100. ஸீமோக்கந்திகபேய்யாலம்

177. இத⁴ பன, பி⁴க்க²வே, அஞ்ஞதரஸ்மிம் ஆவாஸே தத³ஹுபோஸதே² ஸம்ப³ஹுலா ஆவாஸிகா பி⁴க்கூ² ஸன்னிபதந்தி சத்தாரோ வா அதிரேகா வா. தே ந ஜானந்தி ‘‘அஞ்ஞே ஆவாஸிகா பி⁴க்கூ² அந்தோஸீமம் ஓக்கமந்தீ’’தி …பே… தே ந ஜானந்தி ‘‘அஞ்ஞே ஆவாஸிகா பி⁴க்கூ² அந்தோஸீமம் ஓக்கந்தா’’தி…பே… தே ந பஸ்ஸந்தி அஞ்ஞே ஆவாஸிகே பி⁴க்கூ² அந்தோஸீமம் ஓக்கமந்தே …பே… தே ந பஸ்ஸந்தி அஞ்ஞே ஆவாஸிகே பி⁴க்கூ² அந்தோஸீமம் ஓக்கந்தே…பே… தே ந ஸுணந்தி ‘‘அஞ்ஞே ஆவாஸிகா பி⁴க்கூ² அந்தோஸீமம் ஓக்கமந்தீ’’தி…பே… தே ந ஸுணந்தி ‘‘அஞ்ஞே ஆவாஸிகா பி⁴க்கூ² அந்தோஸீமம் ஓக்கந்தா’’தி…பே….

ஆவாஸிகேன ஆவாஸிகா ஏகஸதபஞ்சஸத்ததி திகனயதோ, ஆவாஸிகேன ஆக³ந்துகா, ஆக³ந்துகேன ஆவாஸிகா, ஆக³ந்துகேன ஆக³ந்துகா பேய்யாலமுகே²ன ஸத்த திகஸதானி ஹோந்தி.

178. இத⁴ பன, பி⁴க்க²வே, ஆவாஸிகானம் பி⁴க்கூ²னம் சாதுத்³த³ஸோ ஹோதி, ஆக³ந்துகானம் பன்னரஸோ. ஸசே ஆவாஸிகா ப³ஹுதரா ஹோந்தி, ஆக³ந்துகேஹி ஆவாஸிகானம் அனுவத்திதப்³ப³ம். ஸசே ஸமஸமா ஹோந்தி, ஆக³ந்துகேஹி ஆவாஸிகானம் அனுவத்திதப்³ப³ம். ஸசே ஆக³ந்துகா ப³ஹுதரா ஹோந்தி, ஆவாஸிகேஹி ஆக³ந்துகானம் அனுவத்திதப்³ப³ம்.

இத⁴ பன, பி⁴க்க²வே, ஆவாஸிகானம் பி⁴க்கூ²னம் பன்னரஸோ ஹோதி, ஆக³ந்துகானம் சாதுத்³த³ஸோ. ஸசே ஆவாஸிகா ப³ஹுதரா ஹோந்தி, ஆக³ந்துகேஹி ஆவாஸிகானம் அனுவத்திதப்³ப³ம். ஸசே ஸமஸமா ஹோந்தி, ஆக³ந்துகேஹி ஆவாஸிகானம் அனுவத்திதப்³ப³ம். ஸசே ஆக³ந்துகா ப³ஹுதரா ஹோந்தி, ஆவாஸிகேஹி ஆக³ந்துகானம் அனுவத்திதப்³ப³ம்.

இத⁴ பன, பி⁴க்க²வே, ஆவாஸிகானம் பி⁴க்கூ²னம் பாடிபதோ³ ஹோதி, ஆக³ந்துகானம் பன்னரஸோ. ஸசே ஆவாஸிகா ப³ஹுதரா ஹோந்தி, ஆவாஸிகேஹி ஆக³ந்துகானம் நாகாமா தா³தப்³பா³ ஸாமக்³கீ³. ஆக³ந்துகேஹி நிஸ்ஸீமம் க³ந்த்வா உபோஸதோ² காதப்³போ³. ஸசே ஸமஸமா ஹோந்தி, ஆவாஸிகேஹி ஆக³ந்துகானம் நாகாமா தா³தப்³பா³ ஸாமக்³கீ³. ஆக³ந்துகேஹி நிஸ்ஸீமம் க³ந்த்வா உபோஸதோ² காதப்³போ³. ஸசே ஆக³ந்துகா ப³ஹுதரா ஹோந்தி, ஆவாஸிகேஹி ஆக³ந்துகானம் ஸாமக்³கீ³ வா தா³தப்³பா³ நிஸ்ஸீமம் வா க³ந்தப்³ப³ம்.

இத⁴ பன, பி⁴க்க²வே, ஆவாஸிகானம் பி⁴க்கூ²னம் பன்னரஸோ ஹோதி, ஆக³ந்துகானம்

பாடிபதோ³. ஸசே ஆவாஸிகா ப³ஹுதரா ஹோந்தி, ஆக³ந்துகேஹி ஆவாஸிகானம் ஸாமக்³கீ³ வா தா³தப்³பா³ நிஸ்ஸீமம் வா க³ந்தப்³ப³ம். ஸசே ஸமஸமா ஹோந்தி, ஆக³ந்துகேஹி ஆவாஸிகானம் ஸாமக்³கீ³ வா தா³தப்³பா³ நிஸ்ஸீமம் வா க³ந்தப்³ப³ம். ஸசே ஆக³ந்துகா ப³ஹுதரா ஹோந்தி, ஆக³ந்துகேஹி ஆவாஸிகானம் நாகாமா தா³தப்³பா³ ஸாமக்³கீ³. ஆவாஸிகேஹி நிஸ்ஸீமம் க³ந்த்வா உபோஸதோ² காதப்³போ³.

ஸீமோக்கந்திகபேய்யாலம் நிட்டி²தம்.