79. வினயபுச்ச²னகதா²

151. தேன கோ² பன ஸமயேன ச²ப்³ப³க்³கி³யா பி⁴க்கூ² ஸங்க⁴மஜ்ஜே² அஸம்மதா வினயம் புச்ச²ந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸங்க⁴மஜ்ஜே² அஸம்மதேன வினயோ புச்சி²தப்³போ³. யோ புச்சே²ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸங்க⁴மஜ்ஜே² ஸம்மதேன வினயம் புச்சி²தும். ஏவஞ்ச பன, பி⁴க்க²வே, ஸம்மன்னிதப்³போ³ – அத்தனா வா [அத்தனாவ (ஸ்யா.)] அத்தானம் ஸம்மன்னிதப்³ப³ம், பரேன வா பரோ ஸம்மன்னிதப்³போ³. கத²ஞ்ச அத்தனாவ அத்தானம் ஸம்மன்னிதப்³ப³ம்? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், அஹம் இத்த²ன்னாமம் வினயம் புச்சே²ய்ய’’ந்தி. ஏவம் அத்தனாவ அத்தானம் ஸம்மன்னிதப்³ப³ம்.

கத²ஞ்ச பரேன பரோ ஸம்மன்னிதப்³போ³? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லம், இத்த²ன்னாமோ இத்த²ன்னாமம் வினயம் புச்சே²ய்யா’’தி. ஏவம் பரேன பரோ ஸம்மன்னிதப்³போ³தி.

தேன கோ² பன ஸமயேன பேஸலா பி⁴க்கூ² ஸங்க⁴மஜ்ஜே² ஸம்மதா வினயம் புச்ச²ந்தி. ச²ப்³ப³க்³கி³யா பி⁴க்கூ² லப⁴ந்தி ஆகா⁴தம், லப⁴ந்தி அப்பச்சயம், வதே⁴ன தஜ்ஜேந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஸங்க⁴மஜ்ஜே² ஸம்மதேனபி பரிஸம் ஓலோகேத்வா புக்³க³லம் துலயித்வா வினயம் புச்சி²துந்தி.