272. தீ³கா⁴வுவத்து²

458. அத² கோ² ப⁴க³வா பி⁴க்கூ² ஆமந்தேஸி – ‘‘பூ⁴தபுப்³ப³ம், பி⁴க்க²வே, பா³ராணஸியம் [வஜிரபு³த்³தி⁴டீகா ஓலோகேதப்³பா³] ப்³ரஹ்மத³த்தோ நாம காஸிராஜா அஹோஸி அட்³டோ⁴ மஹத்³த⁴னோ மஹாபோ⁴கோ³ மஹப்³ப³லோ மஹாவாஹனோ மஹாவிஜிதோ பரிபுண்ணகோஸகோட்டா²கா³ரோ. தீ³கீ⁴தி நாம கோஸலராஜா அஹோஸி த³லித்³தோ³ அப்பத⁴னோ அப்பபோ⁴கோ³ அப்பப³லோ அப்பவாஹனோ அப்பவிஜிதோ அபரிபுண்ணகோஸகோட்டா²கா³ரோ. அத² கோ², பி⁴க்க²வே, ப்³ரஹ்மத³த்தோ காஸிராஜா சதுரங்கி³னிம் ஸேனம் ஸன்னய்ஹித்வா தீ³கீ⁴திம் கோஸலராஜானம் அப்³பு⁴ய்யாஸி. அஸ்ஸோஸி கோ², பி⁴க்க²வே, தீ³கீ⁴தி கோஸலராஜா – ‘‘ப்³ரஹ்மத³த்தோ கிர காஸிராஜா சதுரங்கி³னிம் ஸேனம் ஸன்னய்ஹித்வா மமம் அப்³பு⁴ய்யாதோ’’தி. அத² கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ ஏதத³ஹோஸி – ‘‘ப்³ரஹ்மத³த்தோ கோ² காஸிராஜா அட்³டோ⁴ மஹத்³த⁴னோ மஹாபோ⁴கோ³ மஹப்³ப³லோ மஹாவாஹனோ மஹாவிஜிதோ பரிபுண்ணகோஸகோட்டா²கா³ரோ, அஹம் பனம்ஹி த³லித்³தோ³ அப்பத⁴னோ அப்பபோ⁴கோ³ அப்பப³லோ அப்பவாஹனோ அப்பவிஜிதோ அபரிபுண்ணகோஸகோட்டா²கா³ரோ, நாஹம் படிப³லோ ப்³ரஹ்மத³த்தேன காஸிரஞ்ஞா ஏகஸங்கா⁴தம்பி ஸஹிதும். யம்னூனாஹம் படிகச்சேவ நக³ரம்ஹா நிப்பதேய்ய’’ந்தி.

அத² கோ², பி⁴க்க²வே, தீ³கீ⁴தி கோஸலராஜா மஹேஸிம் ஆதா³ய படிகச்சேவ நக³ரம்ஹா நிப்பதி. அத² கோ², பி⁴க்க²வே, ப்³ரஹ்மத³த்தோ காஸிராஜா தீ³கீ⁴திஸ்ஸ கோஸலரஞ்ஞோ ப³லஞ்ச வாஹனஞ்ச ஜனபத³ஞ்ச கோஸஞ்ச கோட்டா²கா³ரஞ்ச அபி⁴விஜிய அஜ்ஜா²வஸதி. அத² கோ², பி⁴க்க²வே, தீ³கீ⁴தி கோஸலராஜா ஸபஜாபதிகோ யேன வாராணஸீ தேன பக்காமி. அனுபுப்³பே³ன யேன பா³ராணஸீ தத³வஸரி. தத்ர ஸுத³ம், பி⁴க்க²வே, தீ³கீ⁴தி கோஸலராஜா ஸபஜாபதிகோ பா³ராணஸியம் அஞ்ஞதரஸ்மிம் பச்சந்திமே ஓகாஸே கும்ப⁴காரனிவேஸனே அஞ்ஞாதகவேஸேன பரிப்³பா³ஜகச்ச²ன்னேன படிவஸதி. அத² கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ மஹேஸீ நசிரஸ்ஸேவ க³ப்³பி⁴னீ அஹோஸி. தஸ்ஸா ஏவரூபோ தோ³ஹளோ உப்பன்னோ ஹோதி – ‘‘இச்ச²தி ஸூரியஸ்ஸ உக்³க³மனகாலே சதுரங்கி³னிம் ஸேனம் ஸன்னத்³த⁴ம் வம்மிகம் ஸுபூ⁴மே டி²தம் பஸ்ஸிதும், க²க்³கா³னஞ்ச தோ⁴வனம் பாதும்’’. அத² கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ மஹேஸீ தீ³கீ⁴திம் கோஸலராஜானம் ஏதத³வோச – ‘‘க³ப்³பி⁴னீம்ஹி, தே³வ. தஸ்ஸா மே ஏவரூபோ தோ³ஹளோ உப்பன்னோ – இச்சா²மி ஸூரியஸ்ஸ உக்³க³மனகாலே சதுரங்கி³னிம் ஸேனம் ஸன்னத்³த⁴ம் வம்மிகம் [வம்மிதம் (ஸீ.)] ஸுபூ⁴மே டி²தம் பஸ்ஸிதும், க²க்³கா³னஞ்ச தோ⁴வனம் பாது’’ந்தி. ‘‘குதோ, தே³வி, அம்ஹாகம் து³க்³க³தானம் சதுரங்கி³னீ ஸேனா ஸன்னத்³தா⁴ வம்மிகா ஸுபூ⁴மே டி²தா, க²க்³கா³னஞ்ச தோ⁴வனம் பாது’’ந்தி [க²க்³கா³னஞ்ச தோ⁴வனந்தி (ஸீ. ஸ்யா.)] ‘‘ஸசாஹம், தே³வ, ந லபி⁴ஸ்ஸாமி, மரிஸ்ஸாமீ’’தி.

459. தேன கோ² பன ஸமயேன, ப்³ரஹ்மத³த்தஸ்ஸ காஸிரஞ்ஞோ புரோஹிதோ ப்³ராஹ்மணோ தீ³கீ⁴திஸ்ஸ கோஸலரஞ்ஞோ ஸஹாயோ ஹோதி. அத² கோ², பி⁴க்க²வே, தீ³கீ⁴தி கோஸலராஜா யேன ப்³ரஹ்மத³த்தஸ்ஸ காஸிரஞ்ஞோ புரோஹிதோ ப்³ராஹ்மணோ தேனுபஸங்கமி, உபஸங்கமித்வா ப்³ரஹ்மத³த்தஸ்ஸ காஸிரஞ்ஞோ புரோஹிதம் ப்³ராஹ்மணம் ஏதத³வோச – ‘‘ஸகீ² தே, ஸம்ம, க³ப்³பி⁴னீ. தஸ்ஸா ஏவரூபோ தோ³ஹளோ உப்பன்னோ – இச்ச²தி ஸூரியஸ்ஸ உக்³க³மனகாலே சதுரங்கி³னிம் ஸேனம் ஸன்னத்³த⁴ம் வம்மிகம் ஸுபூ⁴மே டி²தம் பஸ்ஸிதும், க²க்³கா³னஞ்ச தோ⁴வனம் பாது’’ந்தி. ‘‘தேன ஹி, தே³வ, மயம்பி தே³விம் பஸ்ஸாமா’’தி. அத² கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ மஹேஸீ யேன ப்³ரஹ்மத³த்தஸ்ஸ காஸிரஞ்ஞோ புரோஹிதோ ப்³ராஹ்மணோ தேனுபஸங்கமி. அத்³த³ஸா கோ², பி⁴க்க²வே, ப்³ரஹ்மத³த்தஸ்ஸ காஸிரஞ்ஞோ புரோஹிதோ ப்³ராஹ்மணோ தீ³கீ⁴திஸ்ஸ கோஸலரஞ்ஞோ மஹேஸிம் தூ³ரதோவ ஆக³ச்ச²ந்திம், தி³ஸ்வான உட்டா²யாஸனா ஏகம்ஸம் உத்தராஸங்க³ம் கரித்வா யேன தீ³கீ⁴திஸ்ஸ கோஸலரஞ்ஞோ மஹேஸீ தேனஞ்ஜலிம் பணாமேத்வா திக்க²த்தும் உதா³னம் உதா³னேஸி – ‘‘கோஸலராஜா வத போ⁴ குச்சி²க³தோ, கோஸலராஜா வத போ⁴ குச்சி²க³தோ’’தி. அத்தமனா [அவிமனா (ஸீ. ஸ்யா. கத்த²சி], தே³வி, ஹோஹி. லச்ச²ஸி ஸூரியஸ்ஸ உக்³க³மனகாலே சதுரங்கி³னிம் ஸேனம் ஸன்னத்³த⁴ம் வம்மிகம் ஸுபூ⁴மே டி²தம் பஸ்ஸிதும், க²க்³கா³னஞ்ச தோ⁴வனம் பாதுந்தி.

அத² கோ², பி⁴க்க²வே, ப்³ரஹ்மத³த்தஸ்ஸ காஸிரஞ்ஞோ புரோஹிதோ ப்³ராஹ்மணோ யேன ப்³ரஹ்மத³த்தோ காஸிராஜா தேனுபஸங்கமி, உபஸங்கமித்வா ப்³ரஹ்மத³த்தம் காஸிராஜானம் ஏதத³வோச – ‘‘ததா², தே³வ, நிமித்தானி தி³ஸ்ஸந்தி, ஸ்வே ஸூரியுக்³க³மனகாலே சதுரங்கி³னீ ஸேனா ஸன்னத்³தா⁴ வம்மிகா ஸுபூ⁴மே திட்ட²து, க²க்³கா³ ச தோ⁴வியந்தூ’’தி. அத² கோ², பி⁴க்க²வே, ப்³ரஹ்மத³த்தோ காஸிராஜா மனுஸ்ஸே ஆணாபேஸி – ‘‘யதா², ப⁴ணே, புரோஹிதோ ப்³ராஹ்மணோ ஆஹ ததா² கரோதா²’’தி. அலபி⁴ கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ மஹேஸீ ஸூரியஸ்ஸ உக்³க³மனகாலே சதுரங்கி³னிம் ஸேனம் ஸன்னத்³த⁴ம் வம்மிகம் ஸுபூ⁴மே டி²தம் பஸ்ஸிதும், க²க்³கா³னஞ்ச தோ⁴வனம் பாதும். அத² கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ மஹேஸீ தஸ்ஸ க³ப்³ப⁴ஸ்ஸ பரிபாகமன்வாய புத்தம் விஜாயி. தஸ்ஸ தீ³கா⁴வூதி நாமம் அகம்ஸு. அத² கோ², பி⁴க்க²வே, தீ³கா⁴வு குமாரோ நசிரஸ்ஸேவ விஞ்ஞுதம் பாபுணி. அத² கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ ஏதத³ஹோஸி – ‘‘அயம் கோ² ப்³ரஹ்மத³த்தோ காஸிராஜா ப³ஹுனோ அம்ஹாகம் அனத்த²ஸ்ஸ காரகோ, இமினா அம்ஹாகம் ப³லஞ்ச வாஹனஞ்ச ஜனபதோ³ ச கோஸோ ச கோட்டா²கா³ரஞ்ச அச்சி²ன்னம், ஸசாயம் அம்ஹே ஜானிஸ்ஸதி, ஸப்³பே³வ தயோ கா⁴தாபேஸ்ஸதி, யம்னூனாஹம் தீ³கா⁴வும் குமாரம் ப³ஹினக³ரே வாஸேய்ய’’ந்தி. அத² கோ² பி⁴க்க²வே தீ³கீ⁴தி கோஸலராஜா தீ³கா⁴வும் குமாரம் ப³ஹினக³ரே வாஸேஸி. அத² கோ² பி⁴க்க²வே தீ³கா⁴வு குமாரோ ப³ஹினக³ரே படிவஸந்தோ நசிரஸ்ஸேவ ஸப்³ப³ஸிப்பானி ஸிக்கி².

460. தேன கோ² பன ஸமயேன தீ³கீ⁴திஸ்ஸ கோஸலரஞ்ஞோ கப்பகோ ப்³ரஹ்மத³த்தே காஸிரஞ்ஞே படிவஸதி. அத்³த³ஸா கோ², பி⁴க்க²வே, தீ³கீ⁴திஸ்ஸ கோஸலரஞ்ஞோ கப்பகோ தீ³கீ⁴திம் கோஸலராஜானம் ஸபஜாபதிகம் பா³ராணஸியம் அஞ்ஞதரஸ்மிம் பச்சந்திமே ஓகாஸே கும்ப⁴காரனிவேஸனே அஞ்ஞாதகவேஸேன பரிப்³பா³ஜகச்ச²ன்னேன படிவஸந்தம், தி³ஸ்வான யேன ப்³ரஹ்மத³த்தோ காஸிராஜா தேனுபஸங்கமி, உபஸங்கமித்வா ப்³ரஹ்மத³த்தம் காஸிராஜானம் ஏதத³வோச – ‘‘தீ³கீ⁴தி, தே³வ, கோஸலராஜா ஸபஜாபதிகோ பா³ராணஸியம் அஞ்ஞதரஸ்மிம் பச்சந்திமே ஓகாஸே கும்ப⁴காரனிவேஸனே அஞ்ஞாதகவேஸேன பரிப்³பா³ஜகச்ச²ன்னேன படிவஸதீ’’தி. அத² கோ², பி⁴க்க²வே, ப்³ரஹ்மத³த்தோ காஸிராஜா மனுஸ்ஸே ஆணாபேஸி – ‘‘தேன ஹி, ப⁴ணே, தீ³கீ⁴திம் கோஸலராஜானம் ஸபஜாபதிகம் ஆனேதா²’’தி. ‘‘ஏவம், தே³வா’’தி கோ², பி⁴க்க²வே, தே மனுஸ்ஸா ப்³ரஹ்மத³த்தஸ்ஸ காஸிரஞ்ஞோ படிஸ்ஸுத்வா தீ³கீ⁴திம் கோஸலராஜானம் ஸபஜாபதிகம் ஆனேஸும். அத² கோ², பி⁴க்க²வே, ப்³ரஹ்மத³த்தோ காஸிராஜா மனுஸ்ஸே ஆணாபேஸி – ‘‘தேன ஹி, ப⁴ணே, தீ³கீ⁴திம் கோஸலராஜானம் ஸபஜாபதிகம் த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²காய ரதி²கம் ஸிங்கா⁴டகேன ஸிங்கா⁴டகம் பரினேத்வா த³க்கி²ணேன த்³வாரேன நிக்கா²மேத்வா த³க்கி²ணதோ நக³ரஸ்ஸ சதுதா⁴ சி²ந்தி³த்வா சதுத்³தி³ஸா பி³லானி நிக்கி²பதா²’’தி. ‘‘ஏவம், தே³வா’’தி கோ², பி⁴க்க²வே, தே மனுஸ்ஸா ப்³ரஹ்மத³த்தஸ்ஸ காஸிரஞ்ஞோ படிஸ்ஸுத்வா தீ³கீ⁴திம் கோஸலராஜானம் ஸபஜாபதிகம் த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²காய ரதி²கம் ஸிங்கா⁴டகேன ஸிங்கா⁴டகம் பரினேந்தி.

அத² கோ², பி⁴க்க²வே, தீ³கா⁴வுஸ்ஸ குமாரஸ்ஸ ஏதத³ஹோஸி – ‘‘சிரம்தி³ட்டா² கோ² மே மாதாபிதரோ. யம்னூனாஹம் மாதாபிதரோ பஸ்ஸேய்ய’’ந்தி. அத² கோ², பி⁴க்க²வே, தீ³கா⁴வு குமாரோ பா³ராணஸிம் பவிஸித்வா அத்³த³ஸ மாதாபிதரோ த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²காய ரதி²கம் ஸிங்கா⁴டகேன ஸிங்கா⁴டகம் பரினேந்தே, தி³ஸ்வான யேன மாதாபிதரோ தேனுபஸங்கமி. அத்³த³ஸா கோ², பி⁴க்க²வே, தீ³கீ⁴தி கோஸலராஜா தீ³கா⁴வும் குமாரம் தூ³ரதோவ ஆக³ச்ச²ந்தம்; தி³ஸ்வான தீ³கா⁴வும் குமாரம் ஏதத³வோச – ‘‘மா கோ² த்வம், தாத தீ³கா⁴வு, தீ³க⁴ம் பஸ்ஸ, மா ரஸ்ஸம். ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’’தி. ஏவம் வுத்தே, பி⁴க்க²வே, தே மனுஸ்ஸா தீ³கீ⁴திம் கோஸலராஜானம் ஏதத³வோசும் – ‘‘உம்மத்தகோ அயம் தீ³கீ⁴தி கோஸலராஜா விப்பலபதி. கோ இமஸ்ஸ தீ³கா⁴வு? கம் அயம் ஏவமாஹ – ‘மா கோ² த்வம், தாத தீ³கா⁴வு, தீ³க⁴ம் பஸ்ஸ, மா ரஸ்ஸம். ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’’தி. ‘‘நாஹம், ப⁴ணே, உம்மத்தகோ விப்பலபாமி, அபி ச யோ விஞ்ஞூ ஸோ விபா⁴வேஸ்ஸதீ’’தி. து³தியம்பி கோ², பி⁴க்க²வே…பே… ததியம்பி கோ², பி⁴க்க²வே, தீ³கீ⁴தி கோஸலராஜா தீ³கா⁴வும் குமாரம் ஏதத³வோச – ‘‘மா கோ² த்வம், தாத தீ³கா⁴வு, தீ³க⁴ம் பஸ்ஸ, மா ரஸ்ஸம். ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’’தி. ததியம்பி கோ², பி⁴க்க²வே, தே மனுஸ்ஸா தீ³கீ⁴திம் கோஸலராஜானம் ஏதத³வோசும் – ‘‘உம்மத்தகோ அயம் தீ³கீ⁴தி கோஸலராஜா விப்பலபதி. கோ இமஸ்ஸ தீ³கா⁴வு? கம் அயம் ஏவமாஹ – மா கோ² த்வம், தாத தீ³கா⁴வு, தீ³க⁴ம் பஸ்ஸ, மா ரஸ்ஸம். ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’’தி. ‘‘நாஹம், ப⁴ணே, உம்மத்தகோ விப்பலபாமி, அபி ச யோ விஞ்ஞூ ஸோ விபா⁴வேஸ்ஸதீ’’தி. அத² கோ², பி⁴க்க²வே, தே மனுஸ்ஸா தீ³கீ⁴திம் கோஸலராஜானம் ஸபஜாபதிகம் ரதி²காய ரதி²கம் ஸிங்கா⁴டகேன ஸிங்கா⁴டகம் பரினேத்வா த³க்கி²ணேன த்³வாரேன நிக்கா²மேத்வா த³க்கி²ணதோ நக³ரஸ்ஸ சதுதா⁴ சி²ந்தி³த்வா சதுத்³தி³ஸா பி³லானி நிக்கி²பித்வா கு³ம்ப³ம் ட²பேத்வா பக்கமிம்ஸு. அத² கோ², பி⁴க்க²வே, தீ³கா⁴வு குமாரோ பா³ராணஸிம் பவிஸித்வா ஸுரம் நீஹரித்வா கு³ம்பி³யே பாயேஸி. யதா³ தே மத்தா அஹேஸும் பதிதா, அத² கட்டா²னி ஸம்கட்³டி⁴த்வா சிதகம் கரித்வா மாதாபிதூனம் ஸரீரம் சிதகம் ஆரோபேத்வா அக்³கி³ம் த³த்வா பஞ்ஜலிகோ திக்க²த்தும் சிதகம் பத³க்கி²ணம் அகாஸி.

461. தேன கோ² பன ஸமயேன ப்³ரஹ்மத³த்தோ காஸிராஜா உபரிபாஸாத³வரக³தோ ஹோதி. அத்³த³ஸா கோ², பி⁴க்க²வே, ப்³ரஹ்மத³த்தோ காஸிராஜா தீ³கா⁴வும் குமாரம் பஞ்ஜலிகம் திக்க²த்தும் சிதகம் பத³க்கி²ணம் கரோந்தம், தி³ஸ்வானஸ்ஸ ஏதத³ஹோஸி – ‘‘நிஸ்ஸம்ஸயம் கோ² ஸோ மனுஸ்ஸோ தீ³கீ⁴திஸ்ஸ கோஸலரஞ்ஞோ ஞாதி வா ஸாலோஹிதோ வா, அஹோ மே அனத்த²தோ, ந ஹி நாம மே கோசி ஆரோசேஸ்ஸதீ’’தி. அத² கோ², பி⁴க்க²வே, தீ³கா⁴வு குமாரோ அரஞ்ஞம் க³ந்த்வா யாவத³த்த²ம் கந்தி³த்வா ரோதி³த்வா க²ப்பம் [ப³ப்பம் (ஸீ. ஸ்யா.)] புஞ்சி²த்வா பா³ராணஸிம் பவிஸித்வா அந்தேபுரஸ்ஸ ஸாமந்தா ஹத்தி²ஸாலம் க³ந்த்வா ஹத்தா²சரியம் ஏதத³வோச – ‘‘இச்சா²மஹம், ஆசரிய, ஸிப்பம் ஸிக்கி²து’’ந்தி. ‘‘தேன ஹி, ப⁴ணே மாணவக, ஸிக்க²ஸ்ஸூ’’தி. அத² கோ², பி⁴க்க²வே, தீ³கா⁴வு குமாரோ ரத்தியா பச்சூஸஸமயம் பச்சுட்டா²ய ஹத்தி²ஸாலாயம் மஞ்ஜுனா ஸரேன கா³யி, வீணஞ்ச வாதே³ஸி. அஸ்ஸோஸி கோ², பி⁴க்க²வே, ப்³ரஹ்மத³த்தோ காஸிராஜா ரத்தியா பச்சூஸஸமயம் பச்சுட்டா²ய ஹத்தி²ஸாலாயம் மஞ்ஜுனா ஸரேன கீ³தம் வீணஞ்ச வாதி³தம், ஸுத்வான மனுஸ்ஸே புச்சி² – ‘‘கோ, ப⁴ணே, ரத்தியா பச்சூஸஸமயம் பச்சுட்டா²ய ஹத்தி²ஸாலாயம் மஞ்ஜுனா ஸரேன கா³யி, வீணஞ்ச வாதே³ஸீ’’தி? ‘‘அமுகஸ்ஸ, தே³வ, ஹத்தா²சரியஸ்ஸ அந்தேவாஸீ மாணவகோ ரத்தியா பச்சூஸஸமயம் பச்சுட்டா²ய ஹத்தி²ஸாலாயம் மஞ்ஜுனா ஸரேன கா³யி, வீணஞ்ச வாதே³ஸீ’’தி. ‘‘தேன ஹி, ப⁴ணே, தம் மாணவகம் ஆனேதா²’’தி. ‘‘ஏவம், தே³வா’’தி கோ², பி⁴க்க²வே, தே மனுஸ்ஸா ப்³ரஹ்மத³த்தஸ்ஸ காஸிரஞ்ஞோ படிஸ்ஸுத்வா தீ³கா⁴வும் குமாரம் ஆனேஸும். ‘‘த்வம் ப⁴ணே மாணவக, ரத்தியா பச்சூஸஸமயம் பச்சுட்டா²ய ஹத்தி²ஸாலாயம் மஞ்ஜுனா ஸரேன கா³யி, வீணஞ்ச வாதே³ஸீ’’தி? ‘‘ஏவம், தே³வா’’தி. ‘‘தேன ஹி த்வம், ப⁴ணே மாணவக, கா³யஸ்ஸு, வீணஞ்ச வாதே³ஹீ’’தி. ‘‘ஏவம், தே³வா’’தி கோ², பி⁴க்க²வே, தீ³கா⁴வு குமாரோ ப்³ரஹ்மத³த்தஸ்ஸ காஸிரஞ்ஞோ படிஸ்ஸுத்வா ஆராதா⁴பேக்கோ² மஞ்ஜுனா ஸரேன கா³யி, வீணஞ்ச வாதே³ஸி. ‘‘த்வம், ப⁴ணே மாணவக, மம் உபட்ட²ஹா’’தி. ‘‘ஏவம், தே³வா’’தி கோ², பி⁴க்க²வே, தீ³கா⁴வு குமாரோ ப்³ரஹ்மத³த்தஸ்ஸ காஸிரஞ்ஞோ பச்சஸ்ஸோஸி. அத² கோ², பி⁴க்க²வே, தீ³கா⁴வு குமாரோ ப்³ரஹ்மத³த்தஸ்ஸ காஸிரஞ்ஞோ புப்³பு³ட்டா²யீ அஹோஸி பச்சா²னிபாதீ கிங்காரபடிஸ்ஸாவீ மனாபசாரீ பியவாதீ³. அத² கோ², பி⁴க்க²வே, ப்³ரஹ்மத³த்தோ காஸிராஜா தீ³கா⁴வும் குமாரம் நசிரஸ்ஸேவ அப்³ப⁴ந்தரிமே விஸ்ஸாஸிகட்டா²னே ட²பேஸி.

462. அத² கோ², பி⁴க்க²வே, ப்³ரஹ்மத³த்தோ காஸிராஜா தீ³கா⁴வும் குமாரம் ஏதத³வோச – ‘‘தேன ஹி, ப⁴ணே மாணவக, ரத²ம் யோஜேஹி, மிக³வம் க³மிஸ்ஸாமா’’தி. ‘‘ஏவம், தே³வா’’தி கோ², பி⁴க்க²வே, தீ³கா⁴வு குமாரோ ப்³ரஹ்மத³த்தஸ்ஸ காஸிரஞ்ஞோ படிஸ்ஸுத்வா ரத²ம் யோஜேத்வா ப்³ரஹ்மத³த்தம் காஸிராஜானம் ஏதத³வோச – ‘‘யுத்தோ கோ² தே, தே³வ, ரதோ², யஸ்ஸ தா³னி காலம் மஞ்ஞஸீ’’தி. அத² கோ², பி⁴க்க²வே, ப்³ரஹ்மத³த்தோ காஸிராஜா ரத²ம் அபி⁴ருஹி. தீ³கா⁴வு குமாரோ ரத²ம் பேஸேஸி. ததா² ததா² ரத²ம் பேஸேஸி யதா² யதா² அஞ்ஞேனேவ ஸேனா அக³மாஸி அஞ்ஞேனேவ ரதோ². அத² கோ², பி⁴க்க²வே, ப்³ரஹ்மத³த்தோ காஸிராஜா தூ³ரம் க³ந்த்வா தீ³கா⁴வும் குமாரம் ஏதத³வோச – ‘‘தேன ஹி, ப⁴ணே மாணவக, ரத²ம் முஞ்சஸ்ஸு, கிலந்தோம்ஹி, நிபஜ்ஜிஸ்ஸாமீ’’தி. ‘‘ஏவம், தே³வா’’தி கோ², பி⁴க்க²வே, தீ³கா⁴வு குமாரோ ப்³ரஹ்மத³த்தஸ்ஸ காஸிரஞ்ஞோ படிஸ்ஸுத்வா ரத²ம் முஞ்சித்வா பத²வியம் பல்லங்கேன நிஸீதி³. அத² கோ², பி⁴க்க²வே, ப்³ரஹ்மத³த்தோ காஸிராஜா தீ³கா⁴வுஸ்ஸ குமாரஸ்ஸ உச்ச²ங்கே³ ஸீஸம் கத்வா ஸேய்யம் கப்பேஸி. தஸ்ஸ கிலந்தஸ்ஸ முஹுத்தகேனேவ நித்³தா³ ஓக்கமி. அத² கோ², பி⁴க்க²வே, தீ³கா⁴வுஸ்ஸ குமாரஸ்ஸ ஏதத³ஹோஸி – ‘‘அயம் கோ² ப்³ரஹ்மத³த்தோ காஸிராஜா ப³ஹுனோ அம்ஹாகம் அனத்த²ஸ்ஸ காரகோ. இமினா அம்ஹாகம் ப³லஞ்ச வாஹனஞ்ச ஜனபதோ³ ச கோஸோ ச கோட்டா²கா³ரஞ்ச அச்சி²ன்னம். இமினா ச மே மாதாபிதரோ ஹதா. அயம் க்²வஸ்ஸ காலோ யோஹம் வேரம் அப்பேய்ய’’ந்தி கோஸியா க²க்³க³ம் நிப்³பா³ஹி. அத² கோ², பி⁴க்க²வே, தீ³கா⁴வுஸ்ஸ குமாரஸ்ஸ ஏதத³ஹோஸி – ‘‘பிதா கோ² மம் மரணகாலே அவச ‘மா கோ² த்வம், தாத தீ³கா⁴வு, தீ³க⁴ம் பஸ்ஸ, மா ரஸ்ஸம். ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’தி. ந கோ² மேதம் பதிரூபம், ய்வாஹம் பிதுவசனம் அதிக்கமேய்ய’’ந்தி கோஸியா க²க்³க³ம் பவேஸேஸி. து³தியம்பி கோ², பி⁴க்க²வே, தீ³கா⁴வுஸ்ஸ குமாரஸ்ஸ ஏதத³ஹோஸி – ‘‘அயம் கோ² ப்³ரஹ்மத³த்தோ காஸிராஜா ப³ஹுனோ அம்ஹாகம் அனத்த²ஸ்ஸ காரகோ, இமினோ அம்ஹாகம் ப³லஞ்ச வாஹனஞ்ச ஜனபதோ³ ச கோஸோ ச கோட்டா²கா³ரஞ்ச அச்சி²ன்னம், இமினா ச மே மாதாபிதரோ ஹதா, அயம் க்²வஸ்ஸ காலோ யோஹம் வேரம் அப்பேய்ய’’ந்தி கோஸியா க²க்³க³ம் நிப்³பா³ஹி. து³தியம்பி கோ², பி⁴க்க²வே, தீ³கா⁴வுஸ்ஸ குமாரஸ்ஸ ஏதத³ஹோஸி – ‘‘பிதா கோ² மம் மரணகாலே அவச ‘மா கோ² த்வம் தாத தீ³கா⁴வு, தீ³க⁴ம் பஸ்ஸ, மா ரஸ்ஸம், ந ஹி தாத தீ³கா⁴வு வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’தி. ந கோ² மேதம் பதிரூபம், ய்வாஹம் பிதுவசனம் அதிக்கமேய்ய’’ந்தி. புனதே³வ கோஸியா க²க்³க³ம் பவேஸேஸி. ததியம்பி கோ², பி⁴க்க²வே, தீ³கா⁴வுஸ்ஸ குமாரஸ்ஸ ஏதத³ஹோஸி – ‘‘அயம் கோ² ப்³ரஹ்மத³த்தோ காஸிராஜா ப³ஹுனோ அம்ஹாகம் அனத்த²ஸ்ஸ காரகோ. இமினா அம்ஹாகம் ப³லஞ்ச வாஹனஞ்ச ஜனபதோ³ ச கோஸோ ச கோட்டா²கா³ரஞ்ச அச்சி²ன்னம். இமினா ச மே மாதாபிதரோ ஹதா. அயம் க்²வஸ்ஸ காலோ யோஹம் வேரம் அப்பேய்ய’’ந்தி கோஸியா க²க்³க³ம் நிப்³பா³ஹி. ததியம்பி கோ², பி⁴க்க²வே, தீ³கா⁴வுஸ்ஸ குமாரஸ்ஸ ஏதத³ஹோஸி – ‘‘பிதா கோ² மம் மரணகாலே அவச ‘மா கோ² த்வம், தாத தீ³கா⁴வு, தீ³க⁴ம் பஸ்ஸ, மா ரஸ்ஸம். ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’தி. ந கோ² மேதம் பதிரூபம், ய்வாஹம் பிதுவசனம் அதிக்கமேய்ய’’’ந்தி புனதே³வ கோஸியா க²க்³க³ம் பவேஸேஸி. அத² கோ², பி⁴க்க²வே, ப்³ரஹ்மத³த்தோ காஸிராஜா பீ⁴தோ உப்³பி³க்³கோ³ உஸ்ஸங்கீ உத்ரஸ்தோ ஸஹஸா வுட்டா²ஸி. அத² கோ², பி⁴க்க²வே, தீ³கா⁴வு குமாரோ ப்³ரஹ்மத³த்தம் காஸிராஜானம் ஏதத³வோச – ‘‘கிஸ்ஸ த்வம், தே³வ, பீ⁴தோ உப்³பி³க்³கோ³ உஸ்ஸங்கீ உத்ரஸ்தோ ஸஹஸா வுட்டா²ஸீ’’தி? இத⁴ மம், ப⁴ணே மாணவக, தீ³கீ⁴திஸ்ஸ கோஸலரஞ்ஞோ புத்தோ தீ³கா⁴வு குமாரோ ஸுபினந்தேன க²க்³கே³ன பரிபாதேஸி. தேனாஹம் பீ⁴தோ உப்³பி³க்³கோ³ உஸ்ஸங்கீ உத்ரஸ்தோ ஸஹஸா வுட்டா²ஸிந்தி. அத² கோ², பி⁴க்க²வே, தீ³கா⁴வு குமாரோ வாமேன ஹத்தே²ன ப்³ரஹ்மத³த்தஸ்ஸ காஸிரஞ்ஞோ ஸீஸம் பராமஸித்வா த³க்கி²ணேன ஹத்தே²ன க²க்³க³ம் நிப்³பா³ஹேத்வா ப்³ரஹ்மத³த்தம் காஸிராஜானம் ஏதத³வோச – ‘‘அஹம் கோ² ஸோ, தே³வ, தீ³கீ⁴திஸ்ஸ கோஸலரஞ்ஞோ புத்தோ தீ³கா⁴வு குமாரோ. ப³ஹுனோ த்வம் அம்ஹாகம் அனத்த²ஸ்ஸ காரகோ. தயா அம்ஹாகம் ப³லஞ்ச வாஹனஞ்ச ஜனபதோ³ ச கோஸோ ச கோட்டா²கா³ரஞ்ச அச்சி²ன்னம். தயா ச மே மாதாபிதரோ ஹதா. அயம் க்²வஸ்ஸ காலோ ய்வாஹம் வேரம் அப்பேய்ய’’ந்தி. அத² கோ², பி⁴க்க²வே, ப்³ரஹ்மத³த்தோ காஸிராஜா தீ³கா⁴வுஸ்ஸ குமாரஸ்ஸ பாதே³ஸு ஸிரஸா நிபதித்வா தீ³கா⁴வும் குமாரம் ஏதத³வோச – ‘‘ஜீவிதம் மே, தாத தீ³கா⁴வு, தே³ஹி. ஜீவிதம் மே, தாத தீ³கா⁴வு, தே³ஹீ’’தி. ‘‘க்யாஹம் உஸ்ஸஹாமி தே³வஸ்ஸ ஜீவிதம் தா³தும்? தே³வோ கோ² மே ஜீவிதம் த³தே³ய்யா’’தி. ‘‘தேன ஹி, தாத தீ³கா⁴வு, த்வஞ்சேவ மே ஜீவிதம் தே³ஹி, அஹஞ்ச தே ஜீவிதம் த³ம்மீ’’தி. அத² கோ², பி⁴க்க²வே, ப்³ரஹ்மத³த்தோ ச காஸிராஜா தீ³கா⁴வு ச குமாரோ அஞ்ஞமஞ்ஞஸ்ஸ ஜீவிதம் அத³ம்ஸு, பாணிஞ்ச அக்³க³ஹேஸும், ஸபத²ஞ்ச அகம்ஸு அத்³தூ³பா⁴ய [அத்³ரூபா⁴ய, அது³ப்³பா⁴ய (க.)].

அத² கோ², பி⁴க்க²வே, ப்³ரஹ்மத³த்தோ காஸிராஜா தீ³கா⁴வும் குமாரம் ஏதத³வோச – ‘‘தேன ஹி, தாத தீ³கா⁴வு, ரத²ம் யோஜேஹி, க³மிஸ்ஸாமா’’தி. ‘‘ஏவம், தே³வா’’தி கோ², பி⁴க்க²வே, தீ³கா⁴வு குமாரோ ப்³ரஹ்மத³த்தஸ்ஸ காஸிரஞ்ஞோ படிஸ்ஸுத்வா ரத²ம் யோஜேத்வா ப்³ரஹ்மத³த்தம் காஸிராஜானம் ஏதத³வோச – ‘‘யுத்தோ கோ² தே, தே³வ, ரதோ², யஸ்ஸ தா³னி காலம் மஞ்ஞஸீ’’தி. அத² கோ², பி⁴க்க²வே, ப்³ரஹ்மத³த்தோ காஸிராஜா ரத²ம் அபி⁴ருஹி. தீ³கா⁴வு குமாரோ ரத²ம் பேஸேஸி. ததா² ததா² ரத²ம் பேஸேஸி யதா² யதா² நசிரஸ்ஸேவ ஸேனாய ஸமாக³ஞ்சி². அத² கோ², பி⁴க்க²வே, ப்³ரஹ்மத³த்தோ காஸிராஜா பா³ராணஸிம் பவிஸித்வா அமச்சே பாரிஸஜ்ஜே ஸன்னிபாதாபேத்வா ஏதத³வோச – ‘‘ஸசே, ப⁴ணே, தீ³கீ⁴திஸ்ஸ கோஸலரஞ்ஞோ புத்தம் தீ³கா⁴வும் குமாரம் பஸ்ஸேய்யாத², கிந்தி நம் கரேய்யாதா²’’தி? ஏகச்சே ஏவமாஹம்ஸு – ‘‘மயம், தே³வ, ஹத்தே² சி²ந்தே³ய்யாம. மயம், தே³வ, பாதே³ சி²ந்தே³ய்யாம. மயம், தே³வ, ஹத்த²பாதே³ சி²ந்தே³ய்யாம. மயம், தே³வ, கண்ணே சி²ந்தே³ய்யாம. மயம், தே³வ, நாஸம் சி²ந்தே³ய்யாம. மயம், தே³வ, கண்ணனாஸம் சி²ந்தே³ய்யாம. மயம், தே³வ, ஸீஸம் சி²ந்தே³ய்யாமா’’தி. ‘‘அயம் கோ², ப⁴ணே, தீ³கீ⁴திஸ்ஸ கோஸலரஞ்ஞோ புத்தோ தீ³கா⁴வு குமாரோ. நாயம் லப்³பா⁴ கிஞ்சி காதும். இமினா ச மே ஜீவிதம் தி³ன்னம், மயா ச இமஸ்ஸ ஜீவிதம் தி³ன்ன’’ந்தி.

463. அத² கோ², பி⁴க்க²வே, ப்³ரஹ்மத³த்தோ காஸிராஜா தீ³கா⁴வும் குமாரம் ஏதத³வோச – ‘‘யம் கோ² தே, தாத தீ³கா⁴வு, பிதா மரணகாலே அவச ‘மா கோ² த்வம், தாத தீ³கா⁴வு, தீ³க⁴ம் பஸ்ஸ, மா ரஸ்ஸம். ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’தி, கிம் தே பிதா ஸந்தா⁴ய அவசா’’தி? ‘‘யம் கோ² மே, தே³வ, பிதா மரணகாலே அவச ‘மா தீ³க⁴’ந்தி மா சிரம் வேரம் அகாஸீதி. இமம் கோ² மே, தே³வ, பிதா மரணகாலே அவச மா தீ³க⁴ந்தி. யம் கோ² மே, தே³வ, பிதா மரணகாலே அவச ‘மா ரஸ்ஸ’ந்தி மா கி²ப்பம் மித்தேஹி பி⁴ஜ்ஜித்தா²’’தி. இமம் கோ² மே, தே³வ, பிதா மரணகாலே அவச மா ரஸ்ஸந்தி. யம் கோ² மே, தே³வ, பிதா மரணகாலே அவச ‘‘ந ஹி, தாத தீ³கா⁴வு, வேரேன வேரா ஸம்மந்தி, அவேரேன ஹி, தாத தீ³கா⁴வு, வேரா ஸம்மந்தீ’’தி தே³வேன மே மாதாபிதரோ ஹதாதி. ஸசாஹம் தே³வம் ஜீவிதா வோரோபேய்யம், யே தே³வஸ்ஸ அத்த²காமா தே மம் ஜீவிதா வோரோபேய்யும், யே மே அத்த²காமா தே தே ஜீவிதா வோரோபேய்யும் – ஏவம் தம் வேரம் வேரேன ந வூபஸமேய்ய. இதா³னி ச பன மே தே³வேன ஜீவிதம் தி³ன்னம், மயா ச தே³வஸ்ஸ ஜீவிதம் தி³ன்னம். ஏவம் தம் வேரம் அவேரேன வூபஸந்தம். இமம் கோ² மே, தே³வ, பிதா மரணகாலே அவச – ந ஹி, தாத தீ³கா⁴வு, வேரேன வேரா ஸம்மந்தி; அவேரேன ஹி, தாத தீ³கா⁴வு, வேரா ஸம்மந்தீ’’தி. அத² கோ², பி⁴க்க²வே, ப்³ரஹ்மத³த்தோ காஸிராஜா – ‘‘அச்ச²ரியம் வத போ⁴! அப்³பு⁴தம் வத போ⁴! யாவ பண்டி³தோ அயம் தீ³கா⁴வு குமாரோ, யத்ர ஹி நாம பிதுனோ ஸம்கி²த்தேன பா⁴ஸிதஸ்ஸ வித்தா²ரேன அத்த²ம் ஆஜானிஸ்ஸதீ’’தி பேத்திகம் ப³லஞ்ச வாஹனஞ்ச ஜனபத³ஞ்ச கோஸஞ்ச கோட்டா²கா³ரஞ்ச படிபாதே³ஸி, தீ⁴தரஞ்ச அதா³ஸி. தேஸஞ்ஹி நாம, பி⁴க்க²வே, ராஜூனம் ஆதி³ன்னத³ண்டா³னம் ஆதி³ன்னஸத்தா²னம் ஏவரூபம் க²ந்திஸோரச்சம் ப⁴விஸ்ஸதி. இத⁴ கோ² பன தம், பி⁴க்க²வே, ஸோபே⁴த² யம் தும்ஹே ஏவம் ஸ்வாக்கா²தே த⁴ம்மவினயே பப்³ப³ஜிதா ஸமானா க²மா ச ப⁴வேய்யாத² ஸோரதா சாதி? ததியம்பி கோ² ப⁴க³வா தே பி⁴க்கூ² ஏதத³வோச – ‘‘அலம், பி⁴க்க²வே, மா ப⁴ண்ட³னம் மா கலஹம் மா விக்³க³ஹம் மா விவாத³’’ந்தி. ததியம்பி கோ² ஸோ அத⁴ம்மவாதீ³ பி⁴க்கு² ப⁴க³வந்தம் ஏதத³வோச – ‘‘ஆக³மேது, ப⁴ந்தே, ப⁴க³வா த⁴ம்மஸ்ஸாமீ; அப்போஸ்ஸுக்கோ, ப⁴ந்தே, ப⁴க³வா தி³ட்ட²த⁴ம்மஸுக²விஹாரமனுயுத்தோ விஹரது. மயமேதேன ப⁴ண்ட³னேன கலஹேன விக்³க³ஹேன விவாதே³ன பஞ்ஞாயிஸ்ஸாமா’’தி. அத² கோ² ப⁴க³வா – பரியாதி³ன்னரூபா கோ² இமே மோக⁴புரிஸா, நயிமே ஸுகரா ஸஞ்ஞாபேதுந்தி – உட்டா²யாஸனா பக்காமி.

தீ³கா⁴வுபா⁴ணவாரோ நிட்டி²தோ பட²மோ.

464. [ம. நி. 3.236] அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய கோஸம்பி³ம் பிண்டா³ய பாவிஸி. கோஸம்பி³யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ ஸேனாஸனம் ஸம்ஸாமேத்வா பத்தசீவரமாதா³ய ஸங்க⁴மஜ்ஜே² டி²தகோவ இமா கா³தா²யோ அபா⁴ஸி –

[ம. நி. 3.237] ‘‘புது²ஸத்³தோ³ ஸமஜனோ, ந பா³லோ கோசி மஞ்ஞத²;

ஸங்க⁴ஸ்மிம் பி⁴ஜ்ஜமானஸ்மிம், நாஞ்ஞம் பி⁴ய்யோ அமஞ்ஞரும்.

[ம. நி. 3.237] ‘‘பரிமுட்டா² பண்டி³தாபா⁴ஸா, வாசாகோ³சரபா⁴ணினோ;

யாவிச்ச²ந்தி முகா²யாமம், யேன நீதா ந தம் விதூ³.

[ம. நி. 3.237] ‘‘அக்கோச்சி² மம் அவதி⁴ மம், அஜினி மம் அஹாஸி மே;

யே ச தம் உபனய்ஹந்தி, வேரம் தேஸம் ந ஸம்மதி.

[ம. நி. 3.237] ‘‘அக்கோச்சி² மம் அவதி⁴ மம், அஜினி மம் அஹாஸி மே;

யே ச தம் நுபனய்ஹந்தி, வேரம் தேஸூபஸம்மதி.

[ம. நி. 3.237] ‘‘ந ஹி வேரேன வேரானி, ஸம்மந்தீத⁴ குதா³சனம்;

அவேரேன ச ஸம்மந்தி, ஏஸத⁴ம்மோ ஸனந்தனோ.

[ம. நி. 3.237] ‘‘பரே ச ந விஜானந்தி, மயமேத்த² யமாமஸே;

யே ச தத்த² விஜானந்தி, ததோ ஸம்மந்தி மேத⁴கா³.

[ம. நி. 3.237] ‘‘அட்டி²ச்சி²ன்னா பாணஹரா, க³வாஸ்ஸத⁴னஹாரினோ;

ரட்ட²ம் விலும்பமானானம், தேஸம்பி ஹோதி ஸங்க³தி.

‘‘கஸ்மா தும்ஹாக நோ ஸியா;

[ம. நி. 3.237] ‘‘ஸசே லபே⁴த² நிபகம் ஸஹாயம்;

ஸத்³தி⁴ம்சரம் ஸாது⁴விஹாரி தீ⁴ரம்;

அபி⁴பு⁴ய்ய ஸப்³பா³னி பரிஸ்ஸயானி;

சரேய்ய தேனத்தமனோ ஸதீமா.

[ம. நி. 3.237] ‘‘நோ சே லபே⁴த² நிபகம் ஸஹாயம்;

ஸத்³தி⁴ம் சரம் ஸாது⁴விஹாரி தீ⁴ரம்;

ராஜாவ ரட்ட²ம் விஜிதம் பஹாய;

ஏகோ சரே மாதங்க³ரஞ்ஞேவ நாகோ³.

[ம. நி. 3.237] ‘‘ஏகஸ்ஸ சரிதம் ஸேய்யோ;

நத்தி² பா³லே ஸஹாயதா;

ஏகோ சரே ந ச பாபானி கயிரா;

அப்போஸ்ஸுக்கோ மாதங்க³ரஞ்ஞேவ நாகோ³’’தி.

தீ³கா⁴வுவத்து² நிட்டி²தம்.