279. உபாலிஸங்க⁴ஸாமக்³கீ³புச்சா²

476. அத² கோ² ஆயஸ்மா உபாலி யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா உபாலி ப⁴க³வந்தம் ஏதத³வோச – ‘‘யஸ்மிம், ப⁴ந்தே, வத்து²ஸ்மிம் ஹோதி ஸங்க⁴ஸ்ஸ ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னம் ஸங்க⁴னானாகரணம், ஸங்கோ⁴ தம் வத்து²ம் அவினிச்சி²னித்வா அமூலா மூலம் க³ந்த்வா ஸங்க⁴ஸாமக்³கி³ம் கரோதி, த⁴ம்மிகா நு கோ² ஸா, ப⁴ந்தே, ஸங்க⁴ஸாமக்³கீ³’’தி? ‘‘யஸ்மிம், உபாலி, வத்து²ஸ்மிம் ஹோதி ஸங்க⁴ஸ்ஸ ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னம் ஸங்க⁴னானாகரணம், ஸங்கோ⁴ தம் வத்து²ம் அவினிச்சி²னித்வா அமூலா மூலம் க³ந்த்வா ஸங்க⁴ஸாமக்³கி³ம் கரோதி, அத⁴ம்மிகா ஸா, உபாலி, ஸங்க⁴ஸாமக்³கீ³’’தி.

‘‘யஸ்மிம் பன, ப⁴ந்தே, வத்து²ஸ்மிம் ஹோதி ஸங்க⁴ஸ்ஸ ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னம் ஸங்க⁴னானாகரணம், ஸங்கோ⁴ தம் வத்து²ம் வினிச்சி²னித்வா மூலா மூலம் க³ந்த்வா ஸங்க⁴ஸாமக்³கி³ம் கரோதி, த⁴ம்மிகா நு கோ² ஸா, ப⁴ந்தே, ஸங்க⁴ஸாமக்³கீ³’’தி? ‘‘யஸ்மிம், உபாலி, வத்து²ஸ்மிம் ஹோதி ஸங்க⁴ஸ்ஸ ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னம் ஸங்க⁴னானாகரணம், ஸங்கோ⁴ தம் வத்து²ம் வினிச்சி²னித்வா மூலா மூலம் க³ந்த்வா ஸங்க⁴ஸாமக்³கி³ம் கரோதி, த⁴ம்மிகா ஸா, உபாலி, ஸங்க⁴ஸாமக்³கீ³’’தி.

‘‘கதி நு கோ², ப⁴ந்தே, ஸங்க⁴ஸாமக்³கி³யோ’’தி? ‘‘த்³வேமா, உபாலி, ஸங்க⁴ஸாமக்³கி³யோ – அத்து²பாலி, ஸங்க⁴ஸாமக்³கீ³ அத்தா²பேதா ப்³யஞ்ஜனுபேதா; அத்து²பாலி, ஸங்க⁴ஸாமக்³கீ³ அத்து²பேதா ச ப்³யஞ்ஜனுபேதா ச. கதமா ச, உபாலி, ஸங்க⁴ஸாமக்³கீ³ அத்தா²பேதா ப்³யஞ்ஜனுபேதா? யஸ்மிம், உபாலி, வத்து²ஸ்மிம் ஹோதி ஸங்க⁴ஸ்ஸ ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னம் ஸங்க⁴னானாகரணம், ஸங்கோ⁴ தம் வத்து²ம் அவினிச்சி²னித்வா அமூலா மூலம் க³ந்த்வா ஸங்க⁴ஸாமக்³கி³ம் கரோதி, அயம் வுச்சதி, உபாலி, ஸங்க⁴ஸாமக்³கீ³ அத்தா²பேதா ப்³யஞ்ஜனுபேதா. கதமா ச, உபாலி, ஸங்க⁴ஸாமக்³கீ³ அத்து²பேதா ச ப்³யஞ்ஜனுபேதா ச? யஸ்மிம், உபாலி, வத்து²ஸ்மிம் ஹோதி ஸங்க⁴ஸ்ஸ ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னம் ஸங்க⁴னானாகரணம், ஸங்கோ⁴ தம் வத்து²ம் வினிச்சி²னித்வா மூலா மூலம் க³ந்த்வா ஸங்க⁴ஸாமக்³கி³ம் கரோதி, அயம் வுச்சதி, உபாலி, ஸங்க⁴ஸாமக்³கீ³ அத்து²பேதா ச ப்³யஞ்ஜனுபேதா ச. இமா கோ², உபாலி, த்³வே ஸங்க⁴ஸாமக்³கி³யோ’’தி.

477. அத² கோ² ஆயஸ்மா உபாலி உட்டா²யாஸனா ஏகம்ஸம் உத்தராஸங்க³ம் கரித்வா யேன ப⁴க³வா தேனஞ்ஜலிம் பணாமேத்வா ப⁴க³வந்தம் கா³தா²ய அஜ்ஜ²பா⁴ஸி –

‘‘ஸங்க⁴ஸ்ஸ கிச்சேஸு ச மந்தனாஸு ச;

அத்தே²ஸு ஜாதேஸு வினிச்ச²யேஸு ச;

கத²ம்பகாரோத⁴ நரோ மஹத்தி²கோ;

பி⁴க்கு² கத²ம் ஹோதித⁴ பக்³க³ஹாரஹோதி.

‘‘அனானுவஜ்ஜோ பட²மேன ஸீலதோ;

அவேக்கி²தாசாரோ ஸுஸம்வுதிந்த்³ரியோ;

பச்சத்தி²கா நூபவத³ந்தி த⁴ம்மதோ;

ந ஹிஸ்ஸ தம் ஹோதி வதே³ய்யு யேன நம்.

‘‘ஸோ தாதி³ஸோ ஸீலவிஸுத்³தி⁴யா டி²தோ;

விஸாரதோ³ ஹோதி விஸய்ஹ பா⁴ஸதி;

நச்ச²ம்ப⁴தி பரிஸக³தோ ந வேத⁴தி;

அத்த²ம் ந ஹாபேதி அனுய்யுதம் ப⁴ணம்.

‘‘ததே²வ பஞ்ஹம் பரிஸாஸு புச்சி²தோ;

ந சேவ பஜ்ஜா²யதி ந மங்கு ஹோதி;

ஸோ காலாக³தம் ப்³யாகரணாரஹம் வசோ;

ரஞ்ஜேதி விஞ்ஞூபரிஸம் விசக்க²ணோ.

‘‘ஸகா³ரவோ வுட்³ட⁴தரேஸு பி⁴க்கு²ஸு;

ஆசேரகம்ஹி ச ஸகே விஸாரதோ³;

அலம் பமேதும் பகு³ணோ கதே²தவே;

பச்சத்தி²கானஞ்ச விரத்³தி⁴கோவிதோ³.

‘‘பச்சத்தி²கா யேன வஜந்தி நிக்³க³ஹம்;

மஹாஜனோ ஸஞ்ஞபனஞ்ச க³ச்ச²தி;

ஸகஞ்ச ஆதா³யமயம் ந ரிஞ்சதி;

வியாகரம் [ஸோ ப்³யாகரம் (ஸீ.), வேய்யாகரம் (ஸ்யா.)] பஞ்ஹமனூபகா⁴திகம்.

‘‘தூ³தேய்யகம்மேஸு அலம் ஸமுக்³க³ஹோ;

ஸங்க⁴ஸ்ஸ கிச்சேஸு ச ஆஹு நம் யதா²;

கரம் வசோ பி⁴க்கு²க³ணேன பேஸிதோ;

அஹம் கரோமீதி ந தேன மஞ்ஞதி.

‘‘ஆபஜ்ஜதி யாவதகேஸு வத்து²ஸு;

ஆபத்தியா ஹோதி யதா² ச வுட்டி²தி;

ஏதே விப⁴ங்கா³ உப⁴யஸ்ஸ ஸ்வாக³தா;

ஆபத்தி வுட்டா²னபத³ஸ்ஸ கோவிதோ³.

‘‘நிஸ்ஸாரணம் க³ச்ச²தி யானி சாசரம்;

நிஸ்ஸாரிதோ ஹோதி யதா² ச வத்தனா [வத்து²னா (ஸீ. ஸ்யா.)];

ஓஸாரணம் தம்வுஸிதஸ்ஸ ஜந்துனோ;

ஏதம்பி ஜானாதி விப⁴ங்க³கோவிதோ³.

‘‘ஸகா³ரவோ வுட்³ட⁴தரேஸு பி⁴க்கு²ஸு;

நவேஸு தே²ரேஸு ச மஜ்ஜி²மேஸு ச;

மஹாஜனஸ்ஸத்த²சரோத⁴ பண்டி³தோ;

ஸோ தாதி³ஸோ பி⁴க்கு² இத⁴ பக்³க³ஹாரஹோ’’தி.

உபாலிஸங்க⁴ஸாமக்³கீ³புச்சா² நிட்டி²தா.

கோஸம்ப³கக்க²ந்த⁴கோ த³ஸமோ.