஆபத்தியா சோதே³தப்³போ³. யோ சோதே³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஓகாஸம் காராபேத்வா ஆபத்தியா சோதே³தும் – கரோது ஆயஸ்மா ஓகாஸம், அஹம் தம் வத்துகாமோதி.

தேன கோ² பன ஸமயேன பேஸலா பி⁴க்கூ² ச²ப்³ப³க்³கி³யே பி⁴க்கூ² ஓகாஸம் காராபேத்வா ஆபத்தியா சோதே³ந்தி. ச²ப்³ப³க்³கி³யா பி⁴க்கூ² லப⁴ந்தி ஆகா⁴தம், லப⁴ந்தி அப்பச்சயம், வதே⁴ன தஜ்ஜேந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கதேபி ஓகாஸே புக்³க³லம் துலயித்வா ஆபத்தியா சோதே³துந்தி.

தேன கோ² பன ஸமயேன ச²ப்³ப³க்³கி³யா பி⁴க்கூ² – புரம்ஹாகம் பேஸலா பி⁴க்கூ² ஓகாஸம் காராபேந்தீதி – படிகச்சேவ ஸுத்³தா⁴னம் பி⁴க்கூ²னம் அனாபத்திகானம் அவத்து²ஸ்மிம் அகாரணே ஓகாஸம் காராபேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸுத்³தா⁴னம் பி⁴க்கூ²னம் அனாபத்திகானம் அவத்து²ஸ்மிம் அகாரணே ஓகாஸோ காராபேதப்³போ³. யோ காராபேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, புக்³க³லம் துலயித்வா ஓகாஸம் காது [காராபேதும் (ஸ்யா.)] ந்தி.